Ebileham—Sonla Mɔɔ Lɛ Diedi
Ebileham—Sonla Mɔɔ Lɛ Diedi
Aleɛ ɛdwo, Ebileham gyi alie nwo. Mekɛ mɔɔ ɔlɛnea nwɔlɔra mɔɔ ɛlɛta wɔ anwomanyunlu la, ɔyɛ ye azibɛnwo na ɔsuzu ɛwɔkɛ mɔɔ Nyamenle ɛbɔ kɛ ɔ bo zo amra bɛayɛ dɔɔnwo kɛ zɛhae anwuma ahɛnlaneɛ ne mɔ la anwo. (Mɔlebɛbo 15:5) Nwɔlɔra ne mɔ hakyele Ebileham Gyihova ɛwɔkɛ ne. Eza bɛmanle ɔnwunle kɛ ɔbara nu. Yeanyɛ boɛ fee la, saa Gyihova lɛ tumi bɔ ewiade kpole ɛhye nee ninyɛne mɔɔ wɔ nu la a, asoo ɔnrɛhola ɔnrɛmaa Ebileham nee Sɛla ɛnrɛwo ralɛ ɔ? Ɛnee kɛ Ebileham diedi de la ɛne.
DIEDI A LE DUZU? Kɛmɔ Baebolo ne kile nu la, “diedi” le debie mɔɔ bɛnnwu ye. Noko daselɛ kpalɛ wɔ nwo kɛ ɔwɔ ɛkɛ. Awie mɔɔ lɛ diedi la fa ye adwenle sie Gyihova ɛwɔkɛ ne mɔ azo mɔɔ ɔlɛ anwodozo kɛ bɛbara nu a.
KƐZI EBILEHAM LALE DIEDI ALI Ɛ? Ebileham lale ye ali kɛ ɔdie Nyamenle ɛwɔkɛ ne mɔ ɔdi. Diedi ti, Ebileham vile maanle mɔɔ bɛwole ye nu la anu, na ɔnyianle anwodozo kɛ Gyihova bali ye ɛwɔkɛ zo yeahile ye azɛlɛ fofolɛ. Diedi manle Ebileham lile tutɛnla wɔ Keena, mɔɔ ɛnee ɔlɛ anwodozo kɛ ɔ bo zo amra bɛava azɛlɛ ne ayɛ bɛ ɛdeɛ a. Diedi eza manle Ebileham diele Gyihova na ɔyɛle kɛ ɔfa Ayezeke yeabɔ afɔle. Ɛnee ɔlɛ anwodozo kɛ Gyihova bahola adwazo Ayezeke.—Hibuluma 11:8, 9, 17-19.
Ebileham vale ye adwenle ziele mɔɔ bara kenlebie la azo dɛlale mɔɔ ɛze ɛhɔ la. Ebileham nee Sɛla nyianle asetɛnla kpalɛ wɔ Yule dɛlale Keena noko “bɛandwenle maanle ne mɔɔ ɛnee bɛlɛgyakyi ye bɛ nzi bɛahɔ la anwo.” (Hibuluma 11:15) Emomu, bɛdwenlenle kɛzi Nyamenle bayila bɛ nee bɛ bo zo amra kenlebie la anwo.—Hibuluma 11:16.
Ɛnee Ebileham diedi ne lɛ ngyinlazo kpalɛ ɔ? Ɛhɛe. Gyihova lile ye ɛwɔkɛ mɔɔ ɔbɔle la biala azo. Awieleɛ kolaa ne Ebileham abo zo amra rayɛle maanle na ɛnee bɛfɛlɛ bɛ Yizilayɛma. Yeangyɛ, Yizilayɛma radɛnlanle Keena, azɛlɛ ne mɔɔ Gyihova vale bɔle Ebileham ɛwɔkɛ la azo.—Dwɔhyua 11:23.
DUZU A YƐSUKOA YƐFI NU A? Yɛkola yɛnyia anwodozo kɛ Gyihova bali ye ɛwɔkɛ ne mɔ azo. Saa bɔbɔ ɔyɛ se wɔ sonla nye zo a, “Nyamenle ɛdeɛ, debie biala ɛnyɛ se ɛmmaa ye.”—Mateyu 19:26.
Eza Ebileham neazo ne kile yɛ kɛ ɔnle kɛ yɛfa yɛ adwenle yɛsie ninyɛne mɔɔ ɛze ɛhɔ la azo, emomu, mɔɔ ɔbara kenlebie la. Ɛhye a nrenya bie mɔɔ bɛfɛlɛ ye Jason la zukoale kɛ ɔbayɛ a. Jason mɔɔ anwonyane bie ɛmaa yebubu la ka kɛ: “Ɔdwu mekɛ ne bie a medwenle mɔɔ ɛze ɛhɔ la anwo.” Eza ɔka kɛ: “Ninyɛne ngyikyi le kɛ me ye Amanda mɔɔ mefa me sa meado ɔ kɔme la yɛɛ meta mekakye bɛ kpalɛ a.”
Noko, Jason nyianle diedi kpundii kɛ Gyihova bali ye ɛwɔkɛ zo. Bie a le kɛ ɔnrɛhyɛ yɛ azɛlɛ ye bahakyi paladaese na diedima anyia dahuu ngoane nee kpɔkɛdelɛ kpalɛ. * (Edwɛndolɛ 37:10, 11, 29; Ayezaya 35:5, 6; Yekile 21:3, 4) Jason ka kɛ: “Mekakye me nwo kɛ mekɛ kpalɛ la yɛ nyunlu.” Ɔkilehile nu kɛ: “Ɔnrɛhyɛ ɛvɛlɛ, adwenleadwenle, alɔbɔlɛ, fɔlɛbualɛ, kɔsɔɔti bapɛ nu bɔkɔɔ.” Nea diedi nwo neazo kɛnlɛma mɔɔ le kɛ Ebileham ɛdeɛ ne a!
[Ɔ bo ɛkɛ ne edwɛkɛ]
^ ɛden. 9 Saa ɛkpondɛ kɛ ɛnwu azɛlɛ ne mɔɔ ɔbayɛ paladaese la anwo edwɛkɛ dɔɔnwo a, nea Duzu A Baebolo ne Kilehile Amgba A? buluku ne mɔɔ Gyihova Alasevolɛ ɛyɛ la tile 3, 7, nee 8.
