Nyamenle Mɔɔ Mebikye Ye La Ɛboa Me Kpalɛ
MƆƆ menyianle ɛvolɛ ngɔnla la, meanyɛ tendenle bieko. Menyia ɛvolɛ 43, na me tendenle le mita ko ala. Mɔɔ me awovolɛ nwunle kɛ menrɛyɛ tendenle bieko la, bɛhanle kɛ menyɛ gyima ɛsesebɛ amaa meandwenle me tendenle ne anwo. Amaa dahuu meanyia debie meayɛ la, mendɔnenle mbaka ma wɔ yɛ sua ne anyunlu. Ɛnee medi ɛkɛ ne eni ɔti ɔmaa menli dɔɔnwo batɔ bie.
Noko, gyima ɛsesebɛ ɛyɛlɛ ammaa meangakyi. Metɛde adwola, yemɔti saa mekɔ efiade bie anu a, ɔwɔ kɛ metende na ahenle mɔɔ de ɛkɛ la anwu me. Ɛnee ɔzɔho kɛ bɛyɛle debie biala bɛmaanle menli mɔɔ bɛtɛla me tendenle fane nwiɔ la. Ɔyɛle me nyane, noko mɔɔ menyianle ɛvolɛ 14 la, kɛzi mete nganeɛ la hakyile.
Kenle ko, Gyihova Alasevolɛ mraalɛ nwiɔ radɔle mbakama ne bie na bɛhanle kɛ bɛ nee me bazukoa Baebolo ne. Membanwunle ye kɛ Gyihova nee ye bodane ne mɔɔ mebanwu ye la anwo hyia kpalɛ tɛla me tendenle ne. Yemɔ boale me kpalɛ. Me nye raliele Edwɛndolɛ 73:28 anwo kpalɛ. Zɔhane ngyɛnu ne foa mɔɔ limoa la se: “Ɔle kpalɛ kɛ menwɔbikye Nyamenle.”
Arɛlevilɛ nu, yɛ abusua ne dule vile Côte d’Ivoire hɔle Burkina Faso na me ɛbɛlabɔlɛ ne hakyile kpalɛ. Mɔɔ ɛnee yɛwɔ Côte d’Ivoire la, ɛnee menli ta nwu me wɔ ɛleka mɔɔ metɔne me mbakama ne la. Noko yɛhɔle Burkina Faso la, ɛnee mele ɛyɛvolɛ na bɛnwunle me kɛ mele sonla ngakyile bie. Ɛnee menli nea me kpoonwu, yemɔti ɔmaanle menveale sua nu mengyɛle. Akee mengakyele kɛzi ɔle kpalɛ kɛ menwɔbikye Gyihova la. Mengɛlɛle Gyihova Alasevolɛ Bɛtɛle ne kɛlata na bɛmaanle edwɛkpatɛlɛvolɛ bie mɔɔ bɛfɛlɛ ye Nani la rale me ɛkɛ.
Yɛ kpalɛ ne azo adenle ne le teteletetele, na ɔdwu fɔsɛlɛ nu na ɛlua nu a, ɛnee ɛlɛmi. Saa Nani nee me ɛlɛba arazukoa a, ye moto ne tɔ aze fane dɔɔnwo noko ɔ sa nu ando. Kenle ko, ɔhanle kɛ ɔ nee me bahɔ debiezukoalɛ. Ɛnee ɛhye kile kɛ ɔwɔ kɛ mefinde, yɛɛ menli noko banlea me kpoonwu. Eza moto ne mɔɔ ɔbava me yeadɛnla ɔ nzi la bamaa ye ɛhanlɛ ne akee ayɛ se kpalɛ. Noko menliele mendole nu na mengakyele ngɛlɛlera ne mɔɔ me nye die nwo la foa ne mɔɔ tɔ zo nwiɔ la: “Meyɛ Awulae Nyamenle ne me ɛvealeka.”
