Kpuyia Mɔɔ Vi Kengavoma Ɛkɛ

Saa melɛ kpuyia bie wɔ debie bie mɔɔ megenga ye wɔ Baebolo ne anu anzɛɛ mehyia folɛdulɛ wɔ me ngyegyelɛ bie anwo a duzu a ɔwɔ kɛ meyɛ a?

Mrɛlɛbulɛ 2:1-5 tu yɛ folɛ kɛ yɛkpondɛ ndelebɛbo nee adwenlenunwunlɛ kɛ asɛɛ yɛlɛkpondɛ “anwoneɛ mɔɔ vea la.” Ɛhye kile kɛ ɔwɔ kɛ yɛbɔ mɔdenle yɛyɛ neɛnleanu yɛkpondɛ yɛ Baebolo nwo kpuyia nwo mualɛ nee yɛ ngyegyelɛ sɔbelɛ. Kɛzi yɛbahola yɛayɛ ɛhye ɛ?

Edwɛkɛ “How to Do Research” (Kɛzi Bɛyɛ Neɛanlea Nu La) mɔɔ wɔ Benefit From Theocratic Ministry School Education buluku ne mukelɛ 33 kɔdwu 38 la kile yɛ kɛzi bɛfa ninyɛne mɔɔ akɛlɛ nɔhavo nee nrɛlɛbɛvolɛ eku ne ɛyɛ bɛyɛ neɛnleanu la. (Mat. 24:45) Mukelɛ 36 ne kilehile kɛzi bɛfa Watch Tower Publications Index ne ko biala anu edwɛkɛ nee ngɛlɛlera mɔɔ bɛhyehyɛ bɛyɛ gyima la anu. Ɛhye bamaa wɔalua edwɛkɛ agbɔkɛ anzɛɛ ngɛlɛlera bie mɔ azo wɔanyia edwɛkɛ dɔɔnwo wɔayɛ neɛnleanu. Saa ɛlɛkpondɛ mualɛ anzɛɛ adehilelɛ fɔɔnwo bie a si abotane. Kakye kɛ ɛlɛkpondɛ “anwoneɛ mɔɔ vea” mɔɔ die mekɛ nee mɔdenlebɔlɛ la.

Nɔhalɛ nu, edwɛkɛtile nee ngɛlɛlera bie mɔ wɔ ɛkɛ mɔɔ bɛtɛkanle nwolɛ edwɛkɛ wɔ yɛ mbuluku ne mɔ anu a. Na saa yɛha ngɛlɛlera bie anwo edwɛkɛ bɔbɔ a, bie a ɛnee ɔnvane wɔ kpuyia ne anwo. Bieko, Baebolo kɛlɛtokɛ bie mɔ abo ɛdelɛ ɛnla aze ɔluakɛ bɛanga nwolɛ edwɛkɛ kɔsɔɔti wɔ Ngɛlɛlera ne anu. Ɛhye ati, tɛ kpuyia biala a yɛbahola yɛanyia nwolɛ mualɛ wɔ ɛkɛ ne ala a. Wɔ tɛnlabelɛ zɛhae anu, ɔwɔ kɛ yɛkoati kɛ yɛkɛbɔ yɛ ti anu yɛkɛha edwɛkɛ mɔɔ yɛnlɛ nwolɛ mualɛ la, ɔluakɛ “ɛhye mɔ wie kpolerazulɛ ala, na ɔnvane Nyamenle ngyehyɛlɛ ne mɔɔ bɛdua diedi zo bɛnwu ye la anwo.” (1 Tem. 1:4; 2 Tem. 2:23; Tae. 3:9) Ɔfese ne anzɛɛ asafo ti ɛtɛyɛle ye adwenle kɛ ɔfedevede kpuyia zɛhae mɔ mɔɔ bɛtɛkanle nwolɛ edwɛkɛ wɔ yɛ mbuluku ne mɔ anu la kɔsɔɔti anu na yeamaa nwolɛ mualɛ. Yɛ nye die kɛ adehilelɛ mɔɔ yɛhyia nwo wɔ asetɛnla nu la wɔ Baebolo ne anu. Noko yeanga ninyɛne bie mɔ anwo edwɛkɛ dɔɔnwo amaa yɛanyia diedi kpole wɔ Nyamenle mɔɔ ɔmanle bɛhɛlɛle la anu.—Nea Draw Close to Jehovah buluku ne mukelɛ 185 kɔdwu 187 ne.

Na saa wɔyɛ neɛnleanu kpalɛ wɔ edwɛkɛ bie mɔɔ gyegye wɔ la anwo na ɛtɛnyianle ye sɔbelɛ noko ɛ? Twe bikye ɛ gɔnwo diedinli mɔɔ bɔ mɔdenle la, bie a asafo nu kpanyinli. Bɛlɛ Baebolo ne anu ndelebɛbo nee Keleseɛnema ɛbɛlabɔlɛ nwo anwubielɛ dɔɔnwo. Saa ɛhyia folɛdulɛ wɔ wɔ ngyegyelɛ anzɛɛ kpɔkɛzilɛ bie anwo a bɛbahola bɛaboa wɔ ɔluakɛ bɛze wɔ nee wɔ tɛnlabelɛ ne. Yɛɛ mmamaa ɛ rɛle fi ye ɛlɛ kɛ ɛbazɛlɛ Gyihova wɔ debie biala mɔɔ ehyia nwolɛ la anwo, sɛlɛ ye kɛ ɔlua ye sunsum nwuanzanwuanza ne azo ɔbɔ wɔ adwenle ne anwo bane ɔluakɛ Gyihova “maa nrɛlɛbɛ; ɔdaye yɛɛ ɔmaa . . . ndelebɛbo a.”—Mrɛ. 2:6; Luku 11:13.