MEKƐ mɔɔ ɛ ra ne ɛlɛsukoa ɛdialɛ la, asoo ɛyɛlɛ ninyɛne bie mɔ ɛbɔle ɔ nwo bane ɔ? Bie a ɛhedale lateleke nyɛma nee debie biala mɔɔ kola boda la azo na ɛvale ninyɛne ɛzile ɛleka biala mɔɔ ɔkɔ a ɔbadɔ aze la adenle. Ɛyɛle ɛhye mɔ amuala ɛvale ɛbɔle ɛ ra ne anwo bane.

Ɔnla aze kɛ ɛbabɔ ɛ ra mɔɔ ɛlɛyɛ kpanyinli la anwo bane. Kɛkala ninyɛne dɔɔnwo wɔ ɛkɛ mɔɔ ɔwɔ kɛ ɛdwenle nwo a: ‘Asoo me ra nrenya ne nea nla nwo nvoninli?’ ‘Asoo me ra raalɛ ne ye ɔ nwo fa mobile phone pɛ ɔ nwo nvoninli ɔfa ɔnwa awie mɔ?’ Akee kpuyia mɔɔ gyegye adwenle kpalɛ la, ‘Asoo me ra mɔɔ ɔka ekyii ɔnyia ɛvolɛ 20 la ze nrenya nee raalɛ nla deɛ holɛ ɔ?’

Awovolɛ bie mɔ bɔ mɔdenle kɛ bɛkɛnwu debie biala mɔɔ bɛ mra mɔɔ ɔka ekyii bɛnyia ɛvolɛ 20 yɛ ye wɔ dɔnehwele 24 ne amuala anu la anu. Bɛbeta bɛ kyengye kɛ bɛnea bɛ ɛhɔlɛ nee bɛ ɛralɛ kɔsɔɔti anu. Ɛhye mɔɔ bɛyɛ la maa bɛ mra ne mɔ yɛ ninyɛne fea. Bɛ ra ne sukoa kɛzi ɔbava ɛbɛla mɔɔ ye awovolɛ ɛngulo avea la.

Ɔda ali kɛ kyengye ɛyɛlɛ ɛmboa. Gyihova Nyamenle mumua ne ɛnlua adenle ɛhye azo kɛ ɔmaa ye abɔdeɛ ayɛ tieyɛ amaa ye, na ɔnle kɛ awovolɛ noko yɛ zɔ. (Mɛla ne 30:19) Yemɔti, kɛzi ɛbahola wɔaboa ɛ mra mɔɔ ɛlɛyɛ mgbanyinli la wɔamaa bɛazi ɛbɛla kpalɛ ɛbɔlɛ nwo kpɔkɛ ɛ?—Mrɛlɛbulɛ 27:11.

Ɛ nee ɛ mra ne mɔ ɛzuzu nwo, saa bɔbɔ bɛle ngakula a. * (Mrɛlɛbulɛ 22:6) Saa ɔka ekyii bɛnyia ɛvolɛ 20 a, kɔ zo ka nwolɛ edwɛkɛ. Kɛ awovolɛ la, saa ɛ ra kpondɛ nɔhalɛ edwɛkɛ bie a, wɔ  ɛkɛ a ɔwɔ kɛ ɔdumua ɔba a. Alicia, kakula bɛlɛra bie mɔɔ vi Britain la ka kɛ: “Menli dɔɔnwo suzu kɛ yɛbaha nla nwo edwɛkɛ yɛahile yɛ gɔnwo mɔ emomu, noko ɛhye ɛnle nɔhalɛ. Saa yɛte edwɛkɛ ɛhye mɔ yɛfi yɛ awovolɛ ɛkɛ a yɛ nye die. Yɛdie mɔɔ bɛka la yɛdi.”

Saa ngakula ɛlɛyɛ mgbanyinli a, bɛhyia nla nwo adehilelɛ dɔɔnwo bɛtɛla nwolɛ edwɛkɛ ala mɔɔ ɛbaha wɔahile bɛ la. Eza ɔwɔ kɛ bɛsukoa na “bɛkola bɛnwu ngakyile mɔɔ wɔ kpalɛ nee ɛtane nu la.” (Hibuluma 5:14) Ye sikalɛ a le kɛ, ɔwɔ kɛ bɛnyia nla mɔɔ le ye adenle zo la anu diedi kpundii na bɛfa bɛbɔ bɛ ɛbɛla. Kɛ ɔkɛyɛ na wɔahilehile ɛ mra mɔɔ ɛlɛyɛ mgbanyinli la ɛbɛlabɔlɛ kpalɛ ɛ?

