Ebileham​—Sonla Mɔɔ Lɛ Ɛlɔlɛ

Debie ɛdɔ Ebileham anye zo. Ɔ ye Sɛla mɔɔ ɔkulo ye kɛ debie la ɛwu. Mekɛ mɔɔ nrenya kpanyinli ɛhye ɛlɛsie ɔ ye ne la, ɔhakyehakyele kɛzi ɔ nee ye bɛ nye liele la. Nyane yile ye ahonle ɔmanle monle guale ye. (Mɔlebɛbo 23:1, 2) Yeanze nyiane, monle ɛhye le Ebileham subane ngɛnlɛma ne mɔ anu ko anwo daselɛ—ɔlɛ ɛlɔlɛ.

ƐLƆLƐ A LE DUZU? Ɛlɔlɛ a le nganeɛdelɛ ne mɔɔ maa bɛnyia ahunluyelɛyelalɛ bɛmaa awie mɔ la. Sonla mɔɔ lɛ ɛlɔlɛ la dua ye nyɛleɛ zo da kɛzi ɔte nganeɛ ɔmaa bɛdabɛ mɔɔ ɔkulo bɛ la ali, saa bɔbɔ ɔwɔ kɛ ɔfa ɔ nwo ɔbɔ afɔle a.

KƐZI EBILEHAM LALE ƐLƆLƐ ALI Ɛ? Ebileham hilele kɛ ɔkulo ye abusua ne. Ɛnee Ebileham le awie mɔɔ ɔnlɛ alagye fee a. Noko akee, yeambu ɔ nye yeangua ye abusua ne nganeɛdelɛ anzɛɛ sunsum nu ngyianlɛ zo. Nɔhalɛ nu, Gyihova mumua ne nwunle kɛ Ebileham li ye abusua ne anyunlu wɔ ɛzonlenlɛ nu. (Mɔlebɛbo 18:19) Bieko, Gyihova hanle ye wienyi kɛ Ebileham lɛ ɛlɔlɛ. Mekɛ mɔɔ Gyihova ka Ayezeke anwo edwɛkɛ ahile Ebileham la ɔhanle kɛ: “Ɛ ra nrenya ne . . . mɔɔ la wɔ ahonle nwo” anzɛɛ ɛkulo ye la.—Mɔlebɛbo 22:2.

Yɛbahola yɛanwu Ebileham ɛlɔlɛ ne wɔ nganeɛ mɔɔ ɔdele ye wɔ ɔ ye Sɛla ewule ne anwo la anu. Ebileham zunle ye. Ɔnva nwo kɛ ɛnee ɔle sonla nrenya na ɔ nwo yɛ se la, yeanyɛ ye nyiane kɛ ɔbala ye nyanelilɛ ali. Ebileham lale anwosesebɛ nee mɛlɛbɛnwoaze ali.

Ebileham hilele kɛ ɔkulo ye Nyamenle ne. Ye asetɛnla kɔsɔɔti lale zɛhae ɛlɔlɛ ne ali. Adenle boni azo? Ɔwɔ kɛ yɛkakye mɔɔ  Baebolo ne ka ye wɔ 1 Dwɔn 5:3 la: “Saa yɛdi Nyamenle mɛla ne mɔ azo a ɛnee yɛkulo Nyamenle.” Wɔ adenle ɛhye azo, Ebileham yɛle neazo kɛnlɛma wɔ Nyamenle anwo ɛlɔlɛ nu.

Mekɛ dɔɔnwo ne ala, saa Gyihova maa Ebileham mɛla a, ɔdi zo ndɛndɛ. (Mɔlebɛbo 12:4; 17:22, 23; 21:12-14; 22:1-3) Saa mɛla ne yɛ se anzɛɛ ɔnyɛ se; anzɛɛ ɔze deɛmɔti Gyihova se ɔli zo anzɛɛ ɔnze bɔbɔ a, ɔdi zo. Wɔ Ebileham afoa nu, ninyɛne ɛhye mɔ anwo ɛngyia. Saa ye Nyamenle ne kpondɛ kɛ ɔyɛ debie bie a, ɔlɛ ɛhulolɛ kɛ ɔbayɛ. Ebileham bule mɛla ko biala kɛ nwolɛ adenle mɔɔ ɔbalua zo yeala ɛlɔlɛ mɔɔ ɔlɛ ɔmaa Gyihova la ali.

DUZU A YƐSUKOA YƐFI NU A? Yɛbahola yɛazukoa Ebileham yɛala ahunluyelɛyelalɛ ali yɛahile awie mɔ, titile yɛ abusua ne anu amra. Yɛnrɛhulo kɛ yɛbamaa asetɛnla nu ngyegyelɛ alie yɛ mekɛ mɔɔ yɛbanyia yɛamaa bɛdabɛ mɔɔ yɛkulo bɛ la ɛlɛ.

Eza yɛbabɔ mɔdenle kɛ yɛbanyia ɛlɔlɛ kpalɛ yɛamaa Gyihova. Zɛhae ɛlɔlɛ ne bahola anyia tumi kpole wɔ yɛ asetɛnla zo. Kɛ neazo la, ɔbahola yeamaa yɛayɛ nzenzaleɛ wɔ yɛ subane, yɛ ɛdendɛlɛ nee yɛ nyɛleɛ nu amaa yɛazɔ Nyamenle anye.—1 Pita 1:14-16.

Nɔhalɛ nu, tɛ mekɛ ne amuala a Gyihova mɛla zo ɛlilɛ la aze a. Noko yɛdie yɛdi kɛ Ahenle ne mɔɔ boale Ebileham mɔɔ ɔvɛlɛle ye “me gɔnwo” la, ɛziezie ɔ nwo kɛ ɔbaboa yɛdayɛ noko. (Ayezaya 41:8) Ye Edwɛkɛ Baebolo ne bɔ ɛwɔkɛ kɛ: Ɔbamaa “bɛ anwosesebɛ . . . na yeamaa bɛagyinla kpundii.” (1 Pita 5:10) Ɛwɔkɛ ɛhye mɔɔ ka ahonle la vi Ebileham Agɔnwo ne mɔɔ bɛkola bɛfa bɛ rɛle bɛwula ye nu la ɛkɛ!

[Ɛlɛka wɔ mukelɛ 10]

Nrenya Ɛnzu—Asoo Ɔle Nɔhalɛ?

Menli dɔɔnwo babua kɛ ɛhɛe. Noko wɔannea ɔbazi bɛ nwo kɛ bɛbanwu kɛ mrenya dɔɔnwo mɔɔ Baebolo ne ka kɛ bɛlɛ anwosesebɛ nee diedi noko bɛzunle wɔ nyanelilɛ mekɛ nu la anu ko a le Ebileham. Dwosefi, Devidi, ɛzoanvolɛ Pita, mgbanyima mɔɔ ɛnee wɔ Ɛfɛsɛsema asafo ne anu la nee Gyisɛse bɔbɔ boka mrenya ɛhye mɔ anwo. (Mɔlebɛbo 50:1; 2 Samoɛle 18:33; Luku 22:61, 62; Dwɔn 11:35; Gyima ne 20:36-38) Nɔhalɛ nu, Baebolo ne ɛleka biala ɛnga kɛ nrenya ɛnzu.