Nyamenle Edwɛkɛ Ne Mɔɔ Bɛhile Ɔ Bo Kpalɛ
“Nyamenle Edwɛkɛ ne gyi zo.”—HIBULUMA 4:12.
1. (a) Gyima boni a Nyamenle vale maanle Adam a? (b) Ɔvi Adam mekɛ zo mɔɔ ba la, kɛzi Nyamenle menli ɛlɛfa aneɛ ahyɛlɛdeɛ ne ali gyima ɛ?
GYIHOVA NYAMENLE vale aneɛ ahyɛlɛdeɛ ne maanle alesama. Nyamenle maanle Adam gyima wɔ Yidɛn tola ne anu kɛ ɔtoto nane ne mɔ aluma. Adam donle nane biala duma mɔɔ ɔfɛta ye. (Mɔlebɛbo 2:19, 20) Ɔvi mekɛ zɔhane mɔɔ ba la, Nyamenle menli ɛlɛdua aneɛ zo aye Gyihova ayɛlɛ na bɛaha ɔ nwo edwɛkɛ bɛahile awie mɔ. Kenlensa ye, Nyamenle menli ɛlɛdua aneɛ ahyɛlɛdeɛ ne azo ahile Baebolo ne abo amaa menli dɔɔnwo ahola azukoa Gyihova anwo debie.
2. (a) Ngyinlazo boni mɔ a New World Bible Translation Kɔmatii ne vale lile gyima a? (b) Nzɔne a yɛbazuzu nwo wɔ edwɛkɛ ɛhye anu a?
2 Yɛlɛ Baebolo dɔɔnwo, noko bɛhile bie mɔ abo kpalɛ bɛdɛla bie mɔ. Amaa bɛahile Baebolo ne abo kpalɛ la, New World Bible Translation Kɔmatii ne zile kpɔkɛ kɛ bɛbava ngyinlazo nsa ɛhye bɛali gyima: (1) Bɛdi Nyamenle duma ne eni na bɛamaa yeavinde ye Edwɛkɛ ne anu dɔɔnwo kɛ tete ɛdeɛ ne la. (Kenga Mateyu 6:9.) (2) Saa ɔbayɛ boɛ a, bɛbahile alimoa edwɛkɛ ne kpɔkɛ ko biala abo kɛ mɔɔ edwɛkɛ agbɔkɛ ne abo kile la. Ɛleka mɔɔ ɔnrɛyɛ boɛ la, bɛbahile ndelebɛbo mɔɔ wɔ nu la abo. (3) Bɛbava edwɛkɛ agbɔkɛ mɔɔ ye ɛgengalɛ nee ɔ bo ɛdelɛ ɛnyɛ se la bɛahile ɔ bo. * (Nea ɔ bo ɛkɛ edwɛkɛ ne.) (Kenga Nihɛmaya 8:8, 12.) Menli mɔɔ kile New World Translation ne abo la ɛva ngyinlazo nsa ɛhye ɛli gyima wɔ aneɛ mɔɔ bo 130 la anu. Wɔ edwɛkɛ ɛhye anu, yɛbanwu kɛzi bɛvale ngyinlazo ɛhye mɔ bɛlile gyima wɔ 2013 New World Translation fofolɛ ne anu nee aneɛ gyɛne mɔɔ bɛlɛkile ɔ bo bɛahɔ nu anu la.
BAEBOLO MƆƆ DI NYAMENLE DUMA NE ENI
3, 4. (a) Nienwu a yɛbanwu Tetragrammaton ne a? (b) Kɛzi bɛyɛ Nyamenle duma ne wɔ Baebolo dɔɔnwo anu ɛ?
