1. Nzɔne a ɛzoanvolɛ Dwɔn hanle kɛ yɛdwenledwenle nwo a, na duzu ati ɔ?

ƐZOANVOLƐ Dwɔn hanle kɛ yɛdwenle ɛhulolɛ kpole mɔɔ Gyihova ɛla ye ali ɛhile yɛ la anwo kpalɛ. Ɔhanle ye wɔ 1 Dwɔn 3:1 kɛ: “Bɛnlea kɛ Selɛ ne ɛzi ɛhulo yɛ a!” Saa yɛdwenle kɛzi Gyihova kulo yɛ nee adenle mɔɔ ɔdua zo ɔkulo yɛ la anwo a, ɔmaa yɛbikye ye na yɛkulo ye kpole kpalɛ.

2. Nzɔne ati a bie mɔ ɛnnwu ye kɛ Nyamenle kulo bɛ ɛ?

² Ɔyɛ alɔbɔlɛ kɛ bie mɔ ɛnnwu kɛzi Nyamenle kulo bɛ la. Bɛnea a Nyamenle ɛndwenle menli nwo. Bie a bɛlɛ adwenle kɛ mɛla ala a Nyamenle yɛ a, yɛɛ ɔtwe menli mɔɔ bɛnli ye mɛla zo la anzo. Adalɛ ngilehilelɛ ɛmaa bie mɔ ɛnyia adwenle kɛ Nyamenle ati yɛ se na bɛnrɛhola bɛnrɛhulo ye. Bie mɔ noko te nganeɛ kɛ Nyamenle kulo awie biala ɔnva nwo debie biala mɔɔ bɛbayɛ la. Noko  Baebolo ne mɔɔ wɔzukoa la ɛmaa wɔnwu Gyihova anwo nɔhalɛ ne. Wɔnwu ye kɛ ye subane titili a le ɛlɔlɛ yɛɛ ɔzoanle ɔ Ra ne kɛ ɔrakpɔne wɔ. (Dwɔn 3:16; 1 Dwɔn 4:8) Noko ɔlua mɔɔ wɔyia ye wɔ ɛbɛlabɔlɛ nu la ati, bie a ɔbayɛ se kɛ ɛbanwu kɛzi Gyihova kulo wɔ la.

3. Nzɔne a bamaa yɛade ɛhulolɛ mɔɔ Gyihova lɛ maa yɛ la abo a?

³ Amaa yɛanwu ye kɛ Gyihova kulo yɛ la, ɔwɔ kɛ yɛte ɔ bo kɛ ɔdaye a ɔbɔle yɛ a. Ɔmaanle yɛ ngoane. (Kenga Edwɛndolɛ 100:3-5.) Yemɔti a Baebolo ne se dasanli mɔɔ limoa la le “Nyamenle ara” la. (Luku 3:38) Eza Gyisɛse zele yɛ kɛ yɛvɛlɛ Gyihova kɛ “yɛ Ze mɔɔ wɔ anwuma.” (Mateyu 6:9) Yemɔti Gyihova le yɛ Ze, na ɔkulo yɛ kɛmɔ selɛ kpalɛ kulo ɔ mra la.

4. (a) Nzɔne Selɛ a le Gyihova? (b) Nzɔne a yɛbazuzu nwo wɔ edwɛkɛ ɛhye nee mɔɔ doa zo la anu a?

⁴ Ɔyɛ se ɔmaa bie mɔ kɛ bɛbabu selɛ bie kɛ awie mɔɔ lɛ ɛlɔlɛ a. Bie a bɛ ngakula nu bɛ papa annea bɛ kpalɛ yemɔti ɔyɛ bɛ nyane. Gyihova ɛnrɛyɛ ɔ mra zɔhane ɛlɛ. Ɔle Selɛ kpalɛ mɔɔ tɛla biala a. (Edwɛndolɛ 27:10) Ɔkulo yɛ kpole kpalɛ yɛɛ ɔnea yɛ wɔ ndenle ngakyile zo. Saa yɛte nganeɛ kɛ Gyihova kulo yɛ kpalɛ a, yɛdayɛ noko yɛbahulo ye kpalɛ. (Gyemise 4:8) Wɔ edwɛkɛ ɛhye anu, yɛbazuzu ndenle nna mɔɔ Gyihova dua zo da ɛlɔlɛ ali kile yɛ la anwo. Wɔ edwɛkɛ bieko anu, yɛbanwu ndenle nna mɔɔ yɛbahola yɛalua zo yɛahulo ye la.

