Ɔwɔ Kɛ Yidɛn Edwɛkɛ Ne Kyia Wɔ

ABƆLƆBA Paul Morris mɔɔ sukoa ɛzonlenlɛ nwo ninyɛne la hɛlɛle kɛ: “Nzinlii Baebolo ne andwe adwenle angɔ Yidɛn edwɛkɛ ne azo bieko.” “Mbɔlɔba” dɔɔnwo nee ye yɛ adwenle noko ye edwɛkɛ ne ɛnle nɔhalɛ.

Baebolo ne ka Yidɛn tola ne, Adam, Yive, yɛɛ ɛwɔlɛ ne anwo edwɛkɛ dɔɔnwo. * Mbɔlɔba mɔɔ ɛnlie edwɛkɛ ɛhye ɛndo nu la ɛvo ɛdeɛ, noko ɛzonlenlɛ nu mgbanyima nee menli mɔɔ su Baebolo ne kpolera la ɛyɛ nvonleɛ kpole. Bɛdua Yidɛn tola ne anwo edwɛkɛ mɔɔ wɔ Mɔlebɛbo buluku ne anu mɔɔ bɛnlie bɛndo nu la azo bɛtendɛ bɛtia Baebolo ne. Wɔ adenle boni azo?

Saa yɛte mɔɔ zile Yidɛn la abo a ɔbaboa yɛ yeamaa yɛade Baebolo ne foa mɔɔ ɛha la abo kpalɛ. Kɛ neazo la, Nyamenle Edwɛkɛ ne bua kpuyia mɔɔ anwo hyia kpalɛ na ɔgyegye alesama la. Fane dɔɔnwo ne ala mualɛ mɔɔ Baebolo ne fa maa la twe adwenle kɔ edwɛkɛ mɔɔ zile Yidɛn tola ne anu la azo. Maa yɛnlea neazo bie mɔ.

● Duzu ati a yɛyɛ mrelera na yɛwu a? Saa Adam nee Yive diele Gyihova a anrɛɛ bɛbadɛnla aze dahuu. Ɛnee saa bɛte atua a yɛɛ bɛbawu a. Wɔ kenle ko ne mɔɔ bɛdele atua la, bɛbɔle ɔ bo kɛ bɛwu. (Mɔlebɛbo 2:16, 17; 3:19) Bɛdɔle sinli, yemɔti bɛvale ɛtane nee sinlidɔlɛ bɛwole bɛ mra. Baebolo ne kile nu kɛ: “Kɛmɔ ɛtane luale sonla ko anwo zo a rale ewiade, na sonla ko ne ɛtane ne vale ewule rale la, yɛɛ ewule dele kpondenle aleɛabo amra anwo zo a, ɔluakɛ menli kɔsɔɔti ɛyɛ ɛtane.”—Wulomuma 5:12.

 ● Duzu ati a Nyamenle ɛmaa ɛtaneyɛlɛ nwo adenle a? Wɔ Yidɛn tola ne, anu Seetan hanle kɛ Nyamenle le adalɛ na ɔfa ninyɛne kpalɛ ɔfea ye abɔdeɛ. (Mɔlebɛbo 3:3-5) Ɔluale ɛhye azo ɔdendɛle ɔtiale adenle kpalɛ ne mɔɔ Gyihova dua zo di tumi la. Adam nee Yive diele Seetan ane; yemɔti bɛkpole Gyihova tumililɛ na bɛzuzule kɛ sonla bahola azi kpalɛ nee ɛtane nwo kpɔkɛ. Gyihova mɔɔ ye pɛlepɛlelilɛ nee ye nrɛlɛbɛ di munli la nwunle kɛ adenle kokye a ɔdua zo a ɔbali ngyegyelɛ ɛhye anwo gyima a, yemɔ a le kɛ ɔbamaa alesama anyia mekɛ ali bɛ nwo zo tumi kɛmɔ bɛkulo la. Ninyɛndane mɔɔ ɛbu ɛnɛ mɔɔ ye foa bie vi Seetan la ɛmaa nɔhalɛ edwɛkɛ ɛhye ɛra nu: Sonla ɛnrɛhola ɛnrɛnlea ɔ nwo zo mɔɔ Nyamenle moalɛ ɛmboka nwo a.—Gyɛlɛmaya 10:23.

