Yɛ Kengavoma Biza Kɛ . . .

Amagɛdɔn a le duzu?

▪ Wɔ menli dɔɔnwo afoa nu, edwɛkɛkpɔkɛ “Amagɛdɔn” maa menli dɔɔnwo ɛhunlɛ, nukelea konle, esiane mgbole, anzɛɛ esiane mɔɔ maanle nu wuluwuluyɛlɛ fa ba la ba bɛ adwenle nu. Baebolo nu edwɛkɛkpɔkɛ ɛhye ɛngile ɛhye mɔ biala. Duzu a Baebolo nu edwɛkɛkpɔkɛ Amagɛdɔn ne kile a?

Edwɛkɛkpɔkɛ “Amagɛdɔn” wɔ Baebolo buluku ne mɔɔ bɛfɛlɛ ye Yekile la anu. Ɔle konle titile bie mɔɔ “arelemgbunli mɔɔ wɔ ewiade la amuala” nee “Nyamenle Bedevinli ne” baho wɔ Nyamenle kenle kpole ne mɔɔ li awieleɛ la anu a. Ngɛlɛlera dɔɔnwo noko ka konle ɛhye anwo edwɛkɛ.—Yekile 16:14-16; Yizikeɛle 38:22, 23; Dwowɛle 3:12-14; Luku 21:34, 35; 2 Pita 3:11, 12.

Kɛzi konle ɛhye bayɛ ɛ? Wɔ sɛkɛlɛneɛ adenle zo, Yekile buluku ne bɔ yɛ amaneɛ kɛ: “Menwunle . . . arelemgbunli kɔsɔɔti kɛ bɛ nee bɛ ɛlɔnema ɛboɔboa bɛ nloa kɛ bɛ nee mɔɔ de ɛkpɔnwɔ fufule ne azo la nee ye ɛlɔnema baho.” Ahenle “mɔɔ de ɛkpɔnwɔ fufule ne azo la” a le Gyisɛse Kelaese, Nyamenle Ara ne mɔɔ yekpa ye kɛ ɔli anwumabɔvolɛma anyunlu na bɛli konim wɔ Nyamenle agbɔvolɛ nwo zo la. (Yekile 19:11-16, 19-21) Gyɛlɛmaya 25:33 maa yɛnwu kɛ bɛbazɛkye ɛtanevolɛma dɔɔnwo kpalɛ: “Kenle zɔhane menli mɔɔ [Gyihova] ɛhu bɛ la avunli bagua ye yɛlɛdɛdɛ, ɔvi maanle ti yeahɔdwu maanle bo.”

Duzu ati a Amagɛdɔn ne anwo hyia ɛ? Maanle maanle ne ɛkpo Nyamenle tumililɛ ne, noko bɛbɔ bɛ ɛdeɛ ne nolo. (Edwɛndolɛ 24:1) Bɛha bɛ atuadelɛ ne anwo edwɛkɛ wɔ Edwɛndolɛ 2:2 kɛ: “Ewiade arelemgbunli boɔboa dwenle ɛtane, bɛ maanle mgbanyinli bɔ nu kɔ agyinla tia [Gyihova] nee mɔɔ yekpa nu yeye ye la.”

Wɔ adenle bie azo, atuadelɛma ɛhye mɔ ɛha kɛ azɛlɛ ne le bɛ ɛdeɛ na bɛva bɛli gyima wɔ adenle ɛtane zo bɛzɛkye ye. Ɛnɛ, maanle maanle ne ɛlɛsɛkye azɛlɛ ne nee ninyɛne mɔɔ ɛbɔ yɛ ɛyia la. Nyamenle Edwɛkɛ ne hanle dole ɛkɛ kɛ: “Ɛya ɛwolo bɛdabɛ mɔɔ bɛnzonle Nyamenle la, noko [Nyamenle] ɛya kenle ne ɛdwu.” Akee Nyamenle bazɛkye “bɛdabɛ mɔɔ bɛsɛkye azɛlɛ ye la.” (Yekile 11:18) Nyamenle ɛzi kpɔkɛ kɛ ɔbalua Amagɛdɔn ne azo yeaziezie tumililɛ nwo edwɛkɛ ne.—Edwɛndolɛ 83:18.

Kenlenzu a Amagɛdɔn ne bara a? Nyamenle Ara ne hanle ye wienyi kɛ: “Awie biala ɛnze kenle ne nee mekɛ ne; anwuma soanvolɛma nee Ralɛ ne bɔbɔ ɛnze. Selɛ ne angomekye a ze a.” (Mateyu 24:36) Mekɛ mɔɔ Gyisɛse Kelaese mɔɔ le Belemgbunli Kovolɛ la ɛlɛka Amagɛdɔn ne anwo edwɛkɛ la, ɔvale kɔkɔbɔlɛ ɛhye ɔmanle: “Bɛdie! Mebara bɛ nwo zo kɛ awule la! Na nyilalɛ ɛha sonla ne mɔɔ ɛnee ɔ nye gyi zolɛ” la. (Yekile 16:15) Yemɔti, ewiade kɔsɔɔti konle ɛhye nee Kelaese ɛralɛ ne mɔɔ Baebolo ngapezo kile kɛ yera la a lua a.

Amagɛdɔn bazɛkye ɛtanevolɛma mɔɔ bɛnnu bɛ nwo la, noko “menli pemgbenleamgbe bie” banyia ngoane. (Yekile 7:9-14) Bɛbanwu kɛ zɛhae edwɛkɛ ne ɛra nu: “Ɔnrɛhyɛ biala ɛnee amumuyɛnli ne abo zo ɛminli, ɛbahɔnlea ɛleka mɔɔ ɔwɔ la, na ɛnrɛnwu ye. Na bɛlɛvoma bava azɛlɛ ne ayɛ bɛ ɛdeɛ, na bɛ nye alie bɛ ɛkpazilɛ nwo.”—Edwɛndolɛ 37:10, 11.

[Edwɛkɛ mɔɔ bɛkpa wɔ mukelɛ 20]

“Na bɛlɛvoma bava azɛlɛ ne ayɛ bɛ ɛdeɛ, na bɛ nye alie bɛ ɛkpazilɛ nwo”