BƐWOLE me wɔ Australia suakpole Queensland azo wɔ 1955. Yeangyɛ, me mame Estelle bɔle ɔ bo nee Gyihova Alasevolɛ zukoale Baebolo ne. Ye ɛvolɛ ko anzi bɛzɔnenle ye, na ye ɛvolɛ 13 anzi, me papa Ron noko rale nɔhalɛ ne anu. Bɛzɔnenle me 1968 wɔ Queensland namule bie mɔɔ wɔ moa la azo.

Me ngakula nu amuala, ɛnee me nye die mbuluku nee aneɛ nwo. Saa me nee me awovolɛ ɛlɛtu adenle biala a, mekɔtɛnla kale ne anzi mekenga buluku. Ɔyɛ a me awovolɛ ɛnde ɔ bo kɛ mengulo kɛ menea ninyɛne ngɛnlɛma mɔɔ wɔ adenle nu la bie a. Noko ɛgengalɛ mɔɔ ɛnee me nye die nwo la maanle membɔle mɔdenle wɔ sukulu. Menyianle ahyɛlɛdeɛ dɔɔnwo wɔ mekɛ mɔɔ ɛnee mewɔ sukunwiɔ wɔ Glenorchy mɔɔ wɔ Tasmania la.

Wɔ zɔhane mekɛ ne, ɛnee ɔwɔ kɛ mesi kpɔkɛ mɔɔ hyia la. Asoo mebakponle nwolɛ adenle mɔɔ menyia kɛ bɛbanlea me wɔ yunivɛsiti mɔɔ menrɛdua ɛhwee la azo ɔ? Ɔnva nwo kɛ ɛnee me nye die mbuluku nee debiezukoalɛ nwo la, ɔyɛ me fɛ kɛ me mame hilele me kɛ ɔwɔ kɛ mekulo Gyihova metɛla awie anzɛɛ debie biala la. (1 Kɔlentema 3:18, 19) Yemɔti ɔlua me awovolɛ moalɛ zo, menzile kpɔkɛ kɛ saa mewie sukulu ala a,  mebayɛ adekpakyelɛ. Membɔle adekpakyelɛ bo wɔ January 1971, na ɛnee meli ɛvolɛ 15.

Menyianle nwolɛ adenle menyɛle adekpakyelɛ wɔ Tasmania wɔ ɛvolɛ mɔtwɛ mɔɔ doa zo la anu. Zɔhane mekɛ ne mengyale Jenny Alcock, raalɛ anwofɛlɛko bie mɔɔ ɔvi Tasmania la. Yɛvale ɛvolɛ nna yɛyɛle adekpakyelɛ titilima wɔ Smithton nee Queenstown azua mɔɔ bɛde bɛ nwo la azo.

Wɔ 1978, me nee me ye hɔle maanle maanle avinli nyianu bie wɔ Port Moresby, Papua New Guinea. Mekakye edwɛkpatɛlɛvolɛ bie mɔɔ ɛnee ɔlɛmaa ɛdendɛlɛ wɔ Hiri Motu aneɛ nu la kpalɛ. Ɛnee mende mɔɔ ɔlɛka la abo ɛdeɛ, noko menyianle adwenle kɛ mebayɛ edwɛkpatɛlɛvolɛ, meazukoa aneɛ fofolɛ na meahola meamaa mediema anwosesebɛ ɔlua ɛdendɛlɛ mɔɔ mebamaa wɔ bɛ aneɛ nu la azo. Akee menwunle kɛzi mebava aneɛ mɔɔ me nye die nwo meazonle Gyihova la.

Yɛziale yɛhɔle sua nu la, ɔzinle yɛ nwo kɛ bɛhanle kɛ yɛrayɛ edwɛkpatɛlɛvolɛma a. Yɛdwule Funafuti bɔra ne mɔɔ wɔ Tuvalu la azo wɔ January 1979. Ɛnee nolobɔlɛma nsa mɔɔ bɛzɔne bɛ la a bɛwɔ Tuvalu a.

