Edwɛkɛ ɛhye ka kpuyia bie mɔ mɔɔ bie a wɔbiza ye ɛlɛ la anwo edwɛkɛ yɛɛ ɔkile ɛleka mɔɔ ɛbanyia nwolɛ mualɛ wɔ Baebolo ne anu la. Gyihova Alasevolɛ anye balie kɛ bɛ nee wɔ bazuzu kpuyia ɛhye mɔ anwo.

1. Duzu ati a Nyamenle lɛ duma ɛ?

Kpolerazulɛ biala ɛnle nwolɛ kɛ, wɔ duma yɛɛ ɛkpondɛ kɛ bɛfa bɛfɛlɛ wɔ a, na tɛ amodinli le kɛ, “nrenya ye,” “yɛmenle,” “mame,” anzɛɛ “raalɛ ye.” Wɔ duma maa ɛyɛ ngakyile ɛfi menli mɔɔ ɛha la anwo. Bɛfa amodinli le kɛ “Ɛdɛnkɛma Nyamenle,” “Nyamenle Bedevinli” nee ‘Bɔvolɛ Kpole’ bɛfɛlɛ Nyamenle. (Mɔlebɛbo 15:2; 17:1; Nolobɔvo ne 12:1) Noko eza yemaa yɛnwu ye duma amaa yɛ nee ye anyia agɔnwolɛvalɛ. Wɔ Nzema nu Nyamenle duma a le Gyihova.​—Kenga Ayezaya 42:8, NW.

Bɛva amodinli “Nyamenle” nee “Awulae” bɛzie Nyamenle duma ne agyakɛ anu wɔ Baebolo dɔɔnwo anu, Nzema Baebolo ne vale amodinli “Ɛdɛnkɛma” a lile gyima a, noko duma zɔhane finde Hibulu ngɛlɛlera ne anu asɛɛ 7,000. Ɔda ali kɛ Nyamenle kpondɛ kɛ bɛnwu ye duma.​—Kenga Ayezaya 12:4, NW.

2. Duzu ati a ɔhyia kɛ yɛnwu Nyamenle duma ɛ?

Nyamenle duma ne mɔɔ yɛbabɔ la angome ɛngile kɛ yɛze ye. Saa yɛ nee Nyamenle lɛ agɔnwolɛvalɛ kpalɛ a yɛɛ ɔkile kɛ yɛze ye duma a. Duma Gyihova ne abo kile kɛ “Ɔmaa Ɔyɛ Ɛkɛ.” Ɛhye maa yɛnyia anwodozo kɛ Nyamenle bayɛ ɔ nwo kɛmɔ ɔwɔ kɛ ɔyɛ ye biala la yeamaa ye bodane ara nu. Yemɔti, Nyamenle duma ne ɛnwunlɛ kile kɛ yɛdie yɛali kɛ Nyamenle bamaa ye ɛwɔkɛ ne mɔ ara nu. (Edwɛndolɛ 9:10) Menli mɔɔ ze Nyamenle duma na bɛbɔ la diedi maa bɛfa bɛ nwo bɛto ɔ nwo zo na bɛfa ye ɛhulolɛdeɛ bɛdumua wɔ bɛ ɛbɛlabɔlɛ nu. Gyihova Nyamenle babɔ menli zɛhae mɔ anwo bane.​—Kenga Edwɛndolɛ 91:14.

 3. Duzu ati a Nyamenle kpondɛ kɛ yɛnwu ye duma ɛ?

Nyamenle kpondɛ kɛ yɛnwu ye duma ɔluakɛ ɔbaboa yɛ. Ɔboa yɛ ɔmaa yɛbayɛ Nyamenle agɔnwo mɔ mɔɔ yɛlɛ dahuu ngoane anyelazo a. Ɛhye ati, ɔnyɛ nwanwane kɛ Gyihova kpondɛ kɛ yɛbɔ ye duma la!​—Kenga Dwɔn 17:3; Wulomuma 10:13, 14.

Gyisɛse manle menli nwunle Nyamenle duma. Ɔhilehilele bɛ Nyamenle ndenle, Ye mɛla ne mɔ, nee Ye ɛwɔkɛ ne mɔ. Ɛnɛ, Gyisɛse ɛdoavolɛma ɛlɛtoa gyima ne mɔɔ maa bɛnwu Nyamenle duma la azo wɔ ewiade amuala. Bɛbɔ nu kɛ “menli” mɔɔ Nyamenle duma la bɛ nwo zo la a bɛlɛyɛ gyima ɛhye a.​—Kenga Gyima ne 15:14; Dwɔn 17:26.

4. Kɛzi Nyamenle bawula ye duma ne anyunlunyia ɛ?

Gyihova Nyamenle kpondɛ kɛ ɔwula ye duma ne anyunlunyia ɔluakɛ bɛgua nwolɛ evinli. Kɛ neazo la, menli bie mɔ ka kɛ tɛ ɔdaye a ɔbɔle ngoane a yemɔti ɔnle kɛ yɛtie ye. Bie mɔ noko ka kɛ ɔndwenle yɛ nwo yɛɛ amaneɛnwunlɛ vi ye. Menli ɛhye mɔ gua ye duma nwo evinli. Noko bɛnrɛhola bɛnrɛyɛ ɛhye dahuu. Nyamenle nee menli mɔɔ gua ye duma nwo evinli la bali.​—Kenga Edwɛndolɛ 83:17, 18, NW.

Gyihova bawula ye duma ne anyunlunyia wɔ mekɛ mɔɔ ye Belemgbunlililɛ ne bava alesama tumililɛ kɔsɔɔti ara awieleɛ na alesama anyia anzondwolɛ nee anwobanebɔlɛ la. (Daneɛle 2:44) Ɔnrɛhyɛ, awie biala banwu kɛ Gyihova a le nɔhalɛ Nyamenle ne a.​—Kenga Yizikeɛle 36:23; Mateyu 6:9.

Duzu a ɔwɔ kɛ ɛyɛ a? Dua Nyamenle Edwɛkɛ ne mɔɔ ɛbazukoa nee menli mɔɔ kulo ye mɔɔ ɛ nee bɛ babɔ la azo twe bikye ye. Mekɛ mɔɔ Gyihova bawula ye duma ne anyunlunyia la, ɔbahakye ye nɔhalɛ azonvolɛ.​—Malakae 3:16.

Saa ɛkpondɛ nwolɛ edwɛkɛ dɔɔnwo a, nea buluku ɛhye Duzu A Baebolo Ne Kilehile Amgba A? mɔɔ Gyihova Alasevolɛ ɛyɛ la tile 1.

[Nvoninli wɔ mukelɛ 10]

Nyamenle duma ne mɔɔ wɔ Hibulu ngɛlɛlera ne anu