1, 2. Wɔ Hibulu Ngɛlɛlera ne anu, nzɔne a edwɛkɛ ɔ ‘gyakɛ abo ebia’ kile a?

GYIHOVA NYAMENLE hanle kɛ: “Anwuma le me belemgbunli ebia, yɛɛ azɛlɛ ye le me gyakɛ abo ebia.” (Ayezaya 66:1) Eza Nyamenle hanle ɔ “gyakɛ abo ebia” ne anwo edwɛkɛ kɛ: “Mebamaa ɛleka mɔɔ metɛnla la ayɛ kɛnlɛma.” (Ayezaya 60:13) Kɛzi ɔmaa ɛleka mɔɔ ɔtɛnla la yɛ kɛnlɛma ɛ? Duzu a ɛhye kile maa menli mɔɔ de azɛlɛ ye azo la ɛ?

² Wɔ Hibulu Ngɛlɛlera ne anu, edwɛkɛ ɔ ‘gyakɛ abo ebia’ eza kile tete Yizilayɛ ɛzonlenlɛ sua ne. (1 Edwɛkɛsisilɛ 28:2; Edwɛndolɛ 132:7) Ɛnee Gyihova anye die ɛzonlenlɛ sua ne anwo ɔluakɛ ɛkɛ ne a ɛnee bɛsonle nɔhalɛ nu a. Ɛnee bɛye Gyihova ayɛlɛ wɔ ɛkɛ.

3. Nienwu a bɛsonle Gyihova nɔhalɛ nu ɛnɛ a, na mekɛ boni a ɔbɔle ɔ bo a?

³ Ɛnɛ, nienwu a bɛsonle nɔhalɛ nu wɔ azɛlɛ ye azo a?  Ɔnle sua kɛ ɛzonlenlɛ sua ne la. Ɔle sunsum nu ɛzonlenlɛ sua, na ɔwula Gyihova anyunlunyia ɔtɛla sua biala. Duzu a le sunsum nu ɛzonlenlɛ sua ne? Ɔle ngyehyɛleɛ mɔɔ Nyamenle ɛyɛ mɔɔ maa alesama kola fa ye agɔnwolɛ na bɛsonle ye a. Gyisɛse ɛkpɔnedeɛ ne ala a ɛmaa ngyehyɛleɛ ɛhye ɛyɛ boɛ a. Ngyehyɛleɛ ɛhye bɔle ɔ bo wɔ ɛvolɛ 29 wɔ mekɛ mɔɔ bɛzɔnenle Gyisɛse na bɛkpokpale ye kɛ Gyihova sunsum nu ɛzonlenlɛ sua ne anu Ɛsɔfo Kpanyinli la.—Hibuluma 9:11, 12.

4, 5. (a) Kɛmɔ Edwɛndolɛ 99 kile la, nzɔne a Gyihova nɔhalɛ azonvolɛ kulo kɛ bɛyɛ a? (b) Kpuya boni a ɔwɔ kɛ yɛbiza yɛ nwo a?

⁴ Yɛ nye sɔ ngyehyɛleɛ mɔɔ Nyamenle ɛyɛ amaa yɛazonle ye nɔhalɛ nu la kpole. Saa yɛka Gyihova duma nee ye ɛkpɔnedeɛ ahyɛlɛdeɛ ne anwo edwɛkɛ yɛkile awie mɔ a, ɛnee yɛlɛda yɛ anyezɔlɛ ne ali. Ɔyɛ yɛ fɛ kɛ Kilisienema mɔɔ bɛbo mgbe mɔtwɛ la ɛlɛye Gyihova ayɛlɛ alehyenlɛ biala a! Ɛzonlenlɛ dɔɔnwo anu amra dwenle kɛ saa bɛwu na bɛkɔ anwuma a, yɛɛ bɛbawula Nyamenle anyunlunyia a, noko Gyihova menli ze kɛ ɔwɔ kɛ bɛye ye ayɛlɛ wɔ azɛlɛ ye azo ɛnɛ.

⁵ Saa yɛye Gyihova ayɛlɛ a, ɛnee yɛlɛsukoa Nyamenle nɔhalɛ azonvolɛ mɔɔ Edwɛndolɛ 99:1-3, 5-7 ka bɛ nwo edwɛkɛ la. (Kenga.) Nɔhavoma le kɛ Mosisi, Aalɔn yɛɛ Samoɛle boale ngyehyɛleɛ mɔɔ Nyamenle yɛle amaa bɛazonle ye nɔhalɛ nu wɔ tete ne la. Ɛnɛ, kolaa na menli mɔɔ bɛkpokpa bɛ la nee Gyisɛse azonle kɛ ɛsɔfoma la, ɔwɔ kɛ bɛsonle Gyihova nɔhalɛ nu wɔ sunsum nu ɛzonlenlɛ sua ne anu wɔ azɛlɛ ye azo. ‘Mboane gyɛne’ ne anu amra mgbe dɔɔnwo noko boa bɛ. (Dwɔn 10:16) Ekpunli nwiɔ ne bɔ nu sonle Gyihova. Noko ɔwɔ kɛ yɛbiza yɛ nwo ngoko kɛ: ‘Asoo melɛbɔ mɔdenle meaboa ngyehyɛleɛ mɔɔ Gyihova ɛyɛ amaa yɛazonle ye nɔhalɛ nu la kpalɛ ɔ?’

