Maa Baebolo Ne Ɛhilehile Wɔ

Kɛ Ɔkɛyɛ Na Wɔ Abusua Ne Anye Alie Ɛ?

Edwɛkɛ ɛhye ka kpuyia bie mɔ mɔɔ bie a wɔbiza ye ɛlɛ la anwo edwɛkɛ yɛɛ ɔkile ɛleka mɔɔ ɛbanyia nwolɛ mualɛ wɔ Baebolo ne anu la. Gyihova Alasevolɛ anye balie kɛ bɛ nee wɔ bazuzu kpuyia ɛhye mɔ anwo.

1. Kɛmɔti a ɔwɔ kɛ bɛgya adenle kpalɛ zo na abusua ne anye alie ɛ?

Gyihova, anyelielɛ Nyamenle ne a hyehyɛle agyalɛ a. Agyalɛ nwo hyia na abusua ne anye alie ɔluakɛ ɔkola ɔmaa bɛnyia agɔnwolɛ yɛɛ ɔle ɛleka mɔɔ banebɔlɛ wɔ mɔɔ bɛtete ngakula a. Kɛzi Nyamenle bu agyalɛ ɛ? Ɔkpondɛ kɛ ɔtɛnla ɛkɛ dahuu na nrenya nee raalɛ gya wɔ mɛla adenle zo. (Luku 2:1-5) Nyamenle kulo kɛ kunli nee yelɛ di nɔhalɛ maa bɛ nwo. (Hibuluma 13:4) Gyihova maa adenle kɛ Keleseɛnema kola bɔ ewole na bɛgya fofolɛ saa bɛ bokavolɛ ne sɛkye agyalɛ a.—Kenga Mateyu 19:3-6, 9.

2. Kɛzi ɔwɔ kɛ kunli yɛɛ yelɛ nee bɛ nwo tɛnla ɛ?

Gyihova bɔle raalɛ nee nrenya kɛ bɛbɔ nu bɛyɛ gyima wɔ agyalɛ ne anu. (Mɔlebɛbo 2:18) Kɛ abusua tile la, ɔwɔ kɛ kunli maa ye abusua ne asa ka bɛ nwonane nu ngyianlɛ na ɔkilehile bɛ Nyamenle anwo debie. Ɔwɔ kɛ ɔda tunwomaa ɛlɔlɛ ali ɔkile ɔ ye. Ɔwɔ kɛ kunli nee yelɛ da ɛlɔlɛ nee ɛbulɛ ali kile bɛ nwo. Kɛmɔ kunlima nee yelɛma kɔsɔɔti ɛnli munli la ati, ɛtane fakyɛ nwo hyia kpalɛ na anyelielɛ ara bɛ agyalɛ ne anu.—Kenga Ɛfɛsɛsema 4:31, 32; 5:22-25, 33; 1 Pita 3:7.

3. Saa ɛ nye ɛnlie wɔ wɔ agyalɛ ne anu a, asoo ɔwɔ kɛ ɛgyakyi wɔ bokavolɛ ne?

Saa edwɛkɛ ba ɛ nee wɔ bokavolɛ ne avinli a, bɛziezie ye wɔ ɛlɔlɛ nu. (1 Kɔlentema 13:4, 5) Nyamenle Edwɛkɛ ne ɛnga kɛ ndetenu zo a bɛdua bɛdi agyalɛ nu ngyegyelɛ nwo gyima a. Noko akee, wɔ tɛnlabelɛ mɔɔ anu yɛ se la anu, Keleseɛnenli bahola anlea saa ɔle kpalɛ kɛ ɔbatete agyalɛ ne anu anzɛɛ ɔnle kpalɛ a.—Kenga 1 Kɔlentema 7:10-13.

  4. Ngakula, duzu a Nyamenle kpondɛ kɛ bɛnyia a?

Gyihova kpondɛ kɛ bɛ nye die. Ɔtu bɛ folɛ kpalɛ mɔɔ ɔbamaa bɛ nye alie a. Ɔkpondɛ kɛ bɛ awovolɛ nrɛlɛbɛ nee bɛ anwubielɛ boa bɛ. (Kɔlɔsaema 3:20) Gyihova anye sɔ debie biala mɔɔ bɛyɛ bɛye ye ayɛlɛ la.—Kenga Nolobɔvo ne 11:9–12:1; Mateyu 19:13-15; 21:15, 16.

5. Awovolɛ kɛ ɔkɛyɛ na bɛ mra nye alie ɛ?

Ɔwɔ kɛ bɛyɛ gyima ɛsesebɛ bɛkpondɛ aleɛ, dabelɛ, nee adɛladeɛ bɛmaa bɛ mra. (1 Temɔte 5:8) Noko amaa bɛ mra nye alie la, eza ɔwɔ kɛ bɛkilehile bɛ mra bɛmaa bɛkulo Nyamenle na bɛsukoa ɔ nwo debie. (Ɛfɛsɛsema 6:4) Nyamenle anwo ɛhulolɛ nwo neazo kpalɛ mɔɔ ɛbayɛ la baha ɛ mra ne mɔ ahonle kpalɛ. Saa wɔ adehilelɛ gyi Nyamenle Edwɛkɛ ne azo a, ɔbahola yeanyia ɛ mra adwenle zo tumi wɔ adenle kpalɛ zo.—Kenga Mɛla ne 6:4-7; Mrɛlɛbulɛ 22:6.

Saa bɛmaa ngakula anwosesebɛ na bɛkanvo bɛ a, ɔboa bɛ. Eza ɔwɔ kɛ bɛtenrɛdenrɛ bɛ na bɛtea bɛ. Zɛhae ndetelɛ ne bɔ bɛ nwo bane fi subane mɔɔ ɔbahola yeamaa bɛali nyane la anwo. (Mrɛlɛbulɛ 22:15) Noko akee, ɔnle kɛ bɛfa ɛya bɛtea bɛ atisesebɛ nu.—Kenga Kɔlɔsaema 3:21.

Gyihova Alasevolɛ ɛyɛ mbuluku dɔɔnwo mɔɔ boa awovolɛ ne bɛ mra titile a. Mbuluku ɛhye mɔ gyi Baebolo ne azo.—Kenga Edwɛndolɛ 19:7, 11.

Saa ɛkpondɛ nwolɛ edwɛkɛ dɔɔnwo a, nea buluku ɛhye, Duzu A Baebolo ne Kilehile Amgba A? mɔɔ Gyihova Alasevolɛ ɛyɛ la tile 14.