Siezie Ɛ Nwo Kɛkala Maa Ewiade Fofolɛ Ne Anu Asetɛnla
“Ɔwɔ kɛ bɛyɛ nyele, . . . amaa bɛ sa aha ngoane ne mɔɔ le nɔhalɛ ngoane ne la.”
1, 2. (a) Nzɔne a ɛ nye la ye ade wɔ Paladaese a? (Nea mɔlebɛbo nvoninli ne.) (b) Nzɔne a bamaa yɛ nye alie wɔ ewiade fofolɛ ne anu a?
YƐ NYE la “dahuu ngoane” ade ɛsesebɛ. Ɛzoanvolɛ Pɔɔlo vɛlɛle ye “nɔhalɛ ngoane.” (Kenga 1 Temɔte 6:12, 19.) Ɛhye bamaa menli dɔɔnwo adɛnla aze dahuu wɔ Paladaese azɛlɛ ne azo. Ɔbayɛ se kɛ ɛbahola wɔapɛ nwolɛ nvoninli kpalɛ kɛ ɛkadwazo biala la ɛnee ɛte kpɔkɛ, ɛ nye die na ɛ kunlu dwo ɛ nwo mekɛ biala a. (Ayezaya 35:5, 6) Dwenle kɛzi ɔbayɛ anyelielɛ kɛ yɛ nee yɛ mbusuafoɔ nee yɛ gɔnwo mɔ nee menli mɔɔ bɛbadwazo bɛ la bie mɔ bɛabɔ la anwo nea. (Dwɔn 5:28, 29; Gyima ne 24:15) Ɛbanyia adenle wɔazukoa ninyɛne fofolɛ na wɔahola wɔayɛ ninyɛne mɔɔ ɛ nye die nwolɛ la kpalɛ. Kɛ neazo la, ɛbahola wɔazukoa abɔdeɛ nwo ninyɛne dɔɔnwo. Eza ɛbahola wɔazukoa ninyɛne mɔɔ bɛfa bɛbɔ edwɛne la ɛbɔlɛ anzɛɛ wɔadɔlɔ sua mɔɔ ɛkulo kɛ ɛsi la.
2 Yɛ nye la ninyɛne mgbalɛ ɛhye mɔ ade, noko Gyihova ɛzonlenlɛ a bamaa yɛ nye alie kpole a. Saa awie biala di Gyihova duma ne eni na bɛbu Gyihova kɛ bɛ Tumivolɛ a, anrɛɛ nea kɛzi asetɛnla ne bayɛ a. (Mateyu 6:9, 10) Saa menli mɔɔ di munli la yi azɛlɛ ne kɛmɔ Nyamenle hyehyɛle la a, yɛ nye balie kpole. Akee saa yɛlɛdi munli a, nea kɛzi ɔnrɛyɛ se kɛ yɛ nee Gyihova banyia agɔnwolɛvalɛ kpalɛ la!
3. Nzɔne a ɔwɔ kɛ yɛsiezie yɛ nwo yɛmaa ye kɛkala a?
3 Yɛdie yɛdi kɛ Gyihova bayɛ ninyɛne ngɛnlɛma ɛhye mɔ amuala, ɔluakɛ “Nyamenle ɛdeɛ, debie biala ɛnyɛ se ɛmmaa ye.” (Mateyu 19:25, 26) Saa yɛkulo kɛ yɛkɔ ewiade fofolɛ ne anu bie a, ɔwɔ kɛ yɛkpondɛ “nɔhalɛ ngoane” ne ɛnɛ. Yɛze kɛ ɔnrɛhyɛ awieleɛ ne bara, ɔti ɔwɔ kɛ yɛ ɛbɛlabɔlɛ ne maa ɔda ali kɛ awieleɛ ne bahola ara mekɛ biala. Ɔwɔ kɛ yɛyɛ biala mɔɔ yɛbahola la kɛkala yɛsiezie yɛ nwo kɛ yɛkpondɛ kɛ yɛtɛnla ewiade fofolɛ ne anu bie. Bɛmaa yɛnlea kɛzi yɛbayɛ ye la.