Ɛnee Tuvalu aneɛ ne ɛzukoalɛ ɛnla aze. Ɛnee “New Testament” ne ala a le buluku mɔɔ bɛlɛ wɔ bɛ aneɛ ne anu a. Ɛnee bɛnlɛ edwɛkɛbohilelɛ buluku biala anzɛɛ sukulu mɔɔ bɛsukoa aneɛ ne wɔ ɛkɛ a, yemɔti yɛyɛle yɛ adwenle kɛ yɛbabɔ mɔdenle kɛ kenle ko biala yɛbazukoa edwɛkɛ agbɔkɛ fofolɛ 10 mɔɔ kɔ 20 la. Noko nzinlii yɛranwunle kɛ ɛnee yɛnde edwɛkɛ agbɔkɛ mɔɔ yɛlɛsukoa la dɔɔnwo abo kpalɛ. Kɛ anrɛɛ yɛbaha yɛahile menli kɛ sunsum evinli nyɛleɛ ɛnle kpalɛ la, yɛhanle yɛhilele bɛ kɛ bɛmmafa tone nee kpɔma bɛdi gyima! Ɛnee ɔwɔ kɛ yɛkɔ zo yɛsukoa aneɛ ne ɔluakɛ yɛbɔ Baebolo ɛzukoalɛ dɔɔnwo abo. Ɛvolɛ dɔɔnwo anzi, Baebolo sukoavoma mɔɔ yɛlimoale yɛnyianle bɛ la anu ko zele yɛ kɛ: “Ɔyɛ yɛ fɛ kpole kɛ kɛkala bɛkola bɛka yɛ aneɛ ne la. Alimoa ne ɛnee saa bɛlɛka edwɛkɛ a yɛnwu mɔɔ bɛkpondɛ bɛahile a!”

Noko debie bie a maanle yɛzukoale aneɛ ne ndɛndɛ a. Kɛmɔ ɛnee yɛnnyia sua yɛnhaye la ati, ɛnee ɔwɔ kɛ yɛtɛnla abusua bie mɔɔ bɛle Alasevolɛ la anwo wɔ namule ne anu. Ɛnee ɔwɔ kɛ yɛka Tuvalu aneɛ ne wɔ sua nu yɛɛ ɛleka biala. Kɛmɔ ɛvolɛ dɔɔnwo pɛle nu mɔɔ ɛnee yɛnga Nrelenza la ati, ɔmaanle Tuvalu rayɛle yɛ aneɛ titili.

Yɛdwule ɛkɛ ne la yeangyɛ, menli dɔɔnwo bɔle ɔ bo kɛ bɛkile nɔhalɛ ne anwo anyelielɛ. Noko nzɔne  a yɛbahola yɛava yɛahile bɛ debie a? Ɛnee yɛnlɛ buluku biala wɔ bɛ aneɛ ne anu. Kɛ ɔkɛyɛ na bɛayɛ bɛ ti anwo debiezukoalɛ ɛ? Saa bɛbɔ debiezukoalɛ ɛralɛ bo a, nzɔne edwɛne a bɛbahola ye to a, kɛ ɔkɛyɛ na bɛamaa ɛdendɛlɛ ɛ, kɛ ɔkɛyɛ na bɛaziezie bɛ nwo bɛamaa debiezukoalɛ ne ɛ? Kɛ ɔkɛyɛ na bɛazɔne bɛ ɛ? Menli ɛhye mɔ mɔɔ bɛbɛlɛ bɛ nwo aze la hyia mbuluku mɔɔ bɛbava bɛazukoa Gyihova anwo debie la wɔ bɛ aneɛ nu! (1 Kɔlentema 14:9) Yɛbizale yɛ nwo kɛ: ‘Asoo yɛbanyia mbuluku wɔ Tuvalu aneɛ mɔɔ menli mɔɔ bɛndwu 15,000 la a ka la anu?’ Gyihova buale kpuya zɔhane mɔ na ɔmaanle yɛnwunle ninyɛne nwiɔ ɛhye: (1) Ɔkpondɛ kɛ menli mɔɔ bɛwɔ “moa moa maanle nu” la sukoa ɔ nwo debie, eza (2) ɔkpondɛ kɛ menli mɔɔ “bɛlɛ bɛ nwo aze na bɛ nwo dwo” mɔɔ ewiade ne ɛmbu bɛ la kpondɛ ɛvealeka wɔ ye duma ne anu.—Gyɛlɛmaya 31:10; Zɛfanaya 3:12.

