Nrelenza Mɔɔ Ɔ Bo Ɛdelɛ Ɛnyɛ Se La Ɛzinzalɛ Arane

ƆYƐ yɛ fɛ kɛ yɛlɛye Ɛzinzalɛ Arane mɔɔ bɛva Nrelenza mɔɔ ɔ bo ɛdelɛ ɛnyɛ se bɛhɛlɛ mɔɔ lumua la ali a. Yɛbava yɛali gyima ɛvolɛ ko yɛanlea, na saa ɔbaboa a yɛayɛ ye dahuu. Yɛbava yɛaboka dɛba ne anwo yɛarɛlɛ asafo ne mɔ.

Ɔhyia kɛ awie biala te edwɛkɛ mɔɔ yɛsukoa ye Ɛzinzalɛ Arane ne anu dapɛne biala la abo kpalɛ. Ɛhye le zɔ ɔluakɛ Ɛzinzalɛ Arane Ɛzukoalɛ ne a le adenle titile mɔɔ “[akɛlɛ] nɔhavo mɔɔ ze nrɛlɛbɛ” ne dua zo kilehile Nyamenle menli ɛnɛ a. (Mat. 24:45) Noko duzu ati a ɔwɔ kɛ bɛyɛ Nrelenza Ɛzinzalɛ Arane mɔɔ ɔ bo ɛdelɛ ɛnyɛ se ɛ?

Yɛ mediema mɔɔ bɛwɔ ewiade ye la anu dɔɔnwo kɔ debiezukoalɛ mɔɔ bɛfa Nrelenza aneɛ a bɛyɛ la. Noko tɛ mekɛ ne amuala a bɛte Nrelenza ne mɔɔ wɔ Ɛzinzalɛ Arane ne anu la abo kpalɛ a. Ninyɛne dɔɔnwo ati a yera ye zɔ a. Kɛ neazo la, bɛka Nrelenza wɔ maanle dɔɔnwo mɔɔ wɔ Afrika, Asia, nee Pacific Nyiakɛ la anu. Yɛ mediema mɔɔ bɛwɔ maanle zɛhae mɔ anu la fa Nrelenza a yɛ bɛ ayia ne mɔ a, yɛɛ bɛka ye wɔ daselɛlilɛ nu, noko bɛka aneɛ gyɛne wɔ sua nu. Bieko, ɔbahola yeara ye kɛ asolo Nrelenza mɔɔ bɛka ye wɔ maanle ɛhye mɔ anu la nee Nrelenza mɔɔ bɛfa bɛkɛlɛ Ɛzinzalɛ Arane dɛba ne la. Konle ɛmaa yɛ mediema ne mɔ bie ɛnriandi ɛhɔ maanle mɔɔ Nrelenza ala a bɛfa bɛyɛ debiezukoalɛ la anu. Noko ɔyɛ se kɛ bɛbade Ɛzinzalɛ Arane ne abo kpalɛ ɔluakɛ Nrelenza ɛnle bɛ aneɛ. Ɔdwu mekɛ ne bie a ɔyɛ se ɔmaa ngakula mɔɔ bɛ aneɛ titile a le Nrelenza la bie mɔ bɔbɔ kɛ bɛbade Ɛzinzalɛ Arane ne abo. Magazine ɛhye mɔɔ bɛva Nrelenza mɔɔ ɔ bo ɛdelɛ ɛnyɛ se bɛhɛlɛ la baboa yɛ mediema mɔɔ bɛwɔ ewiade la anu dɔɔnwo yeamaa bɛanyia Ɛzinzalɛ Arane Ɛzukoalɛ ne azo nvasoɛ.

Nrelenza mɔɔ bɛva bɛhɛlɛ magazine ɛhye la ɛnle kɛ dɛba ne la, noko magazine nwiɔ ne bahilehile Baebolo nu nɔhalɛ ko ne ala anu. Bɛ mu nwiɔ bɛ ɛdendɛkpunli ne mɔ sɛ. Kpuyia, nvoninli, nee ndinu wɔ ɔ mu nwiɔ anu. Ɛhye kile kɛ awie ko biala bahola azi kpɔkɛ wɔ magazine mɔɔ ɔkulo kɛ ɔsukoa na ɔfa ɔkɔ Ɛzinzalɛ Arane Ɛzukoalɛ ne abo la anwo.

Yɛdie yɛdi kɛ magazine ɛhye mɔɔ bɛva Nrelenza mɔɔ ɔ bo ɛdelɛ ɛnyɛ se bɛhɛlɛ la baboa yɛ mediema dɔɔnwo mɔɔ ngakula boka nwo la yeamaa baziezie bɛ nwo kpalɛ bamaa Ɛzinzalɛ Arane Ɛzukoalɛ ne dapɛne biala. Gyihova kulo “diedima” ne kɔsɔɔti, na yɛyɛ ye mo kɛ ɔlɛdua “[akɛlɛ] nɔhavo mɔɔ ze nrɛlɛbɛ” ne anwo azo yeamaa yɛ sa aha debie biala mɔɔ yɛhyia nwo la wɔ mekɛ ne anloa a.—1 Pita 2:17.

Gyihova Alasevolɛ Neazo Eku