Sonle Nyamenle Ne Mɔɔ Maa Fanwodi La

“Saa yɛdi Nyamenle mɛla ne mɔ azo a ɛnee yɛkulo Nyamenle, yɛɛ ye mɛla ne mɔ noko ɛnyɛ ɛnlomboɛ mɔɔ bu sonla kɔme a.”​—1 DWƆN 5:3.

ƐBAHOLA WƆAYE Ɔ NLOA Ɔ?

Kɛzi Seetan bɔ mɔdenle kɛ ɔmaa yɛabu Nyamenle mɛla ne mɔ kɛ bɛyɛ ɛlomboɛ ɛ?

Duzu ati a ɔwɔ kɛ yɛnea boɛ kpalɛ kpalɛ wɔ yɛ agɔnwolɛvalɛ nwo ɛ?

Duzu a baboa yɛ amaa yɛahɔ zo yɛali nɔhalɛ yɛamaa fanwodi Nyamenle ne a?

1. Kɛzi Gyihova bu fanwodi ɛ, na kɛzi ɔlale ɛhye ali ɔhilele Adam nee Yive ɛ?

GYIHOVA angomekye a lɛ fanwodi mɔɔ ɛnlɛ ye ɛweɛne a. Noko, ɔnva ɔnli gyima wɔ adenle ɛtane zo. Emomu, yemaa ye azonvolɛ adenle mɔɔ bɛkola bɛyɛ mɔɔ bɛkulo kɛ bɛyɛ a. Kɛ neazo la, mɛla kokye a Nyamenle vale manle Adam nee Yive a​—“kpalɛ nee ɛtane ɛnwunlɛ baka ne” mɔɔ ɔhanle kɛ bɛmmadi la. (Mɔl. 2:17) Saa bɛyɛle bɛ Bɔvolɛ ne ɛhulolɛdeɛ a, anrɛɛ nea fanwodi kpalɛ mɔɔ bɛnyianle a!

2. Duzu ati a yɛ awovolɛ mɔɔ bɛlumua la minlinle fanwodi ne mɔɔ Nyamenle vale manle bɛ la ɛ?

² Duzu ati a Nyamenle manle yɛ awovolɛ mɔɔ bɛlumua la fanwodi dɔɔnwo a? Ɔbɔle bɛ kɛ ye ɛsaso la, ɔmanle bɛ adwenle, na ɛnee ɔlɛnea kɛ ɛlɔlɛ mɔɔ bɛlɛ bɛmaa bɛ Bɔvolɛ ne la bamaa bɛayɛ mɔɔ ɔtenrɛ la. (Mɔl. 1:27; Wulo. 2:15) Ɔyɛ alɔbɔlɛ kɛ Adam nee Yive angile anyezɔlɛ ammaa bɛ Ngoane-Maavolɛ ne nee fanwodi mɔɔ ɔvale ɔmanle bɛ la. Emomu, bɛkpale fanwodi mɔɔ ɔnle ye adenle zo mɔɔ Seetan fa maa la, ɛnee bɛkpondɛ kɛ bɛdi bɛ ti anwo. Yemɔti, kɛ anrɛɛ bɛbanyia fanwodi la, yɛ awovolɛ mɔɔ bɛlumua la dɔnenle bɛ nwo nee bɛ mra manle ɛtane akɛlɛzonlenlɛ, na mɔɔ ɛvi nu ɛra la ɛnle kpalɛ fee.​—Wulo. 5:12.

3, 4. Adwenle boni a Seetan kulo kɛ yɛnyia ye wɔ Gyihova ngyinlazo ne mɔ anwo a?

³ Saa Seetan holale bɛlɛbɛlale menli nwiɔ ne mɔɔ ɛnee di munli la nee sunsum nu abɔdeɛ dɔɔnwo ɔmanle bɛkpole Nyamenle tumililɛ ne a, ɛnee ɔbahola yeabɛlɛbɛla yɛdayɛ noko. Mɛlɛbɛla ndenle ko ne ala a ɔfa ɔdi gyima a. Ɔbɔ mɔdenle kɛ ɔmaa yɛanyia adwenle kɛ Nyamenle ngyinlazo ne mɔ le adesoa na bɛmmaa yɛ nye ɛnlie. (1 Dwɔn 5:3) Saa yɛta yɛdwenledwenle nwolɛ zɔhane a ɔkola ɔnyia yɛ nwo zo tumi kpole. Adiema  raalɛ bie mɔɔ ɛnyia ɛvolɛ 24 na ɔvale ɔ nwo ɔwulale nla nu ɛbɛlatane nu la hanle kɛ, “Agɔnwolɛ ɛtane ɛdulɛ nyianle me nwo zo tumi kpole ɔluakɛ ɛnee mesulo kɛ me nee me gɔnwo mɔ adwenle ɛnrɛyɛ ko la ati.” Bie a wɔyia atipɛnema ngyegyelɛ ɛhye bie ɛlɛ.

