MEKƐ mɔɔ Gyisɛse hanle edwɛkɛ mɔɔ wɔ anwuma ɛkɛ la maa yɛnwu debie mɔɔ ɛnee nwolɛ hyia ye kpalɛ wɔ ye ɛbɛlabɔlɛ nu la. Ɛnee Gyisɛse nee ye ɛdoavolɛ ne mɔ ɛdia Samɛlea maanzinli ne anu awoka ne mɔ azo ɔvi nwonlomɔ dedee sɛnzɛngyinla. (Dwɔn 4:6) Ɛnee ɛdoavolɛ ne mɔ suzu kɛ akee ɛhɔne ɛlɛku Gyisɛse, yemɔti bɛzele ye kɛ ɔkpula ɔ sa. (Dwɔn 4:31-33) Mekɛ mɔɔ Gyisɛse bua bɛ la, ɔhilehilele bodane mɔɔ ɔgyi ɔ nye zo wɔ ɛbɛlabɔlɛ nu la anu sikalɛ. Ɛnee Nyamenle gyima ne mɔɔ ɔbayɛ la anwo hyia tɛla aleɛlilɛ. Gyisɛse hanle ye ɔ nloa yɛɛ ɔvale ye nyɛleɛ ɔhilele kɛ mɔɔ Nyamenle kulo kɛ ɔyɛ la a ɔrale ye ɛyɛlɛ a. Duzu a ɛhye kile a?

Baebolo ne ka Gyisɛse gyima mɔɔ ɔyɛle la anwo edwɛkɛ kɛ: “[Ɔhɔkpɔsale] Galeli maanzinli ne anu amuala na ɔhilehilele . . . , ɔhanle Anwuma Belemgbunlililɛ ne anwo Edwɛkpa ne.” (Mateyu 4:23) Gyisɛse anga anzɛɛ yeambɔ Nyamenle Belemgbunlililɛ ne nolo yeangile awie mɔ ala. Eza ɔhilehilele menli—ɔluale edwɛkɛ mɔɔ ndelebɛbo wɔ nu la azo ɔ nee bɛ zuzule ninyɛne nwo ɔmanle bɛdele ɔ bo. Ɛnee Gyisɛse ngilehilelɛ ne gyi Belemgbunlililɛ ne azo.

Gyisɛse hilehilele ye tievolɛma kɛzi Nyamenle Belemgbunlililɛ ne de nee mɔɔ ɔbayɛ la wɔ ye ɛzonlenlɛ gyima ne kɔsɔɔti anu. Yɛ Belemgbunlililɛ ne anwo nɔhalɛ edwɛkɛ mɔɔ doɔdoa zo nee Ngɛlɛlera mɔɔ maa yɛnwu mɔɔ Gyisɛse hanle ye wɔ nwo la nzonlɛ.

• Nyamenle Belemgbunlililɛ ne le arane mɔɔ wɔ anwuma, na Gyisɛse a Gyihova ɛva ye ɛzie zolɛ Belemgbunli a.—MATEYU 4:17; DWƆN 18:36.

• Belemgbunlililɛ ne bade Nyamenle duma nwo na yeamaa bɛayɛ ye ɛhulolɛdeɛ wɔ azɛlɛ ye azo kɛmɔ bɛyɛ ye wɔ anwuma la.—MATEYU 6:9, 10.

• Azɛlɛ ne kɔsɔɔti bahakyi paladaese wɔ Nyamenle Belemgbunlililɛ ne tumililɛ bo.—LUKU 23:42, 43.

• Ɔnrɛhyɛ Nyamenle Belemgbunlililɛ ne bara na yeamaa Nyamenle ɛhulolɛdeɛ ayɛ ɛkɛ wɔ azɛlɛ ye azo. *—MATEYU 24:3, 7-12.

Ɛnee bɛta bɛfɛlɛ Gyisɛse “Kilehilevolɛ.” (Dwɔn 13:13) Noko akee, ɔyɛle nwanwane gyima dɔɔnwo wɔ ye ɛvolɛ nsa ne foa ɛzonlenlɛ gyima ne anu. Yeanyɛ boɛ fee la, gyima ɛhye mɔ lile ninyɛne nwiɔ anwo daselɛ. Mɔɔ ɔlumua, bɛlile daselɛ kɛ Nyamenle a zoanle ye amgba a. (Mateyu 11:2-6) Mɔɔ tɔ zo nwiɔ, kɛ Nyamenle Belemgbunlililɛ ne azo Belemgbunli la, bɛmaa yɛnwu ninyɛne mɔɔ ɔbayɛ ye dɔɔnwo kenlebie la. Maa yɛnlea nwanwane ninyɛne mɔɔ ɔyɛle la bie mɔ.

• Ɔmanle azɛlɛkye guale diinyi na maanle nu gyinlanle.—MAAKE 4:39-41.