5. Nzɔne a Nyamenle fa maa awie biala a?

⁵ Mɔɔ ɛzoanvolɛ Pɔɔlo wɔ Athens, Greece la, ɔnwunle ananze dɔɔnwo wɔ ɛkɛ yɛɛ ɛnee menli ne die di kɛ bɛ nyamenle ne mɔ a maanle bɛ ngoane a. Yemɔti ɔhanle “Nyamenle ne, mɔɔ bɔle ewiade nee mɔɔ wɔ nuhua la amuala la” anwo edwɛkɛ ɔhilele bɛ. Ɔhanle kɛ Nyamenle a maa “sonla biala ngoane nee ɛnwomenle nee debie biala” a, na “ye nuhua yɛɛ yɛde na yɛkɔ, yɛba, na yɛnyia ngoane a.” (Gyima ne 17:24, 25, 28) Gyihova maa yɛ sa ka debie biala mɔɔ yɛhyia nwo amaa yɛ nye alie wɔ ɛbɛlabɔlɛ nu la. Dwenle ninyɛne mɔɔ yeva yemaa yɛ ɔlua ɛlɔlɛ mɔɔ ɔlɛ ɔmaa yɛ la ati la anwo nea.

6. Nzɔne awuke a Gyihova ɛva ɛmaa yɛ a? (Nea mɔlebɛbo nvoninli ne.)

⁶ Kɛ neazo la, Gyihova zieziele awuke kɛnlɛma bie maanle yɛ. (Edwɛndolɛ 115:15, 16) Wɔ pelanet ngakyile mɔɔ yebɔ la anu, ɔzɔho kɛ azɛlɛ ne le ngakyile. Abɔdeɛ nwo nrɛlɛbɛvoma ɛnleɛnlea anwomanyunlu na bɛnwu pelanet ngakyile, noko bɛtɛnwunle pelanet gyɛne mɔɔ alesama bahola adɛnla zo a. Tɛ ninyɛne mɔɔ ɔbamaa yɛadɛnla aze la ala a Gyihova ɛva ɛmaa yɛ a, eza ɔyɛle azɛlɛ ne kɛnlɛma gyɛlɛɛnye mɔɔ ɔmaa ɛ nye die ɛbɛlabɔlɛ nu a. (Ayezaya 45:18) Saa yɛdwenle awuke zɔhane mɔɔ yɛ Ze Gyihova ɛva ɛmaa yɛ la anwo a, ɔmaa yɛnwu kɛzi amgba ɔkulo yɛ la. —Kenga Dwobu 38:4, 7; Edwɛndolɛ 8:3-5.

7. Kɛzi adenle mɔɔ Gyihova luale zo bɔle yɛ la maa yɛnwu kɛ amgba ɔkulo yɛ ɛ?

⁷ Kɛzi Gyihova bɔle yɛ mɔɔ yɛkola yɛsukoa ye la eza maa yɛnwu kɛ ɔkulo yɛ. (Mɔlebɛbo 1:27) Ɛhye kile kɛ yɛkola yɛnwu kɛ ɔkulo yɛ na yɛdayɛ noko yɛkulo ye. Ɔze kɛ yemɔ a maa yɛ nye die kpalɛ a. Saa ngakula nwu kɛ bɛ awovolɛ kulo bɛ edwɛkɛ a, bɛ nye die kpalɛ. Kakye kɛ, Gyisɛse zele yɛ kɛ saa yɛbikye yɛ Ze Gyihova a yɛ nye balie. (Mateyu 5:3) Ɔmaa yɛ “debie biala molozo” ɔmaa yɛ nye die. Nɔhalɛ, ɔ ti akunlu le kɛnlɛma yɛɛ eza ɔkulo yɛ kpole kpalɛ.—1 Temɔte 6:17; Edwɛndolɛ 145:16.

