Asoo Ɔhyia Kɛ Ɛnwu Mualɛ Ne Mɔ?

“Bɛbanwu nɔhalɛ ne, na nɔhalɛ ne bamaa bɛanyia bɛ ti.”—DWƆN 8:32.

NƆHALƐ mɔɔ maa yɛnyia yɛ ti wɔ Gyisɛse anwo diedi mɔɔ kola maa bɛbɛlɛbɛla yɛ anzɛɛ bɛsɛkye yɛ adwenle anwo la wɔ Baebolo ne anu. Asoo ninyɛne mɔɔ yɛdie yɛdi wɔ Gyisɛse anwo la hyia? Ɛhɛe. Ɔhyia Gyihova. Ɔhyia Gyisɛse. Na ɔwɔ kɛ ɔkyia yɛdayɛ noko.

● Duzu ati a ɔhyia Gyihova ɛ? Ye sikalɛ a le kɛ “Nyamenle le ɛhulolɛ.” (1 Dwɔn 4:8) Gyihova kulo kɛ yɛfa anyelielɛ yɛtɛnla aze dahuu. Gyisɛse hanle kɛ: “Nyamenle hulole ewiade amra kpole kpalɛ la ati yɛɛ ɔvale Ɔ Ra kokye ne ɔmanle a, amaa awie biala mɔɔ kɛlie ye kɛli la anwu na yeanyia ngoane mɔɔ ɛnlɛ awieleɛ.” (Dwɔn 3:16) Nyamenle zoanle ɔ Ra ne kɛ ɔrayɛ yɛ Kpɔnevolɛ na ɔbuke adenle mɔɔ bamaa yɛadɛnla aze dahuu wɔ Paladaese azɛlɛ zo la ɔmaa yɛ, kɛmɔ Ye mɔlebɛbo bodane ne kile la. (Mɔlebɛbo 1:28) Nyamenle ɛziezie ɔ nwo kɛ ɔbava dahuu ngoane ahyɛlɛdeɛ ne yeamaa menli mɔɔ sukoa nɔhalɛ ne mɔɔ fane ɔ Ra ne anwo na bɛbɔ bɛ ɛbɛla bɛmaa ɔ nee ye yia la.—Wulomuma 6:23.

● Duzu ati a ɔhyia Gyisɛse ɛ? Gyisɛse noko kulo alesama. Ɔluale ye ɛhulolɛ nu mɔɔ ɔvile ɔvale ye ngoane ɔdole ɛkɛ ɔmanle yɛ la azo ɔlale tunwomaa ɛlɔlɛ ali. (Dwɔn 15:13) Ɔdele ɔ bo kɛ ɔlɛbuke adenle kokye ne mɔɔ kɔ ngoanelielɛ nu la. (Dwɔn 14:6) Asoo ɔwɔ kɛ ɔsi yɛ nwo kɛ Gyisɛse kpondɛ kɛ menli dɔɔnwo nyia ye ɛkpɔnelɛ afɔle ne azo nvasoɛ ɔ? Yemɔti a yeha yehile ye nɔhalɛ azonvolɛ kɛ bɛhilehile menli mɔɔ wɔ aleɛabo la Nyamenle ɛhulolɛdeɛ nee ye bodane la.—Mateyu 24:14; 28:19, 20.

● Duzu ati a ɔwɔ kɛ ɔkyia yɛ ɛ? Gyinla ekyii na dwenle ninyɛne mɔɔ hyia wɔ kpalɛ kpalɛ la anwo—wɔ kpɔkɛdelɛ nee wɔ abusua. Ɛ nye la kɛ ɛ nee wɔ alɔvolɛ bɛanyia kpɔkɛdelɛ nee asetɛnla kpalɛ ɔ? Gyihova ɛlɛdua Gyisɛse anwo zo yeamaa ɛ nee wɔ alɔvolɛ asa aha kpɔkɛdelɛ kpalɛ nee dahuu ngoane wɔ ewiade fofolɛ ne mɔɔ nyane nee amaneɛnwunlɛ ɛnle nu la anwo anyelazo. (Edwɛndolɛ 37:11, 29; Yekile 21:3, 4) Ɛkulo kɛ ɛtɛnla ewiade mɔɔ ɔle zɛhae la anu ɔ? Ɛnee debie wɔ ɛkɛ mɔɔ ɔwɔ kɛ ɛyɛ a.

Eza nea ngɛlɛlera ne mɔɔ edwɛkɛtile ne gyi zo la bieko: “Bɛbanwu nɔhalɛ ne, na nɔhalɛ ne bamaa bɛanyia bɛ ti.” Nɔhalɛ ne mɔɔ fane Gyisɛse anwo nee ye gyima mɔɔ ɔdi kɛ ɔmaa Nyamenle bodane ara nu la kola maa yɛnyia yɛ ti wɔ ɛtane nee ewule akɛlɛzonlenlɛ bo. Noko amaa wɔanyia zɔhane fanwodi ne la, ɔwɔ kɛ ɛnwu “nɔhalɛ ne.” Duzu ati a ɛnzukoa nɔhalɛ ɛhye nee kɛ ɔkɛyɛ na ɛ nee wɔ alɔvolɛ ahola anyia zolɛ nvasoɛ la anwo ninyɛne dɔɔnwo ɛ? Gyihova Alasevolɛ anye balie kɛ bɛkɛboa wɔ.