ƐBƐLABƆLƐ NU EDWƐKƐ
Me Nee Nyamenle Nee Me Mame Avinli Yɛle Kpalɛ
ME MAME bizale me kɛ: “Nzɔne ati a ɛmkpondɛ kɛ ɛsonle ɛ nlenyia mɔ ɛ? Ɛnze kɛ bɛdabɛ ti a ɛde ngoane nu ɔ? Ɛ nye ɛnzɔ mɔɔ bɛyɛ bɛmaa wɔ la ɔ? Nzɔne ati a ɛkpondɛ kɛ ɛbu ɛ nye ɛgua amaamuo mɔɔ bɛva bɛgyakyi yɛ la azo ɛ? Saa wɔanli yɛ nlenyia mɔ eni a, ɛnee ɛlɛkile kɛ nvasoɛ ɛnle yɛ ɛzonlenlɛ ne azo.” Mɔɔ me Mame hanle edwɛkɛ ɛhye wiele la, ɔbɔle ɔ bo kɛ ɔsu.
Kolaa na ɛhye azi la, ɛnee Gyihova Alasevolɛ ɛha ɛhile me mame kɛ bɛkpondɛ kɛ bɛ nee ye sukoa Baebolo ne. Ɛnee ɔ nye ɛnlie debiezukoalɛ ne anwo, noko yeangola ye ka na ɔhanle kɛ bɛ nee me ɛzukoa. Akee ɔvale me nwo ɛya, ɛnee mende ɔ bo ɔluakɛ dahuu metie ye edwɛkɛ. Noko ɔluakɛ mekpondɛ kɛ memaa Gyihova anye die la ati, yeammaa meandie ye wɔ mekɛ ɛhye anu. Ɛnee ɔnla aze, noko Gyihova boale me.
MENZUKOALE GYIHOVA ANWO DEBIE
Me abusua ne nee Japanma dɔɔnwo le Buddhama. Noko mɔɔ me nee Gyihova Alasevolɛ zukoale debie siane nwiɔ la, menwunle kɛ Baebolo ne le nɔhalɛ. Mɔɔ menwunle kɛ melɛ anwuma Selɛ bie la, ɛnee mekpondɛ kɛ menwu ye kpalɛ. Alimoa ne, ɛnee me nee me Mame bɔ mɔɔ melɛsukoa la anwo adawu. Membɔle ɔ bo kɛ mekɔ debiezukoalɛ Molɛ biala. Mɔɔ menzukoale ninyɛne dɔɔnwo la, menganle mengilele me Mame kɛ menrɛva me nwo menrɛwula Buddhama debie biala anu bieko. Arɛlevilɛ nu ala, ye subane hakyile. Ɔhanle kɛ: “Ɔle anyiemgba kɛ awie wɔ abusua ye anu na ɔnrɛhile anyezɔlɛ ɔnrɛmaa yɛ nlenyia mɔ.” Ɔhanle kɛ mengyakyi Baebolo ne ɛzukoalɛ nee debiezukoalɛ ɛhɔlɛ. Meandwenle nwolɛ ɛlɛ kɛ me mame baha edwɛkɛ ɛhye! Ɔhakyile bɔkɔɔ.
Me Papa nee me Mame yɛle adwenle. Ɛnee menwu ye wɔ Ɛfɛsɛsema tile 6 kɛ Gyihova kpondɛ kɛ metie me awovolɛ. Ɛnee mekpondɛ kɛ anzodwolɛ ba yɛ abusua ne anu bieko, yemɔti menyianle adwenle kɛ saa metie bɛ a, ɔbamaa bɛdabɛ noko bɛadie me. Wɔ zɔhane mekɛ ne, ɛnee melɛkɔ meahɛlɛ sukulu sɔnea, yemɔti menyɛle kɛ mebayɛ mɔɔ me awovolɛ kɛha la wɔ siane nsa anu. Noko membɔle Gyihova ɛwɔkɛ kɛ saa siane nsa ne dwu a, mebazia meahɔ debiezukoalɛ.