⁴ Ɔyɛ alɔbɔlɛ kɛ, ɔdwu mekɛ ne bie a yɛyia atipɛnema ngyegyelɛ wɔ Keleseɛne asafo ne anu la. Dasevolɛ kakula ko hanle kɛ: “Meze ngakula mɔɔ ɛva bɛ nloa ɛdo menli mɔɔ ɛnle diedima la anwo zo a. Noko awieleɛ kolaa ne, menwunle kɛ saa mefa me nwo mebɔ bɛ a ɔmaa meyɛ kɛ bɛdabɛ la. Me sunsum nu gyinlabelɛ nwo rale edwɛkɛ. Ɛnee me nye ɛnlie debiezukoalɛ nee daselɛlilɛ ɛhɔlɛ nwo. Ɛhye manle menwunle kɛ ɔwɔ kɛ metwe me nwo mefi agɔnwolɛ ɛhye mɔ anwo, na menyɛle ye zɔ!” Asoo ɛze tumi mɔɔ ɛ gɔnwo mɔ bahola anyia ye wɔ ɛ nwo zo la? Maa yɛzuzu Baebolo nu neazo ko mɔɔ ɔle ye mekɛ nu ɛdeɛ la anwo.​—Wulo. 15:4.

ƆWUALE BƐ AHONLE

5, 6. Kɛzi Abesalɛm bɛlɛbɛlale awie mɔ ɛ, na asoo ye adwenle ɛtane ne yɛle gyima?

⁵ Menli mɔɔ nyianle awie mɔ anwo zo tumi ɛtane la anwo edwɛkɛ dɔɔnwo wɔ Baebolo ne anu. Nwolɛ neazo ko a le Belemgbunli Devidi ara Abesalɛm. Ɛnee Abesalɛm anwo yɛ fɛ kpalɛ. Noko nzinlii, tumi ɛhulolɛ yile ye ahonle kɛ Seetan la, na ɔ nye bolole ɔ ze ebia ne ɔnva nwo kɛ ɛnee ɔnlɛ adenle ɔnli la. * Ɛnee Abesalɛm kpondɛ kɛ ɔdua mɛlɛbɛla adenle zo ɔdie tumililɛ ne, yemɔti, ɔ nye fuu ɔyɛle kɛ asɛɛ ɔdwenle Yizilayɛma anwo ɔtɛla kɛzi belemgbunli nee ye mgbanyima dwenle bɛ nwo la. Kɛmɔ Abɔnsam yɛle ye wɔ Yidɛn tola ne anu la, Abesalɛm yɛle ɔ nwo kɛ ɔboa menli ne, noko ɛnee ɔlɛpɛ ɔ ze abo kuma.​—2 Sam. 15:1-5.

⁶ Asoo Abesalɛm adwenle ne mɔɔ ɔbɔle la wiele boɛ? Wɔ adenle bie azo, ɔluakɛ Baebolo ne ka kɛ: “Ɛhye manle Yizilayɛma kɔsɔɔti hulole Abesalɛm edwɛkɛ.” (2 Sam. 15:6) Awieleɛ bɔkɔɔ ne, Abesalɛm anwomemaazo ne manle ɔdɔle kuma ne mɔɔ ɔpɛle la anu. Na mɔɔ ɔyɛ alɔbɔlɛ la, ɔwule na menli apenle dɔɔnwo mɔɔ lile ɔ nzi la noko wule.​—2 Sam. 18:7, 14-17.