KƐZI ƐBAZIEZIE Ɛ NWO LA
4. Kɛzi yɛbaziezie yɛ nwo ɛnɛ yɛamaa ewiade fofolɛ ne anu asetɛnla ɛ? Maa neazo.
4 Kɛzi yɛbaziezie yɛ nwo ɛnɛ yɛamaa ewiade fofolɛ ne anu asetɛnla ɛ? Saa yɛkulo kɛ yɛkɔtɛnla maanle fofolɛ nu a, ɔwɔ kɛ yɛyɛ ninyɛne bie mɔ yɛfa yɛsiezie yɛ nwo yɛmaa ɛkɛ ne asetɛnla. Kɛ neazo la, ɔwɔ kɛ yɛsukoa ɛkɛ ne amra aneɛ nee bɛ amaamuo. Bie a yɛbazukoa bɛ aleɛ ne bie ɛlilɛ. Yɛdayɛ noko, ɔwɔ kɛ yɛbɔ yɛ ɛbɛla kɛkala kɛ asɛɛ yɛwɔ ewiade fofolɛ ne anu la yɛfa yɛsiezie yɛ nwo. Bɛmaa yɛnlea kɛzi yɛbahola yɛayɛ ɛhye la.
5, 6. Saa yɛtie adehilelɛ mɔɔ Gyihova ahyehyɛdeɛ ne fa maa yɛ la a, kɛzi ɔbaboa yɛ wɔ ewiade fofolɛ ne anu ɛ?
5 Seetan kpondɛ kɛ menli nyia adwenle kɛ bɛkola bɛyɛ mɔɔ bɛkulo la wɔ ewiade ɛhye anu. Menli dɔɔnwo te nganeɛ kɛ ɔwɔ kɛ bɛ nwo tɔ bɛ na ɔngyia kɛ bɛbadie Nyamenle. Boni a ɛvi nu ɛra a? Nyane nee alɔbɔlɛ ngome. (Gyɛlɛmaya 10:23) Noko Gyihova le Tumivolɛ mɔɔ ɔlɛ ɛlɔlɛ. Saa awie biala ɛlɛtie ye wɔ ewiade fofolɛ ne anu a, nea kɛzi asetɛnla bayɛ anyelielɛ a!
6 Wɔ ewiade fofolɛ ne anu, yɛbali adehilelɛ mɔɔ Gyihova ahyehyɛdeɛ ne bava amaa yɛ amaa yɛayɛ azɛlɛ ne paladaese na yeaboa yɛamaa yɛahilehile menli mɔɔ bɛbadwazo bɛ la azo. Gyihova bamaa yɛ gyima dɔɔnwo. Noko saa menli mɔɔ bɛli yɛ nyunlu la ka kɛ yɛyɛ debie mɔɔ yɛ nye ɛnlie nwolɛ la ɛ? Yɛbadie ɔ? Asoo yɛbabɔ mɔdenle kɛ yɛbayɛ na yɛ nye alie nwo ɔ? Saa yɛkulo kɛ yɛtɛnla ewiade fofolɛ ne anu bie a, ɔwɔ kɛ yɛtie adehilelɛ mɔɔ Gyihova ahyehyɛdeɛ ne fa maa yɛ kɛkala la.
7, 8. (a) Nzɔne ati a ɔwɔ kɛ yɛ nee menli mɔɔ li yɛ ti la yɛ ko ɛ? (b) Nzenzaleɛ boni a ɛra Kilisienema bie mɔ gyimalilɛ nu a? (d) Nzenzaleɛ boni a bahola ara yɛ asetɛnla nu wɔ ewiade fofolɛ ne anu a?
