Edwɛkɛ ɛhye ka kpuyia bie mɔ mɔɔ bie a wɔbiza ye ɛlɛ la anwo edwɛkɛ yɛɛ ɔkile ɛleka mɔɔ ɛbanyia nwolɛ mualɛ wɔ Baebolo ne anu la. Gyihova Alasevolɛ anye balie kɛ bɛ nee wɔ bazuzu kpuyia ɛhye mɔ anwo.

1. Kɛzi ɔwɔ kɛ bɛkakye Gyisɛse ewule ne ɛ?

Gyisɛse zele ye ɛdoavolɛ ne mɔ kɛ bɛva aleɛ, kpanwo nee nwanye bɛyɛ sɛkɛlɛneɛ bɛhakye ye ewule ne. Kpanwo ne gyi ɛkɛ maa Gyisɛse anwo nane ne, yɛɛ nwanye ne gyi ɛkɛ maa ye mogya ne.​—Kenga Luku 22:19, 20.

Ɛnee mgbɔvonle ɛnle kpanwo ne mɔɔ Gyisɛse vale lile gyima la anu. Wɔ Baebolo ne anu, bɛta bɛfa mgbɔvonle bɛgyinla ɛkɛ bɛmaa ɛtane. Yemɔti ɛnee kpanwo ne le Gyisɛse sonlabaka ne mɔɔ di munli la anwo sɛkɛlɛneɛ mɔɔ fɛta a. Ɔvale ye sonlabaka ne ɔbɔle afɔle ɔyele nane afɔle mɔɔ ɛnee bɛbɔ ye wɔ Mosisi Mɛla ne abo la ɔvile ɛkɛ. (Hibuluma 10:5, 9, 10) Nwanye ne le Gyisɛse mogya ne mɔɔ sonle bolɛ mɔɔ ɔvale ɔbɔle afɔle ɔkpɔdale yɛ ɛtane ne la anwo sɛkɛlɛneɛ.​—Kenga 1 Pita 1:19; 2:24; 3:18.

2. Mekɛ boni a ɔwɔ kɛ bɛkakye ye a?

Gyisɛse wule wɔ Naesan 14, wɔ mekɛ mɔɔ ɛnee bɛlɛdi Akpabɛnwo ne la. Dwuuma kenle ne bɔ ɔ bo wɔ mekɛ mɔɔ ewia ne ɛhɔdɔ la. Nɔe ne mɔɔ aleɛ kye a Gyisɛse bawu la, ɔ nee ye ɛzoanvolɛ ne mɔ lile Akpabɛnwo aleɛ ne, yemɔ anzi ɔvale aleɛ fofolɛ mɔɔ bɛbava bɛahakye ye la ɔziele ɛkɛ.​—Kenga Luku 22:14, 15.

Ɛnɛ, Nyamenle menli kakye mɔɔ Nyamenle luale Gyisɛse anwo zo yɛle mɔɔ ɔbava yealie alesama yeavi ɛtane nee ewule nu la. (Adendulɛ 12:5-7, 13, 17) Kɛmɔ ɛnee bɛdi Akpabɛnwo ne kokye ɛvolɛ biala la, zɔhane ala a yɛkakye Gyisɛse ewule ne kokye ɛvolɛ biala wɔ mekɛ mɔɔ ewia ne ɛhɔdɔ wɔ Naesan 14 kɛmɔ Baebolo ne kile la a.​—Kenga Dwɔn 1:29.

  3. Nwane mɔ a ɔwɔ kɛ di kpanwo ne na bɛno nwanye ne bie a?

Mekɛ mɔɔ Gyisɛse vale nwanye ne manle ye ɛzoanvolɛ ne mɔ la, ɔhanle kɛ: “Dwora ɛhye a le Nyamenle Ngyekyeleɛ Fofolɛ ne.” (1 Kɔlentema 11:25) Ngyekyeleɛ Fofolɛ ne ragyinlanle Mosisi Mɛla ne mɔɔ Nyamenle vale manle Yizilayɛma kɛ saa bɛdi zolɛ bɔkɔɔ a bɛbayɛ ye ɛdeɛ la agyakɛ anu. (Adendulɛ 19:5, 6) Noko akee, Yizilayɛma andie Nyamenle ane. Ɛhye ati Gyihova yɛle ngyekyeleɛ fofolɛ.​—Kenga Gyɛlɛmaya 31:31.

Ɔlua ngyekyeleɛ fofolɛ ne ati, Gyihova ɛlɛdua menli ekyi bie anwo zo yeayila menli dɔɔnwo. Menli mɔɔ wɔ ngyekyeleɛ fofolɛ ne anu la le ekyi bie, 144,000 pɛ. Ɔlua bɛ nwo zo, menli mgbe dɔɔnwo mɔɔ vi maanle ngakyile nu la banyia dahuu ngoane wɔ paladaese azɛlɛ ne azo. Menli mɔɔ boka ngyekyeleɛ fofolɛ ne anwo la bie mɔ sonle Gyihova wɔ azɛlɛ ye azo ɛnɛ. Bɛdabɛ ala a bɛkola bɛdi kpanwo ne bie na bɛno nwanye ne bie a ɔluakɛ dwora ne gyi ɛkɛ maa “ngyekyeleɛ fofolɛ ne.”​—Kenga Luku 12:32; Yekile 14:1, 3.

4. Duzu nvasoɛ a yɛnyia ye wɔ Ngakyelɛlilɛ ne azo a?

Gyisɛse ewule ne mɔɔ yɛkakye ye ɛvolɛ biala la maa yɛnyia anyezɔlɛ kpole wɔ ɛlɔlɛ mɔɔ Gyihova lale ye ali la anwo. Ɔzoanle ɔ Ra ne ɔmanle ɔrawule ɔlua yɛ ɛtane ti. Yemɔti saa yɛkɔ Ngakyelɛlilɛ ne abo a, ɔwɔ kɛ yɛdwenledwenle mɔɔ Gyisɛse ewule ne kile maa yɛ la anwo. Ɔwɔ kɛ yɛsuzu kɛzi yɛbahile anyezɔlɛ wɔ mɔɔ Gyihova nee Gyisɛse ɛyɛ ɛmaa yɛ la anwo.​—Kenga Dwɔn 3:16; 2 Kɔlentema 5:14, 15.

Saa ɛkpondɛ nwolɛ edwɛkɛ dɔɔnwo a, nea buluku ɛhye, Duzu A Baebolo ne Kilehile Amgba A? mɔɔ Gyihova Alasevolɛ ɛyɛ la mukelɛ 206-208.