7. Duzu a yɛbahola yɛazukoa yɛavi Abesalɛm edwɛkɛ ne anu a? (Nea nvoninli ne mɔɔ wɔ mukelɛ 19 la.)

⁷ Duzu ati a ɔholale ɔbɛlɛbɛlale Yizilayɛma ne ndɛndɛ zɛhae ɛ? Bie a bɛ nye liele ninyɛne mɔɔ Abesalɛm vale bɔle bɛ ɛwɔkɛ la anwo. Anzɛɛ ye anwofɛlɛko ne a lile bɛ adwenle a. Ɔnva nwo mɔɔ manle bɛyɛle zɔ la, ɔwɔ kɛ yɛnwu ɛhye: Bɛanli nɔhalɛ bɛamaa Gyihova nee ye belemgbunli ne mɔɔ ɛnee yekpa ye la. Ɛnɛ noko, Seetan ɛlɛfa “menli mɔɔ bɛle kɛ Abesalɛm la” yeali gyima yeamaa bɛawua Gyihova azonvolɛ ahonle. Bie a bɛbaha kɛ ‘Gyihova ngyinlazo ne mɔ le kyengye somaa.’ ‘Na nea menli mɔɔ ɛnzonle Gyihova la. Bɛ nye die kpole!’ Asoo ɛbanwu mɛlɛbɛla ndenle ɛhye mɔ anzi na wɔali nɔhalɛ wɔamaa Nyamenle ɔ? Asoo ɛze kɛ Gyihova “mɛla ne mɔɔ di munli la” anzɛɛ Kelaese mɛla ne angome a, bamaa wɔanyia nɔhalɛ fanwodi? (Gye. 1:25) Saa ɔle zɔ a, ɛnee maa ɛ nye ɛlie mɛla zɔhane anwo, na mmafa wɔ fanwodi mɔɔ ɛlɛ kɛ Keleseɛnenli la ɛdi gyima wɔ adenle ɛtane zo ɛlɛ.​—Bɛgenga 1 Pita 2:16.

8. Anwubielɛ boni mɔ a kile kɛ Gyihova ngyinlazo mɔɔ bɛbu bɛ nye bɛgua zo la ɛmmaa sonla nye ɛnlie ɛ?

⁸ Seetan ɛva ɔ nye ɛzie ngakula nwo zo titile. Adiema nrenya bie mɔɔ wɔ ye ɛvolɛ 30 ne anu la ɛlɛka mekɛ mɔɔ ɛnee ɔka ekyii ɔnyia ɛvolɛ abulanwiɔ anwo edwɛkɛ  la, ɔhanle kɛ: “Ɛnee mebu Gyihova ɛbɛlabɔlɛ nwo ngyinlazo ne mɔ kɛ bɛle kyengye, na bɛmbɔ yɛ nwo bane.” Yemɔti ɔbɔle ɛbɛlatane. Noko ɛhye ammaa ɔ nye anlie. Ɔhanle kɛ: “Me adwenle buale me fɔlɛ na menlile nyane ɛvolɛ dɔɔnwo.” Adiema raalɛ ko ɛlɛkakye mekɔ mɔɔ ɛnee ɔka ekyii ɔnyia ɛvolɛ abulanwiɔ la, ɔhɛlɛle kɛ: “Saa ɛbɔ ɛbɛlatane a, ɛte nganeɛ kɛ awie biala ɛngulo wɔ edwɛkɛ yɛɛ nvasoɛ ɛnle ɛ nwo zo. Kɛkala bɔbɔ mɔɔ ɛvolɛ 19 ɛpɛ nu la, mekakye ninyɛndane bie mɔ.” Adiema raalɛ ko noko hanle kɛ: “Me ɛbɛlabɔlɛ mɔɔ manle menli mɔɔ kulo me edwɛkɛ lile nyane la gyegyele me wɔ adwenle nu, sunsum nu, nee nganeɛdelɛ nu kpalɛ. Ɔyɛ nyane kɛ sonla baminli Gyihova anyunlu ɛlolɛ wɔ ɛbɛlabɔlɛ nu la.” Seetan ɛngulo kɛ ɛbadwenle mɔɔ ɛtaneyɛlɛ bamaa yeado wɔ la anwo fee.

9. (a) Kpuyia boni mɔ a bamaa yɛanleɛnlea adwenle mɔɔ yɛlɛ ye wɔ Gyihova nee ye mɛla yɛɛ ye ngyinlazo ne mɔ anwo la anu a? (b) Duzu ati a ɔwɔ kɛ yɛnwu Nyamenle kpalɛ ɛ?