7 Amaa yɛahɔ ewiade fofolɛ ne anu bie la, ɔwɔ kɛ yɛsukoa kɛ yɛbamaa yɛ kunlu adwo yɛ nwo na yɛ nee Gyihova ahyehyɛdeɛ ne nee awie mɔ ayɛ ko. Kɛ neazo la, saa yɛnyia gyimalilɛ fofolɛ a, yɛdie yɛto nu na yɛbɔ mɔdenle kɛ yɛbamaa yɛ nye alie na yɛ kunlu adwo nwo. Saa yɛsukoa kɛ yɛ nee menli mɔɔ li yɛ ti la bayɛ ko a, ɔnrɛyɛ se kɛ yɛbayɛ zɔ wɔ ewiade fofolɛ ne anu. (Kenga Hibuluma 13:17.) Yizilayɛma dwule Ɛwɔkɛ Azɛlɛ ne azo la, bɛhilele bɛ ɛleka mɔɔ ɔwɔ kɛ bɛtɛnla la. (Ɛdianlɛ 26:52-56; Dwɔhyua 14:1, 2) Yɛnze ɛleka mɔɔ bɛbaha kɛ yɛdɛnla wɔ ewiade fofolɛ ne anu a. Noko saa yɛsukoa kɛ yɛbayɛ tieyɛ a, yɛ nye balie kɛ yɛbayɛ Gyihova ɛhulolɛdeɛ wɔ ɛleka biala mɔɔ yɛde la.
8 Nea nwolɛ adenle mɔɔ ɔle kɛ yɛbazonle wɔ ewiade fofolɛ ne anu wɔ Belemgbunlililɛ ne tumililɛ bo a! Ɛhye ati, yɛkulo kɛ yɛ nee Gyihova ahyehyɛdeɛ ne yɛ ko kɛkala na yɛyɛ gyima biala mɔɔ bɛbava bɛamaa yɛ la. Ɔdwu mekɛ ne bie a, bɛbahakyi yɛ gyimalilɛ ne. Kɛ neazo la, bɛmaa United States Bɛtɛlema bie mɔ ɛzia ɛhɔyɛ adekpakyelɛma. Yɛɛ kpanyinliyɛlɛ nee tɛnlabelɛ ngakyile ti, bɛmaa neavolɛ adenduvoma bie mɔ ɛyɛ adekpakyelɛ titilima. Bɛ nye ɛlie bɛ gyimalilɛ fofolɛ ne anwo, na Gyihova noko ɛlɛyila bɛ. Saa yɛsɛlɛ Gyihova moalɛ, yɛbɔ mɔdenle yɛsonle ye na yɛsukoa kɛ yɛbamaa yɛ kunlu adwo mɔɔ bɛse yɛyɛ la anwo a, yɛ nye balie na Gyihova noko bayila yɛ. (Kenga Mrɛlɛbulɛ 10:22.) Na saa yɛkulo kɛ yɛtɛnla ɛleka bie wɔ ewiade fofolɛ ne anu na Gyihova ahyehyɛdeɛ ne ka kɛ yɛhɔ ɛleka gyɛne ɛ? Zɔhane mekɛ ne, ɛleka mɔɔ yɛbadɛnla nee mɔɔ yɛbayɛ la anwo ɛnrɛhyia. Mɔɔ hyia la ala a le kɛ yɛde ewiade fofolɛ ne anu.
9, 10. (a) Nzɔne ati a ɔwɔ kɛ yɛnyia abotane wɔ ewiade fofolɛ ne anu a? (b) Kɛzi yɛbahola yɛahile ye kɛkala kɛ yɛlɛ abotane ɛ?
9 Wɔ ewiade fofolɛ ne anu, ɔdwu mekɛ ne bie a ɔbahyia kɛ yɛsi abotane. Kɛ neazo la, bie a yɛbade kɛ awie mɔ anye ɛlie kpole ɔluakɛ bɛdwazo bɛ mbusuafoɔ nee bɛ gɔnwo mɔ. Noko bie a ɔwɔ kɛ yɛkendɛ yɛmaa bɛdwazo yɛ alɔvolɛ ɛdeɛ ne. Saa ɔba ye zɔ a, yɛ nee bɛ bali fɛlɛko na yɛahendɛ ɔ? (Wulomuma 12:15) Saa yɛsi abotane kɛkala yɛmaa Gyihova di ye ɛwɔkɛ ne mɔ azo a, ɔbaboa yeamaa yɛazi abotane wɔ ɛkɛ.