Bɔ ɔ bo ɛ nee bɛ ɛzuzu mɔɔ ɛdawɔ mumua ne ɛbu ye kɛ ɔle ɛbɛla kpalɛ la anwo. Kɛ neazo la, bie a ɛdie ɛdi kɛ adwɔmanebɔlɛ—menli nwiɔ mɔɔ ɛnle agyalɛma mɔɔ bɛda la—le ɛtane. (1 Tɛsalonaekama 4:3) Ɔda ali kɛ, wɔ ngakula ne mɔ ze wɔ gyinlabelɛ wɔ edwɛkɛ ɛhye anwo; bɛbahola bɔbɔ bɛahile Baebolo nu edwɛkɛ mɔɔ wɔ diedi ne gyi zo la. Saa ɛbiza bɛ a, bɛbahola bɛaha ye ndɛndɛ kɛ nla mɔɔ lumua agyalɛ nyunlu la ɛnle kpalɛ.

Noko ɔwɔ kɛ ɛyɛ dɔɔnwo ɛboka nwo. Sex Smart buluku ne ka kɛ ngakula bie mɔ bɛaha kɛ bɛ nee bɛ awovolɛ yɛ adwenle wɔ diedi mɔɔ bɛlɛ ye wɔ nla nwo la anwo. Buluku ne ka kɛ: “Bɛte nganeɛ kɛ bɛnnwu mɔɔ bɛyɛ ye wɔ edwɛkɛ ɛhye anwo a. Saa bɛyia ‘mɔɔ le ɛbɛla kpalɛ nee mɔɔ ɛnle ɛbɛla kpalɛ’ nwo ngyegyelɛ bie a, bɛnnwu mɔɔ ɔwɔ kɛ bɛyɛ a.” Ɛhye ati a ɛbɛla kpalɛ nwo ngyinlazo ne mɔɔ bɛbanwu ye la anwo hyia a. Kɛ ɔkɛyɛ na wɔaboa ɛ ra wɔamaa yeanwu ye ɛ?

Maa bɛnwu wɔ gyinlabelɛ wɔ ɛbɛla kpalɛ nwo.

Ɛdie ɛdi kɛ ɔwɔ kɛ bɛgya kolaa na bɛanyia nla nu kyɛfoa ɔ? Ɛnee ka ye wienyi kile ɛ ra ne fane dɔɔnwo. Beyond the Big Talk buluku ne ka kɛ, neɛnleanu ɛmaa yela ali kɛ “wɔ awuke mɔɔ awovolɛ ne mɔ ɛha ye wienyi ɛhile bɛ mra kɛ bɛngulo ngakula mɔɔ fa bɛ nwo wula nla nu anu la, ɔda ali kɛ ngakula ɛhye mɔ ɛnrɛva bɛ nwo ɛnrɛwula nla nu ndɛ.”

Kɛmɔ yɛlumua yɛha la, ngyinlazo mɔɔ ɛdie ɛto nu mɔɔ ɛbaha nwolɛ edwɛkɛ wɔahile ɛ ra nrenya anzɛɛ raalɛ la angome ɛngola ɛmmaa ɔnva ɔmbɔ ye ɛbɛla. Noko akee, saa ɛkilehile ngyinlazo mɔɔ ɛkpondɛ kɛ wɔ abusua ne fa bɔ bɛ ɛbɛla la anu wienyi a, ɔkola ɔboa ɛ mra. Neɛnleanu ɛmaa yela ali kɛ awieleɛ bɔkɔɔ ne ngakula dɔɔnwo fa bɛ awovolɛ ngyinlazo di gyima saa bɔbɔ bɛanva bɛanyɛ gyima wɔ mɔlebɛbo ne a.

Kilehile bɛ nla nwo nɔhalɛ edwɛkɛ kɔsɔɔti.

Kɔkɔbɔlɛ nwo hyia. (1 Kɔlentema 6:18; Gyemise 1:14, 15) Noko akee, Baebolo ne maa yɛnwu ye kɛ nla le ahyɛlɛdeɛ mɔɔ vi Nyamenle, ɔnle Seetan ɛhane. (Mrɛlɛbulɛ 5:18, 19; Sɔlɔmɔn Edwɛne 1:2) Saa ɛka ngyegyelɛ mɔɔ wɔ nu la ala ɛkile ɛ mra a, ɔnrɛmaa bɛnrɛnyia nla nwo adwenle mɔɔ tenrɛ anzɛɛ gyi Baebolo ne azo la. Corrina, bɛlɛra bie mɔɔ wɔ France la ka kɛ: “Ɛnee me awovolɛ ta ka nla nu ɛbɛlatane nwo edwɛkɛ, na ɛhye manle menyianle nla nwo adwenle mɔɔ ɛndenrɛ.”

