Fa Adwenle Kpalɛ Siezie Agyalɛ Mɔɔ Ɛlɛsɛkye La
Fa Adwenle Kpalɛ Siezie Agyalɛ Mɔɔ Ɛlɛsɛkye La
“Melɛ ɛhye, kɛ ɔle mɛla mɔɔ vi Awulae ɛkɛ memaa bɛdabɛ mɔɔ bɛle nwuvolɛ la.”—1 KƆL. 7:10.
ƐBAHOLA WƆAHILEHILE NU Ɔ?
Adenle boni azo a Nyamenle ka agyalɛma bɔ nu a?
Kɛzi mgbanyima bahola aboa agyalɛma mɔɔ ɛlɛyia ngyegyelɛ la ɛ?
Kɛzi ɔwɔ kɛ yɛbu agyalɛ ɛ?
1. Kɛzi Keleseɛnema bu agyalɛ ɛ, na duzu ati ɔ?
SAA Keleseɛnema gya a, bɛka ndane wɔ Nyamenle anyunlu—ɛzonlelilɛ mɔɔ ɔnle kɛ bɛbu ye kɛ ɔle debie ekyi bie ala a. (Nolo. 5:4-6) Kɛmɔ Gyihova a hyehyɛle agyalɛ ne la ati, ‘yeha bɛ yebɔ nu’ wɔ agyalɛ nu. (Mak. 10:9) Ɔnva nwo mɛla biala mɔɔ bɛgyinlanle zo bɛgyale la, bɛha bɛ bɛbɔ nu wɔ Nyamenle anyunlu. Ɔwɔ kɛ Gyihova azonvolɛ nwu kɛ agyalɛ ne kyekye bɛ ɔnva nwo kɛ ɛnee bɛsonle ye kolaa na bɛagya anzɛɛ bɛgyale na barazonle ye la.
2. Kpuyia boni a yɛbazuzu nwo wɔ edwɛkɛ ɛhye anu a?
2 Agyalɛ kpalɛ kola maa bɛ nye die kpole. Noko saa ngyegyelɛ ba agyalɛ ne anu a, duzu a bɛbahola bɛayɛ a? Agyalɛ mɔɔ ɛlɛsɛkye la bahola ayɛ boɛ ɔ? Moalɛ boni a wɔ ɛkɛ maa menli mɔɔ anzondwolɛ ɛnle bɛ agyalɛ ne anu la ɛ?
ƆBAYƐ ANYELIELƐ ANZƐƐ ALƆBƆLƐLILƐ Ɔ?
3, 4. Saa awie amkpa ye agyalɛ nu bokavolɛ nrɛlɛbɛ nu a, duzu a bahola azi a?
3 Saa Keleseɛnenli agyalɛ yɛ kpalɛ a, ɔmaa ɔ nye die na ɔwula Gyihova anyunlunyia. Na saa yeanyɛ boɛ a, ɔmaa ɔdi alɔbɔlɛ kpole. Keleseɛnenli mɔɔ kulo kɛ ɔgya la agyalɛ bahola ayɛ kpalɛ saa mɔlebɛbo ne ala ɔdi Nyamenle adehilelɛ zo a. Noko akee, saa awie amkpa kunli anzɛɛ yelɛ wɔ nrɛlɛbɛ nu a, bie a ɔ kunlu ɛnrɛdwo ɔ nwo na ɔbali nyane. Kɛ neazo la, mgbavolɛ nee mbɛlɛra bie mɔ bɔ ɔ bo tu wɔ mekɛ mɔɔ bɛtɛsieziele bɛ nwo bɛtɛmanle agyalɛ la. Bɛ nuhua bie mɔ dua Intanɛte zo kpondɛ bokavolɛ na bɛpele bɛ nwo bɛkɔ agyalɛ mɔɔ anyelielɛ fee ɛnle nu la. Bie mɔ noko yɛ ɛtane kolaa na bɛagya, yemɔti agyalɛ ne kabɔ ɔ bo la ɛnee bɛmbu bɛ nwo kpalɛ.