10 Saa bɛyɛ nzenzaleɛ wɔ kɛzi yɛte nɔhalɛ ne abo la anu na yɛsi abotane a, ɔbaboa yɛ yɛamaa yɛaziezie yɛ nwo yɛamaa ewiade fofolɛ ne. Asoo yɛsukoa ninyɛne fofolɛ ɛhye mɔ, na saa yɛnde ɔ bo kpalɛ a yɛnyia abotane ɔ? Saa yɛyɛ zɔ a, wɔ ewiade fofolɛ ne anu yɛbanyia abotane wɔ mekɛ biala mɔɔ Gyihova bamaa yɛ adehilelɛ fofolɛ la.
11. Nzɔne ati a ɔwɔ kɛ yɛsukoa kɛ yɛbava awie mɔ ɛtane yɛahyɛ bɛ kɛkala ɛ, na kɛzi ɔbaboa yɛ wɔ ewiade fofolɛ ne anu ɛ?
11 Saa yɛsukoa fakyɛ a, ɛnee yɛlɛsiezie yɛ nwo yɛamaa ewiade fofolɛ ne. Wɔ Kelaese Ɛvolɛ Apenle Tumililɛ ne anu, ɔbalie mekɛ na yɛali munli. (Gyima ne 24:15) Yɛbahulo yɛ nwo na yɛava ɛtane yɛahyɛ ɔ? Saa yɛsukoa kɛ yɛbava awie mɔ ɛtane yɛahyɛ bɛ na yɛ nee bɛ anyia agɔnwolɛvalɛ kpalɛ ɛnɛ a, ɔnrɛyɛ yɛ se wɔ ewiade fofolɛ ne anu.
Wɔ ewiade fofolɛ ne anu, yɛbahyia subane mɔɔ Gyihova ɛlɛkile yɛ kɛ yɛla bɛ ali kɛkala la anwo
12. Nzɔne ati a ɔwɔ kɛ yɛsiezie yɛ nwo kɛkala yɛmaa ewiade fofolɛ ne anu asetɛnla ɛ?
12 Wɔ ewiade fofolɛ ne anu, bie a tɛ mekɛ ne amuala a yɛbanyia mɔɔ yɛkpondɛ la a, anzɛɛ bie a ɔwɔ kɛ yɛkendɛ. Ɔwɔ kɛ yɛ nye sɔ tɛnlabelɛ biala mɔɔ yɛwɔ nu la na yɛmaa yɛ kunlu dwo nwo. Nɔhalɛ nu, yɛbahyia subane mɔɔ Gyihova ɛlɛkilehile yɛ kɛkala la anwo. Yemɔti saa yɛsukoa kɛ yɛbala subane ɛhye mɔ ali kɛkala a, ɛnee ɔkile kɛ yɛdie yɛdi kɛ ewiade fofolɛ ne bara na yɛlɛsiezie yɛ nwo yɛamaa dahuu ngoane. (Hibuluma 2:5; 11:1) Eza ɔbala ali kɛ amgba yɛkulo kɛ yɛtɛnla ewiade mɔɔ awie biala tie Gyihova la anu.
