Bɛbɔ Bɛ Ɛbɛla Kɛ Belemgbunlililɛ Ne Maanlema!
Bɛbɔ Bɛ Ɛbɛla Kɛ Belemgbunlililɛ Ne Maanlema!
‘Bɛmaa bɛ ɛbɛlabɔlɛ ɛfɛta edwɛkpa ne.’—FEL. 1:27.
KƐZI ƐBAYE Ɔ NLOA Ɛ?
Nwane mɔ a bahola ayɛ Belemgbunlililɛ ne maanlema a?
Duzu a ɔwɔ kɛ yɛyɛ ye wɔ Belemgbunlililɛ ne aneɛ, ye tetedwɛkɛ, nee ye mɛla nwo a?
Kɛzi Belemgbunlililɛ ne maanlema da ye ali kɛ bɛ nye die Nyamenle ngyinlazo nwo ɛ?
1, 2. Duzu ati a folɛ mɔɔ Pɔɔlo dule Felepaema asafo ne la ɛnee lɛ ndelebɛbo titile ɛ?
ƐZOANVOLƐ Pɔɔlo dule Felepae asafo ne folɛ kɛ ‘bɛmaa bɛ ɛbɛlabɔlɛ ɛfɛta edwɛkpa ne.’ (Bɛgenga Felepaema 1:27.) Eza bɛkola bɛkile Giliki edwɛkɛkpɔkɛ mɔɔ Pɔɔlo vale lile gyima wɔ ɛke mɔɔ bɛhile ɔ bo “ɛbɛlabɔlɛ” la abo kɛ “bɛhɔ zo bɛyɛ maanlema.” Ɛnee edwɛkɛ zɔhane lɛ ndelebɛbo titile maa Felepae asafo ne. Duzu ati ɔ? Ɔzɔho kɛ ɛnee Felepae boka azuamgbole mɔɔ Wulomuma manle bɛ adenle bɛrayɛle ye maanlema la anwo. Ɛnee Felepaema mɔɔ bɛle Wulomu maanlema la nee Wulomu Tumililɛ ne anu amra kɔsɔɔti memaa bɛ nwo zo ɔlua bɛ gyinlabelɛ ne nee Wulomu mɛla mɔɔ ɛnee bɔ bɛ nwo bane la ati.
2 Ɛnee Felepae asafo ne anu amra lɛ ninyɛne mɔɔ sonle bolɛ mɔɔ bɛkola bɛgyinla zo bɛtu bɛ nwo a. Kɛmɔ ɛnee bɛle Keleseɛnema mɔɔ bɛkpokpa bɛ la ati, Pɔɔlo hakyele bɛ kɛ bɛle maanlema “wɔ anwuma.” (Fel. 3:20) Ɛnee bɛnle sonla arane bie maanlema, emomu Nyamenle Belemgbunlililɛ ne. Yemɔti, ɛnee bɛlɛ banebɔlɛ nee nyilalɛ mɔɔ ɛnlɛ ye ɛsaso.—Ɛfɛ. 2:19-22.
3. (a) Nwane mɔ a kola yɛ Belemgbunlililɛ ne maanlema a? (b) Duzu a yɛbazuzu nwo wɔ edwɛkɛ ɛhye anu a?
