1, 2. Nzɔne adwenle a menli bie mɔ lɛ ye wɔ Nyamenle anwo a?

MENLI dɔɔnwo die di kɛ mɔɔ bɛbayɛ la ɛnvale Nyamenle anwo. Bɛte nganeɛ kɛ Nyamenle ɛndwenle mɔɔ bado bɛ la anwo. Kɛ neazo la, mekɛ mɔɔ ahumu kpole bie zɛkyele Philippines ɛleka dɔɔnwo wɔ November 2013 la, kpanyinli bie mɔɔ wɔ suakpole ko azo la hanle kɛ: “Bie a ɛnee Nyamenle ɛhɔ ɛleka bie.”

² Bie mɔ noko te nganeɛ kɛ Nyamenle ɛnnwu mɔɔ bɛlɛyɛ la. (Ayezaya 26:10, 11; 3 Dwɔn 11) Ɛzoanvolɛ Pɔɔlo mekɛ zo amra bie mɔ nyianle zɔhane adwenle ne bie. Ɔhanle bɛ nwo edwɛkɛ kɛ: ‘Bɛkpole kɛ bɛnrɛnwu Nyamenle.’ Ɛnee bɛle amumuyɛ, anyebolo, nee ngunzi.—Wulomuma 1:28, 29.

3. (a) Kpuya boni mɔ a ɔwɔ kɛ yɛbiza yɛ nwo a? (b) Wɔ Baebolo ne anu, saa bɛka Nyamenle “asa” a ɔkile nzɔne?

³ Na yɛdayɛ noko ɛ? Yɛze kɛ Gyihova nwu debie biala mɔɔ yɛyɛ la. Noko asoo yɛdie yɛdi kɛ Gyihova dwenle yɛ nwo ɔ? Asoo yɛnwu ye kɛ ɔboa yɛ wɔ yɛ ɛbɛlabɔlɛ nu ɔ? Wɔ  Baebolo ne anu saa bɛka Nyamenle “asa” a, yemɔ a le ye tumi ne. Ɔfa ye tumi ne ɔboa ye azonvolɛ yɛɛ ɔfa ɔdi ye agbɔvolɛ nwo zo konim. (Kenga Mɛla ne 26:8.) Gyisɛse hanle kɛ menli bie mɔ ‘banwu Nyamenle.’ (Mateyu 5:8) Yɛboka menli zɔhane ɔ? Kɛ ɔkɛyɛ na ‘yɛanwu Nyamenle’ ɛ? Bɛmaa yɛnlea menli bie mɔ mɔɔ bɛnwunle Nyamenle asa wɔ bɛ ɛbɛlabɔlɛ nu nee menli bie mɔ noko mɔɔ bɛannwu ye la anwo neazo wɔ Baebolo ne anu. Eza yɛbanwu kɛzi diedi boa yɛ maa yɛnwu Nyamenle asa la.

4. Nzɔne ati a Yizilayɛma agbɔvolɛ kpole kɛ bɛkɛnwu Nyamenle asa ɛ?

⁴ Tete ne, menli dɔɔnwo nwunle kɛzi Nyamenle boale Yizilayɛma la yɛɛ bie mɔ noko dele. Gyihova luale nwanwane adenle zo liele ye menli vile Yigyibiti na ɔlile arelemgbunli dɔɔnwo anwo zo konim wɔ Ɛwɔkɛ Azɛlɛ ne azo. (Dwɔhyua 9:3, 9, 10) Arelemgbunli dɔɔnwo dele yɛɛ bɛnwunle kɛzi Gyihova liele ye menli la, noko “bɛvale adwenle ko kɛ bɛ nee Dwɔhyua nee Yizilayɛma kaho.” (Dwɔhyua 9:1, 2) Mɔɔ arelemgbunli zɔhane mɔ nee Yizilayɛma ko la, bɛnwunle Nyamenle asa. Gyihova tumi kpole ne ati, “sɛnzɛne ne gyinlanle yɛɛ siane ne andu ɔ bo hɔkpulale kɛ Yizilayɛma asa homonle bɛ kpɔvolɛma ne anwo zo la.” (Dwɔhyua 10:13) Noko Gyihova maanle Yizilayɛma agbɔvolɛ kpunlinle bɛ ahonle amaa bɛ nee Yizilayɛma aho. (Dwɔhyua 11:20) Yizilayɛma lile bɛ agbɔvolɛ anwo zo konim ɔluakɛ bɛanlie bɛando nu kɛ Gyihova a ɛlɛko amaa ye menli ne a.

