“Nyia Akɛnrasesebɛ Na Maa Ɛ Nwo Ɛyɛ Se”
“Nyia Akɛnrasesebɛ Na Maa Ɛ Nwo Ɛyɛ Se”
“Nyia akɛnrasesebɛ na maa ɛ nwo ɛyɛ se . . . Gyihova wɔ Nyamenle ne nee wɔ lua.”—DWƆ. 1:7-9, NW.
KƐZI ƐBABUA Ɛ?
Tɛnlabelɛ boni anu a Yinɔko nee Nowa lale akɛnrasesebɛ ali a?
Diedi nee akɛnrasesebɛ nwo neazo boni a mraalɛ mɔɔ dɛnlanle aze tete ne la bie mɔ yɛle a?
Akɛnrasesebɛ nwo neazo boni a ngakula yɛle mɔɔ ɛ nye die nwo a?
1, 2. (a) Duzu a ɔdwu mekɛ ne bie a yɛhyia nwo na yɛahola yɛayɛ mɔɔ tenrɛ la ɛ? (b) Duzu anwo debie a yɛbazukoa ye wɔ edwɛkɛ ɛhye anu a?
AKƐNRASESEBƐ le ɛzulolɛ, bɛtɛɛyɛlɛ nee foanvoanle angɔbɛnzi. Bie a yɛbaha kɛ sonla mɔɔ lɛ akɛnrasesebɛ la a le awie mɔɔ ɔ nwo yɛ se na ɔnzulo ɛhwee la. Noko ɔdwu mekɛ ne bie a, akɛnrasesebɛ nwo hyia na yɛahola yɛayɛ mɔɔ tenrɛ la.
2 Menli mɔɔ bɛha bɛ nwo edwɛkɛ wɔ Baebolo ne anu la bie mɔ nyianle akɛnrasesebɛ wɔ tɛnlabelɛ mɔɔ anu yɛ se la anu. Bie mɔ noko lale akɛnrasesebɛ ali wɔ tɛnlabelɛ mɔɔ Gyihova azonvolɛ kɔsɔɔti yia ye la anu. Duzu a yɛkola yɛsukoa yɛfi akɛnrasesebɛ nwo neazo mɔɔ wɔ Baebolo ne anu la anu a? Kɛ ɔkɛyɛ na yɛanyia akɛnrasesebɛ ɛ?
ALASEVOLƐ MƆƆ NYIANLE AKƐNRASESEBƐ WƆ ƐTANE EWIADE BIE ANU LA
3. Ɛtanevolɛma anwo ngapezo boni a Yinɔko hanle a?
3 Ɛnee akɛnrasesebɛ nwo hyia na awie ahola ali Gyihova anwo daselɛ wɔ ɛtanevolɛma mɔɔ dɛnlanle aze kolaa na Nowa mekɛ zo Azuyilɛ ne ara la avinli. Noko Yinɔko “mɔɔ le Adam angabɛnzo mɔɔ tɔ zolɛ nsuu la,” hanle bɛ nwo edwɛkɛ kɛ: “Awulae nee ye soanvolɛma nwuanzanwuanza apenle apenle bara arabua awie biala ndɛne, na yeadea bɛdabɛ mɔɔ bɛnze Nyamenle la wɔ bɛ ninyɛndane mɔɔ bɛyɛ ye atisesebɛ nu nee amumuyɛ edwɛkɛ mɔɔ menli ɛhye mɔ mɔɔ ɛnze Nyamenle la ɛha ɛtia ye la anwo.” (Dwu. 14, 15) Ɛnee Yinɔko lɛ diedi kpole kɛ edwɛkɛ ɛhye mɔ bara nu. Ɛtanevolɛma wule wɔ ewiade amuala azuyilɛ ne anu amgba.