4 Keleseɛnema bie mɔ ɛngya “Awulae anu” na bɛnwu amaneɛ wɔ agyalɛ mɔɔ nuhua menli ɛnle ɛzonlenlɛ ko anu la anu. (1 Kɔl. 7:39, NW) Saa zɔhane a wɔ edwɛkɛ ne de a, sɛlɛ ɛtanefakyɛ nee moalɛ fi Nyamenle ɛkɛ. Ɔnye mɔɔ kɛvi awie ɛtane mɔɔ ɔkɛyɛ ye dɛba anu kɛra la ɔnvi ɛkɛ, noko ɔboa menli mɔɔ bɛnu bɛ nwo la ɔmaa bɛgyinla bɛ ngyegyelɛ nloa. (Edw. 130:1-4) Fa yɛ wɔ adwenle kɛ ɛbayɛ mɔɔ sɔ Gyihova anye la ɛnɛ nee dahuu, na ‘fɛlɛkolilɛ ne mɔɔ Gyihova fa maa la bayɛ wɔ anwosesebɛ.’—Nih. 8:10.
SAA NGYEGYELƐ BA AGYALƐ NU A
5. Agyalɛ mɔɔ anyelielɛ ɛnle nu la anwo adwenle boni a ɔwɔ kɛ yɛkoati a?
5 Wɔannea a menli mɔɔ ɛlɛdi alɔbɔlɛ wɔ bɛ agyalɛ nu la baha kɛ: ‘Asoo nvasoɛ wɔ zo kɛ mebabɔ mɔdenle meayɛ me agyalɛ ne mɔɔ anyelielɛ ɛnle nu la boɛ ɔ? Me kunlu a anrɛɛ mebahola meagya awie fofolɛ!’ Bɛbadwenle nwolɛ kɛ bɛgyakyi bɛ bokavolɛ ne ‘amaa bɛ nwo adɔ bɛ! Duzu ati a membɔ ewole a? Saa menrɛhola menrɛgyinla Ngɛlɛlera ne azo menrɛbɔ ewole a, duzu ati a mentete agyalɛ ne anu na me nwo ɛndɔ me ɛ?’ Kɛ anrɛɛ bɛkɛnyia adwenle ɛhye na bɛkɛdwenle kɛzi ɔwɔ kɛ asetɛnla ne yɛ anwo la, ɔwɔ kɛ Keleseɛnema yɛ mɔɔ bɛbahola biala la wɔ tɛnlabelɛ ne anwo na bɛdi Nyamenle adehilelɛ zo.
6. Kilehile edwɛkɛ mɔɔ Gyisɛse hanle ye wɔ Mateyu 19:9 la anu.
6 Saa Keleseɛnenli bie bɔ ewole a, bie a Ngɛlɛlera ne bamaa ye adenle anzɛɛ ɔnrɛmaa ye adenle ɔnrɛmaa ɔnrɛgya bieko. Gyisɛse hanle kɛ: “Nrenya biala mɔɔ kɛbɔ ɔ ye ewole, kɛgya raalɛ fofolɛ la ɛdo awuvolɛvalɛ mɛla ne.” (Mat. 19:9) Wɔ ɛke edwɛkɛkpɔkɛ mɔɔ bɛhile ɔ bo “anli nɔhalɛ” la kile awuvolɛ ɛvalɛ nee nla nu nyɛleɛ ɛtane mɔɔ anyebolo wɔ nu la. Ɔwɔ kɛ yɛfa asɔneyɛlɛ yɛsuzu adwenle biala mɔɔ yɛlɛ kɛ yɛbɔ ewole wɔ mekɛ mɔɔ bokavolɛ biala ɛtɛfale ɔ nwo ɛtɛwulale nla nu ɛbɛlatane nu la anwo.
7. Saa Keleseɛnenli agyalɛ sɛkye a, duzu a menli baha a?
7 Awie agyalɛ sɛkye a ɛnee ɔkile kɛ ye sunsum nu gyinlabelɛ ɛnle kpalɛ. Ɛzoanvolɛ Pɔɔlo bizale kpuyia ɛhye mɔɔ anyebolo wɔ nu la: “Awie mɔɔ ɛngola ɛmbu ɔdaye ye awuke la, kɛ ɔkɛyɛ na yeahola yeanlea Nyamenle asɔne ne azo ɛ?” (1 Tem. 3:5) Saa agyalɛma mɔɔ bɛfɛlɛ bɛ nwo Keleseɛnema la agyalɛ sɛkye a, menli mɔɔ de ahane la baha kɛ bɛnva mɔɔ bɛkilehile la bɛnli gyima.—Wulo. 2:21-24.
