Asoo Mualɛ Ne Anwo Hyia?

“Mekɛ mɔɔ membɔle ɔ bo kɛ me nee mrenya tu la ɛnee meli ɛvolɛ bulu. Mɔlebɛbo ne, ɛnee yɛsosɔ yɛ sa na yɛfufo yɛ nloa anwo. Noko, yeangyɛ yɛsosɔle yɛ nvɛyeba ne mɔ mɔɔ vea la anu na yɛzɔle nla ngakyile yɛnleanle. Mɔɔ menyianle ɛvolɛ 15 la yɛɛ membɔle gyima ɛyɛlɛ bo a, na ɛnee mrenya mɔɔ me nee bɛ yɛ gyima na bɛkpondɛ kɛ bɛ nee me da la kola bikye me. Mengulole kɛ me nee me gɔnwo mɔ gyimayɛvoma yɛ debie biala. Ɛnee mekpondɛ kɛ bɛdie me bɛto nu, na ɛhye manle menzɔle nla ngakyile meneanle.”—SARAH, * AUSTRALIA.

ASOO ɔbazi ɛ nwo kɛ Sarah nyinli wɔ Keleseɛnema awuke nu? Ye awovolɛ vale ɛbɛlabɔlɛ nwo ngyinlazo mɔɔ wɔ Baebolo ne anu la tetele ye. Noko Sarah vale adenle gyɛne zo.

Menli dɔɔnwo bɛalie mɔɔ Sarah yɛle la ado nu. Bɛdwenle kɛ mɔɔ Baebolo ne ka wɔ nla nwo la mekɛ ɛkpa nwo. Saa awie kɔ asɔne na ɔfa ɔ nwo ɔwula nla nu nyɛleɛ ɛtane nu a bie mɔ ɛmbu ye kɛ ɔle ɛtane.

Asoo ɔhyia kɛ ɛnwu mɔɔ Baebolo ne ka wɔ nla nwo la na ɛdi zo? Baebolo ne ka kɛ bɛvale “Nyamenle Sunsum a [bɛhɛlɛle] Nyamenle Edwɛkɛ ne a.” (2 Temɔte 3:16) Saa ɛdie ɛdi kɛ Nyamenle a bɔle sonla na Baebolo ne le ye Edwɛkɛ a, ɛnee ɔwɔ kɛ ɛnwu mɔɔ ɔka ye wɔ edwɛkɛ ɛhye anwo la.

Mɔɔ yɛ nyane la a le kɛ, menli dɔɔnwo adwenle ɛdu ɛfonyia wɔ mɔɔ Baebolo ne ka wɔ nla nwo la anwo. Asɔne mgbanyima kilehile nla nwo edwɛkɛ ngakyile noko bɛka kɛ ɔwɔ Baebolo ne anu. Na ɛhye ɛva mgbakyemgbakye ɛra asɔne dɔɔnwo anu.

Kɛ anrɛɛ ɛbava ɛ nwo wɔado mɔɔ awie mɔ ka azo la, duzu ati a ɛnva mekɛ ekyi ɛneɛnlea edwɛkɛ ne anu ɛ? Edwɛkɛ mɔɔ doa zo la ka kpuyia bulu mɔɔ menli dɔɔnwo biza ye wɔ nla nwo la anwo edwɛkɛ. Ɛbanwu mɔɔ Baebolo ne ka la wienyi wɔ edwɛkɛ zɔhane anu. Edwɛkɛ mɔɔ li awieleɛ wɔ edwɛkɛ ɛhye mɔ anu la bahilehile deɛmɔti kpɔkɛ mɔɔ yɛsi anwo hyia la anu.

[Ɔ bo ɛkɛ ne edwɛkɛ]