Duzu Ati A Ɔwɔ Kɛ Ɛdi Baebolo Ngyinlazo Zo A?
Duzu Ati A Ɔwɔ Kɛ Ɛdi Baebolo Ngyinlazo Zo A?
ASOO mɔɔ Baebolo ne ka ye wɔ nla nwo la mekɛ ɛpɛ nu anzɛɛ le kyengye? Kyɛkyɛ. Mɔɔ Baebolo ne ka la bamaa yɛahoati:
▪ Nla nu ewule
▪ Mraalɛ mɔɔ bɛtɛgyale na bɛnrenzɛ
▪ Nyane mɔɔ ewolebɔlɛ maa bɛdi
▪ Adwenle mɔɔ bua bɛ fɔlɛ
▪ Nyane mɔɔ awie di kɛ yezɛkye ɔ nwo la
Gyihova Nyamenle, * yɛ Bɔvolɛ ne, kpondɛ kɛ yɛ nye die na yɛnyia ye ahyɛlɛdeɛ ne mɔ azo nvasoɛ. Nyamenle “kilehile” yɛ mɔɔ le kpalɛ maa yɛ la. (Ayezaya 48:17) Awie biala mɔɔ di Baebolo ngyinlazo mɔɔ fane nla nwo azo la nyia:
▪ Nyamenle anyunlu ɛlolɛ
▪ Anzondwolɛ
▪ Abusua mɔɔ koyɛlɛ wɔ nu
▪ Dumamɔlɛ kpalɛ
▪ Ɛbulɛ
Na saa ɛnli ɛbɛlabɔlɛ nwo ngyinlazo mɔɔ wɔ Baebolo ne anu la azo ɛ? Asoo ɛbahola wɔahakyi wɔ subane? Nyamenle bagyinla wɔ nyɛleɛ dɛba ne azo yeabua wɔ ndɛne ɔ?
Suzu edwɛkɛ ɛhye anwo: Ɛnee ɛvoya ne mɔɔ lumua la anu Keleseɛnema ne bie mɔ bɔ adwɔmane, fa nwuvolɛ, nee bɛ gɔnwo mɔ mrenya da. Bɛzile kpɔkɛ bɛhakyile bɛ subane na bɛnyianle nvasoɛ dɔɔnwo. (1 Kɔlentema 6:9-11) Ɛnɛ, menli mɔɔ wɔ ewiade ye la anu dɔɔnwo ɛyɛ deɛ ko ne ala bie. Bɛhwe bɛ nwo bɛvi ɛbɛla mɔɔ ɛkpɔlɔ la anwo na bɛnyia nvasoɛ bɛvi bɛ subane mɔɔ bɛmaa ɔ nee Baebolo ngyinlazo ɛyɛ ko la azo. Fa Sarah mɔɔ yɛhanle ɔ nwo edwɛkɛ wɔ mɔlebɛbo ne la kɛ neazo.
“Me Nwo Dɔle Me Ndɛndɛ”
Sarah nwunle kɛ ɛbɛlabɔlɛ ɛtane ne mɔɔ ɔlile ɔ nzi la ammaa ɔ sa anga fanwodi nee anyelielɛ mɔɔ ɛnee ɔlɛkpondɛ la. Ɔhanle kɛ: “Mendele nganeɛ kɛ me adwenle ɛwu. Ɔyɛle me nyiane yɛɛ ɔgyegyele me kɛ mebanrenzɛ anzɛɛ mebanyia ewule ɛzulolɛ bie. Me rɛle anvi Nyamenle ɛlɛ, na ɛnee meze kɛ me ɛbɛlabɔlɛ ne gyegye ye. Menwunle kɛ me nwo ɛnde, na me nye anlie.”
Awieleɛ kolaa ne, Sarah nyianle anwosesebɛ hakyile ye subane. Ɔmanle ye awovolɛ mɔɔ bɛle Gyihova Alasevolɛ la boale ye. Eza ɔmanle ye asafo nu mgbanyima boale ye. Sarah se: “Atiakunlukɛnlɛma nee ɛlɔlɛ mɔɔ me awovolɛ nee asafo ne anu mgbanyima lale ye ali hilele me la zinle me nwo. Me nwo dɔle me ndɛndɛ.”
Sarah ɛwo nwiɔ. Ɔse: “Meka kpɔkɛ mɔɔ menzile la wienyi mekile me mra ne mɔ. Mekpondɛ kɛ bɛnwu kɛ Nyamenle ngyinlazo mɔɔ meanli zo la amboa me. Mekulo kɛ bɛnwu nwonane nu, adwenle nu, nee nganeɛdelɛ nu nvasoɛ mɔɔ Nyamenle ngyinlazo mɔɔ fane nla nwo mɔɔ bɛdi zo maa bɛnyia la. Menwu kɛ Nyamenle ɛmaa yɛ ɛbɛlabɔlɛ nwo ngyinlazo ɔluakɛ ɔngulo kɛ yɛnwu amaneɛ.”
Saa ɛdawɔ noko ɛdi Nyamenle adehilelɛ mɔɔ ɛlɔlɛ wɔ nu la azo a, ɛbanyia nvasoɛ. Baebolo ne bɔ ɛwɔkɛ ɛhye: “[Gyihova] ngyehyɛlɛ ne mɔ le fɔɔnwo, ɔmaa ahonle di fɛlɛko; [Gyihova] mɛla ne anwo te, ɔmaa ndelebɛbo yɛ gyima. . . . Zolɛlilɛ le nyilalɛ kpole.”—Edwɛndolɛ 19:8, 11. *
[Ɔ bo ɛkɛ ne edwɛkɛ ne mɔ]
^ ɛden. 8 Baebolo ne ka kɛ Gyihova le Nyamenle duma.
^ ɛden. 20 Saa ɛkpondɛ kɛ ɛnwu nvasoɛ mɔɔ wɔ Baebolo nu folɛdulɛ zo la anwo edwɛkɛ dɔɔnwo a, nwu Gyihova Alasevolɛ mɔɔ bɛwɔ ɛleka mɔɔ ɛwɔ la. Anzɛɛ fa address mɔɔ wɔ mukelɛ 4 mɔɔ fɛta la kɛlɛ yɛ anzɛɛ kɔ yɛ Intanɛte ɛleka ne wɔ www.watchtower.org.
[Edwɛkɛ mɔɔ bɛkpa wɔ mukelɛ 8]
Menli mɔɔ ɛnli Baebolo ngyinlazo zo la maa awie mɔ di nyane
[Edwɛkɛ mɔɔ bɛkpa wɔ mukelɛ 9]
Menli mɔɔ di Baebolo ngyinlazo zo la nyia adwenle mɔɔ anu te nee abusua mɔɔ koyɛlɛ wɔ nu