⁹ Nea kɛzi ɔyɛ alɔbɔlɛ kɛ ngakula nee mgbanyinli dɔɔnwo mɔɔ bɛwɔ nɔhalɛ ne anu la ɛva bɛ nwo ɛwula nyɛleɛ ɛtane ɛhye anu na bɛlɛnwu nwolɛ amaneɛ a! (Gal. 6:7, 8) Yemɔti biza ɛ nwo kɛ: ‘Asoo menwu Seetan mɛlɛbɛla ndenle ne mɔ ɔ? Asoo mebu Gyihova kɛ me Gɔnwo kpalɛ, awie mɔɔ dahuu ka nɔhalɛ ne kile me na ɔkpondɛ kɛ ɔwie me boɛ la ɔ? Asoo medie medi nɔhalɛ nu kɛ ɔnrɛva debie kpalɛ biala ɔnrɛvea me ɛlɛ na ɔbamaa me nye alie kpalɛ ɔ?’ (Bɛgenga Ayezaya 48:17, 18.) Saa yɛbahola yɛavi ahonle nu yɛabua kɛ ɛhɛe a, ɛnee ɔwɔ kɛ yɛsukoa Gyihova anwo ninyɛne dɔɔnwo. Ɔwɔ kɛ yɛnwu ye kpalɛ na yɛte ɔ bo kɛ ye mɛla nee ye ngyinlazo ne mɔ mɔɔ  wɔ Baebolo ne anu la da ye ɛlɔlɛ mɔɔ ɔlɛ ɔmaa yɛ la ali, na bɛmmaa yɛ nwo ɛngyele yɛ.​—Edw. 25:14.

SƐLƐ NRƐLƐBƐ NEE TIEYƐ AHONLE

10. Duzu ati a ɔwɔ kɛ yɛbɔ mɔdenle yɛsukoa mɔɔ Belemgbunli Sɔlɔmɔn yɛle wɔ ye ngakula nu la ɛ?

¹⁰ Mekɛ mɔɔ Sɔlɔmɔn le kakula la, ɔbɛlɛle ɔ nwo aze ɔhanle ye wɔ asɔneyɛlɛ nu kɛ: “Mele kakula somaa mɔɔ menze nwolɛ bie.” Akee ɔzɛlɛle Gyihova kɛ ɔmaa ye nrɛlɛbɛ nee tieyɛ ahonle. (1 Arl. 3:7-9, 12) Gyihova diele asɔneyɛlɛ zɔhane na ɔbayɛ bie yeamaa wɔ ɔnva nwo kɛ ɛle kakula anzɛɛ kpanyinli la. Nɔhalɛ nu, Gyihova ɛnrɛlua nwanwane adenle zo ɔnrɛmaa wɔ nwunu nee nrɛlɛbɛ. Noko saa ɛfa mɔdenlebɔlɛ ɛsukoa ye Edwɛkɛ ne, ɛsɛlɛ sunsum nwuanzanwuanza, na ɛfa sunsum nu nziezielɛ mɔɔ yeyɛ ye wɔ Keleseɛne asafo ne anu la ɛdi gyima kpalɛ a ɔbamaa wɔanwu nrɛlɛbɛ. (Gye. 1:5) Gyihova dua adenle ɛhye azo ɔmaa ye azonvolɛ ngakula bɔbɔ nwu nrɛlɛbɛ tɛla menli mɔɔ ɛndie ye edwɛkɛ la kɔsɔɔti, bɔbɔ bɛdabɛ mɔɔ bɛbu bɛ kɛ “nrɛlɛbɛvolɛma nee nwomama” wɔ ewiade ɛhye anu la.​—Luku 10:21; bɛgenga Edwɛndolɛ 119:98-100.

11-13. (a) Ɛzukoalɛdeɛ mɔɔ nvasoɛ wɔ zo la boni a yɛsukoa yɛfi Edwɛndolɛ 26:4, Mrɛlɛbulɛ 13:20, nee 1 Kɔlentema 15:33 ne anu a? (b) Kɛzi ɛbava ngyinlazo mɔɔ wɔ Ngɛlɛlera ɛhye mɔ anu la wɔali gyima ɛ?

