Bɔ Edwɛkɛ Ne Nolo Ndɛndɛ
Bɔ Edwɛkɛ Ne Nolo Ndɛndɛ
“Ka edwɛkɛ ne, bɔ ye nolo ndɛndɛ.”—2 TEM. 4:2, NW.
ƐBAHOLA WƆAHILEHILE NU Ɔ?
Duzu ati a Keleseɛnema mɔɔ ɛnee wɔ ɛvoya ne mɔɔ lumua la anu la hanle edwɛkɛ ne ndɛndɛ a?
Kɛ ɔkɛyɛ na yɛahɔ zo yɛaha edwɛkɛ ne ndɛndɛ ɛ?
Kɛmɔti a ɔhyia kɛ yɛka edwɛkɛ ne ndɛndɛ ɛnɛ yɛtɛla mekɛ biala ɛ?
1, 2. Edwɛkɛ ne mɔɔ yɛbɔ ye nolo ndɛndɛ la anwo kpuyia boni mɔ a yɛbabua a?
MENLI mɔɔ yɛ ngoane nwo gyima la anwo yɛ ndɛ kpalɛ. Kɛ neazo la, saa bɛfɛlɛ menli mɔɔ nua senle la a, ndɛndɛ ne ala bɛdie zo na bɛkɔ ɔluakɛ bie a ɛnee awie ngoane la esiane nu.
2 Kɛ Gyihova Alasevolɛ la, yɛkulo kɛ yɛboa menli yɛmaa bɛnyia ngoane. Ɛhye ati a yɛ daselɛlilɛ gyima ne anwo hyia yɛ la. Ɔwɔ kɛ yɛyɛ yɛ gyima ne ndɛndɛ ɛdeɛ, noko yɛmpele yɛ nwo mɔɔ yɛndwenle nwo a. Yemɔti duzu a ɛnee Pɔɔlo ɛlɛkile wɔ mekɛ mɔɔ ɔdule folɛ kɛ: “Ka edwɛkɛ ne, bɔ ye nolo ndɛndɛ” la ɛ? (2 Tem. 4:2, NW) Kɛ ɔkɛyɛ na yɛaha edwɛkɛ ne ndɛndɛ ɛ? Na duzu ati a ɔwɔ kɛ yɛyɛ yɛ gyima ne ndɛndɛ ɛ?
DUZU ATI A ƆWƆ KƐ YƐKA EDWƐKƐ NE NDƐNDƐ Ɛ?
3. Saa menli tie Belemgbunlililɛ ne anwo edwɛkɛ ne anzɛɛ bɛandie a, duzu a bahola avi nu ara a?
3 Saa ɛdwenle kɛzi yɛ edwɛkɛhanlɛ gyima ne kola die menli ngoane la anwo a, ɔbamaa wɔaha edwɛkɛ ne wɔahile awie mɔ ndɛndɛ. (Wulo. 10:13, 14) Nyamenle Edwɛkɛ ne se: “Saa meka mekile amumuyɛnli kɛ, ‘ɛbawu’, na saa ɔsia ɔfi ye ninyɛndane nwo, ɔyɛ mɔɔ fa mɛla adenle nu . . . a, ɔbanyia ngoane, ɔnrɛwu. Bɛnrɛhakye ye ɛtane ne mɔ mɔɔ yeyɛ la biala.” (Yiz. 33:14-16) Baebolo ne ka ye wɔ awie mɔɔ ka Belemgbunlililɛ ne anwo edwɛkɛ ne la anwo kɛ: “Ɛkɛlie ɛ nwo nee bɛdabɛ mɔɔ bɛtie wɔ la ngoane.”—1 Tem. 4:16; Yiz. 3:17-21.