8. Nzɔne ati a yɛkpondɛ kɛ Gyihova kilehile yɛ a?

⁸ Selɛma kulo bɛ mra na bɛngulo  kɛ bɛkɛminli anzɛɛ bɛkɛbɛlɛbɛla bɛ. Noko awovolɛ dɔɔnwo ɛnlie kpalɛ nee ɛtane nwo ngyinlazo mɔɔ wɔ Baebolo ne anu la ɛndo nu. Yemɔti bɛngola bɛntete bɛ mra kpalɛ, ɛhye maa bɛdi nyane na bɛ nye zo ta bɛ. (Mrɛlɛbulɛ 14:12) Noko Gyihova maa ɔ mra adehilelɛ kpalɛ ɔluakɛ ɔle “nɔhavo Nyamenle.” (Edwɛndolɛ 31:5) Ɔkpondɛ kɛ ɔkilehile yɛ ɔ nwo nɔhalɛ ne nee kɛzi ɔwɔ kɛ yɛsonle ye la. Eza ɔkilehile yɛ ɛbɛlabɔlɛ kpalɛ mɔɔ tɛla biala la. (Kenga Edwɛndolɛ 43:3.) Yemɔti, nzɔne a Gyihova ɛhilehile yɛ mɔɔ ɔmaa yɛnwu kɛzi amgba ɔkulo yɛ la ɛ?

9, 10. (a) Nzɔne ati a Gyihova ɛha ɔ nwo edwɛkɛ ɛhile yɛ a? (b) Nzɔne a ɔmaa yɛnwu ye wɔ bodane mɔɔ ɔlɛ ɔmaa yɛ la anwo a?

⁹ Mɔɔ limoa, Gyihova ka ɔ nwo edwɛkɛ kile yɛ. Ɔkpondɛ kɛ yɛnwu ye. (Gyemise 4:8) Yemɔti yebɔ ye duma yehile yɛ. Nɔhalɛ nu, Baebolo ne bɔ ye duma fane dɔɔnwo tɛla duma biala. Eza Gyihova ɛmaa yɛnwu sonla holɛ ko mɔɔ ɔde a. Saa yɛnea ninyɛne mɔɔ yebɔ la a, ɔmaa yɛnwu kɛ ɔlɛ tumi yɛɛ ɔze nrɛlɛbɛ. (Wulomuma 1:20) Eza saa yɛkenga Baebolo ne a, yɛnwu kɛzi ɔyɛ ye ninyɛne pɛpɛɛpɛ na ɔkulo yɛ la. Saa yɛnwu Gyihova subane ngɛnlɛma ne a, ɔmaa yɛbikye ye kpalɛ.

¹⁰ Eza Gyihova maa yɛnwu ye bodane ne mɔ. Yeha yehile yɛ kɛ yɛboka ye abusua ne anwo. Eza ɔmaa yɛnwu mɔɔ ɔkulo kɛ yɛyɛ amaa yɛ nee ye abusua ne abɔ nu ayɛ gyima wɔ anzodwolɛ nu la. Baebolo ne ka ye wienyi kɛ Nyamenle ambɔ yɛ kɛ yɛzi yɛ ti anwo kpɔkɛ wɔ kpalɛ nee ɛtane nwo. (Gyɛlɛmaya 10:23) Gyihova ze mɔɔ le kpalɛ maa yɛ la. Na saa yɛdie ye tumililɛ ne yɛto nu na yɛtie ye a, yɛbanyia anzodwolɛ na yɛ nwo adɔ yɛ wɔ ɛbɛlabɔlɛ nu. Gyihova ɛmaa yɛnwu nɔhalɛ ɛhye mɔɔ anwo hyia la ɔluakɛ ɔkulo yɛ.

11. Nzɔne a yɛ ɛlɔlɛ Selɛ ne ɛha ɛhile yɛ wɔ kenle bie anwo a?

¹¹ Selɛ mɔɔ kulo ɔ mra la dwenle bɛ kenle bie nwo kpalɛ. Ɔkpondɛ kɛ bɛnyia asetɛnla mɔɔ ahunlundwolɛ wɔ nu. Ɔyɛ alɔbɔlɛ kɛ mɔɔ bazi kenle bie la gyegye menli dɔɔnwo la, yɛɛ menli dɔɔnwo sɛkye bɛ mekɛ kpondɛ ninyɛne mɔɔ ɛnrɛhyɛ la. (Edwɛndolɛ 90:10) Ɛbɛla mɔɔ ahunlundwolɛ wɔ nu mɔɔ yɛ Ze Gyihova maa yɛbɔ nee kenle bie mɔɔ yɛ anyelielɛ mɔɔ yeva yebɔ yɛ ɛwɔkɛ la maa yɛ nye die kpalɛ!