3 Bɛvale Hibulu ngɛlɛlera nna ne mɔɔ bɛfɛlɛ ye Tetragrammaton la bɛhɛlɛle Nyamenle duma ne. Yɛbahola yɛanwu Tetragrammaton ne wɔ Hibulu bɛsanloangɛlɛlera mɔɔ bɛhyɛ kpalɛ mɔɔ bie a le Nyevile Wulera Nwomamobɔleɛ ne la anu. Eza yɛbahola yɛanwu Tetragrammaton ne bie wɔ Giliki Septuagint ne anu. Ɔka ɛvolɛ 200 na bɛawo Kelaese la yɛɛ bɛyɛle septuagint ne a, yɛɛ bɛdoale zolɛ too ɔhɔdwule Kelaese ewule nzi ɛvolɛ 100. Saa menli nwu fane dodo mɔɔ Nyamenle duma ne finde tete bɛsanloangɛlɛlera ne anu la a, bɛ nye die kpalɛ.
Saa menli nwu fane dodo mɔɔ Nyamenle duma ne finde tete bɛsanloangɛlɛlera ne anu la a, bɛ nye die kpalɛ
4 Ɔda ali kɛ ɔwɔ kɛ Nyamenle duma ne finde Baebolo ne anu. Noko bɛnva Nyamenle duma ne bɛnli gyima wɔ Baebolo dɔɔnwo anu. Kɛ neazo la, bɛyele New World Translation of the Christian Greek Scriptures ne la, ye ɛvolɛ nwiɔ pɛ anzi yɛɛ bɛyele American Standard Version fofolɛ ne a. Ɛnee Nyamenle duma ne wɔ 1901 ɛdeɛ ne anu, noko yeanvinde 1952 ɛdeɛ ne anu. Nzɔne ati ɔ? Menli mɔɔ hilele ɔ bo la dele nganeɛ kɛ “ɔnfɛta fee” kɛ bɛbava Nyamenle duma ne bɛali gyima. Zɔhane ala a Baebolo dɔɔnwo mɔɔ bɛhile ɔ bo bɛhɔ Nrelenza nee aneɛ gyɛne nu la noko de a.
5. Nzɔne ati a ɔwɔ kɛ yɛfa Nyamenle duma ne yɛdi gyima wɔ Baebolo ne anu a?
5 Saa edwɛbohilelɛma fa Nyamenle duma ne di gyima anzɛɛ bɛanva bɛanli gyima a, nwolɛ hyia ɔ? Ɛhɛe! Gyihova mɔɔ le Baebolo ne Kɛlɛvolɛ la kpondɛ kɛ menli nwu ye duma ne. Ɔwɔ kɛ edwɛkɛbohilelɛnli kpalɛ biala nwu mɔɔ buluku kɛlɛvo bie kulo la na ɔmaa yemɔ ka ye kpɔkɛzilɛ wɔ edwɛbohilelɛ ne anu. Ngɛlɛlera dɔɔnwo maa yɛnwu kɛ Nyamenle duma ne anwo hyia na ɔwɔ kɛ yɛdi ye eni. (Adendulɛ 3:15; Edwɛndolɛ 83:18; 148:13; Ayezaya 42:8; 43:10; Dwɔn 17:6, ɔ bo ɛkɛ edwɛkɛ) Gyihova sunsum ne maanle Baebolo kɛlɛvoma vale ye duma ne lile gyima fane dɔɔnwo wɔ tete bɛsanloangɛlɛlera ne anu. (Kenga Yizikeɛle 38:23.) Yemɔti saa edwɛbohilelɛma ye Nyamenle duma ne fi Baebolo ne anu a, ɔkile kɛ bɛmbu Gyihova.