3 Folɛ mɔɔ Pɔɔlo dule kɛ “bɛhɔ zo bɛyɛ maanlema” la fane bɛdabɛ mɔɔ bɛ nee Kelaese bali tumi wɔ anwuma la anwo titile. (Fel. 3:20) Noko eza ɔkola ɔfane bɛdabɛ mɔɔ bɛbayɛ Nyamenle Belemgbunlililɛ ne maanlema wɔ azɛlɛ ye azo la anwo. Kɛmɔti ɛ? Ɔluakɛ Keleseɛnema mɔɔ bɛdu bɛ nwo bɛmaa la kɔsɔɔti sonle Belemgbunli ko ne ala, Gyihova, yɛɛ ngyinlazo ko ne ala a bɛfa bɛbɔ bɛ ɛbɛla a. (Ɛfɛ. 4:4-6) Ɛnɛ, menli yɛ gyima ɛsesebɛ amaa bɛafɛta kɛ maanlema wɔ maanle kpalɛ nu. Nea kɛzi nwolɛ adenle mɔɔ yɛlɛ kɛ Belemgbunlililɛ ne maanlema la sonle bolɛ a! Amaa yɛanyia anyezɔlɛ kpole wɔ nwolɛ adenle ɛhye anwo la, bɛmaa yɛzuzu kɛzi debie mɔɔ ɔwɔ kɛ awie yɛ na yeayɛ maanle sonla kpalɛ nee mɔɔ ɔwɔ kɛ awie yɛ na yeayɛ Nyamenle Belemgbunlililɛ ne maanle sonla bikye nwo la anwo. Yɛbazuzu ninyɛne nsa mɔɔ ɔwɔ kɛ yɛyɛ na yɛahɔ zo yɛayɛ Belemgbunlililɛ ne maanlema la anwo.
MƆƆ ƆWƆ KƐ MAANLEMA NE YƐ LA
4. Duzu a le aneɛ tagyee ne, na kɛzi ‘yɛka’ ye ɛ?
4 Bɛzukoa aneɛ ne. Alesama arane bie mɔ kpondɛ kɛ bɛdabɛ mɔɔ bɛkulo kɛ bɛdie bɛ kɛ bɛ maanlema la kola ka aneɛ mɔɔ menli dɔɔnwo ka ye wɔ maanle ne anu la. Saa bɛdie awie bɛto nu kɛ maanle ne anu sonla bɔbɔ a, bie a ɔbabɔ mɔdenle ɛvolɛ dɔɔnwo na yeahola yeaha aneɛ fofolɛ ne kpalɛ. Bɛbahola bɛazukoa aneɛ ne anwo mɛla ne ndɛndɛ noko ɔbalie mekɛ na bɛahola bɛabobɔ edwɛkɛ agbɔkɛ ne mɔ kpalɛ. Nyamenle Belemgbunlililɛ ne noko kpondɛ kɛ ye maanlema sukoa mɔɔ Baebolo ne fɛlɛ ye “aneɛ tagyee” wɔ Zɛfanaya 3:9 * la. Ɔka ye wɔ ɛkɛ ne kɛ: “Akee mebahakyi menli ne anloa meamaa bɛaha aneɛ tagyee ne, na bɛ kɔsɔɔti bɛbabɔ Gyihova duma na bɛava awane ko bɛazonle ye.” Duzu a le aneɛ ɛhye? Yemɔ a le Nyamenle nee ye bodane ne mɔ anwo nɔhalɛ ne mɔɔ wɔ Baebolo ne anu la. Saa yɛmaa yɛ ɛbɛlabɔlɛ nee Nyamenle mɛla nee ye ngyinlazo ne mɔ yia a, ɛnee ‘yɛlɛka’ aneɛ tagyee ne. Nyamenle Belemgbunlililɛ ne maanlema bahola azukoa Baebolo mɔlebɛbo ngilehilelɛ ne ndɛndɛ na bɛamaa bɛazɔne bɛ. Noko, wɔ bɛ ɛzɔnenlɛ ne anzi bɔbɔ ɔwɔ kɛ bɛbɔ mɔdenle na bɛahola ‘bɛaha’ aneɛ tagyee ne kpalɛ. Wɔ adenle boni azo? Ɔwɔ kɛ yɛ nuhua ko biala bɔ mɔdenle fa Baebolo ngyinlazo bɔ ye ɛbɛla.