5. Nzɔne a Belemgbunli Ehabe amumuyɛ anlie anli a?

⁵ Amozi, Belemgbunli Ehabe amumuyɛ nyianle nwolɛ adenle dɔɔnwo mɔɔ anrɛɛ ɔbamaa yeanwu Nyamenle asa a. Yilaegya zele ye kɛ: ‘Ɛbɔlɛ anzɛɛ ezule ɛnrɛdɔ kɔkpula mekɛ mɔɔ menwɔye me nloa la.’ (1 Arelemgbunli 17:1) Nyamenle a maanle ɛhye zile a, noko Ehabe anlie anli. Amozi, Yilaegya zɛlɛle Gyihova, na Nyamenle maanle senle vile anwuma rale. Ehabe nwunle ɛhye. Akee Yilaegya hanle hilele Ehabe kɛ, Gyihova bamaa wawaa ne apɛ na ezule adɔ kpole. (1 Arelemgbunli 18:22-45) Ehabe nwunle nwanwane ninyɛne ɛhye mɔ amuala noko yeanlie yeanli kɛ Gyihova tumi ɔ. Nzɔne a yɛsukoa yɛfi neazo ɛhye mɔ anu a? Ɔwɔ kɛ yɛbɔ mɔdenle kɛ yɛbanwu Nyamenle asa wɔ yɛ ɛbɛlabɔlɛ nu.

6, 7. Nzɔne a Gebɛyɔnoma nee Releehabe nwunle ye a?

⁶ Ɛnee Gebɛyɔnoma le ngakyile fi maanle mɔɔ zuozua bɛ la anwo. Bɛnwunle Nyamenle asa. Kɛ anrɛɛ Gebɛyɔnoma nee Yizilayɛma baho la, bɛ nee bɛ yɛle anzodwolɛ ngyekyeleɛ. Nzɔne ati ɔ? Bɛhanle kɛ bɛde Gyihova, nee mɔɔ yeyɛ la amuala anwo edwɛkɛ. (Dwɔhyua 9:3, 9, 10) Ɔle kpalɛ kɛ bɛnwunle kɛ Gyihova a ɛlɛko amaa Yizilayɛma la.

 ⁷ Releehabe noko nwunle Gyihova asa. Ɛnee ɔnle Yizilayɛnli, noko ɔdele kɛzi Gyihova yele ye menli ne vile Yigyibiti la. Mɔɔ Yizilayɛ busiama nwiɔ hɔle ye ɛkɛ la, ɔzele bɛ kɛ: “Meze kɛ [Gyihova] ɛva azɛlɛ ye ɛmaa bɛ.” Ɔliele ɔlile kɛ Gyihova bahola alie ɔ nee ye sua nu amra. Ɔnyianle Gyihova anu diedi ɔnva nwo kɛ ɛnee ɔze kɛ esiane wɔ nu la.—Dwɔhyua 2:9-13; 4:23, 24.

8. Kɛzi Yizilayɛma bie mɔ nwunle Nyamenle asa ɛ?

⁸ Yizilayɛma bie mɔ anyɛ kɛ Ehabe amumuyɛ la, bɛnwunle senle ne mɔɔ Yilaegya nzɛlɛlɛ ne maanle ɔvile anwuma ɔrale la kɛ Nyamenle asa ɔ. Bɛdeanle nu kɛ: “[Gyihova], yemɔ a ɔle Nyamenle a.” (1 Arelemgbunli 18:39) Bɛnwunle ye kɛ Nyamenle tumi ɔ.

9. Kɛ ɔkɛyɛ na yɛanwu Gyihova asa ɛnɛ ɛ?

⁹ Neazo mgbalɛ nee ɛtane mɔɔ yɛzuzu nwolɛ la boa yɛ maa yɛte edwɛkɛ, “nwu Nyamenle” anzɛɛ Nyamenle asa abo. Saa yɛnwu Gyihova nee ye subane ne mɔ a, ɔmaa yɛfa yɛ “adwenle” yɛnwu ye. (Ɛfɛsɛsema 1:18) Ɛhye maa yɛsukoa tete amra nee yɛ mekɛ ye azo amra mɔɔ bɛnwunle kɛzi Gyihova boale ye menli la neazo ne. Noko, asoo yɛlɛ daselɛ mɔɔ kile kɛ Nyamenle ɛlɛboa ye menli ɛnɛ ɔ?