4. Ninyɛne mɔɔ sisile Nowa mekɛ zo noko ɔ nee Nyamenle bɛ avinli ande la bie a le boni?
4 Yinɔko wule la anzi ɛvolɛ 650, mɔɔ ɛnee yeha ɛvolɛ 2370 na Kelaese ara la, yɛɛ Azuyilɛ ne rale a. Ɔvi mekɛ mɔɔ Yinɔko wule kɔdwu mekɛ mɔɔ Azuyilɛ ne rale la anu a bɛwole Nowa a, ɔnyianle abusua na ɔ nee ɔ mra mrenya ne mɔ bobɔle ɛlɛka. Anwumabɔvolɛma mɔɔ bɛanli nɔhalɛ la hakyile bɛ nwo menli ragyale mraalɛ mɔɔ bɛ nwo yɛ fɛ la bɛ nee bɛ wole. Mralɛ ɛhye mɔ rayɛle Kakanyinlima. Menli dɔɔnwo yɛle ɛtane, yemɔti basabasayɛlɛ bule azɛlɛ ne azo. (Mɔl. 6:1-5, 9, 11) Ɛnee ɛhye mɔ amuala ɛlɛkɔ zo ɛdeɛ, noko “[Nowa] nee Nyamenle bɛ avinli ande ɛlɛ.” Ɔvale akɛnrasesebɛ ɔbɔle “pɛlepɛlelilɛ nwo nolo.” (Bɛgenga 2 Pita 2:4, 5.) Yɛhyia akɛnrasesebɛ ɛhye bie wɔ awieleɛ mekɛ ye anu.
BƐLALE DIEDI NEE AKƐNRASESEBƐ ALI
5. Kɛzi Mosisi lale diedi nee akɛnrasesebɛ ali ɛ?
5 Mosisi yɛle diedi nee akɛnrasesebɛ nwo neazo. (Hib. 11:24-27) Ɔvi 1513 kɔdwu 1473 kolaa na Kelaese ara la, Nyamenle vale ye lile gyima manle ɔyele Yizilayɛma ɔvile Yigyibiti na ɔlile bɛ nyunlu wɔ fienemgbole ne anu. Mosisi zuzule kɛ ɔnrɛhola ɔnrɛyɛ gyima ɛhye noko ɔliele ɔdole nu. (Ade. 6:12) Ɔ nee ɔ diema Aalɔn dendɛle hilele Falo atisesebɛ fane dɔɔnwo. Bɛvale akɛnrasesebɛ bɛbɔle Ngyegyelɛ Bulu ne mɔɔ Gyihova vale liele Yizilayɛma la nolo na bɛhilele kɛ Yigyibiti awozonle ɛnlɛ tumi biala. (Ade., tile 7-12) Mosisi lale diedi nee akɛnrasesebɛ ali kɛmɔ yɛyɛ ye ɛnɛ la, ɔluakɛ Nyamenle boale ye.—Mɛla 33:27.
6. Saa maanle mgbanyima biza yɛ edwɛkɛ a, duzu a baboa yɛ na yɛava akɛnrasesebɛ yɛahilehile yɛ diedi ne anu a?
6 Yɛze kɛ yɛhyia Mosisi akɛnrasesebɛ ne bie. Gyisɛse hanle kɛ: “Bɛbahwe bɛ bɛahɔ maanle mgbanyima nee arelemgbunli nyunlu wɔ me ti, na bɛabɔ Edwɛkpa ne nolo bɛahile bɛ nee bɛdabɛ mɔɔ bɛnle Dwuuma la. Saa bɛfa bɛ bɛkɔ kɛ bɛli bɛ edwɛkɛ a, bɛmmadwenle mɔɔ bɛbaha la anwo anzɛɛ kɛ bɛbazi bɛaha ye la anwo; saa mekɛ ne dwu a, bɛbava mɔɔ bɛbaha la bɛamaa bɛ. Ɔluakɛ tɛ bɛmɛ a bɛbadendɛ a; bɛ Ze mɔɔ wɔ anwuma la Sunsum ne balua bɛ nwo zo adendɛ.” (Mat. 10:18-20) Saa maanle mgbanyima biza yɛ yɛ ɛzonlenlɛ ne anwo edwɛkɛ a, Gyihova sunsum ne bamaa yɛava diedi nee akɛnrasesebɛ yɛali daselɛ wɔ ɛbulɛ nu.—Bɛgenga Luku 12:11, 12.