5. Duzu ati a ɔwɔ kɛ yɛsukoa Gyihova ahyehyɛdeɛ ne anwo tetedwɛkɛ ɛ?
5 Bɛzukoa nwolɛ tetedwɛkɛ. Ɔwɔ kɛ awie mɔɔ kpondɛ kɛ yɛ maanle bie anu sonla la sukoa arane mɔɔ wɔ zo la anwo tetedwɛkɛ. Zɔhane ala a ɔwɔ kɛ bɛdabɛ mɔɔ bɛkpondɛ kɛ bɛyɛ Belemgbunlililɛ ne maanlema la noko sukoa Nyamenle Belemgbunlililɛ ne anwo debie biala mɔɔ ɔbaboa la kɔsɔɔti a. Suzu neazo mɔɔ Kɔla amra mrenya ne mɔ yɛle wɔ tete Yizilayɛ ɛzonlenlɛ sua ne anwo la anwo. Bɛ nye liele Gyɛlusalɛm nee ɛleka mɔɔ bɛsonle la anwo kpalɛ na bɛhanle suakpole ne anwo tetedwɛkɛ bɛhilele. Tɛ awolɛ nee mɔta mɔɔ bɛvale bɛzile sua ne la yɛɛ ɛnee yɛ bɛ kɛnlɛma a, emomu, mɔɔ ɛnee bɛyɛ ye wɔ sua ne azo la ɔ. Ɛnee Gyɛlusalɛm le Gyihova, “Belemgbunli kpole ne suakpole” ɔluakɛ ɛkɛ ne yɛɛ ɛnee bɛsonle nɔhalɛ ɛzonlenlɛ a. Ɛnee bɛkilehile Gyihova Mɛla ne wɔ ɛkɛ. Gyihova lale ye ɛhulolɛ kpundii ne ali hilele menli mɔɔ Gyɛlusalɛm Arelemgbunli ziele bɛ la. (Bɛgenga Edwɛndolɛ 48:1, 2, 9, 12, 13.) Asoo ɛlɛ ɛhulolɛ kɛ ɛbazukoa Gyihova ahyehyɛdeɛ ne foa mɔɔ wɔ azɛlɛ ye azo la anwo debie na wɔaha wɔahile kɛmɔ tete amra yɛle la ɔ? Saa ɛsukoa Nyamenle ahyehyɛdeɛ ne nee kɛzi Gyihova boa ye menli la anwo ninyɛne dɔɔnwo a, ɔbamaa wɔanwu kɛ Nyamenle Belemgbunlililɛ ne wɔ ɛkɛ amgba. Na ɛhulolɛ mɔɔ ɛlɛ kɛ ɛbabɔ Belemgbunlililɛ ne anwo edwɛkpa ne nolo la bayɛ kpole.—Gyɛ. 9:24; Luku 4:43.
6. Duzu ati a ndelebɛbo wɔ nu kɛ Gyihova kpondɛ kɛ yɛsukoa Belemgbunlililɛ ne mɛla nee ye ngyinlazo na yɛdi zo ɛ?
6 Bɛzukoa ye mɛla ne mɔ. Alesama arane kpondɛ kɛ bɛ maanlema sukoa maanle ne anu mɛla na bɛdi zo. Ɛhye ati, ndelebɛbo wɔ nu kɛ Gyihova kpondɛ kɛ Belemgbunlililɛ ne maanlema noko sukoa ye mɛla nee ye ngyinlazo kɔsɔɔti na bɛdi zo. (Aye. 2:3; Dwɔn 15:10; 1 Dwɔn 5:3) Alesama mɛla ɛnwie munli di. Noko “[Gyihova] mɛla ne di munli.” (Edw. 19:7) Asoo yɛ nye die Nyamenle mɛla ne anwo na yɛkenga ye Edwɛkɛ ne alehyenlɛ biala? (Edw. 1:1, 2) Adenle kokye mɔɔ yɛbahola yɛalua zo yɛanwu Nyamenle mɛla ne la a le kɛ yɛdayɛ mumua ne yɛbazukoa. Awie gyɛne ɛnrɛhola ɛnrɛyɛ ɛhye ɛnrɛmaa yɛ.