6. Nzɔne ati a Nyamenle duma ne ɛvinde ɛleka nsia bieko wɔ New World Translation fofolɛ ne anu ɛ?
6 Ɛnɛ, daselɛ dɔɔnwo wɔ ɛkɛ mɔɔ ɔmaa yɛnwu kɛ ɔwɔ kɛ yɛfa Gyihova duma ne yɛdi gyima a. Nyamenle duma ne finde 2013 New World Translation fofolɛ ne anu 7,216. Ɛhye kile kɛ bɛva nsia bɛboka nwo. Bɛva nnu bɛboka nwo ɔluakɛ bɛnwu Nyamenle duma ne wɔ Nyevile Wulera Nwomamobɔleɛ ne mɔɔ bɛyɛ ye kenlensa ye la anu. * (Nea ɔ bo ɛkɛ edwɛkɛ ne.) Nnu ɛhye wɔ 1 Samoɛle 2:25; 6:3; 10:26; 23:14, 16. Bɛvale mɔɔ tɔ zo nsia mɔɔ wɔ Maanlebuvolɛma 19:18 la bɛbokale nwo ɔlua neɛnleanu bieko mɔɔ bɛyɛle wɔ tete Baebolo bɛsanloangɛlɛlera mɔɔ bɛdie bɛdi anu la ati.
7, 8. Duma Gyihova abo kile duzu?
7 Nɔhalɛ Kilisienema te nganeɛ kɛ ɔwɔ kɛ bɛte mɔɔ Nyamenle duma ne kile la abo kpalɛ. Ye duma ne abo kile kɛ “Ɔmaa Ɔyɛ Ɛkɛ.” * (Nea ɔ bo ɛkɛ edwɛkɛ ne.) Alimoa ne, yɛ mbuluku ne mɔ vale Adendulɛ 3:14, NW mɔɔ ka kɛ: “Mebayɛ Me Nwo Mɔɔ Mekulo Kɛ Meyɛ La” hilele mɔɔ Nyamenle duma ne kile la abo. Bɛhilehilele nu wɔ 1984 New World Translation ne anu kɛ Gyihova yɛ ɔ nwo kɛzi ɔkulo kɛ ɔyɛ ɔ nwo la amaa yeali ye bodane nwo gyima. * (Nea ɔ bo ɛkɛ edwɛkɛ ne.) Noko 2013 ɛdeɛ ne hilele nu kɛ: “Ɔwɔ nuhua kɛ edwɛkɛ ɛhye fane duma Gyihova ne anwo ɛdeɛ, noko tɛ ɔ muala anu a ɔdaye mumua ne ɔyɛ ɔ nwo kɛzi ɔkulo la. Eza ɔfale kɛzi ɔmaa ye abɔdeɛ di ye bodane nwo gyima la anwo.”
8 Eza Gyihova maa ye abɔdeɛ yɛ mɔɔ ɔkulo la. Kɛ neazo la, Nyamenle maanle Nowa bobɔle ɛlɛne, Bɛzalii yɛle dwinvolɛ mɔɔ ɛbe, Gedɛyɔn yɛle kovolɛ kpole yɛɛ Pɔɔlo yɛle edwɛkpatɛlɛvolɛ. Nyamenle duma ne kile debie titili maa ye menli ne, na yemɔti a New World Bible Translation Kɔmatii ne ɛmaa Nyamenle duma ne ɛvinde Baebolo ɛhye anu la.
9. Nzɔne ati a Baebolo ne mɔɔ bɛkile ɔ bo bɛahɔ aneɛ gyɛne anu la anwo ɛrahyia a?
9 Bɛye Nyamenle duma ne bɛvi Baebolo dɔɔnwo anu. Akee bɛva amodinli “Awulae” anzɛɛ bozonle bie duma bɛzie ɔ gyakɛ anu. Yemɔti a Neazo Eku ne ɛnwu kɛ ɔwɔ kɛ awie biala nyia Baebolo mɔɔ di Nyamenle duma ne eni la. (Kenga Malakae 3:16.) Kɛkala, Gyihova duma ne finde New World Translation ne mɔɔ bɛhile ɔ bo bɛhɔ aneɛ mɔɔ bo 130 anu la anu.
BAEBOLO MƆƆ BƐHILE Ɔ BO KPALƐ NA NUHUA LA ƐKƐ
10, 11. Ngyegyelɛ boni mɔ a bɛyia wɔ New World Translation ne mɔɔ bɛlɛkile ɔ bo bɛahɔ aneɛ gyɛne nu la anu a?