7. Duzu a manle Dwɔhyua nyianle akɛnrasesebɛ na ɔholale ye gyima ne yɛ a?
7 Dwɔhyua mɔɔ lile Mosisi agyakɛ anu lile Yizilayɛma anyunlu la zukoale Nyamenle Mɛla ne dahuu, amaa ye diedi nee ye akɛnrasesebɛ ne ayɛ kpole. Wɔ ɛvolɛ 1473 kolaa na Kelaese ara la, ɛnee Yizilayɛma ɛziezie bɛ nwo kɛ bɛkɔ Ɛwɔkɛ Azɛlɛ ne azo. Nyamenle hanle kɛ: “Mmasulo, gyinla kpundii [anzɛɛ “Nyia akɛnrasesebɛ na maa ɛ nwo ɛyɛ se,” NW].” Nyamenle hanle hilele Dwɔhyua kɛ saa ɔdi Mɛla ne azo a, ɔbanwu nrɛlɛbɛ na yeayɛ ye gyima ne boɛ. Nyamenle zele ye kɛ: “Mmamaa wɔ ahonle tu yɛɛ mmamaa ɛ nwo bubu wɔ, ɔluakɛ medame, [Gyihova] wɔ Nyamenle ne, me nee wɔ lua ɛleka biala mɔɔ ɛkɔ la.” (Dwɔ. 1:7-9) Nea kɛzi edwɛkɛ ɛhye manle Dwɔhyua anwosesebɛ a! Ɛnee Nyamenle nee ye lua amgba. Yɛze ye zɔ ɔluakɛ wɔ ɛvolɛ 1467 kolaa na Kelaese ara la, ɛnee bɛva ɛvolɛ nsia pɛ bɛho bɛva Ɛwɔkɛ Azɛlɛ ne dɔɔnwo.
MRAALƐ MƆƆ ƐNEE LƐ AKƐNRASESEBƐ
8. Duzu ati a Releehabe le diedi nee akɛnrasesebɛ nwo neazo ɛ?
8 Mraalɛ dɔɔnwo mɔɔ zonlenle Gyihova wɔ tete ne la lale akɛnrasesebɛ ali. Kɛ neazo la, tuutuunli Releehabe mɔɔ ɛnee wɔ Gyɛleko la liele lile kɛ Gyihova babɔ ɔ nwo bane. Ɔnyianle akɛnrasesebɛ ɔvale busiama nwiɔ ne mɔɔ Dwɔhyua zoanle bɛ la ɔveale na ɔhilele menli mɔɔ ɛnee ɛlɛkpondɛ busiama ne la adenle ɔhɔle ɛleka fofolɛ. Mekɛ mɔɔ Yizilayɛma zɛkyele Gyɛleko la, ɔ nee ye abusua ne nyianle bɛ ti. Releehabe gyakyile ye ɛbɛla ɛtane ne, na ɔzonlenle Gyihova. Ɔrayɛle Mɛzaya ne busuanli bɔbɔ. (Dwɔ. 2:1-6; 6:22, 23; Mat. 1:1, 5) Ɔnyianle ye diedi ne nee ye akɛnrasesebɛ ne anwo nyilalɛ.