6, 7. Ngyegyelɛ boni a bɔle ɔ bo wɔ alimoa Kilisiene asafo ne anu a, na nzɔne a zile wɔ 1919 ne anu a?

⁶ Kɛmɔ bɛhanle la, bɛdele Kilisiene asafo ne la yeandwu ɛvolɛ 100 yɛɛ kpɔkyevolɛma yele bɛ ti a. (Gyima ne 20:28-30; 2 Tɛsalonaekama 2:3, 4) Mekɛ zɔhane anzi, ɔrayɛle se kɛ bɛbanwu Nyamenle nɔhalɛ azonvolɛ. Ɛvolɛ ɛya dɔɔnwo pɛle nu kolaa na Gyihova amaa Gyisɛse ahile menli mɔɔ amgba bɛlɛsonle Nyamenle wɔ Ye sunsum nu ɛzonlenlɛ sua ne anu la.

⁷ Wɔ 1919 ne, bɛranwunle menli mɔɔ Nyamenle die bɛ to nu na bɛlɛsonle wɔ ye sunsum nu ɛzonlenlɛ sua ne anu la wienyi. Amaa Gyihova anye azɔ bɛ ɛzonlenlɛ ne kpalɛ la, bɛyɛle nzenzaleɛ.  (Ayezaya 4:2, 3; Malakae 3:1-4) Yemɔti yekile mɔɔ ɛzoanvolɛ Pɔɔlo nyianle ye ɛvolɛ ɛya dɔɔnwo mɔɔ ɛpɛ nu la bɔle ɔ bo kɛ ɔba nu.

8, 9. Nzɔne a “paladaese” ne mɔɔ Pɔɔlo nwunle ye la kile a?

⁸ Bɛha Pɔɔlo yekile ne anwo edwɛkɛ wɔ 2 Kɔlentema 12:1-4. (Kenga.) Wɔ yekile zɔhane anu, Gyihova maanle Pɔɔlo nwunle debie mɔɔ bazi kenle bie la. “Paladaese” ne mɔɔ Pɔɔlo nwunle ye la kile nzɔne? Mɔɔ limoa, ɔkola ɔfane Paladaese ne mɔɔ ɔnrɛhyɛ ɔbara azɛlɛ ye azo la anwo. (Luku 23:43) Mɔɔ tɔ zo nwiɔ, ɔkola ɔfane sunsum nu paladaese ne mɔɔ ɔbadoa zo wɔ ewiade fofolɛ ne anu la anwo. Mɔɔ tɔ zo nsa, ɔkola ɔfane “Nyamenle tola” anzɛɛ Nyamenle paladaese ne mɔɔ yemɔ a le anwuma tɛnlabelɛ kɛnlɛma ne la anwo.—Yekile 2:7.

⁹ Nzɔne ati a Pɔɔlo hanle kɛ ɔdele “edwɛkɛ mɔɔ bɛka a ɔnga, yɛɛ dasanli biala ɛnlɛ nwolɛ adenle kɛ ɔkɛha” la ɛ? Ɔluakɛ ɛnee mekɛ ɛtɛdwule mɔɔ ɔwɔ kɛ ɔkilehile yekile ne anu ninyɛne ne mɔ anu a. Noko ɛnɛ, Gyihova ɛlɛmaa yɛaha nyilalɛ mɔɔ ye menli ɛlɛnyia ye kɛkala la anwo edwɛkɛ yɛahile awie mɔ!

10. Nzɔne ati a sunsum nu paladaese ne nee sunsum nu ɛzonlenlɛ sua ne ɛnle ko ɛ?

¹⁰ Yɛta yɛka sunsum nu paladaese nwo edwɛkɛ, noko yemɔ a le nzɔne? Yemɔ a le anzodwolɛ tɛnlabelɛ ne mɔɔ Nyamenle menli wɔ nu la. Yemɔti sunsum nu paladaese ne nee sunsum nu ɛzonlenlɛ sua ne ɛnle ko. Sunsum nu ɛzonlenlɛ sua ne a le ngyehyɛleɛ mɔɔ Nyamenle ɛyɛ amaa bɛazonle ye nɔhalɛ nu la. Sunsum nu paladaese ne maa bɛnwu menli mɔɔ Nyamenle die bɛ to nu na bɛsonle ye wɔ ye sunsum nu ɛzonlenlɛ sua ne anu la.—Malakae 3:18.