4. Duzu ati a ɛnee ɔwɔ kɛ bɛka edwɛkɛ ne ndɛndɛ wɔ ɛvoya ne mɔɔ lumua la anu ɔlua menli mɔɔ ɛnee bɛbakpɔkye la ati ɛ?
4 Saa yɛbade deɛmɔti Pɔɔlo dule Temɔte folɛ kɛ ɔha edwɛkɛ ne ndɛndɛ la abo a, ɔwɔ kɛ yɛkenga ngɛlɛlera ne mɔɔ edwɛkɛ ne gyi zo la nee nwolɛ edwɛkɛ ekyi. Ɔkenga kɛ: “Ka edwɛkɛ ne, bɔ ye nolo ndɛndɛ wɔ mekɛ kpalɛ nee mekɛ ɛtane nu, ka bɛ nyunlu, twi bɛ nyunlu, tu bɛ folɛ, na fa abotane kilehile bɛ kpalɛ. Na mekɛ bie bara mɔɔ bɛnrɛdie ngilehilelɛ kpalɛ ne, emomu, bɛbali bɛdabɛ bɛ atiakunluwɔzo nzi, na bɛaboɔboa kilehilevolɛma anloa bɛamaa bɛahoto bɛ nzo nu; bɛbaye bɛ nzo bɛavi nɔhalɛ ne anwo.” (2 Tem. 4:2-4, NW) Gyisɛse hanle kɛ menli bɛakpɔkye. (Mat. 13:24, 25, 38) Ɛhye ati ɛnee ɔhyia kɛ Temɔte ka Nyamenle edwɛkɛ ne ndɛndɛ kile menli mɔɔ wɔ asafo ne anu la bɔbɔ amaa bɛanva adalɛ ngilehilelɛ bɛambɛlɛbɛla Keleseɛnema ne. Ɛnee bɛ ngoane la esiane nu. Na ɛnɛ noko ɛ?
5, 6. Ngilehilelɛ boni a menli mɔɔ yɛyia bɛ wɔ daselɛlilɛ nu la dɔɔnwo die di a?
5 Menli dɔɔnwo ɛkpɔkye ɛvi nɔhalɛ ɛzonlenlɛ nwo na bɛhɔ ɛleka ngakyile. (2 Tɛs. 2:3, 8) Adalɛ ngilehilelɛ boni a menli anye die nwo ɛnɛ a? Kɛ neazo la, bɛhilehile menli bɛmaa bɛ nye ɛlie ngakyihakyililɛ nwo kɛmɔ bɛ nye die bɛ ɛzonlenlɛ nwo la. Ɔwɔ nuhua kɛ abɔdeɛ nwo nrɛlɛbɛ yɛɛ bɛgyinla zo bɛkilehile ngakyihakyililɛ nu ɛdeɛ, noko ngakyihakyililɛ asɛɛ ɛrayɛ ɛzonlenlɛ yemaa menli mɔɔ bɛnlie Nyamenle bɛnli la. Yeha adwenle mɔɔ bɛlɛ ye wɔ Nyamenle nee awie mɔ anwo la. Ngilehilelɛ bieko mɔɔ menli dɔɔnwo die to nu la a le kɛ Nyamenle ɛndwenle yɛ nwo yemɔti ɔnle kɛ yɛdayɛ noko yɛdwenle ɔ nwo. Duzu ati a menli mgbe dɔɔnwo anye die ngilehilelɛ ɛhye mɔɔ ɔsi agɔnwolɛvalɛ mɔɔ bɛ nee Nyamenle bɛanyia adenle la anwo ɛ? Ngilehilelɛ nwiɔ ɛhye mɔ ɛmaa menli ɛnyia diedi kɛ bɛkola bɛyɛ debie biala mɔɔ bɛkulo la ɔluakɛ bɛnrɛbu nwolɛ mgbonda biala. Edwɛkɛ zɛhae a menli dɔɔnwo kulo kɛ bɛte na bɛdie bɛdi a.—Bɛgenga Edwɛndolɛ 10:4.
6 Noko, ngilehilelɛ fofolɛ wɔ ɛkɛ mɔɔ menli die di a. Bie mɔ kulo kɛ bɛte kɛ ɔnva nwo mɔɔ bɛbayɛ biala la Nyamenle kulo bɛ. Bie mɔ noko kulo kɛ bɛ ɛsɔfo ne mɔ ka kɛ ɛvoyialilɛ, Masse azubɔlɛ, ɛzonlenlɛ nu ɛvoyia nee ananze maa bɛnyia Nyamenle nyilalɛ. Bie a asɔnema ɛhye mɔ ɛnze esiane mɔɔ bɛwɔ nu la. (Edw. 115:4-8) Noko saa yɛtunwue bɛ yɛfi sunsum nu nafelɛ nu na yɛboa bɛ yɛmaa bɛte Baebolo ne abo a bɛbahola bɛanyia Nyamenle Belemgbunlililɛ ne azo nvasoɛ.