9. Adenle boni azo a Dɛbola, Balake, nee Gyeeyɛle lale akɛnrasesebɛ ali a?
9 Wɔ Dwɔhyua ewule nzi wɔ ɛvolɛ 1450 kolaa na Kelaese ara la, Nyamenle kpale mrenya bie mɔ kɛ ndɛnebuavolɛma wɔ Yizilayɛ. Ɛnee Keena Belemgbunli Gyeeben ɛyɛ Yizilayɛma kpɔdekpɔde ɛvolɛ 20. Nyamenle manle ngapezonli raalɛ Dɛbola hanle hilele ndɛnebuavolɛ Balake kɛ ɔ nee belemgbunli ɛhye ɛhɔho. Balake boɔboale mrenya 10,000 anloa wɔ Boka Teebɔ azo na ɛnee yeziezie ɔ nwo kɛ ɔ nee Gyeeben sogyama kpanyinli Sesɛla ko. Ɛnee Sesɛla nee ye ɛlɔnema ne nee ye konle ɛhwili 900 wɔ Kaehyɔn bɔnza ne mɔɔ nzule tɔ a ɔbu ɛkɛ la anu. Mekɛ mɔɔ Yizilayɛma hɔle ɛkɛ la, Nyamenle manle nzule yile bɔnza ne anu arɛlevilɛ nu. Ɛkɛ ne yɛle mɛtɛmɛtɛlɛ yemɔti Keenama ɛhwili ne mɔ angola bɛ bo tu. Balake ɛlɔne ne lile konim na bɛhunle Sesɛla sogyama ne amuala. Sesɛla nriandile hɔveale raalɛ bie mɔɔ bɛfɛlɛ ye Gyeeyɛle la ndanlɛ sua nu noko mekɛ mɔɔ ɔlafele la, raalɛ ne hunle ye. Kɛmɔ ɛnee Dɛbola ɛlumua ɛha la, Keenama anwo zo konimlilɛ ne anwo anyunlunyia ne hɔle raalɛ, Gyeeyɛle ɛkɛ. Ɔluakɛ Dɛbola, Balake nee Gyeeyɛle nyianle akɛnrasesebɛ la ati, Keenama angyegye Yizilayɛma bieko wɔ ɛvolɛ 40 anu. (Maa. 4:1-9, 14-22; 5:20, 21, 31) Mrenya nee mraalɛ dɔɔnwo ɛla diedi nee akɛnrasesebɛ zɛhae bie ali.
YƐ EDWƐKƐ KOLA MAA ANWOSESEBƐ
10. Duzu a maa yɛnwu kɛ yɛ edwɛkɛ kola maa awie mɔ nyia akɛnrasesebɛ ɛ?
10 Edwɛkɛ mɔɔ yɛka la kola boa Gyihova azonvolɛ gyɛne ɔmaa bɛnyia akɛnrasesebɛ. Wɔ ɛvoya 11 kolaa na Kelaese ara la anu, Belemgbunli Devidi zele ɔ ra Sɔlɔmɔn kɛ: “Yɛ ɛ nye gyɛlɛmgbɛɛnye na si wɔ ahonle [anzɛɛ “Nyia akɛnrasesebɛ na maa ɛ nwo ɛyɛ se,” NW]. Bɔ gyima ne abo, mmamaa debie biala si wɔ adenle. [Gyihova] Nyamenle ne, mɔɔ mesonle ye la nee wɔ balua. Ɔnrɛgyakyi ɛ nzi ɛlilɛ, ɔ nee wɔ balua toonwo yeahɔdwu mekɛ mɔɔ ɛkɛwie gyima biala mɔɔ wɔ Ɛzonlenlɛ Sua ne anwo la yɛ la.” (1 Edk. 28:20) Sɔlɔmɔn nyianle akɛnrasesebɛ zile ɛzonlenlɛ sua kɛnlɛma manle Gyihova wɔ Gyɛlusalɛm.