Wɔ 1980 ne anu, Bɛtɛle hanle kɛ yɛhile mbuluku bo yɛhɔ Tuvalu aneɛ nu. Ɔnva nwo kɛ ɛnee yɛnde aneɛ ne kpalɛ la, yɛbɔle gyima ne abo. (1 Kɔlentema 1:28, 29) Alimoa ne, yɛdɔle milahyinli dɛba bie wɔ arane ne ɛkɛ mɔɔ ɛnee yɛfa yɛpelente mbuluku yɛkɔ debiezukoalɛ a. Nzinlii yɛhilele The Truth That Leads to Eternal Life buluku ne abo yɛhɔle Tuvalu aneɛ nu na yɛvale milahyinli ekyi ɛhye yɛpelentenle. Mekakye ink nvoanle ne, nee wuluwulu ne mɔɔ ɛnee ɔmaa yɛfɛ wɔ mbuluku ne ɛpelentelɛ nu la. Zɔhane mekɛ ne, ɛnee laete ɛnle ɛkɛ!

Ɛnee ɔnla aze kɛ yɛbahile edwɛkɛ bo yɛahɔ Tuvalu aneɛ nu ɔluakɛ ɛnee yɛnlɛ Tuvalu edwɛkɛbohilelɛ buluku anzɛɛ neɛnleanu buluku biala. Noko ɔyɛ a yɛnyia moalɛ wɔ ndenle ngakyile zo. Kenle ko nwonlomɔ bie, ɛnee menze yɛɛ mengɔle awie bie mɔɔ ɔ nye ɛnlie nɔhalɛ ne anwo la ɛkɛ a. Nrenyia kpanyinli ne mɔɔ ɛnee ɔle kilehilevolɛ la hanle kɛ yɛmmaba ye sua nu ɛkɛ. Akee ɔhanle kɛ: “Mekpondɛ kɛ meka edwɛkɛ ko mekile wɔ. Wɔ bɛ edwɛkɛbohilelɛ ne anu, bɛka edwɛkɛ a bɛbu ye ɔ kɔme anzi somaa. Bɛnda bɛnga ye zɔ wɔ Tuvalu  aneɛ nu.” Membizale menli gyɛne noko, na ɛnee ɔle nɔhalɛ zɔ. Yemɔti yɛyɛle nzenzaleɛ amaa yɛanyia anyuhɔlɛ wɔ yɛ gyima ne anu. Ɔyɛle me azibɛnwo kɛ Gyihova luale awie mɔɔ ɛnee ɔ nye ɛnlie nɔhalɛ ne anwo noko bie a ɔkenga yɛ mbuluku ne la anwo zo boale yɛ la!

Ngakyelɛlilɛ ɛsalɛdolɛ kɛlata ne a yɛlimoale yɛyɛle wɔ Tuvalu aneɛ nu a. Akee yɛyɛle Belemgbunlililɛ Edwɛkɛ No. 30 trate ne. Bɛyele ye nee Nrelenza ne wɔ mekɛ ko ne ala anu. Nea kɛzi yɛ nye liele kɛ yɛholale yɛyɛle debie yɛmaanle menli ne wɔ bɛ sua zo aneɛ nu a! Mekɛ ekyii guale nu la, yɛnyianle brohyua nee mbuluku bie mɔ wɔ Tuvalu aneɛ nu. Wɔ 1983, Australia Bɛtɛle ne bɔle ɔ bo kɛ ɔpelente Ɛzinzalɛ Arane ne wɔ Tuvalu aneɛ nu. Ɛnee magazine ne lɛ mukelɛ 24 na bɛye ye siane nsa nsa. Tuvaluma anye liele mbuluku nee magazine ɛhye mɔ anwo ɔluakɛ bɛ nye die ɛgengalɛ nwo. Saa yɛye buluku fofolɛ biala a, arane riledio ne bɔ ye nolo, na ɔdwu mekɛ ne bie a, yemɔ ala a bɛka nwolɛ edwɛkɛ wɔ alehyenlɛ ne anu a! *

Kɛzi ɛnee bɛyɛ edwɛkɛbohilelɛ gyima ne ɛ? Mɔɔ limoa, ɛnee yɛfa pɛne yɛkɛlɛ debie biala wɔ kɛlata zo. Akee yɛsia yɛtaepe mɔɔ yɛhile ɔ bo la fane dɔɔnwo kɔkpula kɛ ɔbayɛ kpalɛ na bɛava bɛahɔ Australia Bɛtɛle. Mediema mraalɛ nwiɔ mɔɔ bɛwɔ Australia Bɛtɛle ɛkɛ la taepe Tuvalu edwɛkɛ ne gua kɔmpita zo, ɔnva nwo kɛ bɛnde aneɛ ne la. Noko edwɛkɛ ne mɔɔ bɛbɔ bɛgua kɔmpita ne azo fane nwiɔ na bɛanlea ngakyile mɔɔ wɔ nu la maa bɛkoati nvonleɛ. Bɛfa nvoninli bɛboka edwɛkɛ ne anwo bɛhyehyɛ wɔ Bɛtɛle na bɛwie a bɛava bɛanwa yɛ. Yɛneɛnlea nuhua yɛwie a, yɛava yɛanwa Bɛtɛle bieko na bɛapelente.