DUZU A EDWƐKƐ NE MƆƆ YƐKA YE NDƐNDƐ LA KILE A?
7. Duzu a yɛyɛ a ɔbahile kɛ yɛkpondɛ kɛ yɛka edwɛkɛ ne ndɛndɛ ɛ?
7 Dɔketa mɔɔ yɛ apelehyɛne la fa ye adwenle sie ye gyima ne azo ɔluakɛ ɔle ngoane nwo gyima. Wɔ yɛ Keleseɛnema ɛzonlenlɛ gyima ne anu, yɛ adwenle kɔsɔɔti mɔɔ yɛbava yɛazie edwɛkɛhanlɛ gyima ne azo la a bahile kɛ yɛlɛka ye ndɛndɛ a. Yɛbahola yɛayɛ ɛhye ɔlua edwɛkɛ anzɛɛ kpuyia mɔɔ menli anye balie nwo mɔɔ yɛbadwenle nwolɛ kpalɛ na yɛava yɛali gyima la azo. Bieko, saa yɛte deɛmɔti edwɛkɛ ɛhye anwo hyia la abo a, yɛbayɛ nzenzaleɛ wɔ yɛ ngyehyɛleɛ nu amaa yɛahola yɛahɔ menli ne ɛkɛ wɔ mekɛ kpalɛ mɔɔ bɛbadie yɛ la anu.—Wulo. 1:15, 16; 1 Tem. 4:16.
8. Duzu a edwɛkɛ ne mɔɔ yɛka ye ndɛndɛ la eza kile a?
8 Edwɛkɛ ne mɔɔ yɛka ye ndɛndɛ la eza kile kɛ yɛbalumua yɛayɛ ninyɛne mɔɔ nwolɛ hyia la. (Bɛgenga Mɔlebɛbo 19:15.) Kɛ neazo la, fa ye kɛ dɔketa bie ɛnlea wɔ na yeha yehile wɔ kɛ: “Ɛlɛ ngyegyelɛ bie mɔɔ ɔwɔ kɛ ɛdi nwolɛ gyima ndɛndɛ a, na ɔwɔ kɛ ɛyɛ nwolɛ debie kolaa na siane ko adwu.” Duzu a ɛbayɛ a? Ɛnrɛdwazo ɛkɛ ne ala ɛnrɛyɛ nwolɛ debie. Emomu, ɛbabiza ye debie mɔɔ ɔwɔ kɛ ɛyɛ la, na ɛkɔ sua nu a, wɔazi mɔɔ ɛbayɛ la anwo kpɔkɛ.
9. Duzu ati a yɛbahola yɛaha kɛ Pɔɔlo hanle edwɛkɛ ne ndɛndɛ wɔ Ɛfɛsɛse ɛ?
9 Saa yɛkenga edwɛkɛ mɔɔ Pɔɔlo hanle hilele Ɛfɛsɛse mgbanyima ne mɔ la a, yɛbahola yɛazukoa debie yɛavi kɛzi ɔhanle edwɛkɛ ne ndɛndɛ wɔ Ehyea maanzinli ne anu la anu. (Bɛgenga Gyima ne 20:18-21.) Ɔdwule ɛkɛ ne ala la yɛɛ ɔbɔle ɔ bo ɔhanle edwɛkɛ ne anyebolo zo wɔ azua nu a. Bieko, wɔ ɛvolɛ nwiɔ anu ɛnee “ɔkilehile bɛ wɔ Taelanɛse sukulu sua ne anu alehyenlɛ biala.” (Gyi. 19:1, 8-10) Edwɛkɛhanlɛ ne mɔɔ Pɔɔlo nwunle ye kɛ ɔhyia ndɛndɛ la hanle ninyɛne mɔɔ ɛnee ɔyɛ ye dahuu la. Ɛzonlenlɛ gyima ne mɔɔ bɛse yɛyɛ ye ndɛndɛ la ɛngile kɛ gyima ne bo yɛ nwo zo. Emomu, ɔwɔ kɛ yɛmaa edwɛkɛhanlɛ gyima ne boka ninyɛne mɔɔ anwo hyia yɛ kpalɛ la anwo.