BELEMGBUNLILILƐ NE MAANLEMA ANYE DIE NYAMENLE NGYINLAZO NWO
7. Ngyinlazo mɔɔ kpogya la boni a Belemgbunlililɛ ne maanlema fa bɔ bɛ ɛbɛla a?
7 Saa yɛbahɔ zo yɛayɛ Belemgbunlililɛ ne maanlema a, ɔwɔ kɛ yɛnwu Nyamenle ngyinlazo ne mɔ na yɛ nye die nwo. Menli dɔɔnwo mɔɔ wɔ maanle dɔɔnwo anu la ka kɛ bɛdie maanle ne mɛla nee ye ngyinlazo bɛto nu. Noko, saa bɛnwu kɛ mɛla anzɛɛ ngyinlazo bie azolilɛ yɛ se na awie ɛnle ɛkɛ a, bɛbulu zo. Menli ɛhye mɔ ta yɛ bɛ ninyɛne “ɛnyelɛ zo.” (Kɔl. 3:22) Belemgbunlililɛ ne maanlema fa ngyinlazo mɔɔ kpogya la bɔ bɛ ɛbɛla. Saa awie ɛnle ɛkɛ bɔbɔ a, yɛfa anyelielɛ yɛdi Nyamenle mɛla zo. Duzu ati ɔ? Ɔluakɛ yɛkulo yɛ Mɛlamaavolɛ ne.—Aye. 33:22; bɛgenga Luku 10:27.
8, 9. Kɛ ɔkɛyɛ na wɔanwu ye kɛ ɛ nye die Nyamenle mɛla ne mɔ anwo ɛ?
8 Kɛ ɔkɛyɛ na wɔanwu ye kɛ ɛ nye die Nyamenle mɛla ne mɔ anwo ɛ? Suzu mɔɔ ɛyɛ ye wɔ folɛdulɛ mɔɔ fane debie mɔɔ ɔle awie ati anwo kpɔkɛzilɛ—le kɛ tɛladeɛ ɛwulalɛ nee anwoziezielɛ nwo la anwo nea. Bie a kolaa na wɔarayɛ Belemgbunlililɛ ne maanle sonla la, ɛnee wɔ anwoziezielɛ ɛnle kpalɛ anzɛɛ twehwe atiakunluwɔzo. Noko mekɛ mɔɔ ɛlɔlɛ mɔɔ ɛlɛ ɛmaa Nyamenle yɛle kpole la, ɛnwunle kɛ ɔwɔ kɛ ɛsiezie ɛ nwo wɔ adenle mɔɔ ɔbawula ye anyunlunyia la azo. (1 Tem. 2:9, 10; 1 Pita 3:3, 4) Ɔbahola yeara ye kɛ kɛkala ɛte nganeɛ kɛ wɔ anwoziezielɛ ne le kpalɛ. Noko saa kpanyinli bie twe wɔ adwenle sie zo kɛ wɔ anwoziezielɛ gyegye nolobɔlɛma dɔɔnwo wɔ asafo ne anu ɛ? Duzu a ɛbayɛ a? Asoo ɛbava edwɛkɛ wɔaye ɛ nloa, anzɛɛ ɛbava ɛya, anzɛɛ ɛbayɛ ɛ kɔme ketee? Nyamenle Belemgbunlililɛ ne mɛla titile a le kɛ ye maanlema kɔsɔɔti bazukoa Kelaese. (1 Pita 2:21) Ɛzoanvolɛ Pɔɔlo hɛlɛle ye Gyisɛse neazo ne anwo kɛ: “Mɔɔ ɔwɔ kɛ yɛyɛ la a le kɛ yɛkɛmaa yɛ gɔnwo mɔ anye kɛlie bɛ nwo wɔ bɛ boɛlilɛ ti, amaa bɛ diedi anyi. Ɔluakɛ Kelaese andwenle ɔdaye mumua ne ɔ nwo.” (Wulo. 15:2, 3) Keleseɛnenli mɔɔ ɛnyi wɔ sunsum nu la, gyakyi ninyɛne mɔɔ gyegye awie mɔ adwenle la ɛyɛlɛ amaa anzondwolɛ adɛnla asafo ne anu.—Wulo. 14:19-21.