Edwɛkɛbohilelɛ gyima ne ɛnyia anyuhɔlɛ kpalɛ! Kɛkala edwɛkɛbohilelɛ ekpunli ne mumua ne taepe edwɛkɛ ne na bɛayɛ nzenzaleɛ mɔɔ wɔ nu la wɔ kɔmpita ne azo. Fane dɔɔnwo ne ala ahenle mɔɔ fa nvoninli boka edwɛkɛ ne anwo hyehyɛ la nee edwɛkɛbohilelɛ ekpunli ne wɔ ɛleka ko. Saa bɛwie a, akee bɛfa edwɛkɛ ne bɛnwa Bɛtɛle mɔɔ bɛpelente mbuluku la wɔ Yintanɛte zo. Ɔngyia kɛ awie biala bapele ɔ nwo anriandi ahɔ posu ɔfese kɛ ɔkava edwɛkɛ ne mɔɔ bɛhile ɔ bo la yeanwa.

Mekɛ ne ɛlɛkɔ la, me nee Jenny nyianle gyimalilɛ ngakyile wɔ Pacific ne ɛleka ngakyile. Bɛmaanle yɛvile Tuvalu yɛhɔle Samoa Bɛtɛle wɔ 1985. Bɛmaanle yɛboale Samoa, Tongan, Tokelau yɛɛ Tuvalu edwɛkɛbohilelɛ gyima ne. * Akee wɔ 1996, bɛmaanle yɛhɔle Fiji Bɛtɛle, na yɛboale edwɛkɛbohilelɛ gyima ne mɔɔ bɛyɛ ye wɔ Fiji, Kiribati, Nauru, Rotuman, nee Tuvalu aneɛ nu la.

Edwɛkɛbohilelɛma gyima ne yɛ se, eza ɛvɛlɛ wɔ nu, noko kɛzi bɛ nye die nwo la si me nwo kpole. Nɔhavoma ɛhye mɔ le kɛ Gyihova la, bɛkpondɛ kɛ menli te edwɛkpa ne wɔ bɛ aneɛ nu. (Yekile 14:6) Kɛ neazo la, mekɛ mɔɔ ɛnee bɛkpondɛ kɛ bɛkile Ɛzinzalɛ Arane ne mɔɔ limoa la abo bɛkɔ Tonga aneɛ nu la, menyiale mgbanyima ne mɔ amuala na membizale bɛ awie mɔɔ yɛbahola yɛahile ye edwɛkɛbohilelɛ  gyima ne la. Mgbanyima ne mɔ ko mɔɔ le fitanli mɔɔ yɛ deɛ la hanle kɛ aleɛ kye ala a ɔbagyakyi ye gyima ne na yearabɔ edwɛkɛbohilelɛ gyima ne abo. Diedi kpole mɔɔ ɔlale ye ali la maanle me anwosesebɛ, ɔluakɛ ɛnee ɔlɛ abusua noko yeandwenle kɛzi ɔbanyia ezukoa yeanlea bɛ la anwo. Noko Gyihova nleanle ɔ nee ye abusua ne, na ɔyɛle edwɛkɛbohilelɛ gyima ne ɛvolɛ dɔɔnwo.

Edwɛkɛbohilelɛma ɛhye mɔ le kɛ Neazo Eku ne anu amra la, bɛkpondɛ kɛ bɛyɛ mbuluku wɔ aneɛ biala anu, saa bɔbɔ menli mɔɔ ka la anwo anzo a. Kɛ neazo la, bɛbizale kɛ asoo ɔwɔ kɛ bɛkɔ zo bɛkile mbuluku bo bɛkɔ Tuvalu aneɛ nu ɔ? Me nye liele Neazo Eku ne mualɛ ne anwo kpalɛ: “Yɛnnwu deɛmɔti ɔwɔ kɛ yɛgyakyi edwɛkɛbohilelɛ gyima ne wɔ Tuvalu aneɛ nu a. Saa ɛfa menli mɔɔ bɛka Tuvalu aneɛ ne la ɛto aneɛ gyɛne nwo a bɛ nwo anzo ɛdeɛ, noko ɔwɔ kɛ bɛka edwɛkpa ne bɛkile bɛ wɔ bɛ sua zo aneɛ nu.”