11. Kɛzi Yizilayɛ kakula bɛlɛra ne mɔɔ lɛ akɛnrasesebɛ la edwɛkɛ ne boale awie ɛ?
11 Wɔ ɛvoya bulu kolaa na Kelaese ara la anu, edwɛkɛ mɔɔ Yizilayɛnli kakula bɛlɛra bie vale akɛnrasesebɛ hanle la manle bɛyɛle kokobɛvolɛ bie ayile na ɔzukoale Gyihova anwo debie. Seleama hyele kakula bɛlɛra ɛhye nuokɛ wɔ konle nu. Na ɛnee ɔsonle sogyama kpanyinli ne mɔɔ bɛfɛlɛ ye Neeman na ɔle kokobɛvolɛ la. Ɛnee kakula bɛlɛra ne ze nwanwane ninyɛne mɔɔ Gyihova manle ngapezonli Yilaehya yɛle la. Yemɔti ɔhanle ɔhilele Neeman aye ne kɛ saa ɔ hu kɔ Yizilayɛ a, Yilaehya bayɛ ye ayile. Neeman yɛle mɔɔ kakula bɛlɛra ne hanle la yemɔti bɛyɛle ye ayile wɔ nwanwane adenle zo na ɔrayɛle Gyihova sonvolɛ. (2 Arl. 5:1-3, 10-17) Saa ɛle kakula mɔɔ ɛkulo Gyihova kɛ zɔhane kakula bɛlɛra ne la a, ɔbahola yeamaa wɔ akɛnrasesebɛ wɔali kilehilevolɛma, sukuluma nee menli gyɛne daselɛ.
12. Kɛzi Belemgbunli Hɛzikaya edwɛkɛ ne boale ye menli ne ɛ?
12 Edwɛkɛ kpalɛ kola boa awie maa ɔnyia akɛnrasesebɛ wɔ mekɛ ɛtane nu. Mɔɔ Aseleama rale Gyɛlusalɛm wɔ ɛvoya mɔtwɛ kolaa na Kelaese ara la anu la, Belemgbunli Hɛzikaya zele ye menli ne kɛ: “Bɛgyinla kpundii na bɛyele bɛ nwo [anzɛɛ “Bɛnyia akɛnrasesebɛ na bɛ nwo ɛyɛ se,” NW]. Bɛmmamaa bɛ ahonle tu anzɛɛ bɛmmasulo Aselea belemgbunli ne nee ye ɛlɔnema ne mɔɔ ɔ nee bɛ lua la, ɔluakɛ mɔɔ nee yɛ lua la anwo yɛ ɛzulolɛ tɛla ye. Yemɔ, ɔ nee menli a lua a, na yɛmɛ, yɛ nee [Gyihova], yɛ Nyamenle ne a lua a; ɔbaboa yɛ na yeaho konle ne yeamaa yɛ.” Kɛzi edwɛkɛ ɛhye boale Dwudama ne ɛ? Ɔmanle bɛnyianle akɛnrasesebɛ kpole kpalɛ. Baebolo ne ka kɛ: “Hɛzikaya ɛdendɛlɛ ne manle menli ne anwosesebɛ.” (2 Edk. 32:7, 8) Edwɛkɛ mɔɔ maa anwosesebɛ kɛ Hɛzikaya ɛdeɛ ne la bahola aboa yɛ nee Keleseɛnema gyɛne yeamaa yɛanyia akɛnrasesebɛ wɔ ɛkpɔlɛ mekɛ nu.
13. Akɛnrasesebɛ nwo neazo boni a Belemgbunli Ehabe sonvolɛ Obadaya yɛle a?
13 Ɔdwu mekɛ ne bie noko a yɛdua yɛ nyɛleɛ zo yɛkile kɛ yɛlɛ akɛnrasesebɛ. Wɔ ɛvoya bulu kolaa na Kelaese ara la anu, Belemgbunli Ehabe sonvolɛ Obadaya nyianle akɛnrasesebɛ liele Gyihova ngapezoma ɛya ko ngoane. Ɔvale bɛ “abulanlu abulanlu ɔveɛveale awolɛ mbɔne nu” na Belemgbunli raalɛ Gyɛzɛbɛle atisesebɛ angu bɛ. (1 Arl. 18:4) Kɛmɔ Obadaya mɔɔ sulo Nyamenle yɛle la, ɛnɛ noko Gyihova azonvolɛ dɔɔnwo nyia akɛnrasesebɛ bɔ bɛ mediema nwo bane wɔ ɛkpɔlɛ mekɛ nu. Bɛnye bɛ bɛmmaa.