Ka nɔhalɛ mɔɔ fane nla nwo la kɔsɔɔti kile ɛ mra. Nadia, ninli bie mɔɔ wɔ Mexico la se: “Mebɔ mɔdenle dahuu memaa me mra nwu ye kɛ nla le debie kɛnlɛma mɔɔ Gyihova Nyamenle ɛva ɛmaa alesama amaa bɛ nye alie. Noko agyalɛ nu yɛɛ ɔfɛta a. Kɛzi yɛbava yɛali gyima la bahola amaa yɛ nye alie anzɛɛ yɛanwu amaneɛ.”

 Boa ɛ ra maa ɔzuzu mɔɔ bavi nu ara la anwo.

Amaa ngakula ahola azi kpɔkɛ kpalɛ la, ɔwɔ kɛ bɛnwu mɔɔ ɔbavi kpɔkɛ biala mɔɔ bɛbazi anu ara la na bɛsuzu nwolɛ kpalɛ. Mmadwenle kɛ kɛmɔ bɛze mɔɔ le kpalɛ nee mɔɔ le ɛtane la ati yemɔ ne ala ɛne. Keleseɛnenli raalɛ bie mɔɔ wɔ Australia mɔɔ bɛfɛlɛ ye Emma la ka kɛ: “Saa medwenledwenle nvonleɛ mɔɔ menyɛle wɔ me ngakula nu la anwo a, mekola meka kɛ saa ɛze Nyamenle ngyinlazo ne mɔ a, ɛnee ɔngile kɛ ɛdie ɛto nu. Ɔhyia kpalɛ kɛ ɛbanwu nvasoɛ mɔɔ wɔ ngyinlazo ɛhye mɔ azo, nee mɔɔ saa wɔanli zo a ɔbavi nu yeara la.”

Baebolo ne bahola aboa, ɔluakɛ edwɛkɛ dɔɔnwo mɔɔ maa yɛnwu mɔɔ bavi nyɛleɛ ɛtane ɛhye anu ara la wɔ mɛla mɔɔ ɔfa ɔmaa la anu. Kɛ neazo la, Mrɛlɛbulɛ 5:8, 9 tu mgbavolɛ folɛ kɛ bɛhwe bɛ nwo bɛvi adwɔmane ɛbɔlɛ nwo ‘anrɛɛ bɛkɛminli bɛ anyunlunyia bɛkɛmaa awie mɔ kɛva.’ Kɛmɔ ngyehyɛnu zɔhane mɔ kile la, menli mɔɔ fa bɛ nwo wula nla mɔɔ li agyalɛ nyunlu anu la sɛkye bɛ subane kpalɛ, nɔhalɛlilɛ nee ɛbulɛ. Ɛhye ɛmmaa awie mɔɔ anrɛɛ kenlebie kɛgya bɛ na ɔlɛ subane kpalɛ ɛhye mɔ la, anye ɛnlie bɛ nwo. Saa ɛ ra dwenledwenle nwonane nu, nganeɛdelɛ nu, nee sunsum nu ngyegyelɛ mɔɔ fi Nyamenle mɛla mɔɔ bɛnli zo anu ba la anwo a, ɔbaboa ye yeamaa yeali zo. *

Takao, kakula nrenya bie mɔɔ wɔ Japan mɔɔ yeli ɛvolɛ 18 la se, “Meze kɛ ɔwɔ kɛ meyɛ mɔɔ tenrɛ la, noko me nee nwonane ne atiakunluwɔzo pele dahuu.” Bɛbahola bɛakyekye ngakula mɔɔ te nganeɛ zɛhae la arɛle kɛ tɛ bɛ ngome a bɛwɔ tɛnlabelɛ zɛhae anu a. Ɛzoanvolɛ Pɔɔlo—Keleseɛnenli mɔɔ ɛnee gyi ye kpundii bɔbɔ la—hanle kɛ: “Mɔɔ mekulo kɛ meyɛ kpalɛ la, ɛnee ɛtane ala a gyi me nye zo a.”—Wulomuma 7:21.

Ɔwɔ kɛ ngakula nwu ye kɛ nvonleɛ biala ɛnle ɛpelelɛ ɛhye anwo. Ɔbahola yeaha bɛ yeamaa badwenledwenle sonla holɛ mɔɔ bɛkulo kɛ bɛyɛ la anwo. Ɔbahola yeaboa bɛ yeamaa bazuzu kpuyia ɛhye noko anwo, ‘Asoo mekpondɛ kɛ meyɛ awie mɔɔ lɛ subane kpalɛ na ɔdi nɔhalɛ? Anzɛɛ meyɛ mɔɔ awie biala yɛ bie la bie, medi me atiakunluwɔzo nzi?’ Ɛbɛla kpalɛ ɛbɔlɛ nwo ngyinlazo bahola aboa ɛ ra yeamaa yeabua kpuyia ɛhye nrɛlɛbɛ nu.