Wɔ 2003, bɛmaanle me nee Jenny vile Fiji Translation Department (ɛleka mɔɔ bɛkile edwɛkɛ bo la) yɛhɔle Translation Services (ɛleka mɔɔ bɛnea edwɛkɛbohilelɛ gyima ne azo) mɔɔ wɔ Patterson, New York la. Ɛnee yɛ nye la ɛhye ade! Yɛrabokale ekpunli mɔɔ bɛboa bɛmaa bɛkile yɛ mbuluku ne mɔ abo bɛkɔ aneɛ dɔɔnwo anu la anwo. Ɛvolɛ nwiɔ nee ɔ nzi mɔɔ yɛlile wɔ Translation Services la, bɛmaanle yɛtetele edwɛkɛbohilelɛ ekpunli ngakyile mɔɔ bɛwɔ ewiade ɛleka ngakyile la.

Akee maa menzia mengɔ ayia ne mɔɔ menlimoale menganle nwolɛ edwɛkɛ la azo. Wɔ ɛvolɛ 2000 ne anu, Neazo Eku ne nwunle kɛ edwɛkɛbohilelɛ ekpunli ngakyile mɔɔ bɛwɔ ewiade amuala la hyia moalɛ. Ɛnee bɛ nuhua dɔɔnwo ɛtɛnyianle edwɛkɛbohilelɛ nwo ndetelɛ. Yɛ nee Mbulukuhɛlɛlɛ Kɔmatii ne ayia zɔhane anzi, Neazo Eku ne hanle kɛ ɔwɔ kɛ bɛtete edwɛkɛbohilelɛma amuala. Bɛbahile bɛ kɛ ɔkɛyɛ na bɛade Nrelenza edwɛkɛ ne abo, bɛahola bɛali edwɛkɛbohilelɛ nwo ngyegyelɛ nwo gyima nee kɛzi bɛbabɔ nu bɛayɛ gyima kɛ ekpunli la.

Duzu a ɛvi ndetelɛ ɛhye anu ɛra a? Yemaa edwɛkɛbohilelɛ gyima ne ɛnyia anyuhɔlɛ. Eza yemaa bɛhile yɛ mbuluku ne mɔ abo bɛhɔ aneɛ dɔɔnwo anu. Wɔ 1979 mɔɔ bɛmaanle yɛhɔyɛle edwɛkpatɛlɛvolɛma la, ɛnee bɛkile Ɛzinzalɛ Arane ne abo wɔ aneɛ 82 pɛ anu. Yemɔ bɔbɔ, ɛnee saa bɛye Nrelenza Ɛzinzalɛ Arane ne a, siane ekyii gua nu na bɛaye aneɛ gyɛne mɔɔ ɛha la. Noko kɛkala, bɛkile Ɛzinzalɛ Arane ne abo wɔ aneɛ mɔɔ bo 240 la anu, na bɛye nuhua dɔɔnwo ne ala nee Nrelenza ɛdeɛ ne bɛbɔ nu. Kɛkala, menli bahola agenga Baebolo ne anu nɔhalɛ ne anwo debie wɔ aneɛ mɔɔ bo 700 la anu. Mekɛ bie mɔɔ ɛze la, ɛnee ɔzɔho kɛ ɛhye ɛnrɛyɛ boɛ.

Wɔ 2004 ne anu, Neazo Eku ne bɔle kpɔkɛ kɛ ɔwɔ kɛ bɛyɛ New World Translation ne wɔ aneɛ dɔɔnwo anu ndɛndɛ. Ɛhye ati, kɛkala menli dɔɔnwo kola kenga New World Translation ne wɔ bɛ aneɛ nu. Wɔ 2014 anu, bɛyele Baebolo ɛhye anzɛɛ ye foa bie wɔ aneɛ 128 anu, mɔɔ aneɛ bie mɔ mɔɔ bɛka wɔ South Pacific la boka nwo a.