10 Bɛyia ngyegyelɛ dɔɔnwo wɔ Nrelenza New World Translation ne mɔɔ Nolobɔvo ne 9:10 nee ngyɛnu gyɛne gyɛne anu. Edwɛkɛkpɔkɛ ɛhye finde Nrelenza Baebolo gyɛne gyɛne noko anu. Noko bɛangola bɛanva bɛanli gyima wɔ aneɛ dɔɔnwo mɔɔ bɛlɛkile New World Translation ne abo bɛahɔ nu la anu, ɔluakɛ menli dɔɔnwo mɔɔ ka aneɛ ɛhye mɔ la ɛnze Hibulu edwɛkɛkpɔkɛ zɔhane. Ɔnle bɛ edwɛbohilelɛ mbuluku nu, yɛɛ bie mɔ adwenle yɛle bɛ bɔbɔ kɛ ɔle ɛleka bie duma. Ɛhye ati, bɛmaanle edwɛbohilelɛma adenle kɛ bɛhile Hibulu edwɛkɛkpɔkɛ “Sheol” yɛɛ Giliki edwɛkɛkpɔkɛ “Hades” abo kɛ “Nla” anzɛɛ “Ɛbolɔ.” Ɛhye le ngilebɛbo kpalɛ na ɔmaa edwɛkɛ ne anu da ɛkɛ.
bɛlɛkile ɔ bo bɛahɔ aneɛ gyɛne anu la anu. Kɛ neazo la, Nrelenza ɛdeɛ ne fa Hibulu edwɛkɛkpɔkɛ “Sheol” di gyima wɔ11 Ɛnee ɔyɛ se kɛ bɛbahile Hibulu nee Giliki edwɛkɛ agbɔkɛ mɔɔ kile “ɛkɛla” la abo bɛahɔ aneɛ bie mɔ anu. Wɔ aneɛ ɛhye mɔ anu, edwɛkɛ kpɔkɛ mɔɔ kile “ɛkɛla” la abo kile nwomenle anzɛɛ debie mɔɔ saa awie wu a ɔfi sonlabaka ne anu la. Amaa edwɛkɛ ne anu ala ɛkɛ la, bɛmaanle edwɛbohilelɛma adenle kɛ bɛnlea kɛzi edwɛkɛ ne mɔɔ bɛlɛkile ɔ bo la de la na bɛhile edwɛkɛkpɔkɛ “ɛkɛla” ne abo. Ɛbahola wɔanwu kɛzi bɛhilehile “ɛkɛla” ne anu la wɔ New World Translation of the Holy Scriptures—With References ne mokanwo ne anu. Amaa Baebolo ne ɛgengalɛ anyɛ se na bɛade ɔ bo ndɛndɛ la, bɛva Hibulu nee Giliki edwɛkɛ agbɔkɛ ne mɔ anwo edwɛkɛ dɔɔnwo mɔɔ baboa la bɛwula ɔ bo ɛkɛ edwɛkɛ ne mɔ anu wɔ Baebolo fofolɛ ne anu.
Kɔmatii ne nleɛnleanle kpuya dɔɔnwo mɔɔ menli mɔɔ bɛlɛkile Baebolo ne abo bɛahɔ aneɛ gyɛne nu bizale la anu kpalɛ