¹¹ Saa yɛbade nvasoɛ mɔɔ wɔ Baebolo ne mɔɔ yɛbazukoa na yɛadwenledwenle nwolɛ amaa yɛanwu Gyihova kpalɛ la abo a, ɛnee bɛmaa yɛzuzu ngɛlɛlera ɛhye mɔ anwo. Ngyinlazo mɔɔ baboa yɛ wɔ yɛ agɔnwolɛvalɛ nu la wɔ ko biala anu: “Me nee adalɛma ɛndɛnla, yɛɛ me nee nabalabama ɛndu.” (Edw. 26:4) “Sonla mɔɔ nee nrɛlɛbɛvolɛma tu la nwu nrɛlɛbɛ, na mɔɔ nee ahoasea tu la nwu ɔ nyunlu.” (Mrɛ. 13:20) “Agɔnwolɛ ɛtane sɛkye ɛbɛla kpalɛ.”​—1 Kɔl. 15:33.

¹² Ɛzukoalɛdeɛ mɔɔ nvasoɛ wɔ zo la boni a yɛsukoa yɛfi ngɛlɛlera ɛhye mɔ anu a? (1) Gyihova kpondɛ kɛ yɛkpa menli mɔɔ yɛ nee bɛ tu la anu. Ɔkpondɛ kɛ ɔbɔ yɛ nwo bane wɔ ɛbɛlabɔlɛ nu nee sunsum nu. (2) Menli mɔɔ yɛ nee bɛ tu la kola maa yɛbɔ ɛbɛla kpalɛ anzɛɛ ɛbɛla ɛtane; yɛnwu ɛhye anwo neazo wɔ ɛbɛlabɔlɛ nu. Ngɛlɛlera ne mɔ mɔɔ wɔ anwuma ɛkɛ la kile kɛ Gyihova kulo kɛ edwɛkɛ ne ka yɛ ahonle. Duzu a kile zɔ a? Yɛ ye nzonlɛ kɛ bɛanyɛ ngyehyɛnu ne mɔ mɛla kɛ, “bɛmmayɛ. . .” Emomu, bɛhɛlɛ bɛmaa yɛ kɛ nɔhalɛ edwɛkɛ mɔɔ nuhua la ɛkɛ a. Nɔhalɛ nu, Gyihova ɛlɛka ahile yɛ kɛ: ‘Nɔhalɛ edwɛkɛ ne ɛne. Duzu a ɛbayɛ ye wɔ nwo a? Boni a wɔ wɔ ahonle nu a?’

¹³ Mɔɔ li awieleɛ la, kɛmɔ bɛhɛlɛle ngɛlɛlera nsa ɛhye mɔ kɛ nɔhalɛ edwɛkɛ mɔɔ ɔ bo ɛdelɛ ɛnyɛ se la ati, ɔmkpa nwolɛ ɛlɛ yɛɛ yɛfa yɛdi gyima wɔ ndenle ngakyile zo. Kɛ neazo la, biza ɛ nwo kpuyia ɛhye mɔ: Kɛ ɔkɛyɛ na meahwe me nwo meavi “nabalabama” anwo ɛ? Mekɛ boni a me nee menli ɛhye mɔ yia a? (Mrɛ. 3:32; 6:12) “Nrɛlɛbɛvolɛma” mɔɔ Gyihova kpondɛ kɛ me nee bɛ tu la a le nwane mɔ? “Ahoasea” ne mɔ mɔɔ Gyihova kpondɛ kɛ metwe me nwo mefi bɛ nwo la a le nwane mɔ? (Edw. 111:10; 112:1; Mrɛ. 1:7) Saa mefa agɔnwolɛ ɛtane a, “ɛbɛla kpalɛ” boni a mebazɛkye ye a? Asoo ewiade ne anu angome a agɔnwolɛ ɛtane wɔ a? (2 Pita 2:1-3) Kɛzi ɛbabua kpuyia ɛhye mɔ ɛ?