Kpɔkɛ mɔɔ menzile la ɛnle kpalɛ wɔ ninyɛne nwiɔ bie ati. Mɔɔ limoa, mendwenlenle kɛ ɛhulolɛ mɔɔ melɛ kɛ mesonle Gyihova la bahɔ zo ayɛ kpole wɔ siane nsa ne anzi. Noko agɔnwolɛvalɛ mɔɔ me nee ye lɛ la hanle aze ndɛndɛ. Mɔɔ tɔ zo nwiɔ, me Papa nee me Mame bɔle mɔdenle kpalɛ kɛ bɛmaa meagyakyi Gyihova ɛzonlenlɛ.
MENYIANLE MOALƐ YƐƐ BƐKPƆLƐ ME
Menyia Alasevolɛ dɔɔnwo mɔɔ bɛ mbusuafoɔ kpɔle bɛ la wɔ Belemgbunlililɛ Asalo ɛkɛ. Bɛmaanle menwunle kɛ Gyihova baboa me. (Mateyu 10:34-37) Bɛhilehilele nuhua bɛhilele me kɛ saa medi nɔhalɛ memaa Gyihova a, me abusua ne bahola azukoa ɔ nwo debie. Ɛnee mekpondɛ kɛ mefa me nwo meto Gyihova anwo zo, yemɔti membɔle ɔ bo kɛ meyɛ asɔne kpalɛ.
Me abusua ne kpɔle me wɔ ndenle ngakyile zo. Me Mame kpale me kyɛlɛ kɛ mengyakyi debiezukoalɛ ne, na ɔbɔle mɔdenle kɛ ɔkilehile ninyɛne nu yeahile me. Mekɛ dɔɔnwo ne ala, ɛnee menga ɛhwee. Saa meyɛ kɛ meka edwɛkɛ a, yɛta yɛsu kpolera ɔluakɛ awie biala bɔ mɔdenle kɛ ɔkile kɛ ye edwɛkɛ yɛ fɛ. Akee menwu kɛ saa mendele me Mame nganeɛdelɛ nee ye diedi ne abo kpalɛ a, anrɛɛ anzodwolɛ rale. Me awovolɛ maanle me gyima dɔɔnwo amaa meannyia adenle meanvinde. Ɔdwu mekɛ ne bie a bɛto me anlenkɛ nu anzɛɛ bɛkye me ɛhɔne.
Me Mame hanle hilele awie mɔ kɛ bɛboa ye na bɛmaa mengakyi me adwenle. Ɔhanle nwolɛ edwɛkɛ ɔhilele me kilehilevolɛ ne, noko yeanyɛ boɛ. Ɔvale me ɔhɔle ye gyima nu kpanyinli ne ɛkɛ amaa yeali me adwenle kɛ nvasoɛ ɛnle ɛzonlenlɛ gyɛne biala azo. Eza ɔvɛlɛle yɛ mbusuafoɔ wɔ telefonu zo, na mekɛ mɔɔ ɔlɛka yeahile bɛ kɛ bɛboa ye la ɛnee ɔlɛsu. Ɛhye gyegyele me kpalɛ. Noko saa mekɔ debiezukoalɛ a, mgbanyima ne mɔ ka kile me kɛ, saa me Mame ka mɔɔ ɛlɛkɔ zo la anwo edwɛkɛ kile awie mɔ a, ɛnee ɔlɛdi bɛ daselɛ.
Ɛnee me awovolɛ kpondɛ kɛ mekɔ yunivɛsiti amaa meanyia gyima kpalɛ. Ɛya ammaa yɛangola yɛanga ɛhye anwo edwɛkɛ wɔ adenle bɛtɛɛ zo,
yemɔti mengɛlɛle bɛ ngɛlata dɔɔnwo mengilehilele bodane mɔɔ melɛ la anu mengilele bɛ. Me Papa vale ɛya kpalɛ na ɔhanle kɛ, “Saa ɛnea na ɛbanyia gyima a, kpondɛ bie ɛhyema, tɛ ye zɔhane a ɛbavi sua nu ɛke.” Menzɛlɛle Gyihova kɛ ɔboa me. Ye alehyenlɛ nu mɔɔ mengɔle daselɛlilɛ la, mediema mraalɛ nwiɔ maanle me gyima kɛ mengile bɛ mra ne mɔ debie. Ɛnee me Papa anye ɛnlie nwo, yemɔti ɔ nee me andendɛ. Me Mame hanle kɛ saa mele kodiawu a anrɛɛ ɔle kpalɛ ɔtɛla kɛ mebayɛ Gyihova Dasevolɛ.Gyihova boale me maanle mengakyile me adwenle na menwunle mɔɔ ɔwɔ kɛ meyɛ la
Ɔyɛ a mengola mennwu ye saa Gyihova kpondɛ kɛ meko metia me awovolɛ kpole zɔhane a. Yemɔti menzɛlɛle Gyihova na mendwenlenle mɔɔ Baebolo ne ka wɔ ye ɛlɔlɛ ne anwo la anwo. Ɛhye maanle menyianle adwenle kpalɛ na menwunle kɛ me awovolɛ ɛlɛdwazo atia me ɔluakɛ ɛnee bɛdwenle me nwo. Gyihova boale me maanle mengakyile me adwenle na menwunle mɔɔ ɔwɔ kɛ meyɛ la. Eza daselɛlilɛ mɔɔ mengɔle ye dahuu la maanle me nye liele nwo kɛ mebayɛ adekpakyelɛnli.
