Baebolo Ne Kakyi Sonla

DUZU a maanle Rastanli (Rastafarian) bie pepɛle ye enrinli ndendenle ne na ɔgyakyile kɛ ɔbanyia awie mɔ anwo adwenle ɛtane ɛ? Tie mɔɔ ɔhanle la.

“Mengolale Menlile Menli Nwo Adwenletane Zo Konim”​—HAFEN NGHAMA

YE ƐVOLƐ: 34

MAANLE MƆƆ ƆVI NU: ZAMBIA

ALIMOA NE: RASTANLI

ME ƐBƐLA DƐBA NE: Bɛwole me wɔ tutanema azokoɛleɛ wɔ Zambia. Me mame nriandile vile Namibia wɔ konle mekɛ nu na ɔvale ɔ nwo ɔhɔbokale eku bie mɔɔ bɛfɛlɛ ye South West Africa People’s Organization (SWAPO) la anwo. Ɛnee eku ɛhye ɛlɛko atia South Africa arane ne mɔɔ ɛnee di Namibia azo tumi wɔ zɔhane mekɛ ne la.

Mekali ɛvolɛ 15 la ɛnee medɛnla tutanema azokoɛleɛ dɔɔnwo. Bɛtetele ngakula mɔɔ wɔ SWAPO ne anu la kɛ bɛmaa bɛagyinla fanwodi ngyehyɛleɛ ne anzi. Bɛvale maanyɛlɛ bɛwulale yɛ nu na bɛhilele yɛ kɛ yɛkpɔ alɔfolɛ.

Menlile ɛvolɛ 11 la, ɛnee mekulo kɛ bɛdie me bɛto nu kɛ Kilisienenli wɔ asɔne bie mɔɔ ɛnee wɔ azokoɛleɛ ɛkɛ ne la anu. Ɛnee ɔle asɔne asɔne ngakyile mɔɔ ɛha ɛbɔ nu la. Ɛsɔfo ne mɔɔ me nee ye dendɛle la hanle hilele me kɛ ɔnle kɛ meyɛ zɔ. Ɔvi zɔhane mekɛ ne ɛnee akee menlie Nyamenle menli. Menlile ɛvolɛ 15 la, me nye raliele reggae edwɛne nwo kpalɛ na ɔluakɛ ɛnee mekulo kɛ meko memaa Abibilema mɔɔ bɛsisi bɛ la ati, menvale me nwo membɔle Rastama ekpunli ne anwo. Menziele me ti enrinli, menonle wee, mengyakyile nane ɛlilɛ na membɔle nolo kɛ ɔwɔ kɛ Abibilema nyia fanwodi. Noko meangyakyi ɛbɛlatane ɛbɔlɛ anzɛɛ sini mɔɔ basabasayɛlɛ ɛbu zo wɔ nu la ɛnleanlɛ. Yɛɛ ɛnee me ɛdendɛlɛ ɛnle kpalɛ.

KƐZI BAEBOLO NE HAKYILE ME ƐBƐLABƆLƐ LA: Wɔ 1995 mɔɔ ɛnee meli ɛvolɛ 20 la, membɔle ɔ bo kɛ medwenle me ɛbɛlabɔlɛ nwo. Menzukoale Rastama buluku biala mɔɔ menyianle ye la. Bie mɔ hanle Baebolo ne anu edwɛkɛ noko ɛnee ngilenu ne ɛndɔ ɛnzolɛ nu. Yemɔti menzile kpɔkɛ kɛ mekenga Baebolo ne.

Nzinlii, me gɔnwo Rastanli bie maanle me buluku mɔɔ Gyihova Alasevolɛ ɛyɛ mɔɔ bɛfa bɛsukoa Baebolo ne la ko. Me ngomekye menvale Baebolo ne menzukoale buluku ne. Nzinlii, menyiale Gyihova Alasevolɛ na me nee bɛ doale me Baebolo ɛzukoalɛ ne azo.

