“Mɛla ne ɛbuke wɔ adwenle nu ɛmaa wɔnwu nɔhalɛ ne [anu ndelebɛbo ne.]”—WULO. 2:20.

1. Duzu ati a ɔhyia kɛ yɛbade mɔɔ Pɔɔlo hanle ye wɔ Mosisi Mɛla ne anwo la abo a?

EDWƐKƐ mɔɔ ɛzoanvolɛ Pɔɔlo hɛlɛle la maa yɛte Mosisi Mɛla ne foa bie mɔ mɔɔ anwo hyia la abo. Kɛ neazo la, Pɔɔlo hilehilele nu wɔ ye kɛlata ne mɔɔ ɔhɛlɛle Hibuluma la anu kɛ Gyisɛse le “Sɛlɛvolɛ Kpanyinli mɔɔ di nɔhalɛ,” na ɔvale ɔ nwo ɔbɔle afɔle kokye ɔmanle yɛ. Anzondwolɛ badɛnla bɛdabɛ mɔɔ bɛdie ye bɛdi la nee Nyamenle avinli na bɛbanyia “ngoanelielɛ mɔɔ ɛnlɛ awieleɛ.” (Hib. 2:17; 9:11, 12) Eza Pɔɔlo hilehilele nu kɛ ndanlɛ sua ne le mɔɔ “wɔ anwuma lɔ la sɔhovolɛ” ala. Gyisɛse le ngyekyeleɛ ne mɔɔ le kpalɛ tɛla Mosisi Mɛla ne la avinligyinlavolɛ. (Hib. 7:22; 8:1-5) Pɔɔlo boale Keleseɛnema mɔɔ ɛnee wɔ ye mekɛ zo la ɔhilehilele Mosisi Mɛla ne foa bie mɔ anu ɔhilele bɛ. Ye ngilehilenu ne bahola aboa yɛdayɛ noko yeamaa yɛanyia anyezɔlɛ kpole yɛamaa mɔɔ Nyamenle ɛyɛ ɛmaa yɛ la.

2. Duzu ati a ɛnee Dwuu Keleseɛnema ne ze Nyamenle anwo ninyɛne dɔɔnwo nee deɛmɔti ɔvale mɛla ne ɔmanle la tɛla menli mɔɔ ɛnee ɛnle Dwuuma la ɛ?

² Ɛnee Pɔɔlo edwɛkɛ mɔɔ ɔhɛlɛle Keleseɛnema mɔɔ wɔ Wulomu la bie fane Dwuuma mɔɔ bɛze Mosisi Mɛla ne na bɛrayɛ Keleseɛnema la anwo. Ɔzele bɛ kɛ ɔluakɛ bɛze Mɛla ne la ati, yebuke bɛ adwenle nu yemaa bɛnwu “nɔhalɛ” mɔɔ fane Gyihova tenleneyɛlɛ nwo nee deɛmɔti ɔvale mɛla ne ɔmanle la anu ndelebɛbo. Bɛdele nɔhalɛ mɔɔ wɔ Mɛla ne anu la abo na bɛ nye liele nwo. Yemɔti ɛnee bɛbahola bɛahilehile awie mɔ Gyihova anwo nɔhalɛ ne kɛmɔ Dwuuma mɔɔ di nɔhalɛ mɔɔ dɛnlanle aze wɔ tete ne yɛle la.—Bɛgenga Wulomuma 2:17-20.