MENYƐLE ADEKPAKYELƐNLI
Mekɛ mɔɔ mediema mraalɛ bie mɔ dele kɛ mekpondɛ kɛ meyɛ adekpakyelɛnli la, bɛhanle kɛ mengendɛ na me awovolɛ ahonle tɔ bɛ azule nu a meabɔ ɔ bo. Menzɛlɛle nrɛlɛbɛ, menyɛle neɛnleanu, mendwenlenle deɛmɔti mekpondɛ kɛ meyɛ adekpakyelɛnli la anwo, na menganle nwolɛ edwɛkɛ mengilele mediema mɔɔ bɛnyi sunsum nu la. Akee menzile kpɔkɛ kɛ mekpondɛ kɛ memaa Gyihova anye die. Eza menwunle kɛ saa mekendɛ mekɔdwu mekɛ bie na meabɔ adekpakyelɛ gyima ne abo bɔbɔ a, me awovolɛ badwazo atia me.
Ɔka ɛvolɛ ko na meawie ndoazo sukulu la yɛɛ membɔle adekpakyelɛ gyima ne abo a. Menyɛle adekpakyelɛ gyima ne ekyi la, ɛnee mekpondɛ kɛ metu mekɔ ɛleka mɔɔ bɛhyia moalɛ dɔɔnwo la. Noko ɛnee me Papa nee me Mame ɛmkpondɛ kɛ mefi sua nu. Yemɔti mengendɛle kɔkpula kɛ menyianle ɛvolɛ 20 la. Akee menganle mengilele Bɛtɛle kɛ bɛmaa me gyima wɔ ɛleka mɔɔ mebabikye me mbusuafoɔ wɔ Japan nyiakɛ la amaa me Mame andwenle nwolɛ somaa.
Mekɛ mɔɔ ɛnee megua gyima ne azo wɔ ɛkɛ la, me nye liele kɛ bɛzɔnenle me Baebolo sukoavoma dɔɔnwo la. Membɔle ɔ bo kɛ mesukoa Nrelenza ɔluakɛ ɛnee mekpondɛ kɛ meyɛ dɔɔnwo wɔ me ɛzonlenlɛ gyima ne anu. Akee mɔɔ menwunle kɛzi adekpakyelɛ titilima nwiɔ bie mɔɔ bɛwɔ me asafo ne anu ɛlɛbɔ mɔdenle aboa awie mɔ la, menyɛle kɛ medame noko mebayɛ adekpakyelɛ titili. Wɔ mekɛ ɛhye anu, me Mame anwo dole kpole fane nwiɔ, na ɔ mu nwiɔ anu mengɔle sua nu mengɔmboale ye. Ɛhye zinle ɔ nwo, na ɔmaanle ɔ nye liele me nwo ekyi.
GYIHOVA YILALE ME DƆƆNWO
Wɔ ɛvolɛ nsuu anzi, adekpakyelɛ titilima ne mɔɔ melimoa meha bɛ nwo edwɛkɛ la anu ko mɔɔ bɛfɛlɛ ye Atsushi la hɛlɛle me kɛlata. Ɛnee ɔkpondɛ kɛ ɔgya, na ɛnee ɔkpondɛ kɛ ɔnwu kɛ saa me nye die ɔ nwo a. Ɛnee ɔtɛbale me adwenle nu, yɛɛ meanzuzu kɛ Atsushi anye die me nwo bɔbɔ. Ye siane ko anzi, menganle mengilele ye kɛ mekpondɛ kɛ menwu ye kpalɛ. Yɛnwunle kɛ yɛlɛ bodane ko. Ɛnee yɛkpondɛ kɛ yɛtoa dahuu ɛzonlenlɛ gyima ne azo yɛɛ ɛnee yɛlɛ ɛhulolɛ kɛ yɛbayɛ gyima biala mɔɔ bɛbava bɛamaa yɛ la. Akee yɛgyale. Ɔyɛle me fɛ kpole kpalɛ kɛ me Mame, me Papa nee me mbusuafoɔ bie mɔ rale yɛ atɔfolɛlielɛ ne abo la.