10. Daselɛ boni a kile kɛ Gyihova ɛlɛboa menli ɛnɛ a? (Nea mɔlebɛbo nvoninli ne.)

¹⁰ Yɛlɛ daselɛ dɔɔnwo mɔɔ kile kɛ Gyihova ɛlɛboa ye menli ɛnɛ a. Yɛta yɛte menli dɔɔnwo mɔɔ bɛyɛle nzɛlɛlɛ  kɛ Nyamenle ɛboa bɛ mɔɔ ɔbuale bɛ nzɛlɛlɛ ne la anwo edwɛkɛ. (Edwɛndolɛ 53:2) Kɛ neazo la, mekɛ mɔɔ ɛnee Allan ɛlɛbɔ edwɛkɛ ne nolo wɔ Philippines bɔra ekyi bie azo la, raalɛ bie mɔɔ ɔhɔdole ye la bɔle ɔ bo kɛ ɔsu. Allan se, “Zɔhane nwonlomɔ ne, raalɛ ne zɛlɛle Gyihova kɛ ɔmaa ye Alasevolɛ ne mɔ bie ɛrakpɔla ye.” Mekɛ mɔɔ ɔle kakula bɛlɛra la, ɔ nee Alasevolɛ ne mɔ zukoale Baebolo ne, noko mɔɔ bɛgyale ye bɛhɔle bɔra ne azo la, yeandoa ye debiezukoalɛ ne azo. Kɛzi Nyamenle buale ye nzɛlɛlɛ ne ndɛndɛ la hanle ye ahonle. Yeandwu ɛvolɛ ko yɛɛ ɔyilale ɔ nwo zo ɔmaanle Gyihova a.

11, 12. (a) Kɛzi Gyihova ɛlɛboa ye menli ɛ? (b) Kɛzi Gyihova boale adiema raalɛ ko ɛ?

¹¹ Gyihova azonvolɛ dɔɔnwo ɛnwu kɛ mekɛ mɔɔ bɛgyakyile ninyɛne le kɛ sigalɛte nee nyile ɛtane ɛtane ɛnlonlɛ anzɛɛ nlanwonvoninli ɛnleanlɛ kolaa na bɛarayɛ Gyihova Alasevolɛ la, yeboa bɛ. Bie mɔ se bɛbɔle mɔdenle kɛ bɛgyakyi noko bɛangola. Noko, mɔɔ bɛzɛlɛle Gyihova moalɛ la, ɔvale ye “tumi bedevinli ne” ɔboale bɛ, na akee bɛgyakyile bɛ subane ɛtane ne.—2 Kɔlentema 4:7; Edwɛndolɛ 37:23, 24.

¹² Eza Gyihova boa ye azonvolɛ ɔmaa bɛgyinla ngyegyelɛ nloa. Mɔɔ dole Amy la ɛne. Bɛhanle kɛ ɔboa ɔmaa bɛzi Belemgbunlililɛ Asalo nee edwɛkpatɛlɛvolɛma sua wɔ Pacific bɔra ekyi bie azo. Ɛkɛ ne amaamuo ne le ngakyile, bɛnda bɛnnyia laete nee nzule, awɔdenle ne mɔ azo le nzule ngome, ɛnee ɔ nwo dɔ sua nu, eza ɔda hotɛle sua ekyi bie anu. Kenle ko, ɔdeɛdeanle adiema raalɛ ko mɔɔ ɔ nee ye ɛlɛyɛ gyima la nu. Mɔɔ ɔyɛle la maanle ɔyɛle basaa. Ɔhɔle sua nu la, ɔzɛlɛle Gyihova kɛ ɔboa ye. Mɔɔ bɛzɔle laete ne la, ɔgengale Geleade sukuluma ayia bie anwo edwɛkɛ wɔ Ɛzinzalɛ Arane ne anu. Ɛzinzalɛ Arane ne hanle ngyegyelɛ ko ne ala mɔɔ ɔlɛyia la anwo edwɛkɛ. Ɔse: “Mendele nganeɛ kɛ Gyihova ɛlɛtendɛ ahile me zɔhane nɔe ne. Ɔmaanle menyianle anwosesebɛ menyɛle me gyima ne.”—Edwɛndolɛ 44:25, 26; Ayezaya 41:10, 13.