 GYISƐSE AFƆLE NE SƆHOVOLƐ

3. Saa yɛsukoa afɔle mɔɔ Dwuuma bɔle la anwo debie a nvasoɛ boni a yɛbanyia a?

³ Nɔhalɛ mɔɔ wɔ Mosisi Mɛla ne anu mɔɔ Pɔɔlo vɛlɛle ye nɔhalɛ ne anu ndelebɛbo la boa yɛ maa yɛte Gyihova bodane ne mɔ abo. Ɛnɛ bɔbɔ mɔɔ Gyihova luale Mɛla ne azo hilehilele ye menli ne la anwo hyia. Yemɔti yɛbazukoa afɔle ngakyile mɔɔ Mɛla ne manle bɛbɔle la anwo debie. Afɔle ɛhye mɔ hilele Dwuuma mɔɔ bɛlɛle bɛ nwo aze la adenle hɔle Kelaese anwo zo na ɔboale bɛ ɔmanle bɛdele mɔɔ Nyamenle kpondɛ avi bɛ ɛkɛ la abo. Na kɛmɔ Gyihova kpondɛ deɛ ko ne ala avi ye azonvolɛ ɛkɛ ɛnɛ la ati, afɔlebɔlɛ nwo mɛla mɔɔ ɔvale ɔmanle Yizilayɛma la baboa yɛ yeamaa yɛanleɛnlea kɛzi yɛsonle ye la anu.—Mal. 3:6.

4, 5. (a) Duzu a Mosisi Mɛla ne hakyele Dwuuma a? (b) Ɛnee bɛ afɔle ne mɔ le duzu “sɔhovolɛ”?

⁴ Mosisi Mɛla ne anu dɔɔnwo hakyele Dwuuma kɛ bɛle ɛtanevolɛma. Kɛ neazo la, ɛnee saa awie fa ɔ sa ka funli a ɔwɔ kɛ ɔte ɔ nwo. Saa ɔmaa ɔ nwo ade a ɔwɔ kɛ ɔfa ɛnlankɛ belɛ kɔkɔlɛ mɔɔ anwo ɛnlɛ dɛne la ɔbɔ afɔle. Ɛsɔfo ne ku ɛnlankɛ ne yela ye, akee bɛfa ye nzonle ne “[bɛkpoto] nzule mɔɔ bɛfa bɛanlua evinli [ne] la anu.” Ye kenle nsa anzɛɛ nsuu ne azo, bɛfa nzule ɛhye bɛkponde ahenle mɔɔ evinli ne ɛha ye la anwo bɛfa bɛte ɔ nwo. (Ɛdi. 19:1-13) Bɛhakyele Dwuuma kɛ bɛfa sinlidɔlɛ nee ɛtane bɛwo yɛ kɔsɔɔti ɔluakɛ saa raalɛ wo a ɛnee ɔ nwo ɛnde wɔ mekɛ bie anu, na yemɔ anzi ɔwɔ kɛ ɔbɔ afɔle ɔfa ɔsɛlɛ ɛtanefakyɛ.—Sɛlɛ. 12:1-8.

⁵ Ɛnee Dwuuma fa nane bɔ afɔle fa sɛlɛ ɛtanefakyɛ wɔ tɛnlabelɛ ngakyile nu. Saa ɛnee bɛze anzɛɛ bɛnze bɔbɔ a, afɔle mɔɔ bɛbɔle ye wɔ ndanlɛ sua ne anu nee nzinlii wɔ ɛzonlenlɛ sua ne anu la, ɛnee le Gyisɛse ɛdeɛ ne mɔɔ di munli la “sɔhovolɛ.”—Hib. 10:1-10.

ADWENLE MƆƆ WƆ AFƆLEBƆLƐ NZI

6, 7. (a) Saa Yizilayɛma kpondɛ kɛ bɛbɔ afɔle a, duzu a ɛnee ɔwɔ kɛ bɛkakye a? Ɛnee afɔle mɔɔ bɛdie bɛto nu la gyi ɛkɛ maa duzu? (b) Kpuyia boni mɔ a ɔwɔ kɛ yɛbiza yɛ nwo a?