8. Saa Keleseɛnema bie si kpɔkɛ kɛ bɛtete bɛ agyalɛ ne anu a, ɛnee duzu a ɛngɔ boɛ a?
8 Saa agyalɛma mɔɔ bɛzɔne bɛ la suzu nwolɛ kɛ bɛtete nu anzɛɛ bɛbɔ ewole mɔɔ ɛngyi ngɛlɛlera ne azo la a, ɛnee ninyɛne ɛngɔ boɛ sunsum nu. Bie a ɛnee nuhua ko anzɛɛ bɛ mu nwiɔ bɛnva Ngɛlɛlera ne anu ngyinlazo bɛnli gyima. Saa ‘bɛfi ahonle muala nu bɛfa bɛ nwo bɛto Gyihova anwo zo a,’ bɛbanyia diedi kɛ bɛ agyalɛ ne bayɛ kpalɛ.—Bɛgenga Mrɛlɛbulɛ 3:5, 6.
9. Kɛzi Keleseɛnema bie mɔ mɔɔ zile abotane wɔ bɛ agyalɛ nu la ɛnyia zolɛ nvasoɛ ɛ?
9 Agyalɛ dɔɔnwo mɔɔ anrɛɛ sɛkye bɔbɔ la bie mɔ ɛyɛ boɛ. Ɔyɛ a Keleseɛnema mɔɔ bɛyia ngyegyelɛ noko bɛmpele bɛ nwo bɛmbɔ ewole la nyia zolɛ nvasoɛ. Suzu mɔɔ bahola azi wɔ abusua mɔɔ bɛnle ɛzonlenlɛ ko anu la anwo nea. Ɛzoanvolɛ Pita hɛlɛle kɛ: “Bɛmɛ nwuvolɛ mraalɛ, bɛbɛlɛ bɛ nwo aze bɛmaa bɛ hu mɔ, amaa nuhua mɔɔ ɔ hu ɛnlie Nyamenle Edwɛkɛ ne ɛnli la, bɛalua bɛ nyɛleɛ zo bɛahwe ye bɛarɛlɛ Nyamenle, mɔɔ ɔnrɛhyia kɛ bɛkɛha edwɛkɛ kpɔkɛ ko bɔbɔ a, ɔboalekɛ bɛbanwu bɛ nwo enililɛ nee bɛ anwondelɛ wɔ bɛ nyɛleɛ nu.” (1 Pita 3:1, 2) Ɔlua bokavolɛ ne nyɛleɛ kpalɛ ti, nuhua ne mɔɔ ɛnle diedinli la bahola alie nɔhalɛ ne! Menli mɔɔ maa bɛ agyalɛ yɛ kpalɛ na bɛ nee bɛ bokavolɛ tɛnla la wula Nyamenle anyunlunyia na ɔmaa abusua ne anu amra nyia nvasoɛ.
10, 11. Ngyegyelɛ mɔɔ bɛ nye ɛnla la boni a bahola ara agyalɛ nu a, na duzu a ɔwɔ kɛ Keleseɛnenli nyia anwodozo wɔ nu a?
10 Keleseɛne mbelazinli dɔɔnwo ɛgya mediema mɔɔ bɛdu bɛ nwo bɛmaa Gyihova la, ɔluakɛ bɛkulo kɛ bɛsɔ ɔ nye. Yemɔ bɔbɔ, ɔyɛ a asetɛnla ne kakyi arɛlevilɛ nu. Kɛ neazo la, bie a bokavolɛ bie bayia ngyegyelɛ mɔɔ anu yɛ se la wɔ nganeɛdelɛ nu. Anzɛɛ bie a atɔfolɛlielɛ ne anzi, bokavolɛ bie bayɛ bɛtɛɛ wɔ sunsum nu. Kɛ neazo la: Linda, * Keleseɛnenli ɛrɛladane mɔɔ bɔ mɔdenle kpalɛ la dele nganeɛ kɛ ɔnlɛ moalɛ biala wɔ mekɛ mɔɔ ɔ hu bɔle ɔ bo kɛ ɔyɛ ninyɛndane la. Kɛmɔ yeanlu ɔ nwo la ati bɛdule ye. Saa Keleseɛnenli bie agyalɛ yɛ zɛhae a, duzu ɔwɔ kɛ ɔyɛ a?