ƐNEE ƐSETA LƐ AKƐNRASESEBƐ
14, 15. Kɛzi Belemgbunli raalɛ Ɛseta lale diedi nee akɛnrasesebɛ ali ɛ? Duzu a vi nu rale a?
14 Ɛseta mɔɔ ɛnee le belemgbunli raalɛ la lale diedi kpole nee akɛnrasesebɛ ali. Wɔ ɛvoya nnu kolaa na Kelaese ara la anu, Heeman amumuyɛ bɔle adwenle kɛ ɔmaa bɛahu Dwuuma mɔɔ wɔ maanle ne anu la amuala. Mekɛ mɔɔ Dwuuma dele kɛ bɛkpondɛ kɛ bɛku bɛ la, bɛzunle kpalɛ na bɛhyele ɛhɔne. Eza ɔbayɛ kɛ bɛvile bɛ ahonle nu bɛyɛle asɔne. (Ɛst. 4:1-3) Belemgbunli raalɛ Ɛseta lile Dwuuma anwo nyane kpole kpalɛ. Ɔ diema Mɔdekae manle bɛvale mɛla mɔɔ ɛnee bɛli kɛ bɛhu Dwuuma la bɛhɔhilele ye na ɔzele ye kɛ ɔhɔ belemgbunli ne ɛkɛ ɔhɔzɛlɛ ye moalɛ. Noko ɛnee saa belemgbunli anvɛlɛ awie na ɔkɔ ye ɛkɛ a bɛku ye.—Ɛst. 4:4-11.
15 Mɔdekae hanle hilele Ɛseta kɛ saa yeangɔ belemgbunli ne ɛkɛ a, Gyihova balua adenle fofolɛ zo alie Dwuuma. Mɔdekae hanle kɛ bie a ɔbaboa Gyihova menli la ati a, ɔrayɛle belemgbunli raalɛ a. Ɛseta zele Mɔdekae kɛ ɔhɔboɔboa Dwuuma mɔɔ wɔ Susa la amuala anloa, ɔmaa bɛhye ɛhɔne na bɛzɛlɛ bɛmaa ye. Ɔhanle kɛ: “Me nee me sonvolɛ mraalɛ ne mɔ yɛdayɛ yɛbayɛ zɔhane ala. Ɛhye anzi, mebahɔ belemgbunli ɛkɛ. Ɛhye tia mɛla ne bɔbɔ ɛdeɛ, noko saa ɔlua ɛhye ati na ɔwɔ kɛ mewu a, menwɔwu.” (Ɛst. 4:12-17) Ɛseta lale akɛnrasesebɛ ali na buluku ne mɔɔ ye duma la zo la bɔ yɛ amaneɛ kɛ Nyamenle liele ye menli ne. Ɛnɛ, saa Keleseɛnema mɔɔ bɛkpokpa bɛ nee mboane gyɛne ne anu amra ɛlɛnwu amaneɛ a, bɛda akɛnrasesebɛ ko ne ala bie ali. Na Gyihova mɔɔ tie “nzɛlɛlɛ la” boa bɛ.—Bɛgenga Edwɛndolɛ 65:2; 118:6.