⁶ Ɛnee Gyihova kpondɛ kɛ Yizilayɛma fa nane mɔɔ “di munli” la a bɔ afɔle a. Ɛnee ɔnle kɛ bɛfa nane mɔɔ anye ɛzi, ɛbubu, anwo ɛdudu anzɛɛ ewule ɛha ye la. (Sɛlɛ. 22:20-22) Gyihova hanle kɛ “egyinli nu bɛyɔba mɔɔ Yizilayɛma kɛlumua kɛbu” la yɛɛ bɛva bɛmaa ye a, na eza “bɛva mɔɔ bɛkɛnyia ye la anu kpalɛ kpalɛ ne.” (Ɛdi. 18:12, 29) Afɔle mɔɔ ɛnli munli la anzɔ Gyihova anye. Nane mɔɔ di munli mɔɔ Yizilayɛma vale bɔle afɔle la hilele kɛ Gyisɛse afɔle ne bayɛ mɔɔ ɔdi munli na ngehanleɛ biala ɛnle nwo. Gyihova bava debie mɔɔ le kpalɛ na ɔsonle bolɛ kpole kpalɛ la abɔ afɔle alie alesama avi ewule nee ɛtane nu.—1 Pita 1:18, 19.

⁷ Saa ahenle mɔɔ ɛlɛbɔ afɔle ne la anye sɔ kpalɛ kɔsɔɔti mɔɔ Gyihova ɛyɛ la amgba a, ɔbava anyelielɛ yeakpa mɔɔ ɔlɛ ye la anu kpalɛ kpalɛ ne. Ahenle lɛ adenle fa mɔɔ ɔlɛ ye la anu kpalɛ ne anzɛɛ ɔnrɛva. Noko ɛnee ɔze kɛ saa yeanva mɔɔ ɔlɛ la anu kpalɛ ne a, Nyamenle anye ɛnrɛlie nwo. Saa ɔfa debie mɔɔ ɛnli munli la a, ɛnee ɔlɛmaa yeala ali  kɛ ɔsuzu kɛ afɔlebɔlɛ nwo ɛngyia anzɛɛ Gyihova ɛlɛkpondɛ dɔɔnwo avi ye ɛkɛ. (Bɛgenga Malakae 1:6-8, 13.) Ɔwɔ kɛ neazo ɛhye maa yɛsuzu kɛzi yɛsonle Nyamenle la anwo. Yɛbahola yɛabiza yɛ nwo kɛ: Duzu ati a melɛsonle Gyihova a? Ɔwɔ kɛ mekakyi adenle mɔɔ medua zo mesonle ye la ɔ? Asoo melɛfa mɔɔ melɛ la anu kpalɛ kpalɛ ne meamaa ye?

8, 9. Duzu a yɛsukoa yɛfi adwenle mɔɔ ɛnee Yizilayɛma fa bɔ afɔle la anu a?

⁸ Ɛnee Yizilayɛnli bahola avi ye ɛhulolɛ nu abɔ afɔle ava ala ye anyezɔlɛ ali. Anzɛɛ yeavi ye ɛhulolɛ nu yeabɔ ɛyelalɛ afɔle yeava yeakpondɛ Gyihova anyunlu ɛlolɛ. Wɔ mekɛ ɛhye mɔ anu, bie a ɔnrɛyɛ se kɛ ɔbava nane mɔɔ ɔlɛ la anu kpalɛ kpalɛ ne. Ɔ nye balie nwo kɛ ɔbava zɔhane nane ne yeamaa Gyihova. Ɛnɛ, ɔngyia kɛ yɛkɛbɔ afɔle ne mɔɔ bɛha nwolɛ edwɛkɛ wɔ Mosisi Mɛla ne anu la, noko yɛbɔ afɔle gyɛne. Yɛfa yɛ mekɛ, yɛ anwosesebɛ, nee yɛ ezukoa yɛsonle Gyihova. Ɛzoanvolɛ Pɔɔlo hanle kɛ yɛ anyelazo ne anwo edwɛkɛhanlɛ a le afɔle “mɔɔ ɛnloanlɛ . . . kola bɔ a.” Eza ɔhanle kɛ: “Bɛmmamaa bɛ rɛle fi kɛ bɛkɛyɛ kpalɛ na bɛkɛboa bɛ nwo ngoko ngoko.” Ɛhye maa yɛnwu afɔle mɔɔ sɔ Nyamenle anye la. (Hib. 13:15, 16) Yɛ nyɛleɛ, anzɛɛ yɛ nganeɛdelɛ wɔ Gyihova ɛzonlenlɛ nwo kile kɛzi yɛ nye sɔ mɔɔ yeyɛ yemaa yɛ la. Yemɔti kɛmɔ Yizilayɛma yɛle la, ɔwɔ kɛ yɛneɛnlea kɛzi yɛte nganeɛ wɔ Nyamenle ɛzonlenlɛ nwo nee deɛmɔti yɛsonle ye la anu.