● Duzu ati a Nyamenle bɔle azɛlɛ ye a? Gyihova zieziele Yidɛn tola ne manle ɔyɛle kɛnlɛma kpalɛ wɔ azɛlɛ ye azo. Ɔzele Adam nee Yive kɛ bɛlɔ, bɛyi azɛlɛ ye na ‘bɛzie ye’ na bɛmaa anzondwolɛ ɛrɛla ɛleka kɔsɔɔti na ɔyɛ kɛnlɛma. (Mɔlebɛbo 1:28) Yemɔti Nyamenle bɔle azɛlɛ ye kɛ ɔmaa Adam nee Yive abo zo amra mɔɔ di munli na bɛle abusua mɔɔ koyɛlɛ wɔ bɛ avinli la adɛnla zo. Baebolo ne ka adenle mɔɔ Nyamenle balua zo ayɛ ɛhye la anwo edwɛkɛ dɔɔnwo.

● Duzu ati a Gyisɛse Kelaese rale azɛlɛ ye azo a? Yidɛn tola ne anu atuadelɛ ne vale ewule rale Adam nee Yive nee bɛ bo zo amra kɔsɔɔti anwo zo, noko Nyamenle vile ɛlɔlɛ nu manle yɛ anyelazo. Ɔzoanle ɔ Ra ne azɛlɛ ye azo kɛ ɔva ye ngoane ɔrayɛ mɔɔ Baebolo ne fɛlɛ ye ɛkpɔnedeɛ la. (Mateyu 20:28) Duzu a ɛhye kile a? Ɛnee Gyisɛse le “Adam ne mɔɔ li amozi”; ɔyɛle mɔɔ Adam angola ye yɛ la. Gyisɛse mɔɔ ɛnee di munli la diele Gyihova dahuu. Ɔvile ye ɛhulolɛ nu ɔvale ye ngoane ɔbɔle afɔle, anzɛɛ ɔyɛle ɛkpɔnedeɛ, amaa alesama mɔɔ di nɔhalɛ la kɔsɔɔti anyia ɛtanefakyɛ na awieleɛ kolaa ne bɛanyia asetɛnla mɔɔ ɛnee Adam nee Yive lɛ ye wɔ Yidɛn kolaa na bɛayɛ ɛtane la. (1 Kɔlentema 15:22, 45; Dwɔn 3:16) Yemɔti, Gyisɛse bamaa Gyihova bodane mɔɔ yemɔ a le kɛ ɔbahakyi azɛlɛ ɛhye paladaese kɛ Yidɛn la ara nu. *

Nyamenle bodane ɛhye anu la ɛkɛ wienyi, ɔle nɔhalɛ. Ɔnle nwɔra. Kɛmɔ ɛnee Yidɛn tola ne wɔ ɛkɛ amgba wɔ azɛlɛ ye azo mɔɔ ɛnee nane nee menli wɔ nu la, zɔhane ala a ɔnrɛhyɛ mɔɔ Nyamenle ɛha kɛ ɔbayɛ ye kenlebie la noko bara a. Asoo ɛdie ɛdi kɛ ɔbara? Ɛbadɛnla zolɛ bie ɔ? Ɔwɔ wɔ ɛkɛ. Nyamenle kulo kɛ menli dɔɔnwo mɔɔ bɛdabɛ mɔɔ bɛnli ye mɛla zo bɔbɔ boka nwo la, nyia asetɛnla ɛhye bie.—1 Temɔte 2:3, 4.