10. Kɛmɔti a ɔyɛ yɛ fɛ kɛ Baebolo Sukoavoma ne hanle edwɛkɛ ne ndɛndɛ ɛ?
10 Baebolo Sukoavoma ekyi bie yɛle edwɛkɛhanlɛ gyima ne mɔɔ bɛyɛ ye ndɛndɛ la anwo neazo kolaa na ɛvolɛ 1914. Bɛ neazo ne maa yɛnwu kɛzi yɛbaha edwɛkɛ ne ndɛndɛ la. Ɛnee bɛ nwo anzo ɛdeɛ, noko bɛnwunle kɛzi ɔhyia kɛ bɛyɛ ninyɛne ndɛndɛ la na bɛvale anyelielɛ bɛyɛle Belemgbunlililɛ edwɛkɛhanlɛ gyima ne. Bɛmanle bɛhɛlɛle bɛ ɛdendɛlɛ ne wɔ adwelie ngɛlata dɔɔnwo anu na bɛvale kɔla bɛyɛle sini mɔɔ nuhua menli keha bɛ nwo mɔɔ bɛvɛlɛle ye “Photo-Drama of Creation” la bɛhilele awie mɔ. Kɛmɔ bɛhanle edwɛkɛ ne ndɛndɛ la ati, menli dɔɔnwo mɔɔ yɛ nuhua bie mɔ boka nwo la dele Belemgbunlililɛ ne anwo edwɛkɛ ne.—Bɛgenga Edwɛndolɛ 119:60.
MMABU Ɛ NYE ƐGUA NINYƐNE ZO
11. Duzu ati a bie mɔ ɛnga edwɛkɛ ne ndɛndɛ bieko ɛ?
11 Ninyɛne mɔɔ twehwe adwenle la bahola aye awie adwenle avi kɛzi edwɛkɛhanlɛ gyima ne anwo hyia la azo. Seetan dua ewiade ɛhye anu ninyɛne mɔɔ yɛ nye die nwo anzɛɛ nwolɛ hyia yɛ la azo twehwe yɛ adwenle fi Gyihova ɛzonlenlɛ zo. (1 Pita 5:8; 1 Dwɔn 2:15-17) Menli bie mɔ mɔɔ vale Gyihova ɛzonlenlɛ lumuale bɛ asetɛnla nu la ɛnyɛ zɔ bieko. Kɛ neazo la, ɛnee Dimase le Keleseɛnenli mɔɔ ɔ nee ɛzoanvolɛ Pɔɔlo yɛle gyima a, noko nzinlii ɔmanle ewiade ne lile ye adwenle. Kɛ anrɛɛ ɔbamaa Pɔɔlo anwosesebɛ wɔ ye anwongyelelɛ mekɛ ne anu la, Dimase kpole ye.—Fae. 23, 24; 2 Tem. 4:10.
12. Nwolɛ adenle boni a yɛlɛ ye ɛnɛ a? Nwolɛ adenle boni mɔ a yɛbanyia ye kenlebie a?
12 Saa yɛbahola yɛaha edwɛkɛ ne ndɛndɛ a, ɔwɔ kɛ yɛnea boɛ wɔ ninyɛne mɔɔ bahola aye yɛ adwenle avi edwɛkɛhanlɛ gyima ne azo la anwo. Ɔwɔ kɛ yɛyele yɛ nwo yɛyɛ ninyɛne mɔɔ bamaa yɛ sa aha “nɔhalɛ ngoane ne la.” (1 Tem. 6:18, 19) Yɛdie yɛdi kɛ dahuu ngoane mɔɔ Nyamenle Belemgbunlililɛ ne bamaa yɛanyia ye wɔ azɛlɛ ye azo la bamaa yɛanyia nwolɛ adenle dɔɔnwo mɔɔ bamaa yɛ nye alie la. Noko nwolɛ adenle mɔɔ yɛlɛ ye ɛnɛ kɛ yɛbaboa awie mɔ yɛamaa bɛapɛ Amagɛdɔn la ɛnrɛra bieko.