Membɔle mɔdenle kpalɛ na mengyakyile nyiletane nee nza dɔɔnwo ɛnlonlɛ. (2 Kɔlentema 7:1) Mengakyile kɛzi mesiezie me nwo la, mempepɛle me enrinli ndendenle ne, mengyakyile nlanwonvoninli nee sini mɔɔ basabasayɛlɛ wɔ nu la ɛnleanlɛ na membɔle mɔdenle kɛ menrɛva ɛdendɛlɛ evinli menrɛli gyima. (Ɛfɛsɛsema 5:3, 4) Akee mengolale menlile alɔfolɛ nwo adwenletane mɔɔ melɛ la azo konim. (Gyima ne 10:34, 35) Amaa meahola meayɛ nzenzaleɛ ɛhye mɔ la, ɛnee ɔwɔ kɛ megua edwɛne mɔɔ kanvo menli nu nyeyenu la lɔ na metwe me nwo mefi agɔnwolɛma mɔɔ bamaa meazia meahɔ me ɛbɛla dɛba ne anu la anwo.

Menyɛle nzenzaleɛ ɛhye mɔ menwiele la, memkpondɛle ɛleka mɔɔ Gyihova Alasevolɛ Belemgbunlililɛ Asalo wɔ la na ɛnee mekulo kɛ meboka bɛ nwo. Bɛ nee me zukoale Baebolo ne. Menzile kpɔkɛ kɛ memaa bɛazɔne me la, me abusua ne anye anlie nwo. Me mame hanle hilele me kɛ mebahola meakpa “Kilisiene” asɔne gyɛne biala na tɛ Gyihova Alasevolɛ. Me ankele bie mɔɔ ɛnee ɔboka arane ne anwo la dendɛle tiale me fane dɔɔnwo kɛ me nee Alasevolɛ ne mɔ ɛlɛtu la.

Noko akee, mɔɔ menzukoale kɛzi Gyisɛse nee menli lile na menvale ye folɛdulɛ ne menlile gyima la ɔboale me ɔmaanle mengyinlanle dwazotia nee agolobɛnwo ne anloa. Menvale mɔɔ Alasevolɛ ne mɔ kilehile la mentotole mɔɔ Baebolo ne ka la anwo la menwunle ye wienyi kɛ menwu nɔhalɛ ɛzonlenlɛ ne. Kɛ neazo la, bɛdi Baebolo nu mɛla mɔɔ se bɛha edwɛkɛ ne bɛhile awie mɔ la azo. (Mateyu 28:19, 20; Gyima ne 15:14) Yɛɛ bɛnva bɛ nwo bɛnwulowula maanyɛlɛ nu.​—Edwɛne 146:3, 4; Dwɔn 15:17, 18.

KƐZI YEBOA ME LA: Baebolo ngyinlazo mɔɔ melɛfa meabɔ me ɛbɛla la ɛboa me dɔɔnwo. Kɛ neazo la, wee mɔɔ megyakyi ye ɛnlonlɛ la ɛmaa mehoati kɛ mebazɛkye ezukoa dɔɔnwo siane biala. Ninyɛne mɔɔ gyinlegyinla me nye zo na ɔmaa metendɛ mgbane mgbane la ɛvi ɛkɛ yɛɛ menyia adwenle nee nwonane nu kpɔkɛdelɛ kpalɛ.

Mele kakula la ɛnee mekpondɛ kɛ mebɔ ɛbɛla kpalɛ mɔɔ gyi bodane kpalɛ zo na kɛkala menyia ye. Na mɔɔ hyia kpalɛ la, kɛkala mete nganeɛ kɛ mehwe mebikye Nyamenle.​—Gyemise 4:8.

[Edwɛkɛ mɔɔ bɛkpa]

Amaa meahola meayɛ nzenzaleɛ la, ɛnee ɔwɔ kɛ megua edwɛne mɔɔ kanvo menli nu nyeyenu la lɔ