Duzu A Le Edwɛkpa Ne?

“Edwɛkpa ɛhye . . .”—MATEYU 24:14.

ƆWƆ kɛ Keleseɛnema bɔ ‘Belemgbunlililɛ ne anwo Edwɛkpa’ ne nolo, na bɛkile nu kɛ Belemgbunlililɛ ne le arane mɔɔ ɔbazie azɛlɛ ye wɔ tenleneyɛlɛ nu kenlebie a. Noko akee, bɛva edwɛkɛkpɔkɛ “Edwɛkpa” bɛli gyima wɔ ndenle ngakyile zo wɔ Baebolo ne anu. Kɛ neazo la, yɛlɛ “ngoanelielɛ nwo edwɛkpa” (Edwɛndolɛ 96:2, NW); “Edwɛkpa ne mɔɔ vi Nyamenle” (Wulomuma 15:16); yɛɛ ‘Gyisɛse Kelaese anwo Edwɛkpa ne.’—Maake 1:1.

Nɔhalɛ edwɛkɛ mɔɔ Gyisɛse hanle na ye ɛdoavolɛ ne mɔ hɛlɛle la kɔsɔɔti boka edwɛkpa ne anwo. Kolaa na Gyisɛse ahɔ anwuma la, ɔzele ye ɛdoavolɛ ne mɔ kɛ: “Bɛhɔ maanle ti nee maanle bo, bɛmaa menli ɛrayɛ me ɛdoavolɛma; bɛzɔne bɛ wɔ Selɛ ne, Ralɛ ne nee Sunsum Nwuanzanwuanza ne duma nu, na bɛhilehile bɛ bɛmaa bɛli debie biala mɔɔ meha mehile bɛ la azo.” (Mateyu 28:19, 20) Yemɔti ɔwɔ kɛ nɔhalɛ Keleseɛnema ka Belemgbunlililɛ ne anwo edwɛkɛ ne na eza bɛmaa menli bayɛ ɛdoavolɛma.

Boni a asɔnema ɛlɛyɛ ye wɔ ɛhye anwo a? Menli dɔɔnwo—ɛnde Belemgbunlililɛ ne abo—yɛɛ bɛngola bɛngilehile nuhua fɔɔnwo bɛngile awie mɔ. Emomu, edwɛkɛ mɔɔ menli anye die nwo mɔɔ le kɛ ɛtanefakyɛ nee Gyisɛse anu diedi la a bɛka a. Bɛbɔ mɔdenle kɛ bɛdua anyuhɔlɛ gyima anzɛɛ asopiti, sukulu, nee azua mɔɔ bɛsi bɛmaa ehyiavolɛma la azo bɛanyia menli dɔɔnwo. Ɛhye bahola amaa menli dɔɔnwo ara asɔne ne, noko ɔmmaa bɛnyɛ nɔhalɛ Keleseɛnema mɔɔ fi ahonle nu fa Gyisɛse ngilehilelɛ bɔ bɛ ɛbɛla la.

Kilehilevolɛ bie ɛhɛlɛ kɛ: “Mbɔlɔba anzɛɛ adekilevoma ekyi bie ala a wɔ Keleseɛnema anu mɔɔ su kpolera kɛ ɔnle kɛ yɛyɛ menli Gyisɛse ɛdoavolɛma anzɛɛ yɛkilehile bɛ yɛmaa bɛyɛ mɔɔ Gyisɛse hanle la amuala a. . . . Adehilelɛ mɔɔ Gyisɛse vale manle wɔ ɛhye anwo la anu la ɛkɛ wienyi. Yɛnyɛ mɔɔ ɔhanle la. Yɛ nye ɛmbolo kɛ yɛyɛ. Na yɛnze ye yɛ bɔbɔ.”

Katelekma bie mɔɔ bɛbizebizale bɛ edwɛkɛ wɔ United States la anu ɛya ngyɛnu 95 noko die to nu kɛ bɛ diedi ne ati ɔwɔ kɛ bɛbɔ edwɛkpa ne nolo. Noko akee, asɛɛ bɛ muala bɛhanle kɛ adenle kpalɛ mɔɔ bɛdua zo bɛyɛ ɛhye la a le kɛ, ɔnle kɛ bɛka ye bɛ nloa ala, emomu bɛbabɔ ɛbɛla mɔɔ ɔbayɛ neazo yeamaa awie mɔ la. Bɛ nuhua ko hanle kɛ: “Edwɛkpa ne nolo ɛbɔlɛ ɛnle bɛ nloa anu edwɛkɛ ala. Emomu, ɔwɔ kɛ bɛnwu Edwɛkpa ne wɔ yɛ ɛbɛlabɔlɛ nu.” U.S. Catholic, adwelie kɛlata ne mɔɔ yɛle neɛnleanu ne la, hanle kɛ menli dɔɔnwo ɛngulo kɛ bɛka bɛ diedi ne anwo edwɛkɛ ɔlua “nla nwo nyɛleɛ ɛtane mɔɔ asɔne ne ɛva ɔ nwo ɛwula nu kenlensa ye nee asɔne ne ngilehilelɛ mɔɔ edwɛkɛ wɔ nwo la ati.”

Methodist sɛlɛvolɛ kpanyinli bie noko lile nyane kɛ ye asɔnema ne anu ɛhyɛ yɛɛ bɛ adwenle ɛdu ɛfonyia, ɔboalekɛ bɛnva akɛnrazilɛ bɛnyɛ bɛ gyima yɛɛ bɛmbɔ ɛbɛla kpalɛ. Ɔvale nyanelilɛ ɔbizale kɛ: “Nwane mɔ a fɛta kɛ bɛka Belemgbunlililɛ ne anwo edwɛkpa ne a, na nwane mɔ a ɛlɛka a?”

Sɛlɛvolɛ kpanyinli ne ambua ye kpuyia ne. Noko nwolɛ mualɛ wɔ ɛkɛ. Ɛbanwu ye wɔ edwɛkɛ mɔɔ doa zo la anu.

[Edwɛkɛ mɔɔ bɛkpa wɔ mukelɛ 6]

Edwɛkpa ne fane Nyamenle Belemgbunlililɛ ne nee Gyisɛse Kelaese anu diedi mɔɔ maa bɛnyia ngoane la anwo