Ɔyɛ a me nee Nani yɛtɔ aze wɔ ndɛtɛlɛ ne anu, noko kɛmɔ yɛ nye die debiezukoalɛ ne anwo la ati, yɛammaa yeangyegye yɛ. Mengɔle debiezukoalɛ la, bɛannea me kpoonwu kɛ mɔɔ melua sua zo a bɛnea me la, yemɔti ɔmaanle me nye liele! Ye siane ngɔnla anzi, bɛzɔnenle me.
Ngɛlɛlera ne mɔɔ me nye die nwo la foa mɔɔ tɔ zo nsa la se, “amaa meabɔ wɔ gyima ne mɔ nolo.” Ɛnee meze kɛ daselɛlilɛ ɛhɔlɛ bayɛ se amaa me kpalɛ. Mekakye mekɛ mɔɔ limoa mɔɔ mengɔle daselɛlilɛ wɔ azua nu la. Ngakula nee mgbanyinli amuala nleanle me kpoonwu, bɛdoale me na bɛvale kɛzi metia la bɛzelele me. Yemɔ gyegyele me kpalɛ, noko mengakyele me nwo kɛ, kɛ mɔɔ mehyia Paladaese ne anwo la, bɛdabɛ noko bɛhyia nwo, na yemɔ maanle mengyinlanle ɔ nloa.
Mendɔle basekɛ agyakɛ nsa bie mɔɔ bɛfa bɛ sa bɛka la amaa yeaboa me. Saa yɛlɛfo boka a, ahenle mɔɔ me nee ye lua daselɛlilɛ nu la pia me na saa yɛlɛtolo a, yeawulu yeadɛnla zo. Ɔnva nwo kɛ mɔlebɛbo ne ɛnee daselɛlilɛ ne yɛ se la, yeangyɛ ɔmaanle me nye liele kpalɛ, yemɔti wɔ 1998 ne anu menyɛle dahuu adekpakyelɛnli.
Menyɛle Baebolo ɛzukoalɛ dɔɔnwo, na bɛzɔnenle sukoavoma zɔhane anu nna. Eza me mediema mraalɛ ne mɔ ko vale nɔhalɛ ne! Saa mete kɛzi awie mɔ ɛlɛnyia anyuhɔlɛ la a, ɔmaa menyia anwosesebɛ. Kenle ko bie mɔɔ ɛnee ebunlu ɛhye me la, menyianle kɛlata bie menvile Côte d’Ivoire. Me nee yunivɛsiti sukoavo bie bɔle anlenkɛnloa Baebolo ɛzukoalɛ bo wɔ Burkina Faso na mengakyile debiezukoalɛ ne memaanle adiema nrenyia bie. Nzinlii sukoavo ne hɔle Côte d’Ivoire. Mɔɔ mendele kɛ yerayɛ nolobɔlɛnli mɔɔ bɛtɛsɔnenle ye la, me nye liele!
Kɛzi menea me nwo ɛ? Ahyehyɛdeɛ bie mɔɔ bɛboa wuliravolɛma la hilele me ninyɛne ɛkpomgbalɛ. Kilehilevolɛma ne ko nwunle kɛzi meyɛ gyima la na ɔhanle kɛ: “Ɔwɔ kɛ yɛkile wɔ kɛzi bɛyɛ saminla la.” Na bɛhilele me. Meyɛ saminla ne wɔ sua nu. Menli anye die me saminla ne anwo na bɛka nwolɛ edwɛkɛ bɛkile awie mɔ. Mefa me moto agyakɛ nsa ne a mefa mekɔmaa menli mɔɔ bɛkpondɛ bie la a.
Wɔ 2004, ɛnee ɔwɔ kɛ megyakyi adekpakyelɛ gyima ne ɔluakɛ ɛnee me nzi yɛ me nyane kpalɛ. Noko mekɔ daselɛlilɛ dahuu.
Menli ka kɛ bɛnwu kɛ mekulo ɛzelekɛ kpalɛ. Ɔwɔ kɛ memaa me nye die ɔluakɛ Nyamenle mɔɔ mebikye ye la ɛboa me kpalɛ.