⁹ Ɛnee Mosisi Mɛla ne kile kɛ saa Yizilayɛnli bie yɛ ɛtane a ɔwɔ kɛ ɔbɔ ɛtaneyɛlɛ anzɛɛ fɔlɛlilɛ nwo afɔle. Kɛmɔ mɛla ne a se bɛbɔ afɔle ɛhye mɔ la ati, ɛsuzu kɛ ɔbayɛ se yeamaa Yizilayɛnli kɛ ɔbavi ye ɛhulolɛ nu yeabɔ ɔ? (Sɛlɛ. 4:27, 28) Kyɛkyɛ, saa ɔkpondɛ kɛ ɔ nee Gyihova nyia abusuabɔlɛ kpalɛ a.

10. Saa yɛfo a afɔle boni mɔ a ɔwɔ kɛ yɛbɔ a?

¹⁰ Ɛnɛ, yɛbahola yɛaha edwɛkɛ ɛtane yɛatia yɛ diema. Bie a tɛ yɛ nye fuu ɔ, anzɛɛ yɛandwenle nwo na yɛaha. Yɛ adwenle noko bahola abua yɛ fɔlɛ wɔ debie bie anwo. Saa yɛkpondɛ kɛ yɛsɔ Gyihova anye amgba a, yɛbabɔ mɔdenle yɛaziezie nvonleɛ ne. Ɔbahola yeara ye kɛ ɔwɔ kɛ yɛkpa adiema ne mɔɔ yɛvo ye la kyɛlɛ nɔhalɛ nu. Anzɛɛ saa yɛyɛ ɛtane kpole bie a, ɔwɔ kɛ yɛkpondɛ moalɛ yɛfi mgbanyima ne mɔ ɛkɛ. (Mat. 5:23, 24; Gye. 5:14, 15) Saa yɛbaziezie ɛtane mɔɔ yɛyɛ yɛtia yɛ diema anzɛɛ Nyamenle la a, ɔwɔ kɛ yɛyɛ debie. Ɔle kɛ afɔlebɔlɛ la. Saa yɛkola yɛyɛ zɔ a, yɛ nee Gyihova yɛɛ yɛ mediema avinli bayɛ kɛnlɛma na yɛanyia adwenle mɔɔ anu te. Nyilalɛ ɛhye mɔ maa yɛnwu kɛ Gyihova ze mɔɔ le kpalɛ maa yɛ la.

11, 12. (a) Anzondwolɛ afɔle a le duzu? (b) Duzu a yɛsukoa yɛfi anzondwolɛ afɔle ne anu a?