9 Bɛmaa yɛzuzu ninyɛne nwiɔ bieko mɔɔ gyegye menli la anwo: yɛ nyɛleɛ wɔ nla nwo nee yɛ adwenle wɔ agyalɛ nwo. Bie a menli mɔɔ bɛtɛbayɛle Nyamenle Belemgbunlililɛ ne maanlema la die mrenya mɔɔ fa mrenya, mraalɛ mɔɔ fa mraalɛ, nee nlanwonvoninli ɛnleanlɛ to nu, yɛɛ bɛlɛ adwenle kɛ agyalɛzɛkyelɛ nee ewolebɔlɛ le bɛtianwo kpɔkɛzilɛ. Belemgbunlililɛ ne maanlema ɛkpo nzuzulɛ anzɛɛ angomedi nyɛleɛ ɛhye mɔ. Ɔnva nwo kɛ ɛnee Keleseɛnema dɔɔnwo ɛbɛlabɔlɛ ɛzɛkye la, kɛkala bɛbu nla nee agyalɛ kɛ ahyɛlɛdeɛ mɔɔ vi Nyamenle. Gyihova ngyinlazo ne mɔɔ kpogya la sonle bolɛ maa bɛ na bɛfi ahonle nu bɛdie bɛto nu kɛ bɛdabɛ mɔɔ bɛfa bɛ nwo bɛwula ɛbɛlatane ɛbɔlɛ nu la ɛnfɛta kɛ Belemgbunlililɛ ne maanlema. (1 Kɔl. 6:9-11) Noko akee, bɛze kɛ ahonle le mɛlɛbɛla. (Gyɛ. 17:9) Yemɔti bɛtie kɔkɔbɔlɛ mɔɔ ɔbaboa bɛ yeamaa bɛabɔ ɛbɛla kpalɛ dahuu la.
BELEMGBUNLILILƐ NE MAANLEMA TIE KƆKƆBƆLƐ
10, 11. Kɔkɔbɔlɛ mɔɔ le ye mekɛ nu ɛdeɛ la boni a Nyamenle Belemgbunlililɛ ne fa maa a, na nganeɛ boni a ɛte ye wɔ nwo a?
10 Sonla arane bahola ava kpɔkɛdelɛ nwo kɔkɔbɔlɛ amaa wɔ aleɛ nee nyile bie mɔ anwo. Tɛ aleɛ nee nyile kɔsɔɔti a le ɛtane a. Noko saa aleɛ anzɛɛ ayile bie bahola ava ngyegyelɛ ara a, arane bie bahola ava nwolɛ kɔkɔbɔlɛ mɔɔ fɛta la amaa ye maanlema. Saa arane ne anyɛ ye zɔ a, ɛnee ɔkile kɛ ɔndwenle ye maanlema ne anwo. Zɔhane ala a Nyamenle Belemgbunlililɛ ne fa ɛbɛlabɔlɛ nee sunsum nu esiane nwo kɔkɔbɔlɛ maa wɔ ye mekɛ nu a. Kɛ neazo la, Intanɛte ɛrayɛ adenle kpalɛ mɔɔ bɛdua zo bɛdi ngitanwo, bɛsukoa debie na bɛdielie bɛ nye a. Nyamenle ahyehyɛdeɛ ne fa Intanɛte di gyima yɛ ninyɛne kpalɛ dɔɔnwo. Noko akee, Intanɛte zo gyimalilɛ bie kola sɛkye awie ɛbɛlabɔlɛ nee ye sunsum nu gyinlabelɛ. Ɛleka mɔɔ nlanwonvoninli nwo edwɛkɛ wɔ wɔ Intanɛte zo la le esiane maa Belemgbunlililɛ ne maanlema. Akɛlɛ nɔhavo eku ne ɛva gyimalilɛ ɛleka ɛhye anwo kɔkɔbɔlɛ ɛmaa wɔ ɛvolɛ dɔɔnwo anu. Yɛ nye sɔ sunsum nu kpɔkɛdelɛ nwo kɔkɔbɔlɛ ɛhye mɔ kpole kpalɛ!