NYIA AKƐNRASESEBƐ
16. Neazo boni a Gyisɛse yɛle manle ngakula a?
16 Mɔɔ Gyisɛse lile ɛvolɛ 12 la, kenle ko ye awovolɛ nwunle kɛ “ɔde Dwuu kilehilevolɛma avinli, ɔlɛtie bɛ edwɛkɛ ne bie na ɔbizebiza bɛ kpuyia.” Na “nrɛlɛbɛ mɔɔ wɔ ye nyelebɛnloa nee ye ndelebɛbo nu la zinle bɛdabɛ mɔɔ ɛnee bɛlɛtie ye la anwo.” (Luku 2:41-50) Ɛnee Gyisɛse le kakula noko ɛnee ɔlɛ diedi nee akɛnrasesebɛ mɔɔ ɔhyia na yeahola yeabizebiza kilehilevolɛ mgbanyinli kpuyia la. Ɔwɔ kɛ ngakula mɔɔ wɔ Keleseɛne asafo ne anu la kakye Gyisɛse neazo ne. Ɛhye baboa bɛ yeamaa bɛava nwolɛ adenle biala mɔɔ bɛbanyia la bɛahilehile bɛ diedi ne anu.—1 Pita 3:15.
17. Duzu ati a Gyisɛse zele ye ɛdoavolɛ ne mɔ kɛ bɛnyia akɛnrasesebɛ ɛ? Kɛmɔti a ɔwɔ kɛ yɛnyia akɛnrasesebɛ ɛ?
17 Gyisɛse hanle kɛ bɛdo bɛ “rɛle azule nu!” anzɛɛ bɛnyia akɛnrasesebɛ. (Mat. 9:2, 22) Ɔzele ye ɛdoavolɛ ne mɔ kɛ: “Mekɛ ɛlɛba, na yedwu bɔbɔ, bɛbabɔ bɛ kɔsɔɔti asande, na awie biala ahɔ ɔdaye ye sua nu, na yeaha me ngomekye. Noko ɔnrɛha me ngome, ɔboalekɛ Selɛ ne nee me lua. Meha ɛhye mehile bɛ amaa saa bɛmeta me nwo a bɛanyia [anzondwolɛ]. Ɛtane ewiade ɛhye bamaa bɛali nyane, noko [bɛnyia akɛnrasesebɛ]. Meli ɛtane ewiade ɛhye anwo zo konim!” (Dwɔn 16:32, 33) Ewiade ne kpɔ yɛ kɛmɔ ɔkpɔle Gyisɛse ɛdoavolɛma mɔɔ lumua la, noko yɛngulo kɛ yɛyɛ ewiade ne ɛdeɛ. Saa yɛsukoa Gyisɛse akɛnrasesebɛ nwo neazo ne a, yɛbahola yɛahwe yɛ nwo yɛavi ewiade ɛhye anwo. Ɔlile ewiade ne azo konim na yɛdayɛ noko yɛbahola yɛali zo konim.—Dwɔn 17:16; Gye. 1:27.
“GYINLA KPUNDII!”
18, 19. Adenle boni azo a Pɔɔlo lale diedi nee akɛnrasesebɛ ali a?
18 Ɛzoanvolɛ Pɔɔlo yiale sɔnea dɔɔnwo. Kenle ko bie, ɛnee Dwuuma mɔɔ bɛwɔ Gyɛlusalɛm la kpondɛ kɛ bɛku ye noko Wulomu sogyama liele ye. Kenle ko ne nɔe ne “Awulae ragyinlanle Pɔɔlo anwo ɛkɛ ne na ɔzele ye kɛ, ‘Gyinla kpundii [anzɛɛ “Nyia akɛnrasesebɛ,” NW]! Wɔli me nwo daselɛ bɔkɔɔ wɔ Gyɛlusalɛm ɛke, na ɔwɔ kɛ ɛyɛ ye zɔhane noko wɔ Wulomu.’” (Gyi. 23:11) Pɔɔlo yɛle mɔɔ Gyisɛse hanle hilele ye la.
