Maa Baebolo Ne Ɛhilehile Wɔ

Duzu Ati A Ɔwɔ Kɛ Ɛmaa Nyamenle Kilehile Wɔ A?

Edwɛkɛ ɛhye ka kpuyia bie mɔ mɔɔ bie a wɔbiza ye ɛlɛ la anwo edwɛkɛ yɛɛ ɔkile ɛleka mɔɔ ɛbanyia nwolɛ mualɛ wɔ Baebolo ne anu la. Gyihova Alasevolɛ anye balie kɛ bɛ nee wɔ bazuzu kpuyia ɛhye mɔ anwo.

1. Duzu ati a ɔwɔ kɛ ɛmaa Nyamenle kilehile wɔ a?

Nyamenle lɛ edwɛkpa maa alesama. Ɔdua Baebolo ne azo ɔka ɔkile yɛ. Baebolo ne le kɛ kɛlata bie mɔɔ yɛ Ze mɔɔ wɔ anwuma mɔɔ ɔlɛ yɛ nwo ɛlɔlɛ la ɛhɛlɛ ɛmaa yɛ a.—Kenga Gyɛlɛmaya 29:11.

2. Duzu a le edwɛkpa ɛhye?

Alesama hyia arane kpalɛ nwo. Sonla arane biala ɛtɛdiele alesama ɛtɛfile basabasayɛlɛ, nzisi, anwodolɛ anzɛɛ ewule nu ɛlɛ. Noko edwɛkpa wɔ ɛkɛ. Nyamenle bamaa alesama anyia arane kpalɛ mɔɔ ɔbalie bɛ yeavi amaneɛnwunlɛ kɔsɔɔti anu a.—Kenga Daneɛle 2:44.

3. Duzu ati a ɔhyia kɛ ɛmaa Nyamenle kilehile wɔ a?

Ɔnrɛhyɛ, Nyamenle baye menli mɔɔ maa bɛ gɔnwo mɔ di nyane la kɔsɔɔti yeavi ɛkɛ. Noko, ɛnɛ ɔlɛkilehile menli dɔɔnwo mɔɔ bɛlɛ bɛ nwo aze la yeamaa bɛanyia asetɛnla kpalɛ mɔɔ ɛlɔlɛ wɔ nu. Menli ɛlɛsukoa kɛzi bɛbagyinla ngyegyelɛ nloa, bɛanyia nɔhalɛ anyelielɛ, na bɛazɔ Nyamenle anye la bɛavi Baebolo ne anu.—Kenga Zɛfanaya 2:3.

  4. Nwane a le Baebolo ne Kɛlɛvolɛ a?

Mbuluku ngyikyi 66 a ka bɔ nu yɛ Baebolo ne a. Mrenya 40 a hɛlɛle a. Mosisi a hɛlɛle nnu ne mɔɔ lumua la wɔ ɛvolɛ kɛyɛ 3,500 mɔɔ ɛze ɛhɔ la anu a. Ɛzoanvolɛ Dwɔn a hɛlɛle mɔɔ li awieleɛ la wɔ ɛvolɛ kɛyɛ 1,900 mɔɔ ɛze ɛhɔ la a. Noko Nyamenle edwɛkɛ yɛɛ Baebolo kɛlɛvolɛma ne hɛlɛle a, tɛ bɛ edwɛkɛ ɔ. Yemɔti, Nyamenle a le Baebolo ne Kɛlɛvolɛ a.—Kenga 2 Temɔte 3:16; 2 Pita 1:21.

Yɛze kɛ Baebolo ne vi Nyamenle ɔluakɛ ɔka edwɛkɛ mɔɔ ɔbara kenlebie la. Dasanli biala ɛnrɛhola ɛnrɛyɛ ɛhye. (Ayezaya 46:9, 10) Eza Baebolo ne maa yɛnwu Nyamenle subane ngɛnlɛma ne mɔ. Ɔkola ɔkakyi sonla ɔmaa ye ɛbɛlabɔlɛ yɛ kpalɛ. Ɛhye maa menli dɔɔnwo die to nu kɛ Baebolo ne le Nyamenle Edwɛkɛ.—Kenga Dwɔhyua 23:14; 1 Tɛsalonaekama 2:13.

5. Kɛ ɔkɛyɛ na wɔade Baebolo ne abo ɛ?

Gyisɛse liele duma kɛ Nyamenle Edwɛkɛ ne kilehilevolɛ. Ɔnva nwo kɛ ɛnee menli mɔɔ ɔdendɛle ɔhilele bɛ la anu dɔɔnwo kenga Baebolo ne la, ɛnee bɛhyia moalɛ na bɛahola bɛade ɔ bo. Amaa Gyisɛse aboa bɛ la, ɔvale Baebolo nu edwɛkɛ bie mɔ ɔhilehilele edwɛkɛ nu “ɔmanle bɛdele Nyamenle Edwɛkɛ ne abo.” Edwɛkɛtile ɛhye, “Maa Baebolo Ne Ɛhilehile Wɔ,” balua adenle ko ne ala azo aboa wɔ.—Kenga Luku 24:27, 45.

Saa Nyamenle kilehile yɛ asetɛnla bodane a ɔmaa yɛ nye die tɛla debie biala mɔɔ yɛbazukoa la. Noko bie mɔ anye ɛnrɛlie nwo kɛ ɛlɛsukoa Baebolo ne la. Mmamaa ɛ sa nu to. Dahuu ngoane mɔɔ ɛbanyia la gyi Nyamenle mɔɔ ɛbanwu ye la azo.—Kenga Mateyu 5:10-12; Dwɔn 17:3.

Saa ɛkpondɛ nwolɛ edwɛkɛ dɔɔnwo a, nea buluku ɛhye, Duzu A Baebolo ne Kilehile Amgba A? mɔɔ Gyihova Alasevolɛ ɛyɛ la tile 2.