12. Kɛzi Gyihova bɔle mɔdenle kɛ ɔboa Keen nee Bɛlɛke ɛ?

¹² Mekɛ mɔɔ Gyihova nwunle kɛ wɔannea a Keen bayɛ ɛtane la, ɔbɔle mɔdenle kɛ ɔboa Keen, ɔbizale ye kɛ: “Duzu ati a ɛ nyunlu ɛyɛ kpundikpundi na wɔva ɛya ɛ? Asoo saa ɛyɛle ye boɛ a, anrɛɛ ɛ nyunlu ɛnrɛra anyia?” (Mɔlebɛbo 4:6, 7) Keen ammaa Gyihova  amboa ye, yemɔti ɔnwunle amaneɛ. (Mɔlebɛbo 4:11-13) Mekɛ gyɛne noko, Gyihova nwunle kɛ adwenle mɔɔ ɛndenrɛ mɔɔ Bɛlɛke nyianle la ɛlɛmaa yeade ɛvɛlɛ nganeɛ na ɔ sa nu ado. Yemɔti Gyihova zele Bɛlɛke kɛ ye nzuzulɛ ne ɛnle kpalɛ yemɔti ɔwɔ kɛ ɔkakyi ye adwenle. Bɛlɛke diele Gyihova folɛdulɛ ne yemɔti ɔnyianle ngoane.—Gyɛlɛmaya 45:2-5.

13. Nzɔne a Gyihova nɔhalɛ azonvolɛ zukoale vile sɔnea nu a?

¹³ Gyihova kile yɛ adenle na eza ɔtenrɛdenrɛ yɛ ɔluakɛ ɔkulo yɛ. Ɔtea yɛ wɔ mekɛ mɔɔ fɛta la yɛɛ eza ɔtete yɛ. (Hibuluma 12:6) Yɛkenga Baebolo ne a, yɛnwu Gyihova nɔhalɛ azonvolɛ mɔɔ ɔtetele bɛ ɔmaanle bɛyɛle menli mgbalɛ la. Kɛ neazo la, Dwosefi, Mosisi nee Devidi anwo hyelele bɛ kpalɛ. Gyihova boale bɛ wɔ bɛ sɔnea mekɛ nu. Ninyɛne mɔɔ bɛzukoale wɔ bɛ sɔnea ne mɔ anu la boale bɛ wɔ mekɛ mɔɔ Gyihova maanle bɛ gyima dɔɔnwo la. Saa yɛlɛkenga Baebolo ne na yɛnwu kɛzi Gyihova boa na ɔtete ye menli la a, ɔmaa yɛnwu kɛ amgba ɔkulo yɛ.—Kenga Mrɛlɛbulɛ 3:11, 12.

14. Saa yɛfo a, kɛzi Gyihova da ɛlɔlɛ ali kile yɛ ɛ?

¹⁴ Saa yɛfo bɔbɔ a, Gyihova kɔ zo da ɛlɔlɛ ali kile yɛ. Saa yɛdie ye ndeanlɛ yɛto nu na yɛnu yɛ nwo a, ɔfa yɛ ɛtane ɔkyɛ yɛ bɔkɔɔ. (Ayezaya 55:7) Ɛhye kile nzɔne? Devidi hanle Gyihova fakyɛ ne anwo edwɛkɛ kɛ: “Ɔfa wɔ ɛtane ne mɔ amuala ɔkyɛ wɔ, ɔyɛ wɔ ewule kɔsɔɔti ayile. Ɔdie wɔ ngoane ɔfi Ewule Kuma nu, na ɔkile ye ɛhulolɛ kpundii ne nee ye anwunvɔnezelɛ ne ɛ nwo zo. Kɛ aduduleɛ nee adɔleɛ avinli si twe la, zɔhane ala yɛɛ ɔye yɛ ɛtane ne mɔ ɔmaa yɛ nee bɛ avinli twe a.” (Edwɛndolɛ 103:3, 4, 12) Ɛhye maa yɛnwu kɛzi yɛ Ze se anwunvɔne la. Gyihova tenrɛdenrɛ yɛ na eza ɔkile yɛ adenle wɔ ndenle ngakyile zo. Asoo ɛyɛ nzenzaleɛ ndɛndɛ? Dahuu kakye kɛ Gyihova tenrɛdenrɛ yɛ ɔluakɛ ɔkulo yɛ.—Edwɛndolɛ 30:5.

15. Adenle boni bieko azo a Gyihova da ɛlɔlɛ ali kile yɛ a?

¹⁵ Selɛ mɔɔ lɛ ɛlɔlɛ la bɔ ye abusua nwo bane fi esiane nwo. Zɔhane ala a yɛ Ze Gyihova yɛ maa yɛ a. Edwɛndolɛnli ne hanle Gyihova anwo edwɛkɛ kɛ: “Ɔbɔ ɔdaye ye menli ne anwo bane; ɔdie bɛ ɔfi amumuyɛma asa anu.” (Edwɛndolɛ 97:10) Dwenle ɛhye anwo nea: Kɛmɔ ɛ nye hyia wɔ la ati ɛbɔ nwolɛ bane ndɛndɛ la, Gyihova noko bɔ ye menli nwo bane ndɛndɛ ɔluakɛ bɛsonle bolɛ bɛmaa ye.—Kenga Zɛkalaya 2:8.

