Ɛhye Kile “Ngoane Mɔɔ Ɛnlɛ Awieleɛ”

“Ngoane mɔɔ ɛnlɛ awieleɛ la a le kɛ bɛkɛnwu kɛ wɔmɔ a ɛle nɔhalɛ Nyamenle kokye ne a, na bɛkɛnwu Gyisɛse Kelaese, mɔɔ wɔzoa ye la.”​—DWƆN 17:3.

DEBIENWUNLƐ kola die ngoane. Mekɛ mɔɔ Nouhou mɔɔ ɛli siane bulu anwo dole ye la, ɛnee ɔ nli mɔɔ wɔ Niger la ze mɔɔ ɔwɔ kɛ ɔyɛ a, ɔluakɛ ɛnee ɔze ayileyɛlɛ nwo debie. Ɔvale nzule mɔɔ anye te la ɔfonlanle ngyenle nee asikyɛlɛ ɔmanle ɔ ra ne. UNICEF ka kɛ, kɛmɔ “ɔlile nwolɛ gyima ndɛndɛ na ɔze ayileyɛlɛ nwo debie la ati, ɔ ra ne dele kpɔkɛ ndɛndɛ.”

Saa awie ze Baebolo ne anu edwɛkɛ noko a, ɔkola ɔdie ye ngoane. Mosisi, Baebolo kɛlɛvo mɔɔ lumua la hanle kɛ: “Ɔnle nwɔwe edwɛkɛ; ɔle bɛ ngoane. Bɛdi zolɛ a bɛbanyi bɛahyɛ.” (Mɛla ne 32:47) Asoo Baebolo ne bahola amaa yɛanyi yɛahyɛ amgba? Kɛzi nuhua edwɛkɛ ne kola maa yɛnyia ngoane ɛ?

Edwɛkɛ nnu ne mɔɔ li ɛhye anyunlu la ɛmaa yɛnwu kɛ yɛnrɛhola yɛnrɛva edwɛkɛ mɔɔ mbuluku gyɛne ka ye wɔ ngapezo, tetedwɛkɛ, ayileyɛlɛ, nee koyɛlɛ nwo, yɛɛ nvasoɛ mɔɔ wɔ zo la yɛnrɛdo Baebolo ne anwo. Ɛhye mɔ di daselɛ kɛ Baebolo ne le ngakyile. Zɔhane ati, saa ɔka kɛ ɔkola ɔmaa sonla nyi kyɛ anzɛɛ nyia dahuu ngoane a, asoo ɔwɔ kɛ yɛsu ye kpolera ɔ?

Yɛsi wɔ adua kɛ ɛzukoa kɛzi Baebolo ne anu nɔhalɛ edwɛkɛ ne bahola amaa wɔanyia anzondwolɛ ɛnɛ nee anyelielɛ kenlebie la. Gyihova Alasevolɛ anye balie nwo kɛ bɛbahile wɔ adenle mɔɔ ɛdua zo a ɛbanwu ɛhye la.

[Ɛlɛka/​Nvoninli wɔ mukelɛ 9]

Eza Baebolo ne le ngakyile ɔluakɛ ɔ ngomekye ala a ɔkola ɔbua kpuyia mɔɔ anwo hyia mɔɔ yɛbiza la kpalɛ a:

• Duzu ati a yɛwɔ ɛke a?

• Duzu ati a amaneɛnwunlɛ dɔɔnwo wɔ ɛkɛ a?

• Asoo anyelazo bie wɔ ɛkɛ maa me alɔvolɛ mɔɔ bɛwu la?

Ɛbahola wɔanwu mualɛ mɔɔ Baebolo ne fa maa wɔ kpuyia ɛhye mɔ anwo la wɔ buluku ɛhye Duzu A Baebolo Ne Kilehile Amgba A? mɔɔ Gyihova Alasevolɛ ɛyɛ la anu.