13. Duzu a baboa yɛ na yɛaha edwɛkɛ ne ndɛndɛ a?
13 Menli dɔɔnwo mɔɔ wɔ ewiade ye la ɛnze Gyihova. Yemɔti duzu a ɔwɔ kɛ yɛyɛ na yɛahola yɛaha edwɛkɛ ne ndɛndɛ a? Ɔwɔ kɛ yɛkakye kɛ mekɛ bie mɔɔ ɛze la ɛnee yɛnze Nyamenle yemɔti ɛnee yɛnlɛ anyelazo biala. Noko yɛzukoale Gyihova nee Gyisɛse anwo nɔhalɛ ne la, kɛkala yɛnyia nwolɛ adenle yɛlɛfa nɔhalɛ ne yɛahilehile awie mɔ. (Bɛgenga Ɛfɛsɛsema 5:14.) Pɔɔlo hɛlɛle kɛ: “Bɛnlea boɛ kpalɛ na bɛ ɛbɛlabɔlɛ ne anyɛ kɛ menli mɔɔ ɛnze nrɛlɛbɛ na emomu kɛ nrɛlɛbɛvolɛma, na bɛdɔ mekɛ biala mɔɔ bɛkɛnyia la, ɔboalekɛ mekɛ ye le mekɛ ɛtane.” (Ɛfɛ. 5:15, 16, NW) Wɔ ɛtane ewiade ɛhye anu, ɔhyia kɛ yɛfa mekɛ mɔɔ yɛlɛ ye la yɛyɛ ninyɛne mɔɔ bamaa yɛabikye Gyihova la.
YƐWƆ MEKƐ MƆƆ ANWO HYIA LA ANU
14-16. Duzu ati a mekɛ ɛhye anu a ɔwɔ kɛ yɛka Belemgbunlililɛ ne anwo edwɛkɛ ne yɛtɛla mekɛ biala ɛ?
14 Keleseɛnema ɛzonlenlɛ gyima ne hyia ndɛndɛ. Noko ɛnɛ a le mekɛ mɔɔ nwolɛ hyia ndɛndɛ tɛla mekɛ biala a. Ɔvi 1914 mɔɔ ba la, yɛnwu ninyɛne dɔɔnwo mɔɔ Baebolo ne hanle dole ɛkɛ mɔɔ ɛlɛsisi la. (Mat. 24:3-51) Bɛva ɛzɛkyelɛ bɛnwulonwunla alesama bɛdɛla mekɛ biala. Ɔwɔ nuhua kɛ maanle mɔɔ lɛ tumi la ɛyɛ anzondwolɛ ngyehyɛleɛ ngakyile ɛdeɛ, noko bɛlɛ konle nwo ninyɛne mɔɔ bɛkola bɛto bɛkɔ ewiade ɛleka biala la mɔɔ bo 2,000. Amaneɛbɔlɛ kile kɛ ɔdwu mekɛ ne bie a zɛhae konle ninyɛne ne mɔ bie minli mɔɔ bɛnnwu ye a. Konle ninyɛne ɛhye mɔ bie ɛhɔli amumuyɛma ɛkɛ ɔ? Menli bie mɔ ɛha kɛ konle mɔɔ amumuyɛma bava ara la bahola azɛkye ewiade. Noko akee, tɛ konle angome a maa ɛzulolɛ ka alesama a.
15 The Lancet nee University College London bɔle amaneɛ wɔ 2009 ne anu kɛ: “Maanle nu ɛhakyile bahola ava esiane kpole ara alesama anwo zo.” Ɔhanle kɛ nzenzaleɛ mɔɔ bara maanle nu la baha alesama kpɔkɛdelɛ na yeava menli mgbe dɔɔnwo ngoane yeado esiane nu. Ninyɛne dɔɔnwo bazɛkye ɔlua azɛlɛ nwo mɔɔ ɔwe, azuyilɛ, ewulenzane, ahumuakyima, nee konle mɔɔ bahɔ ɔ nyunlu la ati. Kpolerazulɛ biala ɛnle nwolɛ kɛ konle nee esiane ngakyile fa alesama ngoane to esiane nu.