16, 17. Kɛzi Gyihova ɛbɔ ye menli nwo bane wɔ tete ne nee ɛnɛ ɛ?

¹⁶ Adenle ko mɔɔ Gyihova ɛlua zo ɛbɔ ye menli nwo bane wɔ tete ne nee ɛnɛ la a le ye anwumabɔvolɛ ne mɔ.  (Edwɛndolɛ 91:11) Anwumabɔvolɛ ko hunle Aselea sogyama 185,000 kenle ko nɔɔzo na ɔliele Nyamenle menli. (2 Arelemgbunli 19:35) Wɔ ɛvoya mɔɔ limoa la anu, anwumabɔvolɛma liele Pita, Pɔɔlo nee menli gyɛne vile efiade. (Gyima ne 5:18-20; 12:6-11) Ɔtɛkyɛle biala, konle kpole bie zile Africa maanle ko anu. Ɔlua konle, awule, bɔnadolɛ nee menli ɛhunlɛ ti, basabasayɛlɛ hɔle zo wɔ maanle ne anu. Yɛ mediema ne mɔ bie anwu noko bɛ nuhua dɔɔnwo minlinle debie biala mɔɔ bɛlɛ la. Noko bɛ muala bɛdele nganeɛ kɛ Gyihova kulo bɛ na eza ɔlɛnea bɛ. Ɔnva nwo amaneɛ mɔɔ bɛnwunle ye la, ɛnee bɛ nye die. Mɔɔ ewiade amuala gyima ne ati agyakɛnugyinlavolɛ hɔkpɔlale mediema ne mɔ na ɔbizale bɛ kɛzi bɛ nwo de la, bɛhanle kɛ: “Gyihova moalɛ zo debie biala le kpalɛ!”

¹⁷ Nɔhalɛ nu, ɛdoavolɛ Sitivin nee Gyihova azonvolɛ bie mɔ ɛwu ɔlua bɛ nɔhalɛlilɛ ti. Tɛ dahuu a Gyihova si ɛhye mɔ adenle a. Noko Gyihova bɔ ye menli nwo bane kɛ ekpunli ɔlua ndenle ngakyile mɔɔ Seetan dua zo bɛlɛbɛla bɛ mɔɔ ɔbɔ bɛ kɔkɔ wɔ nwo la azo. (Ɛfɛsɛsema 6:10-12) Yɛnwu kɔkɔbɔlɛ ɛhye mɔ wɔ Baebolo ne nee mbuluku mɔɔ Gyihova ahyehyɛdeɛ ne yɛ la anu. Kɛ neazo la, yɛnwu esiane mɔɔ wɔ Yintanɛte, ezukoa nwo anyebolo, ɛbɛlatane, vidio mɔɔ basabasayɛlɛ wɔ nu, mbuluku anzɛɛ nwɔhoa nu la. Ɔda ali kɛ, Gyihova kulo yɛ na ɔkpondɛ kɛ ɔbɔ yɛ nwo bane.

18. Kɛzi ɛte nganeɛ wɔ Gyihova mɔɔ ɔkulo wɔ la anwo ɛ?

¹⁸ Mɔɔ Mosisi dwenlenle ɛvolɛ dodo mɔɔ yeva yezonle Gyihova anwo la, ɔnwunle kɛ Gyihova kulo ye. Ɔhanle kɛ: “Maa wɔ ɛhulolɛ kpundii ne ɛyi yɛ nwonlomɔ biala, amaa yɛ nye alie na yɛali fɛlɛko yɛ ngoane mekɛ nu.” (Edwɛndolɛ 90:14) Ɔle nyilalɛ kpole kɛ yɛkola yɛnwu kɛzi Gyihova kulo yɛ la. Nea enililɛ kpole mɔɔ ɔle kɛ Gyihova kulo yɛ a! Yɛte nganeɛ kɛ ɛzoanvolɛ Dwɔn mɔɔ ɔhanle kɛ: “Bɛnlea kɛ Selɛ ne ɛzi ɛhulo yɛ a” la.—1 Dwɔn 3:1.