Abusua Ɛzonlenlɛ Nee Bɛtianwo Debiezukoalɛ Nwo Nzuzulɛ

WƆ ƐVOLƐ 2009 ne mɔlebɛbo, Gyihova Alasevolɛ mɔɔ wɔ ewiade amuala la yɛle nzenzaleɛ wɔ bɛ debiezukoalɛ ngyehyɛleɛ ne anu. Bɛhanle debiezukoalɛ nwiɔ ne mɔɔ bɛyɛ ye dapɛne ne avinli la bɛbɔle nu, na bɛmanle yɛ kɔsɔɔti anwosesebɛ kɛ yɛva nɔsolɛ ko ne mɔɔ ɛha la yɛyɛ abusua ɛzonlenlɛ anzɛɛ bɛtianwo debiezukoalɛ. Asoo ɛlɛfa ngyehyɛleɛ fofolɛ ɛhye wɔayɛ gyima? Asoo wɔnyia nvasoɛ wɔ zo?

Bie mɔ ɛbiza kɛ buluku boni a ɔwɔ kɛ bɛfa bɛyɛ abusua ɛzonlenlɛ ne a. Tɛ Neazo Eku ne adwenle a le kɛ ɔyɛ ngyehyɛleɛ ko yeamaa mbusua kɔsɔɔti. Ɔluakɛ tɛnlabelɛ ne le ngakyile la ati, ɔfɛta kɛ abusua tile anzɛɛ baholɛ biala nea kɛzi ɔbava dapɛne ngyehyɛleɛ ɛhye yeali gyima wɔ adenle kpalɛ zo la.

Bie mɔ fa siezie bɛ nwo maa asafo debiezukoalɛ, noko tɛ adenle ɛhye ala a ɔwɔ kɛ bɛdua zo bɛyɛ abusua ɛzonlenlɛ ne a. Bie mɔ kenga Ngɛlɛlera ne, bɛsuzu nwo, na bɔbɔ bɛyɛ nwolɛ yɛkile ɔlua ngakula ne mɔ ati. Tɛ mekɛ ne kɔsɔɔti a ɔhyia kɛ bɛyɛ ye kpuyia nee mualɛ adenle zo kɛmɔ yɛyɛ ye debiezukoalɛ bo la a. Ɔwɔ kɛ awie biala anwo tɔ ye na bɛahola bɛazuzu ninyɛne nwo kɛnlɛma amaa awie biala ahola ahile ye adwenle. Tɛnlabelɛ zɛhae maa bɛdwenle ninyɛne nwo kpalɛ na ɔmaa debiezukoalɛ ne ka bɛ adwenle nu na awie biala anye die.

Selɛ ko mɔɔ lɛ ngakula nsa la hɛlɛle kɛ: “Debie mɔɔ ɛnee yɛta yɛyɛ la a le kɛ yɛkenga Baebolo ne. Yɛ nuhua ko biala dumua kenga tile ne mɔ, ngakula ne mɔ fa ngɛlɛlera ne anu edwɛkɛ bie yɛ neɛnleanu na bɛka mɔɔ bɛnwunle ye la. Michael [mɔɔ ɛnyia ɛvolɛ nsuu la] yɛ nvoninli wɔ kɛlata zo anzɛɛ kɛlɛ ɛdendɛkpunli bie. David nee Kaitlyn [mɔɔ bɛnyia ɛvolɛ 13 nee 15 la] kɛlɛ edwɛkɛ bie mɔɔ zile Baebolo mekɛ nu la anwo edwɛkɛ kɛ asɛɛ ɛnee bɛwɔ ɛkɛ ne bie la. Kɛ neazo la, mekɛ mɔɔ ɛnee yɛlɛkenga Falo kpanwotovolɛ ne nee ye nzasuvolɛ ne ɛlalɛ mɔɔ bɛhanle na Dwosefi hilele ɔ bo anwo edwɛkɛ la, Kaitlyn yɛle ɔ nwo kɛ awie mɔɔ ɔla efiade na ɔlɛnea mɔɔ ɛlɛkɔ zo la na ɔhɛlɛle nwolɛ edwɛkɛ.”—Mɔl., tile 40.