14. Kɛ ɔkɛyɛ na wɔamaa nvasoɛ dɔɔnwo ara wɔ nɔsolɛ Abusua Ɛzonlenlɛ ne azo ɛ?

¹⁴ Mekɛ mɔɔ wɔdwenledwenle Ngɛlɛlera ne anwo wɔwie la, duzu ati a ɛnyɛ Baebolo ne anu edwɛkɛ gyɛne mɔɔ gyegye wɔ anzɛɛ wɔ abusua ne la anwo neɛnleanu a? * Awovolɛ, bɛzuzu edwɛkɛ zɔhane mɔ anwo  wɔ bɛ nɔsolɛ Abusua Ɛzonlenlɛ ne abo. Saa bɛlɛyɛ zɔ a, bɛhakye kɛ bɛ bodane a le kɛ bɛboa abusua ne anu amra kɔsɔɔti bɛamaa bade Nyamenle ɛlɔlɛ mɔɔ ɔlɛ ɔmaa yɛ mɔɔ yela ye ali wɔ ye mɛla nee ye ngyinlazo ne mɔ anu la abo kpalɛ. (Edw. 119:72) Nɔhalɛ nu, ɔwɔ kɛ debiezukoalɛ zɛhae maa abusua ne anu amra kɔsɔɔti twe bikye Gyihova nee bɛ nwo bɛ nwo kpalɛ.

15. Saa ɛlɛnyia nrɛlɛbɛ nee tieyɛ ahonle a, kɛ ɔkɛyɛ na wɔanwu ye ɛ?

¹⁵ Saa ɛlɛnyia nrɛlɛbɛ nee tieyɛ ahonle a, kɛ ɔkɛyɛ na wɔanwu ye ɛ? Adenle ko a le kɛ ɛbava wɔ nzuzulɛ wɔado nɔhavoma mɔɔ dɛnlanle aze wɔ tete ne mɔɔ bɛ nuhua ko a le Belemgbunli Devidi mɔɔ hɛlɛle edwɛkɛ ɛhye la ɛdeɛ ne anwo: “O me Nyamenle, mekulo kɛ meyɛ wɔ ɛhulolɛdeɛ; wɔ mɛla ne wɔ me ahonle nu.” (Edw. 40:8) Edwɛndolɛ 119 kɛlɛvo ne noko hanle kɛ: “O, mekulo wɔ mɛla ne somaa! Medwenledwenle nwolɛ alehyenlɛ biala.” (Edw. 119:97) Ɛlɔlɛ zɛhae ɛmba mgbane. Emomu, debiezukoalɛ kpalɛ, asɔneyɛlɛ, edwɛkɛ nwo ɛdwenledwenlenlɛ nee nyilalɛ mɔɔ Gyihova ngyinlazo mɔɔ bɛdi zo maa bɛnyia la a fa ɛhye ba a.​—Edw. 34:8.

KO MAA WƆ KELESEƐNE FANWODI NE!

16. Saa yɛbali konim wɔ nɔhalɛ fanwodi nwo konle ne anu a, duzu a ɔwɔ kɛ yɛnwu ye a?

¹⁶ Tetedwɛkɛ maa yɛnwu kɛ menli ɛho konle mgbole ɛva ɛkpondɛ fanwodi. Yemɔti, ɔfɛta kɛ yɛko sunsum nu yɛmaa yɛ Keleseɛne fanwodi ne! Ɔwɔ kɛ yɛnwu ye kɛ tɛ Seetan, ewiade ne, nee ewiade sunsum ne angome a le yɛ agbɔvolɛ a. Ɔwɔ kɛ yɛ nee yɛ sinlidɔlɛ nee yɛ ahonle ne mɔɔ le mɛlɛbɛla la noko di apelepele. (Gyɛ. 17:9; Ɛfɛ. 2:3) Noko akee, ɔlua Gyihova moalɛ zo, yɛbahola yɛali konim. Na konim biala mɔɔ yɛbali la, saa ɔle kpole anzɛɛ ekyi bɔbɔ a yɛnyia nvasoɛ nwiɔ yɛfi nu. Mɔɔ lumua la, yɛmaa Gyihova anye die. (Mrɛ. 27:11) Mɔɔ tɔ zo nwiɔ, saa Nyamenle dua tumi mɔɔ wɔ “fanwodi mɛla ne mɔɔ di munli la” azo die yɛ a, ɔmaa yɛsika yɛ bo kpalɛ kɛ yɛbalua ‘adenle ɛdenraa ne’ mɔɔ kɔ dahuu ngoane nu la azo dahuu. Ɔnrɛhyɛ, yɛbanyia fanwodi kpalɛ ne mɔɔ wɔ ɛkɛ maa Gyihova nɔhalɛ azonvolɛ la.​—Gye. 1:25; Mat. 7:13, 14.