¹¹ Afɔle bieko mɔɔ bɛhanle nwolɛ  edwɛkɛ wɔ Mosisi Mɛla ne anu la a le anzondwolɛ afɔle. Bɛmaa ɔda ali kɛ anzondwolɛ wɔ ahenle nee Gyihova avinli. Ahenle mɔɔ ɛlɛbɔ afɔle ne la nee ye abusua ne babɔ nu ali nane ne, bie a wɔ ɛzonlenlɛ sua ne azua mɔɔ bɛdi aleɛ wɔ nu la ko anu. Ɛsɔfo ne mɔɔ ɛlɛbɔ afɔle ne la nee ɛsɔfoma mɔɔ ɛlɛyɛ gyima wɔ ɛzonlenlɛ sua ne anu la anu biala nyia ye kyɛfoa. (Sɛlɛ. 3:1; 7:31-33) Ɔmaa mɔɔ ɛlɛbɔ afɔle ne la nee Nyamenle nyia agɔnwolɛvalɛ kpalɛ. Ɔle kɛ asɛɛ, ɔ nee ye abusua ne, ɛsɔfo ne mɔ yɛɛ Gyihova mumua ne ɛlɛto ɛsalɛ wɔ anyelielɛ nee anzondwolɛ nu la.

¹² Anzondwolɛ afɔle ne le kɛ ɛlɛfɛlɛ Gyihova kɛ ɔrɛla ɔmaa bɛkpula bɛ sa la. Saa Gyihova kponle ɛsalɛdolɛ ɛhye azo a, ɔbayɛ anyunlunyia kpole yeamaa Yizilayɛnli ne mɔɔ vɛlɛle ye la. Ɔda ali kɛ ɔbava mɔɔ ɔlɛ la anu kpalɛ kpalɛ ne yeamaa Nyamenle. Anzondwolɛ afɔle ne boka nɔhalɛ mɔɔ wɔ Mosisi Mɛla ne anu mɔɔ ɔwɔ kɛ yɛnyia nuhua ndelebɛbo la anwo. Ɔmaa ɔda ali kɛ awie biala mɔɔ kpondɛ kɛ anzondwolɛ tɛnla ye nee ye Bɔvolɛ ne avinli la bahola alua Gyisɛse afɔlebɔlɛ ne azo ayɛ zɔ. Ɛnɛ, saa yɛfi yɛ ahonle nu yɛbɔ afɔle anzɛɛ yɛfa yɛ ezukoa nee yɛ anwosesebɛ yɛboa Gyihova ɛzonlenlɛ ne a yɛbahola yɛayɛ ɔ gɔnwo.

AFƆLE BIE MƆ MƆƆ NYAMENLE ANLIE ANDO NU

13, 14. Kɛmɔti a Gyihova anye anlie afɔle mɔɔ ɛnee Belemgbunli Sɔɔlo kpondɛ kɛ ɔbɔ la anwo ɛ?

¹³ Saa ahenle mɔɔ ɛlɛbɔ afɔle ne la lɛ adwenle kpalɛ a, Gyihova die to nu. Noko afɔle bie mɔ mɔɔ Gyihova anlie ando nu la anwo neazo wɔ Baebolo ne anu. Duzu ati a ɔ nye anzɔ afɔle zɛhae mɔ a? Maa yɛzuzu nuhua nwiɔ anwo.

¹⁴ Ngapezonli Samoɛle zele Belemgbunli Sɔɔlo kɛ mekɛ ɛdwu mɔɔ Gyihova bazɛkye Amalɛkema a. Ɔhanle ɔhilele Sɔɔlo kɛ ɔhu bɛ nee bɛ nyɛmoa ne kɔsɔɔti. Noko Sɔɔlo lile konim la, yeammaa ye sogyama ne angu Egage, Amalɛkema belemgbunli ne. Eza Sɔɔlo angu bɛ nyɛmoa ngɛnlɛma ne, ɔhanle kɛ ɔbava yeabɔ afɔle yeamaa Gyihova. (1 Sam. 15:2, 3, 21) Duzu a Gyihova yɛle a? Ɔlua Sɔɔlo anzosesebɛ ne ati, Gyihova angulo kɛ ɔbayɛ belemgbunli wɔ Yizilayɛ bieko. (Bɛgenga 1 Samoɛle 15:22, 23.) Duzu a yɛsukoa yɛfi nu a? Saa yɛdi Nyamenle mɛla zo a ɔbalie yɛ afɔlebɔlɛ yeado nu.