11 Wɔannea a ɛbabiza kɛ, ‘Ɔwɔ kɛ meyɛ me agyalɛ ne boɛ ɔnva nwo debie biala mɔɔ bazi la ɔ?’ Awie biala ɛnrɛhola anzɛɛ ɔnle kɛ awie biala si zɔhane kpɔkɛ ne maa wɔ. Noko akee, ndelebɛbo kpalɛ bie wɔ ɛkɛ mɔɔ ɔti ɔnle kɛ ɛmaa ɛ sa nu to wɔ agyalɛ mɔɔ ɛyɛ basaa la anwo a. Keleseɛnema mɔɔ ɔlua bɛ adwenle ne mɔɔ bɛtete ye la ati bɛgyinla bɛ agyalɛ nu ngyegyelɛ nloa la sonle bolɛ maa Nyamenle. (Bɛgenga 1 Pita 2:19, 20.) Gyihova balua ye Edwɛkɛ ne nee ye sunsum ne azo aboa Keleseɛnenli mɔɔ ɛlɛbɔ mɔdenle biala kɛ ɔmaa ye agyalɛ ne ayɛ boɛ la.
BƐBABOA WƆ
12. Saa yɛkɔ mgbanyima ne mɔ ɛkɛ kɛ bɛboa yɛ a, kɛzi bɛbabu yɛ ɛ?
12 Saa ɛlɛyia ngyegyelɛ wɔ agyalɛ nu a, maa Keleseɛnema mɔɔ bɛnyi sunsum nu la ɛboa wɔ. Mgbanyima ne mɔ le mboaneneavolɛma na bɛ nye balie nwo kɛ bɛbahile wɔ nwolɛ folɛdulɛ mɔɔ wɔ Ngɛlɛlera ne anu la. (Gyi. 20:28; Gye. 5:14, 15) Mmanyia adwenle kɛ saa ɛkɔka wɔ ngyegyelɛ ɛkile mgbanyima ne mɔ a bɛnrɛbu ɛ nee wɔ bokavolɛ ne. Bɛ nye balie ɛ nwo ɔluakɛ bɛbanwu kɛ ɛkulo kɛ ɛyɛ mɔɔ sɔ Nyamenle anye.
13. Folɛdulɛ boni a wɔ 1 Kɔlentema 7:10-16 a?
13 Saa mgbanyima ɛlɛboa Keleseɛne agyalɛma mɔɔ bɛ bokavolɛma ɛnle diedima la a, bɛtwe bɛ adwenle bɛkɔ Pɔɔlo folɛdulɛ ɛhye azo: “Melɛ ɛhye, kɛ ɔle mɛla mɔɔ vi Awulae ɛkɛ memaa bɛdabɛ mɔɔ bɛle nwuvolɛ la kɛ yelɛ mmagyakyi ɔ hu; yɛɛ saa ɔgyakyi ye a ɔmmakɔ agyalɛ fofolɛ; anzɛɛ ɔzia ɔ nee ɔ hu dɛba ne ɛhɔbɔ nu. Kunli biala noko mmabɔ ɔ ye ewole. . . . Kelaese ɛdoavolɛ raalɛ, saa wɔmɔ a ɛbalie ɛ hu ngoane a, asoo ɛze? Kelaese ɛdoavolɛ nrenya, saa wɔmɔ a ɛbalie ɛ ye ngoane a, asoo ɛze?” (1 Kɔl. 7:10-16) Nea nyilalɛ mɔɔ ɔbayɛ kɛ awie mɔɔ ɔnle diedinli la barazonle Gyihova a!
14, 15. Mekɛ boni a Keleseɛnenli bokavolɛ bahola azi kpɔkɛ kɛ ɔtete nu a, na duzu ati a asɔneyɛlɛ mɔɔ bɛfa bɛsuzu edwɛkɛ nwo kpalɛ la hyia ɛ?
14 Tɛnlabelɛ boni anu a Keleseɛnenli yelɛ bahola atete agyalɛ nu a? Bie mɔ ɛkpa kɛ bɛbatete nu ɔluakɛ bokavolɛ bie anye fuu ɛnnea abusua ne. Keleseɛnema bie mɔ noko tete nu ɔluakɛ bɛbo bɛ anzɛɛ bɛyɛ bɛ basabasa bɛmaa bɛ ngoane nee bɛ sunsum nu gyinlabelɛ tɔ esiane nu.
15 Kɛ awie batete nu anzɛɛ ɔnrɛtete nu la le ɔ ti anwo kpɔkɛzilɛ. Noko, ɔwɔ kɛ bokavolɛ mɔɔ bɛzɔne ye la fa asɔneyɛlɛ suzu ɛhye anwo kpalɛ. Kɛ neazo la, asoo ahenle mɔɔ ɔnle diedinli la a ɔmmaa adiema ne ɛnzonle Gyihova a, anzɛɛ Keleseɛnenli mumua ne a ɛnyɛ ɔ ti anwo debiezukoalɛ dahuu na ɔngɔ debiezukoalɛ nee daselɛlilɛ a?