Ninyɛne mɔɔ mekakye bɛ kpalɛ la bie a le nyianu bie mɔɔ bɛyɛle wɔ Tuvalu wɔ 2011 la. Siane  dɔɔnwo pɛle nu mɔɔ ɛnee ezule fee ɛtɛtɔle wɔ maanle nu anu a. Yemɔti mediema ne mɔ zuzule kɛ ɔwɔ kɛ bɛpɛ nyianu ne anu. Anyelielɛ edwɛkɛ a le kɛ, zɔhane nɔsolɛ ne mɔɔ yɛdwule ɛkɛ la, ezule ne bɔle ɔ bo dɔle kpole bie. Ɔti yɛholale yɛyɛle nyianu ne! Ɔle nwolɛ adenle kpole mɔɔ menyianle menyele New World Translation of the Christian Greek Scriptures ne wɔ Tuvalu aneɛ nu a! Ɔnva nwo kɛ mediema ekyi bie ala a ka zɔhane aneɛ ne la, bɛdabɛ noko bɛ sa hanle ahyɛlɛdeɛ kɛnlɛma ɛhye mɔɔ ɔvi Gyihova ɛkɛ la. Yɛwiele nyianu ne la, ezule ne dɔle kpole bieko. Yemɔti awie biala nyianle sunsum nu nzule yɛɛ nzule kpalɛ dɔɔnwo!

Ɔyɛ alɔbɔlɛ kɛ, ɛnee me kulovolɛ Jenny ɛmboka me nwo. Ɔwule 2009, ɔluakɛ ɔnyianle kansa ɛvolɛ bulu. Yɛgyale ɛvolɛ 35. Saa bɛdwazo ye na ɔte kɛ bɛyele Baebolo ne wɔ Tuvalu aneɛ nu a, ɔ nye balie kpole.

Gyihova moalɛ zo, menyia yelɛ anwofɛlɛko bieko, bɛfɛlɛ ye Loraini Sikivou. Loraini nee Jenny yɛle gyima wɔ Fiji Bɛtɛle, na ɛnee Loraini noko le edwɛkɛbohilelɛnli. Yemɔti, menyianle yelɛ bieko mɔɔ ɔfa nɔhalɛlilɛ ɔsonle Gyihova na eza ɔ nye die aneɛ nwo kɛ medame la!

Ɛvolɛ dɔɔnwo mɔɔ ɛze ɛhɔ la, menwu kɛzi yɛ ɛlɔlɛ Selɛ Gyihova di menli mɔɔ bɛka aneɛ ngakyile la ngyianlɛ nwo gyima la, saa bɔbɔ menli ekyi bie a ka bɛ aneɛ ne a. (Edwɛndolɛ 49:1-3) Menwu kɛzi menli asa ka yɛ mbuluku ne bie wɔ bɛ aneɛ nu anzɛɛ saa bɛto edwɛne bɛmaa Gyihova wɔ bɛ sua zo aneɛ nu a, bɛ nye die la. Wɔ mekɛ zɛhae mɔ anu, me adwenle kɔ ɛlɔlɛ kpole mɔɔ Gyihova lɛ maa yɛ la azo. (Gyima ne 2:8, 11) Mekakye edwɛkɛ bie mɔɔ adiema kpanyinli Saulo Teasi mɔɔ ɔvi Tuvalu la hanle la kpalɛ. Mekɛ mɔɔ limoa mɔɔ ɔdole asafo edwɛne ne bie wɔ ye aneɛ nu ɔwiele la, ɔhanle kɛ: “Bɛha bɛhile Neazo Eku ne kɛ Tuvalu edwɛne ne anu la ɛkɛ tɛla Nrelenza ɛdeɛ ne.”

Bɛhanle kɛ memamboka Neazo Eku ne anwo wɔ September 2005 la, ɔzinle me nwo. Kɛkala mengile edwɛkɛ bo, noko meda Gyihova ase kɛ yemaa adenle kɛ mengɔ zo memboa ewiade amuala edwɛkɛbohilelɛ gyima ne la. Ɔyɛ me fɛ kɛ menwu kɛ Gyihova di ye menli kɔsɔɔti ngyianlɛ nwo gyima, bɔbɔ bɛdabɛ mɔɔ bɛde mbɔra mɔɔ bɛde bɛ nwo azo wɔ Pacific Nyevile Kpole ne avinli nehane la! Ɔle kɛ mɔɔ edwɛndolɛnli ne hanle la, “[Gyihova] le belemgbunli; bɛmaa ewiade amra anye ɛlie; bɛmaa maanle maanle mɔɔ gua nyevile nloa la ɛli fɛlɛko!”—Edwɛndolɛ 97:1.