12. Nzenzaleɛ boni bieko a bɛyɛ ye wɔ 2013 New World Translation ne anu a?
12 Kpuya mɔɔ edwɛbohilelɛma bizale la maanle bɛnwunle Baebolo ne anu edwɛkɛ bie mɔ mɔɔ bie a bɛnrɛde ɔ bo kpalɛ la. Yemɔti wɔ September 2007, Neazo Eku ne liele dole nu kɛ bɛnleɛnlea Nrelenza ɛdeɛ ne anu bieko. Mɔɔ kɔmatii ne ɛlɛneɛnlea Baebolo ne anu bieko la, bɛnleɛnleanle kpuya dɔɔnwo mɔɔ menli mɔɔ bɛlɛkile Baebolo ne abo bɛahɔ aneɛ gyɛne nu bizale la anu kpalɛ. Bɛvale adwuleso Nrelenza edwɛkɛ agbɔkɛ bɛziele mɔɔ ɛkpa nwo la agyakɛ anu, ɛhye ɛtɛmaanle ye ndelebɛbo ne ɛtɛkakyile yɛɛ ye ɛgengalɛ nee ɔ bo ɛdelɛ ɛnyɛ se. Baebolo ne mɔɔ bɛhile ɔ bo bɛhɔ aneɛ gyɛne anu kenlensa ye la noko ɛboa ɛmaa bɛyɛ nzenzaleɛ mɔɔ fɛta la wɔ Nrelenza edwɛkɛ ne anu.—BƐHILE NWOLƐ ANYEZƆLƐ KPOLE
13. Kɛzi menli dɔɔnwo te nganeɛ wɔ 2013 Baebolo ne anwo ɛ?
13 Kɛzi menli dɔɔnwo te nganeɛ wɔ Nrelenza New World Translation fofolɛ ne anwo ɛ? Mediema dɔɔnwo ɛhɛlɛ Gyihova Alasevolɛ Bɛtɛle ne mɔɔ wɔ Brooklyn, New York la bɛhile nwolɛ anyezɔlɛ. Bɛ nuhua dɔɔnwo te nganeɛ kɛ adiema raalɛ ko mɔɔ ɔhɛlɛle kɛ: “Baebolo ne le kɛ ɛlɛka mɔɔ agudeɛ mɔɔ sonle bolɛ ɛyi ye tɔ la. Saa ɛkenga Gyihova Edwɛkɛ ne wɔ 2013 Baebolo fofolɛ ne anu a, ɔle kɛ asɛɛ ɛlɛye agudeɛ ne wɔagua aze na akee wɔanlea kɛzi ko biala le kɛnlɛma la. Baebolo ne mɔɔ kɛkala ɔ bo ɛdelɛ ɛnyɛ se la ɛboa ɛmaa menwu Gyihova mɔɔ ɔle kɛ selɛ mɔɔ yeva ɔ sa yedo me kɔme na ɔlɛkenga ye edwɛkɛ ne mɔɔ ka ahonle yeahile me la kpalɛ.”
14, 15. Kɛzi menli te nganeɛ wɔ New World Translation ne mɔɔ bɛhile ɔ bo bɛhɔ aneɛ gyɛne anu la anwo ɛ?
14 Menli mɔɔ ka aneɛ gyɛne la noko ɛhile New World Translation ne anwo anyezɔlɛ. Nrenyia kpanyinli ko mɔɔ ɔvi Sofia, Bulgaria, la hanle Bulgaria ɛdeɛ ne anwo edwɛkɛ kɛ: “Megenga Baebolo ne ɛvolɛ dɔɔnwo, noko metɛkengale Baebolo mɔɔ ɔ bo ɛdelɛ ɛnyɛ se na ɔka ahonle