11. Nwolɛ adenle boni a yɛnyia ye ɛnɛ a?

¹¹ Ɔyɛ anyelielɛ kɛ ɔvi 1919 mɔɔ ba la, Gyihova ɛlɛmaa menli mɔɔ ɛnli munli la aboa sunsum nu paladaese ne amaa yeanyia anyuhɔlɛ. Ɛlɛboa wɔamaa bɛayɛ gyima kɛnlɛma ɛhye ɔ? Asoo ɛ nye sɔ nwolɛ adenle mɔɔ wɔnyia kɛ ɛ nee Gyihova babɔ nu ayɛ gyima amaa bɛaye ye ayɛlɛ wɔ azɛlɛ ye azo la ɔ?

12. Kɛzi yɛkola yɛnwu ye kɛ Ayezaya 60:17 ɛra nu ɛ? (Nea mɔlebɛbo nvoninli ne.)

¹² Ngapezonli Ayezaya hanle kɛ nzenzaleɛ mɔɔ yɛ anyelielɛ la bɛhɔ zo wɔ Gyihova ahyehyɛdeɛ ne foa mɔɔ wɔ azɛlɛ ye azo la anu. (Kenga Ayezaya 60:17.) Kilisienema mɔɔ bɛle ngakula anzɛɛ fofolɛ la ɛgenga anzɛɛ ɛde ɛhye anwo edwɛkɛ ala. Noko mediema dɔɔnwo ɛnwu nzenzaleɛ ngɛnlɛma ɛhye mɔ! Nɔhavoma ɛhye mɔ die di kɛ Nyamenle ɛlɛdua yɛ Belemgbunli  Gyisɛse anwo zo ahile Ye ahyehyɛdeɛ ne adenle! Saa yɛte Kilisienema ɛhye mɔ anwubielɛ ne a, diedi nee anwodozo mɔɔ yɛlɛ ye wɔ Gyihova anu la anu bamia.

13. Nzɔne a Edwɛndolɛ 48:12-14 se yɛyɛ a?

¹³ Ɔwɔ kɛ nɔhalɛ Kilisienema kɔsɔɔti ka Gyihova ahyehyɛdeɛ ne anwo edwɛkɛ kile awie mɔ. Ɔyɛ nwanwane kɛ yɛde Seetan ewiade ɛtane ɛhye anu noko yɛlɛ mediemayɛlɛ mɔɔ anzodwolɛ nee koyɛlɛ wɔ bɛ avinli a! Ɔwɔ kɛ yɛfa anyelielɛ yɛka Gyihova ahyehyɛdeɛ ne nee sunsum nu paladaese ne anwo edwɛkɛ yɛkile “awolɛndoazo mɔɔ bara” la!—Kenga Edwɛndolɛ 48:12-14.

14, 15. Nzenzaleɛ boni a bɛyɛle ye wɔ 1970 anzi a, na kɛzi yeboa ahyehyɛdeɛ ne ɛ?

¹⁴ Yɛ asafo ne anu mgbanyima dɔɔnwo ɛnwu nzenzaleɛ mɔɔ ɛmaa Gyihova ahyehyɛdeɛ ne foa mɔɔ wɔ azɛlɛ ye azo ɛyɛ kɛnlɛma la. Bɛkakye kɛ ɛnee asafo sonvolɛ a nea asafo ne azo a na tɛ mgbanyima eku ɔ, ɛnee ɔfese sonvolɛ a nea Bɛtɛle azo a na tɛ Ɔfese Kɔmatii ɔ, yɛɛ ɛnee Watch Tower Society president ne a fa adehilelɛ maa a na tɛ Gyihova Alasevolɛ Neazo Eku ne ɔ. Ɔnva nwo kɛ ɛnee mediema ɛhye mɔ lɛ boavolɛma mɔɔ bɛdi nɔhalɛ la, ɛnee sonla ko ala a si kpɔkɛ wɔ asafo ne mɔ anu, ɔfese ne mɔ anu yɛɛ ewiade amuala gyima ne ati a. Wɔ 1970 ne  anzi, bɛyɛle nzenzaleɛ mɔɔ mgbanyima eku a si kpɔkɛ a na tɛ sonla ko ɔ.

¹⁵ Nzɔne ati a nzenzaleɛ ɛhye mɔ ɛboa ahyehyɛdeɛ ne ɛ? Ɔluakɛ bɛgyi Ngɛlɛlera ne mɔɔ bɛdele ɔ bo kpalɛ la azo. Kɛ anrɛɛ sonla ko a bazi kpɔkɛ biala la, ahyehyɛdeɛ ne nyia subane mgbalɛ mɔɔ mgbanyima ne mɔ amuala, anzɛɛ ‘menli nu ahyɛlɛdeɛ’ mɔɔ Gyihova ɛmaa yɛnyia lɛ la azo nvasoɛ.—Ɛfɛsɛsema 4:8; Mrɛlɛbulɛ 24:6.