• Ɔyɛle menli dɔɔnwo mɔɔ ɛnde kpɔkɛ la ayile, anyenzinliravolɛma, anzondiliravolɛma, nee abuburama.—LUKU 7:21, 22.

• Ɔmanle aleɛ ekyi bie yɛle dɔɔnwo ɔvale ɔmanle menli dɔɔnwo ne mɔ mɔɔ ɛnee ɛhɔne ɛlɛku bɛ la lile.—MATEYU 14:17-21; 15:34-38.

• Yeanyɛ boɛ fee la, ɔdwazole menli nsa ɔvile ewule nu.—LUKU 7:11-15; 8:41-55; DWƆN 11:38-44.

 Pɛ kɛzi azɛlɛ ye azo asetɛnla bayɛ wɔ Belemgbunli ɛhye mɔɔ lɛ tumi kpole la tumililɛ bo nvoninli wɔ wɔ adwenle nu nea!

Awie biala ɛnle ɛkɛ mɔɔ ɔbahola yeahilehile Gyihova anwo debie yeadɛla Nyamenle mumua ne Ara ne mɔɔ bɛravɛlɛle ye Gyisɛse Kelaese la a. Kɛ “abɔdeɛ muala anu belamunli Ralɛ” la, Gyisɛse nee Gyihova dɛnlanle anwuma—yehyɛ yedɛla sunsum nu abɔdeɛ gyɛne biala. (Kɔlɔsaema 1:15) Suzu nwolɛ adenle mɔɔ ɛnee ɔlɛ kɛ ɔbazukoa kɛzi ɔ Ze dwenle, Ye ɛhulolɛdeɛ, ngyinlazo nee ye ndenle nwo debie la anwo.

Ɛnee Gyisɛse bahola aha kɛ: “Awie biala ɛnze Ralɛ ne sonla holɛ kɛ Selɛ ne ala, yɛɛ awie biala ɛnze Selɛ ne sonla holɛ kɛ Ralɛ ne nee bɛdabɛ mɔɔ Ralɛ ne kulo kɛ ɔye ye ɔkile bɛ la ala.” (Luku 10:22) Mekɛ mɔɔ ɛnee Gyisɛse le sonla wɔ azɛlɛ ye azo la, ɔvile ye ɛhulolɛ nu—ɛhɛe, ye ahonle nu—ɔyele kɛzi ɔ Ze de la ali. Gyisɛse luale adenle mɔɔ le ngakyile kolaa la azo ɔdendɛle na ɔhilehilele; ɔhwenle adwenle ɔhɔle ninyɛne mɔɔ ɔzukoale ye wɔ Anwuma Anwumanli Nyamenle ne ɛkɛ wɔ sunsum ɛleka ne mɔɔ ɛnee ɔkakye la azo.—Dwɔn 8:28.

Yɛbahola yɛava kɛzi Gyisɛse yele ɔ Ze hilele la yɛado kɛzi milahyinli mɔɔ maa bɛnyia lateleke yɛ ye gyima la anwo. Zɛhae milahyinli ye kola die lateleke tumi mɔɔ anloa yɛ se kpalɛ la na ɔka tumi ne aze amaa awie biala asa aha mɔɔ ɔhyia nwo la. Zɔhane ala a, mekɛ mɔɔ Gyisɛse wɔ azɛlɛ ye azo la ɔhakyele mɔɔ ɔ Ze hilehilele ye wɔ anwuma la na ɔluale ndenle ngakyile zo ɔlale ye ali ɔhilele alesama mɔɔ bɛ ndelebɛbo wɔ aze la amaa bɛahola bɛade ɔ bo na bɛava bɛali gyima a.

Maa yɛzuzu ndenle nwiɔ mɔɔ anwo hyia mɔɔ Gyisɛse luale zo manle ɔ Ze subane lale ali la anwo.

• Gyisɛse lale nɔhalɛ mɔɔ fane Gyihova—Ye duma, ye bodane nee ye ndenle ne mɔ anwo la ali wɔ ye ngilehilelɛ nu.—DWƆN 3:16; 17:6, 26.

• Gyisɛse lale ninyɛne ngɛnlɛma dɔɔnwo mɔɔ fane Gyihova anwo la ali wɔ ye nyɛleɛ nu. Gyisɛse lale ɔ Ze subane ali wɔ adenle mɔɔ di munli la azo, yemɔti ɛnee ɔbahola yeaha kɛ: ‘Saa ɛkpondɛ kɛ ɛnwu kɛzi me Ze de la a, ɛnee nea me.’—DWƆN 5:19; 14:9.

Kɛzi Gyisɛse bɔle ye ɛbɛla la yɛ azibɛnwo. Saa yɛsuzu deɛmɔti ɔwule la anwo na yɛnea nwo yɛbɔ yɛ ɛbɛla a, yɛbanyia nvasoɛ dɔɔnwo.