FA WƆ ADWENLE SIE GYIHOVA ƐZONLENLƐ ZO
Bɔ mɔdenle bɔ edwɛkpa ne nolo
13. Nzɔne a yɛbava yɛalimoa yɛ ɛbɛlabɔlɛ nu wɔ ewiade fofolɛ ne anu a?
13 Wɔ ewiade fofolɛ ne anu, yɛ sa baha debie biala mɔɔ yɛhyia nwo na yɛ nye alie la. Noko Gyihova mɔɔ yɛ nee ye banyia agɔnwolɛvalɛ mɔɔ anu mia la a bamaa yɛ nye alie kpalɛ a. (Mateyu 5:3) Yɛbayɛ gyima dɔɔnwo wɔ Gyihova ɛzonlenlɛ nu, eza yɛ nye balie ye ɛzonlenlɛ nwo. (Edwɛndolɛ 37:4) Yemɔti saa yɛmaa Gyihova dimoa yɛ ɛbɛlabɔlɛ nu kɛkala a, ɛnee yɛlɛsiezie yɛ nwo yɛamaa ewiade fofolɛ ne.
14. Bodane boni a ngakula bahola ava azie bɛ nye zo wɔ Gyihova ɛzonlenlɛ nu a?
14 Kɛ ɔkɛyɛ na yɛ nye alie Gyihova ɛzonlenlɛ nwo kpalɛ ɛ? Bie a le kɛ yɛbava bodane yɛazie yɛ nye zo. Saa ɛle kakula a, dwenle Gyihova mɔɔ ɛbazonle ye la anwo kpalɛ. Nzɔne ati a ɛnyɛ dahuu ɛzonlenlɛ gyima ne foa ngakyile ne mɔ anwo neɛnleanu wɔ yɛ mbuluku ne mɔ anu ɛ? Ɛbahola wɔava nuhua ko wɔazie ɛ nye zo. * (nea ɔ bo ɛkɛ ne edwɛkɛ.) Ɛ nee menli mɔɔ bɛva ɛvolɛ dɔɔnwo bɛyɛ dahuu ɛzonlenlɛ gyima ne bie la ɛbɔ adawu. Saa ɛsonle Gyihova a, ɛbanyia ndetelɛ kpalɛ. Anwubielɛ ɛhye bamaa wɔazonle Gyihova wɔ ewiade fofolɛ ne anu.
Fa bodane sie ɛ nye zo wɔ Gyihova ɛzonlenlɛ nu
15. Bodane boni mɔ a yɛbahola yɛava yɛazie yɛ nye zo wɔ Gyihova ɛzonlenlɛ nu a?
15 Bodane dɔɔnwo wɔ ɛkɛ mɔɔ yɛbahola yɛava yɛazie yɛ nye zo wɔ Gyihova ɛzonlenlɛ nu a. Yɛbahola yɛava yɛazie yɛ nye zo kɛ yɛsukoa ɛzonlenlɛ gyima ne foa bie kpalɛ. Anzɛɛ yɛbahola yɛabɔ mɔdenle kɛ yɛbade Baebolo ngyinlazo bo kpalɛ, na yɛabɔ mɔdenle kɛ yɛbava yɛali gyima. Yɛbahola yɛabɔ mɔdenle yɛanyia anyuhɔlɛ wɔ yɛ ɛgengalɛ, ɛdendɛlɛ ɛmaanlɛ nee mualɛ ɛmaanlɛ nu. Nɔhalɛ ne a le kɛ: Saa yɛfa bodane yɛsie yɛ nye zo a, ɔbamaa yɛabɔ yɛ nwo mɔdenle na yɛaziezie yɛ nwo yɛamaa ewiade fofolɛ ne.