19 Pɔɔlo lale akɛnrasesebɛ ali wɔ mekɛ mɔɔ ɔhanle ɔhilele “ɛzoanvolɛma kpalɛ” ne mɔɔ bɔle mɔdenle kɛ bɛsɛkye Kɔlente asafo ne kɛ mɔɔ bɛlɛyɛ la ɛnle kpalɛ la. (2 Kɔl. 11:5; 12:11) Ɛnee mrenya ɛhye mɔ le ɛzoanvolɛma alane. Ɛnee Pɔɔlo bahola ali daselɛ kɛ Gyisɛse a zoanle ye a ɔlua ninyɛne ɛhye mɔ mɔɔ ɔgyinlanle ɔ nloa la ati. Ɔlale efiade, bɛbilale ye empele, ɔyiale esiane dɔɔnwo wɔ ye adendulɛ ne mɔ anu, ɔsolole ye nlafelɛ, ɛhɔne nee nzuhɔne hunle ye, yɛɛ asafo ne mɔ anwo adwenleadwenle yɛle adesoa kpole manle ye. (Bɛgenga 2 Kɔlentema 11:23-28.) Pɔɔlo diedi nee ye akɛnrasesebɛ ne manle ɔlale ali kɛ Nyamenle a manle ye anwosesebɛ a!
20, 21. (a) Maa neazo fa kile kɛ yɛhyia akɛnrasesebɛ na yɛahola yɛagyinla tɛnlabelɛ mɔɔ anu yɛ se la anloa. (b) Tɛnlabelɛ boni mɔ anu a yɛhyia akɛnrasesebɛ a? Anwodozo boni a ɔwɔ kɛ yɛnyia a?
20 Tɛ Keleseɛnema kɔsɔɔti a bɛayia ɛkpɔlɛ mɔɔ anu yɛ se la a. Noko yɛ kɔsɔɔti yɛhyia akɛnrazilɛ na yɛagyinla tɛnlabelɛ mɔɔ anu yɛ se la anloa. Kɛ neazo la, ɛnee kpavolɛ bie mɔɔ wɔ Brazil la boka nwulema eku bie anwo. Mekɛ mɔɔ ɔzukoale Baebolo ne la, ɔnwunle kɛ ɔwɔ kɛ ɔyɛ nzenzaleɛ, noko mekɛ biala mɔɔ awie kɛvi zɔhane eku ne anu la bɛku ye. Ɔyɛle asɔne na ɔgyinlanle ngɛlɛlera ne azo ɔhilehilele nu ɔhilele kpanyinli ne kɛ ɔnrɛhola ɔnrɛboka eku ne anwo bieko. Bɛmanle ye adenle ɔvile nu mɔɔ bɛanyɛ ye ɛhwee a, na ɔrayɛle nolobɔlɛnli.
21 Yɛhyia akɛnrasesebɛ wɔ tɛnlabelɛ dɔɔnwo anu. Yɛhyia nwo amaa yɛahola yɛabɔ edwɛkpa ne nolo. Mgbavolɛ nee mbɛlɛra hyia akɛnrasesebɛ na bɛali nɔhalɛ wɔ sukulu nu. Yɛhyia akɛnrasesebɛ na yɛahola yɛazɛlɛ adenle wɔ gyima nu yɛahɔ nyianu. Neazo ne zonle noko ɔnva nwo tɛnlabelɛ biala mɔɔ yɛbahɔ nu la, saa yɛfa “diedi [yɛyɛ] nzɛlɛlɛ” a Gyihova badie yɛ. (Gye. 5:15) Ɔbahola yeamaa yɛ ye sunsum nwuanzanwuanza ne amaa yɛanyia “akɛnrasesebɛ” na yɛ nwo ayɛ se.
[Debiezukoalɛ kpuyia ne mɔ]
[Nvoninli wɔ mukelɛ 19]
Yinɔko lile daselɛ akɛnrasesebɛ zo wɔ ɛtane ewiade bie anu
[Nvoninli wɔ mukelɛ 20]
Ɛnee Gyeeyɛle lɛ akɛnrasesebɛ na ɔ nwo yɛ se