15. Mekɛ mɔɔ ɛnee Yizilayɛma ɛlɛyɛ ninyɛndane na bɛlɛbɔ afɔle la ɛnee bɛlɛkile duzu?

¹⁵ Ɛhye anwo neazo bieko wɔ Ayezaya buluku ne anu. Ɛnee Yizilayɛma  mɔɔ wɔ Ayezaya mekɛ zo la bɔ afɔle fa sɛlɛ Gyihova ɛkɛ ɛtanefakyɛ. Noko ɛnee bɛyɛ ninyɛndane yemɔti bɛ afɔle ne anzɔ ɛnyelɛ. Gyihova zele bɛ kɛ: “Bɛ azubɔlɛ [anzɛɛ, afɔlebɔlɛ] bebelebe ne ɛnzɔ me nye.” Eza ɔhanle kɛ: “Bɛ mboane ɛyelalɛ azubɔdeɛ ne mɔ nee bɛ nane mɔɔ ɛlɔ la anu ɛnlome azubɔdeɛ ne mɔɔ bɛfa bɛmaa me la ɛyɛ boɛ. Me nye ɛnlie nlankɛ, mboane mralɛ anzɛɛ mbɔnkye nyinli mogya nwo bieko.” Ɔzele bɛ bieko kɛ: “Bɛmmafa azubɔdeɛ mgbane biala bɛfinde me nyunlu; mekyi bɛ ɛyɛlɛ evuanlɛ ne.” Duzu ati a ɔ nye anlie bɛ afɔle ne anwo ɛ? Nyamenle hanle kɛ: “Bɛyɛ nzɛlɛlɛ dɔɔnwo kɛyɛ nyɛ bɔbɔ a, menrɛdie. Bɛ sa anwo le mogya ngome. Bɛbia bɛyɛ bɛ nwo bɔkɔbɔkɔ, bɛye ɛtane biala mɔɔ wɔ bɛ ɛbɛla nu la bɛvi me nye zo. Bɛgyakyi ɛtaneyɛlɛ.”—Aye. 1:11-16.

16. Afɔle boni mɔ a Nyamenle die to nu a?

¹⁶ Gyihova anlie bɛdabɛ mɔɔ bɛhɔle zo bɛyɛle ninyɛndane la afɔle ando nu. Noko ɔdiele bɛdabɛ mɔɔ bɛyɛle mɔɔ bɛbahola biala bɛlile ye mɛla zo la nzɛlɛlɛ na ɔliele bɛ afɔlebɔlɛ ɔdole nu. Ndelebɛbo mɔɔ ɛnee wɔ Mosisi Mɛla ne anu nɔhalɛ ne anu la manle menli ne nwunle kɛ bɛle ɛtanevolɛ na bɛhyia Gyihova ɛkɛ ɛtanefakyɛ. (Gal. 3:19) Saa Yizilayɛnli te mɔɔ Mɛla ne ɛlɛkilehile ye la abo a, ɔdi nyane wɔ ye ɛtane nwo na ɔkpondɛ Gyihova ɛkɛ ɛtanefakyɛ. Ɛnɛ, ɔhyia kɛ yɛdayɛ noko yɛkakye kɛ Kelaese afɔle ne azo a Gyihova balua ava yɛ ɛtane ahyɛ yɛ a. Saa yɛte kɛzi Kelaese afɔle ne anwo hyia la abo na yɛkile nwolɛ anyezɔlɛ kpalɛ a, ɔbamaa Gyihova “[a]nye alie” wɔ mɔɔ yɛyɛ ye wɔ ye ɛzonlenlɛ nu la kɔsɔɔti anwo.—Bɛgenga Edwɛndolɛ 51:17, 19.

NYIA GYISƐSE AFƆLE NE ANU DIEDI!