Mɔɔ Gyisɛse ɛlɛba arawu la, ɔ nee nrenya bie mɔɔ yɛle ɛtane kpole la dendɛle. Ɛnee nrenya ɛhye le kɔdiawu; na ɔze kɛ ɔfɛta ewule. Noko ɔkpondɛle arɛlekyekyelɛ nee anyelazo ɔvile Gyisɛse ɛkɛ. Duzu a Gyisɛse hanle a? “Me nee wɔ bahɔ Paladaese.” (Luku 23:43) Saa ɛnee Gyisɛse kulo kɛ nrenya ɛhye mɔɔ ɛnee le kɔdiawu la dwazo fi ewule nu kɔ paladaese mɔɔ le kɛ Yidɛn la anu a, asoo ɔnrɛhulo kɛ ɛdawɔ noko ɛbanyia zɛhae nyilalɛ ne bie ɔ? Ɔbahulo! Ɔ Ze noko bahulo! Saa ɛkulo kɛ ɛnyia kenlebie asetɛnla ɛhye bie a, ɛnee bɔ mɔdenle sukoa Nyamenle ne mɔɔ yɛle Yidɛn tola ne la anwo debie.

[Ɔ bo ɛkɛ ne edwɛkɛ ne mɔ]

 [Ɛlɛka/Nvoninli wɔ mukelɛ 10]

NGAPEZO MƆƆ BAEBOLO NE GYI ZO

“Mebava ɛkpɔlɛ meado wɔ [ɛwɔlɛ ne] nee raalɛ ne, nee ɛ ra nee raalɛ ne ara avinli. Raalɛ ne ara bagelegele ɛ ti na ɛdawɔ wɔaha ɔ gyakɛ anzi.”—Mɔlebɛbo 3:15.

Ɛhye a le Baebolo ne anu ngapezo mɔɔ lumua a, Nyamenle hanle ye wɔ Yidɛn. Nwane mɔ a le menli nna ɛhye: raalɛ ne, raalɛ ne ara ne, ɛwɔlɛ ne, yɛɛ ɛwɔlɛ ne ara ne? Adenle boni azo a “ɛkpɔlɛ” wɔ bɛ avinli a?

ƐWƆLƐ NE

Seetan Abɔnsam.—Yekile 12:9.

RAALƐ NE

Gyihova ahyehyɛdeɛ ne foa ne mɔɔ wɔ anwuma la. (Galeehyeama 4:26, 27) Ayezaya hanle “raalɛ” ɛhye anwo edwɛkɛ kɛ ɔbawo sunsum nu maanle kenlebie.—Ayezaya 54:1; 66:8.

ƐWƆLƐ NE ARA NE

Bɛdabɛ mɔɔ bɛyɛ Seetan ɛhulolɛdeɛ la.—Dwɔn 8:44.

RAALƐ NE ARA NE

Mɔɔ lumua la a le Gyisɛse Kelaese mɔɔ vi Gyihova ahyehyɛdeɛ ne foa mɔɔ wɔ anwuma anu rale la. Menli mɔɔ boka ye la a le Kelaese amediema ne mɔ mɔɔ bɛkpokpa bɛ na bɛ nee ye bali tumi wɔ anwuma la. Keleseɛnema ɛhye mɔ mɔɔ bɛkpokpa bɛ la bɔ nu yɛ sunsum nu maanle, “Nyamenle Yizilayɛ ne.”—Galeehyeama 3:16, 29; 6:16, NW; Mɔlebɛbo 22:18.

ƐHALƐ NE

Ɛhye zile wɔ mekɛ mɔɔ Seetan manle bɛhunle Gyisɛse la. Noko bɛdwazole Gyisɛse.

Ɔ TI ƐGELEGELELƐ NE

Gyisɛse baye Seetan avi ɛkɛ bɔkɔɔ. Kolaa na yeayɛ ɛhye bɔbɔ la, ɔbaye ɛtane mɔɔ Seetan bɔle ɔ bo wɔ Yidɛn la yeavi ɛkɛ.—1 Dwɔn 3:8; Yekile 20:10.

Saa ɛkpondɛ Baebolo ne edwɛkɛtile ne mɔɔ bɛpɛ ye sikalɛ la a, nea brohyua The Bible—What Is Its Message? mɔɔ Gyihova Alasevolɛ ɛyɛ la.

[Nvoninli wɔ mukelɛ 11]

Adam nee Yive nwunle ɛtane mɔɔ bɛyɛle la anwo amaneɛ