16. Duzu a ɔwɔ kɛ boa Keleseɛnenli na yeanzi kpɔkɛ ndɛndɛ kɛ ɔbɔ ewole ɛ?
16 Kɛmɔ yɛ nee Nyamenle agɔnwolɛvalɛ ne sonle bolɛ maa yɛ na yɛ nye sɔ agyalɛ ahyɛlɛdeɛ ne mɔɔ vi ye ɛkɛ la ati, ɔnle kɛ yɛsi kpɔkɛ ndɛndɛ kɛ yɛbɔ ewole. Kɛ Gyihova azonvolɛ la, ye duma nwuanzanwuanza ne mɔɔ yɛte nwolɛ la hyia yɛ kpalɛ. Yemɔti, ɔnle kɛ yɛbɔ adwenle yɛbɔ ewole amaa yɛanyia adenle yɛagya awie bie mɔɔ yɛ nye die ɔ nwo la.—Gyɛ. 17:9; Mal. 2:13-16.
17. Tɛnlabelɛ boni anu a yɛbahola yɛaha kɛ Nyamenle ɛvɛlɛ agyalɛma ne kɛ bɛdɛnla anzondwolɛ nu a?
17 Ɔwɔ kɛ Keleseɛnenli mɔɔ ɛgya awie mɔɔ ɔnle adiema la bɔ mɔdenle maa agyalɛ ne tɛnla ɛkɛ. Noko saa Keleseɛnenli ne bɔ mɔdenle biala kɛ ɔmaa agyalɛ ne ayɛ boɛ na mɔɔ ɔnle adiema la ɛmkponle zo a, ɔnle kɛ Keleseɛnenli ne maa ye adwenle bua ye fɔlɛ. Pɔɔlo hɛlɛle kɛ: “Na saa awie mɔɔ ɛnle diedinli la kulo kɛ ɔbɔ ewole a, bɛmaa ye adenle. Saa ɔba ye zɔhane a, Kelaese ɛdoavolɛ nrenya ne anzɛɛ raalɛ ne lɛ adenle kɛ ɔbɔ ewole ne. Ɔluakɛ Nyamenle ɛvɛlɛ bɛ kɛ bɛdɛnla anzondwolɛ nu.”—1 Kɔl. 7:15. *
FA Ɛ NWO TO GYIHOVA ANWO ZO
18. Saa wɔangola agyalɛ ne boɛ yɛ bɔbɔ a, ninyɛne kpalɛ boni a bavi wɔ mɔdenlebɔlɛ ne anu ara a?
18 Ɛlɛdi agyalɛ nu ngyegyelɛ biala anwo gyima a, fa ɛ nwo to Gyihova anwo zo dahuu maa ɔmaa wɔ akɛnrasesebɛ. (Bɛgenga Edwɛndolɛ 27:14.) Suzu Linda mɔɔ yɛlumuale yɛhanle ɔ nwo edwɛkɛ la anwo nea. Awieleɛ bɔkɔɔ ne, bɛbɔle ewole ɔnva nwo kɛ ɔbɔle mɔdenle ɛvolɛ dɔɔnwo kɛ ɔbamaa agyalɛ ne ayɛ boɛ la. Asoo ɔte nganeɛ kɛ ɔzɛkyele ye mekɛ? Ɔka kɛ, “Kyɛkyɛ. Me mɔdenlebɔlɛ ne lile awie mɔ daselɛ. Me adwenle ɛmbua me fɔlɛ. Mɔɔ tɛla biala la, mekɛ zɔhane boale yɛ ra raalɛ ne manle ɔdɛnlanle nɔhalɛ ne anu. Ɔrayɛle Gyihova Dasevolɛ mɔɔ ɛdu ɔ nwo ɛmaa na ɔbɔ mɔdenle a.”