16, 17. Nzenzaleɛ mɔɔ bɛyɛ ye kenlensa ye la boni a ɛ nye ɛlie nwo a, na nzɔne ati ɔ?

¹⁶ Dwenle nzenzaleɛ mɔɔ bɛyɛ ye kenlensa ye wɔ yɛ mbuluku ne mɔ anu la anwo nea. Yɛ nye die kɛ yɛbava mbuluku mɔɔ le ngɛnlɛma na ɔboa la yɛamaa wɔ daselɛlilɛ nu. Eza dwenle kɛzi yɛfa ɛlɛtɔlɔneke ninyɛne yɛbɔ edwɛkpa ne nolo la anwo. Kɛ neazo la, jw.org wɛbsaete ne maa menli dɔɔnwo nyia moalɛ mɔɔ bɛhyia la. Yɛnwu kɛzi Gyihova anye die menli nwo na ɔkulo bɛ la wɔ nzenzaleɛ ɛhye mɔ amuala anu.

¹⁷ Yɛ nye sɔ nzenzaleɛ mɔɔ bɛyɛ ye wɔ yɛ debiezukoalɛ mekɛ ne anu amaa yɛanyia mekɛ yɛayɛ abusua ɛzonlenlɛ anzɛɛ bɛ ti anwo debiezukoalɛ la. Eza yɛ nye sɔ nzenzaleɛ mɔɔ bɛyɛ ye wɔ yɛ nyianu ngyehyɛleɛ ne anu la. Ɔzɔho kɛ ɛvolɛ biala nzenzaleɛ kpalɛ ba! Eza yɛ nye sɔ ndetelɛ mɔɔ yɛnyia yɛfi yɛ Baebolo sukulu ngakyile ne mɔ anu la.  Ɔda ali wɔ nzenzaleɛ ɛhye mɔ amuala anu kɛ Gyihova ɛlɛkile ye ahyehyɛdeɛ ne adenle, na ɔmaa sunsum nu paladaese ne yɛ kɛnlɛma kpalɛ!

18, 19. Kɛ ɔkɛyɛ na yɛaboa yɛamaa yɛ sunsum nu paladaese ne ayɛ kɛnlɛma kpalɛ ɛ?

¹⁸ Gyihova ɛmaa yɛ nwolɛ adenle kɛ yɛboa yɛmaa yɛ sunsum nu paladaese ne ɛyɛ kɛnlɛma kpalɛ. Noko kɛzi yɛyɛ ɛhye ɛ? Yɛbɔ Belemgbunlililɛ ne anwo edwɛkpa ne nolo na yɛbɔ mɔdenle yɛyɛ menli dɔɔnwo ɛdoavolɛma. Saa yɛboa awie yɛmaa ɔbayɛ Nyamenle sonvolɛ a, ɛnee yɛlɛboa yɛamaa sunsum nu paladaese ne ahɔ zo.—Ayezaya 26:15; 54:2.

¹⁹ Saa yɛbɔ mɔdenle kɛ yɛbanyia Kilisiene subane kpalɛ a, ɛnee yɛlɛboa yɛamaa sunsum nu paladaese ne ayɛ kɛnlɛma. Ɛhye boa maa awie mɔ anye die sunsum nu paladaese ne anwo kpalɛ. Fane dɔɔnwo ne ala, tɛ Baebolo ne anu ndelebɛbo mɔɔ yɛlɛ la ala a maa menli anye die ahyehyɛdeɛ ne anwo na bɛabikye Gyihova nee Gyisɛse a, emomu yɛ subane kpalɛ ne ɔ.

20. Nzɔne a Mrɛlɛbulɛ 14:35 se ɔwɔ kɛ yɛyɛ a?

²⁰ Saa Gyihova nee Gyisɛse nwu kɛzi yɛ sunsum nu paladaese ne ɛyɛ la a, bɛ nye die kpole. Mɔdenle mɔɔ yɛlɛbɔ yɛamaa yeayɛ kɛnlɛma la maa yɛ nye die, noko saa kenle bie yɛboa yɛmaa azɛlɛ ne amuala kakyi paladaese a, yɛ nye balie kpole. Ɔwɔ kɛ dahuu bɛmaa yɛkakye Mrɛlɛbulɛ 14:35 mɔɔ ɔse: “Sonvolɛ mɔɔ bɔ ye ɛbɛla nrɛlɛbɛ nu la sɔ belemgbunli anye” la. Bɛmaa yɛyɛ nrɛlɛbɛvolɛma na yɛboa yɛmaa sunsum nu paladaese ne ɛyɛ kɛnlɛma!