ƐBƐLABƆLƐ KPALƐ MƆƆ TƐLA BIALA
Yɛ Gyihova mo wɔ debie biala mɔɔ ɔbava yeamaa wɔ la anwo
16. Nzɔne ati a Gyihova ɛzonlenlɛ le ɛbɛlabɔlɛ kpalɛ mɔɔ tɛla biala ɛ?
16 Saa yɛfa yɛ mekɛ yɛsiezie yɛ nwo yɛmaa Nyamenle ewiade fofolɛ ne a, ɛnee yɛlɛmaa ɛbɛlabɔlɛ mɔɔ tɛla biala la abɔ yɛ ɛnɛ ɔ? Kyɛkyɛ! Ɛbɛlabɔlɛ mɔɔ tɛla biala la a le kɛ yɛbazonle Gyihova. Tɛ awie mɔɔ tinlitinli yɛ nwo zo anzɛɛ anwongyelelɛ kpole ne mɔɔ yɛkulo kɛ yɛpɛ la ati a yɛlɛsonle Gyihova a. Saa yɛ nee Gyihova lɛ agɔnwolɛvalɛ kpalɛ a, yɛ ɛbɛlabɔlɛ yɛ kpalɛ na yɛ nye die. Zɔhane ala a ɔbɔle yɛ kɛ yɛyɛ a. Saa Nyamenle kulo yɛ na ɔmaa yɛ adehilelɛ wɔ ɛbɛlabɔlɛ nu a, ɔle kpalɛ ɔtɛla debie biala. (Kenga Edwɛndolɛ 63:1-3.) Saa yɛfa yɛ ahonle muala yɛsonle Gyihova a, yɛ nye balie kpole. Menli mɔɔ bɛva ɛvolɛ dɔɔnwo bɛzonle ye la bahola aha kɛ ɛbɛlabɔlɛ kpalɛ mɔɔ tɛla biala la a le ɛhye.
Kpondɛ adehilelɛ fi Baebolo ne anu
17. Kɛzi ninyɛne mɔɔ yɛ nye die nwo nee anyelielɛ nwo bahyia wɔ Paladaese ɛ?
17 Wɔ Paladaese, yɛbanyia mekɛ yɛayɛ mɔɔ yɛ nye die nwo la na eza yɛalielie yɛ nye. Ɔluakɛ Gyihova bɔle yɛ kɛ yɛmaa yɛ nye ɛlie. Eza yebɔ ɛwɔkɛ kɛ ɔbamaa ‘tease abɔdeɛ biala akunlu adwo ɔ nwo.’ (Edwɛndolɛ 145:16; Nolobɔvo ne 2:24) Yɛhyia anyelielɛ nee ɛnwomenlelielɛ, noko saa yɛmaa agɔnwolɛvalɛ mɔɔ yɛ nee Gyihova lɛ la dimoa a, ɔmaa yɛ nye die kpalɛ. Kɛ ɔbayɛ wɔ ewiade fofolɛ ne anu la ɛne. Yemɔti ɔwɔ kɛ yɛdimoa yɛkpondɛ “Belemgbunlililɛ ne” na yɛfa yɛ adwenle yɛsie nyilalɛ mɔɔ yɛbanyia yɛavi Gyihova ɛzonlenlɛ nu la azo.
Saa yɛ nee Gyihova lɛ agɔnwolɛvalɛ kpalɛ a, yɛ ɛbɛlabɔlɛ ne yɛ kpalɛ na yɛ nye die
18. Kɛ ɔkɛyɛ na yɛahile kɛ yɛkulo kɛ yɛtɛnla aze dahuu wɔ Paladaese ɛ?
18 Wɔ paladaese ne anu, ɛbɛlabɔlɛ ne bayɛ anyelielɛ adɛla kɛzi yɛdwenle kɛ ɔbayɛ la. Bɛmaa yɛziezie yɛ nwo kɛkala yɛmaa “nɔhalɛ ngoane” ne yɛva yɛhile kɛ yɛkulo kɛ yɛkɔ ɛkɛ ne bie. Bɛmaa yɛnyia subane mɔɔ Gyihova fa kilehile yɛ la, na yɛbɔ mɔdenle yɛbɔ edwɛkpa ne nolo. Bɛmaa yɛva Gyihova ɛzonlenlɛ yɛlimoa yɛ ɛbɛlabɔlɛ nu na yɛ nye ɛlie. Yɛlɛ anwodozo kɛ wɔ ewiade fofolɛ ne anu, Gyihova bayɛ biala mɔɔ yebɔ nwolɛ ɛwɔkɛ la. Yemɔti bɛmaa yɛbɔ yɛ ɛbɛla kɛ asɛɛ yɛwɔ ɛkɛ la!
^ ɛden. 14 Nea Young People Ask