16 Bie mɔ suzu kɛ nukelea konle a bava awieleɛ mekɛ ne anu ninyɛne mɔɔ Gyisɛse hanle nwolɛ edwɛkɛ la ara ye awieleɛ a. Noko menli dɔɔnwo ɛnde mɔɔ Gyisɛse ngapezo ne kile la abo kpalɛ. Yɛnwu ninyɛne mɔɔ kile kɛ Kelaese ɛra na ewiade ɛhye awieleɛ ɛbikye la wɔ ɛvolɛ dɔɔnwo anu. (Mat. 24:3) Mekɛ ɛhye anu a yɛnwu ninyɛne mɔɔ Gyisɛse hanle nwolɛ edwɛkɛ la dɔɔnwo a. Mekɛ ɛdwu mɔɔ ɔwɔ kɛ menli nee Nyamenle nyia abusuabɔlɛ a. Yɛ daselɛlilɛ gyima ne bahola aboa bɛ.
17, 18. (a) Kɛzi awieleɛ mekɛ ɛhye mɔɔ yɛwɔ nu la kola ka yɛ ɛ? (b) Duzu a bahola amaa bie mɔ anye alie Belemgbunlililɛ edwɛkɛ ne anwo a?
17 Mekɛ ekyi bie ala a yɛlɛ mɔɔ yɛbava yɛahile kɛ yɛkulo Gyihova na yɛawie edwɛkɛhanlɛ gyima ne mɔɔ yeva yemaa yɛ wɔ awieleɛ mekɛ ɛhye anu la a. Edwɛkɛ mɔɔ Pɔɔlo hanle hilele Wulomu Keleseɛnema la anwo hyia yɛdayɛ noko kpalɛ: “Ɔwɔ kɛ bɛnwu kɛ mekɛ ɛdwu mɔɔ ɔwɔ kɛ bɛfi nafelɛ nu bɛdwazo a. Ɔluakɛ ngoanelielɛ mekɛ ne ɛbikye ɛdɛla kɛmɔ yɛzuzule ye wɔ mekɛ mɔɔ yɛlumuale yɛnyianle diedi ne la.”—Wulo. 13:11.
18 Ninyɛne mɔɔ bɛhanle kɛ ɔbasisi wɔ awieleɛ mekɛ ne anu la maa menli nwu kɛ ɔwɔ kɛ bɛ nee Nyamenle nyia agɔnwolɛvalɛ. Saa bie mɔ suzu ezukoa nwo ngyegyelɛ, nukelea akodeɛ, basabasayɛlɛ, anzɛɛ azɛlɛ ne mɔɔ bɛlɛsɛkye ye na sonla arane ɛngola ɛnli nwolɛ gyima la anwo a, ɔmaa bɛtie Belemgbunlililɛ ne anwo edwɛkɛ ne. Edwɛkɛ mɔɔ ɛsisi bie mɔ abusua nu mɔɔ bie a le kpɔkɛdelɛ nwo edwɛkɛ, ewolebɔlɛ, anzɛɛ dɔvolɛ bie ewule la ɛmaa bɛ nye ɛlie yɛ edwɛkɛ ne anwo. Yemɔti yɛdua daselɛlilɛ gyima ne azo yɛboa menli ɛhye mɔ.
KA EDWƐKƐ NE NDƐNDƐ
19, 20. Nzenzaleɛ boni a edwɛkɛ ne mɔɔ ɔwɔ kɛ yɛka ye ndɛndɛ la ɛmaa Keleseɛnema dɔɔnwo ɛyɛ ye wɔ bɛ ɛbɛlabɔlɛ nu a?