19. Saa awie bɔ mɔdenle kɛ ɔmaa ye agyalɛ ayɛ boɛ a, duzu a bahola avi nu ara a?
19 Keleseɛnenli raalɛ bie mɔɔ bɛfɛlɛ ye Marilyn la anye die kɛ ɔvale ɔ nwo ɔdole Nyamenle anwo zo na ɔbɔle mɔdenle ɔmanle ye agyalɛ ne yɛle boɛ la. Ɔka kɛ, “Kɛmɔ ɛnee me hu ɛnnea yɛ na yɛ ngoane la esiane nu wɔ sunsum nu la ati, ɔhale ekyii na me ne ye atete nu. Ɛnee me hu le asafo nu kpanyinli kolaa na yeava ɔ nwo yeawula gyima ɛtane bie anu. Ɔbɔle ɔ bo ɔtotole debiezukoalɛ ɛhɔlɛ nu yɛɛ ɛnee ɔ nee yɛ ɛnli adwelie. Maamɔvoma bie rale ɛleka mɔɔ yɛde la yemɔti ɛnee ɔyɛ se kɛ me nee menli kɛbɔ. Akee menwunle kɛ medame noko meboka nwolɛ bie. Yɛbɔle adwelielilɛ nee abusua ɛzonlenlɛ bo bieko na yɛhɔle debiezukoalɛ dahuu. Mgbanyima ne mɔ boale yɛ. Ɛnee ɛbaha kɛ asɛɛ bɔ zo mɔɔ yɛ agyalɛ ne ɛbɔ ɔ bo a. Nzinlii, me hu ranyianle nwolɛ adenle dɔɔnwo wɔ asafo ne anu. Ɛnee ɔyɛ nyane ɛdeɛ, noko debie kpalɛ vile nu rale.”
20, 21. Duzu a ɔwɔ kɛ yɛbɔ kpɔkɛ kɛ yɛbayɛ a?
20 Kɛ yɛgya anzɛɛ yɛtɛgyale la, ɔwɔ kɛ yɛnyia akɛnrasesebɛ na yɛfa yɛ nwo yɛto Gyihova anwo zo. Saa yɛlɛyia ngyegyelɛ wɔ agyalɛ nu a, ɔwɔ kɛ yɛbɔ mɔdenle yɛdi nwolɛ gyima na yɛkakye kɛ menli mɔɔ ɛgya la ɛnle “nwiɔ bieko na bɛle ko.” (Mat. 19:6) Bɛmaa yɛhakye kɛ saa yɛbɔ mɔdenle yɛdi yɛ agyalɛ nu ngyegyelɛ nwo gyima a bie a bokavolɛ ne mɔɔ ɔnle adiema la barazonle Gyihova, na yɛ nye alie.
21 Kɛzi yɛ tɛnlabelɛ ne de ye biala la, ɔwɔ kɛ yɛyɛ ninyɛne mɔɔ ɔbali menli mɔɔ bɛnle asafo ne anu daselɛ la. Saa ngyegyelɛ wɔ yɛ agyalɛ nu a, ɔwɔ kɛ yɛkpondɛ deɛmɔti yera ye zɔ la, yɛyɛ asɔne anyebolo zo, yɛdwenledwenle Ngɛlɛlera ne anwo na yɛmaa mgbanyima ne mɔ boa yɛ. Mɔɔ tɛla biala la, ɔrɛla ye kɛ yɛbabɔ kpɔkɛ kɛ yɛyɛ mɔɔ sɔ Gyihova Nyamenle anye wɔ debie biala anu na yɛahile agyalɛ ahyɛlɛdeɛ ne mɔɔ vi ye la anwo anyezɔlɛ.
[Ɔ bo ɛkɛ ne edwɛkɛ ne mɔ]
^ ɛden. 10 Tɛ bɛ aluma kpalɛ ɔ.
^ ɛden. 17 Nea “Bɛzie Bɛ Nwo wɔ Nyamenle Ɛhulolɛ ne Anu,” mukelɛ 219-221; Nrelenza Ɛzinzalɛ Arane November 1, 1988, mukelɛ 26-27; September 15, 1975, mukelɛ 575.
[Debiezukoalɛ kpuyia ne mɔ]
[Edwɛkɛ mɔɔ bɛkpa wɔ mukelɛ 20]
Keleseɛnema mɔɔ bɛyia ngyegyelɛ noko bɛmpele bɛ nwo bɛmbɔ ewole la nyia zolɛ nvasoɛ
[Edwɛkɛ mɔɔ bɛkpa wɔ mukelɛ 22]
Fa ɛ nwo to Gyihova anwo zo dahuu maa ɔmaa wɔ akɛnrasesebɛ
[Nvoninli wɔ mukelɛ 19]
Gyihova yila Keleseɛnema mɔɔ bɔ mɔdenle kɛ bɛmaa bɛ agyalɛ ne ayɛ kpalɛ la
[Nvoninli wɔ mukelɛ 21]
Yɛbahola yɛanyia arɛlekyekyelɛ nee sunsum nu moalɛ wɔ Keleseɛnema asafo ne anu