17-19. (a) Kɛ ɔkɛyɛ na Gyihova anwu kɛ yɛ nye sɔ Gyisɛse ɛkpɔnenlɛ afɔle ne ɛ? (b) Duzu a yɛbazukoa ye wɔ edwɛkɛ mɔɔ doa zo la anu a?

¹⁷ Yizilayɛma nwunle Nyamenle bodane ne mɔ “sɔhovolɛ” ala. Noko ye kpalɛ ne wɔ ɛkɛ. (Hib. 10:1) Afɔlebɔlɛ nwo mɛla ne manle Yizilayɛma nwunle mɔɔ ɔwɔ kɛ bɛyɛ na bɛ nee Nyamenle anyia abusuabɔlɛ kpalɛ la. Ɛnee ɔwɔ kɛ bɛnyia anyezɔlɛ bɛmaa ye, bɛfa mɔɔ bɛlɛ la anu kpalɛ ne bɛmaa ye, na bɛte ɔ bo kɛ bɛhyia ɛtanefakyɛ. Ɛnɛ, Keleseɛnema Giliki Ngɛlɛlera ne boa yɛ maa yɛte ɔ bo kɛ ɔlua Gyisɛse ɛkpɔnenlɛ afɔle ne ati Gyihova baye ɛtane nee ewule avi ɛkɛ ne bɔkɔɔ. Ɛnɛ bɔbɔ, ɔlua ɛkpɔnedeɛ ne ati, ɔbahola yeava yɛ ɛtane yeahyɛ yɛ na yɛanyia adwenle mɔɔ anu te la. Ɛkpɔnedeɛ ne le ahyɛlɛdeɛ kɛnlɛma mɔɔ vi Nyamenle!—Gal. 3:13; Hib. 9:9, 14.

¹⁸ Nɔhalɛ, saa yɛbanyia ɛkpɔnedeɛ ne azo nvasoɛ a, ɔwɔ kɛ yɛte ɔ bo na yɛyɛ nwolɛ gyima. Pɔɔlo hɛlɛle kɛ: “Mɛla ne [hilele yɛ adenle] hɔdwule mekɛ mɔɔ Kelaese rale la, amaa saa yɛdie ye yɛdi a, yɛazɔ Nyamenle anye.” (Gal. 3:24) Ɔwɔ kɛ yɛdua gyimayɛlɛ zo yɛda yɛ diedi ali. (Gye. 2:26) Dwuu Keleseɛnema mɔɔ ɛnee wɔ ɛvoya ne mɔɔ lumua anu la nyianle nɔhalɛ ne anu ndelebɛbo ne ɔluakɛ ɛnee bɛze Mosisi Mɛla ne. Pɔɔlo zile bɛ adua kɛ bɛva mɔɔ bɛzukoa la bɛbɔ bɛ ɛbɛla. Saa bɛyɛ zɔ a, ɛnee bɛlɛfa nɔhalɛ ne mɔɔ bɛfa bɛkilehile awie mɔ la bɛabɔ bɛ ɛbɛla.—Bɛgenga Wulomuma 2:21-23.

¹⁹ Ɔwɔ nuhua kɛ yɛnle Mosisi Mɛla ne abo ɛdeɛ, noko ɔwɔ kɛ yɛbɔ afɔle mɔɔ sɔ Gyihova anye. Yɛbazukoa kɛzi yɛbahola yɛayɛ ɛhye la wɔ edwɛkɛ mɔɔ doa zo la anu.

[Debiezukoalɛ kpuyia ne mɔ]

[Edwɛkɛ mɔɔ bɛkpa wɔ mukelɛ 19]

Nane ne boni a anrɛɛ ɛbava wɔamaa Gyihova a?

[Nvoninli wɔ mukelɛ 20]

Nane ne boni a anrɛɛ ɛbava wɔamaa Gyihova a?

[Nvoninli wɔ mukelɛ 21]

Saa yɛbɔ afɔle mɔɔ sɔ Gyihova anye la a ɔbalie yɛ yɛado nu