13. Daselɛ boni a kile kɛ Gyihova ɛboa ye menli yemaa bɛgyinla edwɛkpa ne anzi ɛ?

¹³ Gyihova eza ɛboa ye menli yemaa bɛgyinla edwɛkpa ne anzi na bɛva bɛwula mɛla bo. (Felepaema 1:7, NW) Kɛ neazo la, mekɛ mɔɔ maanle bie mɔ bɔle mɔdenle kɛ bɛtua edwɛkɛhanlɛ gyima ne la, yɛhɔyele yɛ nloa wɔ kɔɔto. Wɔ ewiade ɛleka bie mɔ, yɛli konim 268 wɔ edwɛkɛ mɔɔ bɛvale bɛhɔle kɔɔto mgbole nu la anu, yɛlile nuhua 24 anu konim wɔ Europe Kɔɔto Mɔɔ Nea Sonla Fanwodi Nwo Edwɛkɛ Zo la anu ɔvi ɛvolɛ 2000 ne mɔɔ ba la. Ɔda ali kɛ awie biala ɛnrɛhola ɛnrɛzɔ Nyamenle asa!—Ayezaya 54:17; kenga Ayezaya 59:1.

14. Daselɛ boni bieko a yɛlɛ mɔɔ kile kɛ Nyamenle nee ye menli de a?

 ¹⁴ Edwɛkpa ne mɔɔ bɛlɛbɔ ye nolo wɔ ewiade amuala la noko kile kɛ Nyamenle ɛlɛboa yɛ. (Mateyu 24:14; Gyima ne 1:8) Gyihova moalɛ ti a koyɛlɛ wɔ ye menli mɔɔ bɛvi ewiade ɛleka biala la avinli a. Koyɛlɛ ɛhye le ngakyile! Menli mɔɔ bɛnzonle Gyihova bɔbɔ la ka kɛ: “Amgba Nyamenle nee bɛ de!” (1 Kɔlentema 14:25) Yɛlɛ daselɛ dɔɔnwo mɔɔ kile kɛ amgba Nyamenle nee ye menli de a. (Kenga Ayezaya 66:14.) Na ɛdawɔ mumua ne ɛ? Ɛnwu Gyihova asa wɔ wɔ ɛbɛlabɔlɛ nu ɔ?

15. Nzɔne ati a ɔdwu mekɛ ne bie a yɛnrɛnwu Gyihova asa wɔ yɛ ɛbɛlabɔlɛ nu ɛ?

¹⁵ Ɔdwu mekɛ ne bie a, yɛnrɛnwu Nyamenle asa wɔ yɛ ɛbɛlabɔlɛ nu. Nzɔne ati ɔ? Saa yɛlɛyia ngyegyelɛ dɔɔnwo a, bie a yɛ rɛle bavi kɛ Gyihova ɛboa yɛ fane dɔɔnwo. Ɛhye bie dole Yilaegya. Ɛnee ɔlɛ akɛnrasesebɛ, noko mekɛ mɔɔ ɛnee Belemgbunli raalɛ Gyɛzɛbɛle kpondɛ kɛ ɔku ye la, ye ahonle dule. Ɛkɛ ne ala, ɔ rɛle vile kɛzi Gyihova boale ye la. Baebolo ne hanle kɛ, Yilaegya anwo lɔle ewule. (1 Arelemgbunli 19:1-4) Nienwu a anrɛɛ ɔbahola yeanyia moalɛ nee akɛnrazilɛ a? Ɛnee ɔwɔ kɛ ɔfa ɔ nwo ɔto Gyihova anwo zo!—1 Arelemgbunli 19:14-18.

16. Saa yɛlɛyia ngyegyelɛ a, kɛ ɔkɛyɛ na yɛanwu Nyamenle ɛ?

¹⁶ Dwobu vale ye adwenle ziele ye ngyegyelɛ ne azo somaa yemɔti yeannwu tɛnlabelɛ ne kɛ mɔɔ Gyihova nwunle ye la. (Dwobu 42:3-6) Ɔdwu mekɛ ne bie a, yɛdayɛ noko yɛ ngyegyelɛ ne ɛnrɛmaa yɛnrɛnwu Nyamenle.  Nzɔne a bahola aboa yɛ yeamaa yɛanwu mɔɔ Nyamenle yɛ maa yɛ la ɛ? Ɔwɔ kɛ yɛdwenledwenle mɔɔ Baebolo ne ka ye wɔ yɛ ngyegyelɛ ne mɔ anwo la anwo. Yemɔ bamaa yɛanwu Gyihova kpalɛ, na yɛbahola yɛaha kɛ: “Me nzo yɛɛ menvale mendele wɔ nganeɛ a, na kɛkala, yemɔ menwu ɛ nyunlu.”