Nepal
Yɛgyale mɔɔ ɛnee yɛlɛsonle kɛ dahuu adekpakyelɛma la, yeangyɛ yɛɛ bɛkpale Atsushi kɛ ɔgyinla maangyebakyi zo neavolɛ bie agyakɛ anu a. Nzinlii bɛkpale yɛ kɛ adekpakyelɛ titilima, akee bɛkpale me hu kɛ maangyebakyi zo neavolɛ. Mekɛ mɔɔ limoa mɔɔ yɛzonlenle asafo ne mɔ mɔɔ
bɛwɔ yɛ maangyebakyi ne anu yɛwiele la, Bɛtɛle vɛlɛle yɛ. Ɛnee bɛkpondɛ kɛ bɛnwu kɛ saa yɛlɛ ɛhulolɛ kɛ yɛbadoa maangyebakyi gyima ne azo wɔ Nepal a.Maanle ngakyile mɔɔ menzonlenle ɛkɛ la maanle menwunle Gyihova anwo ninyɛne dɔɔnwo
Ɛnee melɛkɔ moa na ɛnee mennwu kɛzi me awovolɛ bade nganeɛ la. Mɔɔ menvɛlɛle bɛ wɔ telefonu zo la, me Papa hanle kɛ, “Ɛleka mɔɔ bɛbahɔ la le kɛnlɛma.” Ɔ gɔnwo bie vale buluku mɔɔ ɔka Nepal anwo edwɛkɛ la maanle ye la ye dapɛne ko anzi yɛɛ menvɛlɛle ye a, na ɛnee me Papa bɔbɔ ɛlɛdwenle kɛ ɔbayɛ ɛleka kɛnlɛma mɔɔ ɔwɔ kɛ ɔkɔnea ɛkɛ a.
Yɛ nye liele kɛ yɛ nee Nepalma mɔɔ kulo menli la hɔzonlenle a. Amozi bɛvale Bangladesh bɛbokale yɛ maangyebakyi ne anwo. Ɛnee ɔbikye Nepal kpalɛ, noko ɛkɛ ne le ngakyile. Yɛluale ndenle ngakyile zo yɛlile daselɛ. Ɛvolɛ nnu anzi, bɛmaanle yɛziale yɛhɔdoale yɛ maangyebakyi gyima ne azo wɔ Japan na ɛkɛ ne a yɛtɛbɔ a.
Menzukoale Gyihova anwo ninyɛne dɔɔnwo wɔ mekɛ mɔɔ ɛnee yɛlɛsonle wɔ Japan, Nepal, nee Bangladesh la. Asolo menli mɔɔ bɛwɔ maanle ɛhye mɔ biala azo la amaamuo nee bɛ subane. Yɛɛ asolo awie biala. Menwu kɛzi Gyihova nea awie biala, ɔdie bɛ ɔto nu, ɔboa bɛ na ɔyila bɛ la.
Ninyɛne dɔɔnwo wɔ ɛkɛ mɔɔ ɔwɔ kɛ meyɛ Gyihova mo wɔ nwo a. Yemaa menwu ye na melɛyɛ ye gyima, eza yemaa menyia kunli kpalɛ. Nyamenle ɛboa me ɛmaa mezi kpɔkɛ kpalɛ, na kɛkala me nee ye nee me abusua ne lɛ agɔnwolɛvalɛ kpalɛ. Meyɛ Gyihova mo kɛ me nee me Mame ɛyɛ agɔnwolɛma kpalɛ bieko la. Me nye sɔ anzodwolɛ mɔɔ ɛra medame, Nyamenle nee me mame avinli la kpole kpalɛ.
Yɛ nye die kpalɛ wɔ maangyebakyi gyima ne anu