Nɔhalɛ nu, tɛnlabelɛ ne gua ye ngakyile. Debie mɔɔ baboa awie anzɛɛ abusua bie la ɛnrɛhola ɛnrɛboa awie anzɛɛ abusua gyɛne. Nzuzulɛ ngakyile mɔɔ ɛbahola wɔava wɔali gyima wɔ wɔ abusua ɛzonlenlɛ anzɛɛ bɛtianwo debiezukoalɛ nu la wɔ ɛlɛka ne mɔɔ boka nwo la anu. Kpolerazulɛ biala ɛnle nwolɛ kɛ, ɛbahola wɔadwenle debie gyɛne nwo.

 [Ɛlɛka/Nvoninli wɔ mukelɛ 31]

Mbusua mɔɔ ɛvolɛ 13 mɔɔ kɔ 19 ngakula wɔ nu:

• Bɛgenga Questions Young People Ask—Answers That Work na bɛzuzu nwo.

• Fa ye kɛ ɛnee ɛde aze wɔ Baebolo mekɛ ne anu. (Nea May 15, 1996, Nrelenza Ɛzinzalɛ Arane ne mukelɛ 14, ɛdendɛkpunli 17-18.)

• Bɛha mekɛ ezinra nu nee mekɛ tendenle nu bodane nwo edwɛkɛ.

• Ɔvi mekɛ mɔɔ kɔ mekɛ la, bɛnlea Baebolo nwo video na bɛzuzu nwo.

• Bɛzuzu Nrelenza Ɛzinzalɛ Arane ne anu edwɛkɛ “For Young People” ne anwo.

Agyalɛma mɔɔ bɛnlɛ ngakula:

• Bɛzuzu The Secret of Family Happiness buluku ne tile 1, 3, 11-16 la anwo.

• Bɛha neɛnleanu mɔɔ bɛyɛle ye wɔ Baebolo ɛgengalɛ nu la bɛhile bɛ nwo.

• Bɛziezie bɛ nwo bɛmaa Asafo Baebolo Ɛzukoalɛ anzɛɛ Ɛzinzalɛ Arane Ɛzukoalɛ.

• Bɛzuzu kɛzi bɛbadɛlɛ bɛ ɛzonlenlɛ gyima ne anu kɛ agyalɛma la anwo.

Mbelazinli nee mbusua mɔɔ bɛ muala bɛnle ɛzonlenlɛ ko anu la:

• Bɛzukoa mbuluku fofolɛ mɔɔ bɛ sa hanle ye wɔ maangyeba nyianu bo la.

• Bɛgenga Yearbooks dɛba nee fofolɛ.

• Bɛyɛ neɛnleanu wɔ kpuyia mɔɔ bɛta bɛbiza ye wɔ bɛ azɛlɛsinli ne anu la anwo.

• Bɛziezie edwɛkɛ mɔɔ bɛbaha ye wɔ daselɛlilɛ nu la.

Mbusua mɔɔ ngakula ngyikyi wɔ nu:

• Bɛva Baebolo nu edwɛkɛ bɛyɛ yɛkile.

• Bɛva ninyɛne mɔɔ bamaa bɛahakye edwɛkɛ mɔɔ bie a le mɔɔ wɔ Awake! nu wɔ mukelɛ 30 nee 31 ne la bɛli nwɔhoa.

• Ɔdwu mekɛ ne bie a, bɛbɔ bɛ ti anu bɛyɛ ninyɛne. (Nea “Studying the Bible—In the Zoo!” mɔɔ wɔ March 8, 1996 Awake! ne mukelɛ 16-19 la.)

• Bɛzuzu “Teach Your Children” mɔɔ ɔba Nrelenza Ɛzinzalɛ Arane ne anu la anwo.