19 Kɛmɔ bɛkulo kɛ bɛka edwɛkɛ ne ndɛndɛ la ati, Keleseɛnema dɔɔnwo yɛ nzenzaleɛ wɔ bɛ ɛbɛlabɔlɛ nu amaa bɛahola bɛayɛ dɔɔnwo wɔ daselɛlilɛ gyima ne anu. Kɛ neazo la, mekɛ mɔɔ agyalɛma bie mɔɔ bɛwɔ Ecuador dele ye wɔ 2006 kenle ko nyianu titile ne abo kɛ “Maa Ɛ Nye Ɛyɛ Kpalɛ” la, bɛzile kpɔkɛ bɛdele bɛ asetɛnla zo. Bɛhɛlɛle ninyɛne mɔɔ bɛngyia nwo la, na wɔ siane nsa anu, bɛdule bɛvile bɛ sua ne mɔɔ le ekpumgbunli nsa la anu bɛhɔdɛnlanle sua ekpumgbunli ko anu, bɛdɔnenle bɛ ninyɛne ne bie, na bɛduale bɛ nwo kakɛ kɔsɔɔti. Yeangyɛ bɛbɔle adekpakyelɛ boavolɛ gyima ne abo na mekɛ mɔɔ maanzinli zo neavolɛ ne hanle kɛ bɛhɔboa asafo bie mɔɔ hyia moalɛ la, bɛhɔle.
20 Adiema bie mɔɔ wɔ United States la hɛlɛle kɛ: “Mekɛ mɔɔ me nee me ye yɛhɔle nyianu bie wɔ 2006 la, ɛnee yɛbɔ azu yɛnyia ɛvolɛ 30. Mɔɔ yɛlɛsia yɛahɔ sua nu la, yɛzuzule kɛzi yɛbade yɛ asetɛnla zo la anwo.” (Mat. 6:19-22) Ɛnee bɛlɛ azua nsa, azɛlɛ, kale, ɛlɛne mɔɔ milahyinli bɔ nwo, nee kale mɔɔ sua gyi zo la. Kɛmɔ bɛdele nganeɛ kɛ bɛzɛkye bɛ mekɛ nee bɛ anwosesebɛ bɛkpondɛ nwonane afoa nu ninyɛne la ati, bɛzile kpɔkɛ kɛ bɛbayɛ dahuu ɛzonlenlɛ gyima ne. Bɛhɔbokale bɛ ra raalɛ ne anwo bɛyɛle dahuu adekpakyelɛ wɔ ɛvolɛ 2008 ne anu. Bɛ nye ɛlie kɛ bɛnwu kɛzi menli fa anyelielɛ tie nɔhalɛ mɔɔ wɔ Nyamenle Edwɛkɛ ne anu na bɛte ɔ bo la. Adiema nrenya ne toa zo kɛ: “Nea kɛzi ɔyɛ anyelielɛ kɛ yɛ nee mediema ne mɔ bɔ nu yɛ gyima a! Yɛhola yɛyɛ gyima wɔ ɛleka mɔɔ moalɛ kpole nwo hyia la. Bieko, Gyihova ɛzonlenlɛ ne mɔɔ yɛva yɛ nwo yɛwula nu dɔɔnwo la ɛmaa yɛbikye ye kpalɛ.”
21. Duzu a maa yɛka edwɛkɛ ne ndɛndɛ yɛkile menli a?
21 Yɛze kɛ ɔnrɛhyɛ “ndɛnebualɛ kenle ne nee menli mɔɔ ɛnze Nyamenle la ɛzɛkyelɛ” ne baye ɛtane ewiade ɛhye avi ɛkɛ. (2 Pita 3:7) Mɔɔ yɛzukoa ye wɔ Nyamenle Edwɛkɛ ne anu la ka yɛ maa yɛbɔ anwongyelelɛ kpole ne nee ewiade fofolɛ ne anwo nolo yɛkile menli. Yɛka edwɛkɛ ne ndɛndɛ yɛmaa menli nyia anyelazo kpalɛ. Saa yɛfa yɛ nwo yɛwula gyima ɛhye mɔɔ gyi senle zo la anu a, yɛda ye ali kɛ yɛkulo Nyamenle nee menli.
[Debiezukoalɛ kpuyia ne mɔ]