zɛhae la ɛlɛ.” Adiema raalɛ ko mɔɔ ɔvi Albania la hɛlɛle kɛ: “Nea kɛzi Nyamenle Edwɛkɛ ne ɛgengalɛ yɛ fɛ wɔ Albania aneɛ nu a! Ɔle nwolɛ adenle kpole kɛ Gyihova ɛlɛtendɛ ahile yɛ wɔ yɛ sua zo aneɛ nu la!”15 Wɔ maanle dɔɔnwo anu, Baebolo ne bolɛ yɛ se anzɛɛ ɔyɛ se kɛ ɛbanyia bie. Saa ɛnyia Baebolo ne bie a, ɔle nyilalɛ kpole! Rwanda amaneɛbɔlɛ bie hanle kɛ: “Mekɛ tendenle mɔɔ ɛpɛ nu la, menli dɔɔnwo mɔɔ ɛnee mediema ne mɔ nee bɛ sukoa la annyia anyuhɔlɛ ɔluakɛ ɛnee bɛnlɛ Baebolo. Ɛnee bɛngola mɔɔ asɔne ne tɔne ye la bie tɔ. Ɔyɛ noko a bɛnde ngyɛnu bie mɔ abo kpalɛ, na ɛhye ammaa bɛannyia anyuhɔlɛ.” Mɔɔ Rwandama asa hanle New World Translation ne bie wɔ bɛ aneɛ nu la, abusua bie mɔɔ bɛlɛ ngakula nna mɔɔ bɛtɛdwule ɛvolɛ 20 la hanle kɛ: “Yɛda Gyihova nee akɛlɛ nɔhavo nee nrɛlɛbɛvolɛ ne ase kpalɛ kɛ bɛmaa yɛ sa ɛha Baebolo ɛhye la. Yɛle ehyiavolɛma yɛɛ yɛnlɛ ezukoa mɔɔ yɛfa yɛadɔ Baebolo yɛamaa awie biala a. Noko kɛkala yɛ nuhua biala lɛ ɔ ti anwo Baebolo. Yɛkpondɛ kɛ Gyihova nwu kɛ yɛ nye sɔ Baebolo ne, yemɔti yɛbɔ nu yɛkenga ye dahuu.”
16, 17. (a) Nzɔne a Gyihova kpondɛ kɛ ye menli nyia a? (b) Nzɔne a ɔwɔ kɛ yɛbɔ kpɔkɛ kɛ yɛbayɛ a?
16 Bɛbahile New World Translation fofolɛ ne abo bɛahɔ aneɛ dɔɔnwo anu kenle bie. Seetan ɛlɛbɔ mɔdenle kɛ ɔsi gyima ɛhye adenle, noko yɛze kɛ Gyihova kpondɛ kɛ ye menli ne amuala tie ye wɔ mekɛ mɔɔ ɔlɛtendɛ yeahile bɛ wɔ aneɛ mɔɔ nuhua la ɛkɛ na bɛte ɔ bo anu la. (Kenga Ayezaya 30:21.) Ɔnrɛhyɛ “[Gyihova] anwo adwenle bayi azɛlɛ ye tɛkɛɛ kɛ nzule mɔɔ wɔ nyevile nu la.”—Ayezaya 11:9.
17 Bɛmaa yɛbɔ kpɔkɛ kɛ yɛbava ahyɛlɛdeɛ biala mɔɔ vi Gyihova ɛkɛ, yɛɛ Baebolo ɛhye mɔɔ di ye duma ne eni la yɛali gyima. Maa ɔlua ye Edwɛkɛ ne azo ɔ nee wɔ ɛdendɛ dahuu. Ɔbahola yeadie yɛ nzɛlɛlɛ ne mɔ amuala kpalɛ. Adwelielilɛ ɛhye bamaa yɛanwu Gyihova kpalɛ, na yɛahulo ye kpole.—Dwɔn 17:3.
“Ɔle nwolɛ adenle kpole kɛ Gyihova ɛlɛtendɛ ahile yɛ wɔ yɛ sua zo aneɛ nu la!”
^ ɛden. 2 Nea Appendix A1 mɔɔ wɔ New World Translation fofolɛ ne nee edwɛkɛ “How Can You Choose a Good Bible Translation?” mɔɔ wɔ The Watchtower May 1, 2008 anu la.
^ ɛden. 6 Nyevile Wulera Nwomamobɔleɛ ne tɛla Hebrew Masoret ne ɛvolɛ 1,000.
^ ɛden. 7 Neɛnleanu mbuluku bie mɔ fa ngilenu ɛhye maa, noko tɛ menli mɔɔ sukoa Baebolo ne anwo debie la amuala a die to nu a.
^ ɛden. 7 Nea New World Translation of the Holy Scriptures—With References, Appendix 1A “The Divine Name in the Hebrew Scriptures,” mukelɛ 1561.