17, 18. (a) Kɛ ɔkɛyɛ na wɔanwu Gyihova asa wɔ wɔ ɛbɛlabɔlɛ nu ɛ? (b) Anwubielɛ boni a kile kɛ Nyamenle ɛlɛboa yɛ ɛnɛ a?

¹⁷ Kɛ ɔkɛyɛ na wɔanwu Gyihova asa wɔ wɔ ɛbɛlabɔlɛ nu ɛ? Bɛmaa yɛzuzu neazo nnu anwo. Mɔɔ limoa, ɛbahola wɔanwu ye kɛ Gyihova a boale wɔ ɔmaanle ɛnwunle nɔhalɛ ne a. Mɔɔ tɔ zo nwiɔ, bie a ɛbahakye kɛ ɛdiele ɛdendɛlɛ bie wɔ debiezukoalɛ bo na ɛhanle kɛ, “Mɔɔ ɛnee mehyia nwolɛ la ɛne!” Mɔɔ tɔ zo nsa, bie a wɔnwu ye kɛ Gyihova buale wɔ nzɛlɛlɛ bie. Mɔɔ tɔ zo nna, bie noko a ɛnee ɛkpondɛ kɛ ɛyɛ dɔɔnwo ɛmaa Gyihova na ɛnwunle kɛzi ɔboale wɔ ɔmaanle ɛdwule wɔ bodane nwo la. Mɔɔ tɔ zo nnu, bie a ɛgyakyile gyima mɔɔ ɛnee ɛyɛ la ɔluakɛ ɔmmaa ɛnnyia adenle ɛnzonle Gyihova na ɛnwunle kɛ yeli ɛwɔkɛ mɔɔ ɔbɔle kɛ: “Menrɛgyakyi bɛ ɛlɛ” la azo. (Hibuluma 13:5) Saa yɛ nee Gyihova lɛ agɔnwolɛvalɛ kpalɛ a, yɛbanwu ɔ sa wɔ yɛ ɛbɛlabɔlɛ nu.

¹⁸ Adiema raalɛ Sarah mɔɔ ɔvi Kenya la se: “Menyɛle sukoavo bie mɔɔ ɛnee mete ngane kɛ ɔ nye ɛnlie ye Baebolo ɛzukoalɛ ne anwo la anwo nzɛlɛlɛ. Membizale Gyihova saa mengyakyi debiezukoalɛ ne a. Mengale ‘Amen’ ala la, yɛɛ me fonu ne zunle a. Baebolo sukoavo ne bizale me saa ɔbahola ɔ nee me ahɔ debiezukoalɛ a! Ɔzinle me nwo!” Saa yɛnea mɔɔ Nyamenle ɛlɛyɛ amaa yɛ la a, yɛbanwu kɛzi ɔlɛboa yɛ la. Rhonna, adiema raalɛ bie mɔɔ ɔvi Asia la se, ɔdie mekɛ na yɛanwu kɛzi Gyihova ɛlɛboa yɛ la. Ɔtoa zo kɛ: “Saa ɛyɛ ye zɔhane a, ɛbanwu kɛzi Gyihova anye die yɛ nwo la!”

19. Nzɔne bieko a ɔwɔ kɛ yɛyɛ na yɛanwu Nyamenle a?

¹⁹ Gyisɛse hanle kɛ, ɔwɔ kɛ menli mɔɔ “bɛbanwu Nyamenle” la maa bɛ “ahonle nu te.” (Mateyu 5:8) Nzɔne a ɔkile a? Ɔwɔ kɛ yɛmaa yɛ nzuzulɛ nwo te na yɛgyakyi ɛtaneyɛlɛ. (Kenga 2 Kɔlentema 4:2.) Wɔ edwɛkɛ ɛhye anu, yɛnwu ye kɛ amaa yɛanwu Nyamenle la, ɔwɔ kɛ yɛmia agɔnwolɛvalɛ mɔɔ yɛ nee ye lɛ la anu. Wɔ edwɛkɛ bieko anu, yɛbazuzu kɛzi diedi bahola amaa yɛanwu Gyihova asa kpalɛ wɔ yɛ ɛbɛlabɔlɛ nu la anwo.