17. Duzu ati a ɔnle kɛ yɛmaa yɛ sa nu to ɔlua yɛ sinlidɔlɛ ti ɛ, na moalɛ boni a Gyihova fa maa a?

¹⁷ Noko ɔdwu mekɛ ne bie a yɛ kɔsɔɔti yɛyɛ ɛtane. (Nolo. 7:20) Saa ɔba ye zɛhae a, ɔnle kɛ yɛbu yɛ nwo kɛ nvasoɛ ɛnle yɛ nwo zo anzɛɛ yɛmaa yɛ sa nu to. Kɛmɔ yɛbaha ye la, saa ɛtɔ aze a, ɔwɔ kɛ ɛdwazo na ɛkɔ ɛ nyunlu​—saa bɔbɔ ɔwɔ kɛ ɛkpondɛ moalɛ ɛfi mgbanyima ne mɔ ɛkɛ a. Gyemise hɛlɛle kɛ: “Saa bɛfa diedi bɛyɛ nzɛlɛlɛ” a, ɔbamaa “wuleravolɛ ne anwo [aza]; Awulae badwazo ye, na saa yeyɛ ɛtane a yeava ye ɛtane yeahyɛ ye.” (Gye. 5:15) Yemɔti, mmamaa ɛ rɛle fi ye ɛlɛ kɛ Gyihova se anwunvɔne na ɔhwenle wɔ ɔrale asafo ne anu ɔluakɛ ɔnwunle debie kpalɛ bie wɔ wɔ nu. (Bɛgenga Edwɛndolɛ 103:8, 9.) Ɛhye ati, saa ɛkɔ zo ɛfa wɔ ahonle muala ɛsonle Gyihova a, ɔnrɛkpo wɔ ɛlɛ.​—1 Edk. 28:9.

18. Kɛ ɔkɛyɛ na yɛ nyɛleɛ nee Gyisɛse nzɛlɛlɛ ne mɔɔ wɔ Dwɔn 17:15 la ayia ɛ?

¹⁸ Mekɛ mɔɔ Gyisɛse nee ye ɛzoanvolɛ 11 ne mɔɔ lile nɔhalɛ la ɛlɛyɛ asɔne wɔ nɔe ne mɔɔ aleɛ kye a ɔbawu la, ɔhanle edwɛkɛ ɛhye mɔɔ bɛ rɛle ɛnvi la: “Mesɛlɛ kɛ ɛkɛzie bɛ gyɛlɛɛnye ɛkɛvi amumuyɛnli Seetan asa anu.” (Dwɔn 17:15) Ɛnee Gyisɛse ɛzoanvolɛ ne mɔ nee ye ɛdoavolɛma ne kɔsɔɔti anwo hyia ye. Zɔhane ati, yɛlɛ diedi kɛ Gyihova badie Gyisɛse asɔneyɛlɛ ne na yeazinza yɛ wɔ anwongyelelɛ mekɛ ɛhye anu. ‘Gyihova le enyinlike maa bɛdabɛ mɔɔ bɛgyinla bɛ munlililɛ nu la, ɔsinza bɛdabɛ mɔɔ bɛdi pɛlepɛle la ɛbɛlabɔlɛ.’ (Mrɛ. 2:7, 8) Ɛhɛe, munli nu ɛgyinlanlɛ nee ye ngyegyelɛ lua, noko yemɔ ala a le adenle mɔɔ yɛdua zo yɛkɔ dahuu ngoane nu na yɛnyia nɔhalɛ fanwodi a. (Wulo. 8:21) Yemɔti, mmamaa awie biala bɛlɛbɛla wɔ!

[Ɔ bo ɛkɛ ne edwɛkɛ ne mɔ]

[Debiezukoalɛ kpuyia ne mɔ]

[Nvoninli ne mɔ wɔ mukelɛ 19]

Kɛ ɔkɛyɛ na yɛanwu menli mɔɔ bɛle kɛ Abesalɛm la na yɛanlea boɛ wɔ bɛ nwo ɛ?