11 Kenlensa ye ala, Intanɛte zo gyimalilɛ fofolɛ ɛra mɔɔ saa yɛfa yɛdi gyima wɔ adenle kpalɛ zo a yɛbanyia nvasoɛ a. Noko gyimalilɛ ɛleka ɛhye mɔɔ bɛfɛlɛ ye Intanɛte zo agɔnwolɛvalɛ ɛleka la noko bahola ava ngyegyelɛ kpole ara. Ɔkola ɔmaa awie tu agɔnwolɛ ɛtane. (1 Kɔl. 15:33) Yemɔti, ɔnyɛ nwanwane kɛ Nyamenle ahyehyɛdeɛ ne bɔ yɛ kɔkɔ wɔ nwo la. Asoo wɔgenga Intanɛte zo agɔnwolɛvalɛ nwo edwɛkɛ ne mɔɔ akɛlɛ nɔhavo ne ɛhɛlɛ ye kenlensa ye la kɔsɔɔti? Nrɛlɛbɛ ɛnle nu kɛ yɛbava Intanɛte zo ɛleka ɛhye yɛali gyima wɔ mekɛ mɔɔ yɛtɛkengale magazine ɛhye mɔ la! * Ɛhye ɛyɛlɛ bayɛ kɛ yɛlɛno ayile bie mɔɔ ɔ nloa yɛ se noko yɛtɛkengale nwolɛ kɔkɔbɔlɛ mɔɔ wɔ toba ne anwo la.
12. Duzu ati a nrɛlɛbɛ ɛnle nu kɛ yɛbabu yɛ nye yɛagua kɔkɔbɔlɛ zo ɛ?
12 Menli mɔɔ bu bɛ nye gua kɔkɔ mɔɔ akɛlɛ nɔhavo ne bɔ azo la nee bɛ alɔvolɛ nwu amaneɛ. Nlanwonvoninli ɛnleanlɛ anzɛɛ ɛbɛlatane ɛbɔlɛ ɛha bie mɔ ɛkɛ na bɛsuzu kɛ Gyihova ɛnnwu mɔɔ bɛyɛ la. Saa yɛlɛ adwenle kɛ Gyihova ɛnnwu mɔɔ yɛyɛ la a ɛnee yɛbɛlɛbɛla yɛ nwo kpole! (Mrɛ. 15:3; bɛgenga Hibuluma 4:13.) Nyamenle kpondɛ kɛ ɔboa menli ɛhye mɔ, yemɔti yemaa menli mɔɔ gyi ɔ gyakɛ anu wɔ azɛlɛ ye azo la anwosesebɛ kɛ bɛboa bɛ. (Gal. 6:1) Noko akee, kɛmɔ saa arane bie maa awie adenle wɔ ye maanle nu na ɔbu mɛla zo a bɛkola bɛfoa ye bɛfi maanle ne anu la, zɔhane ala a saa awie bulu Gyihova ngyinlazo zo na yeanlu ɔ nwo a bɛkola bɛdie nwolɛ adenle mɔɔ ɔlɛ la a. * (1 Kɔl. 5:11-13) Noko, ɔse anwunvɔne. Menli mɔɔ kɛnlu bɛ nwo na bɛkɛhakyi bɛ ɛbɛlabɔlɛ la bahola anyia gyinlabelɛ kpalɛ wɔ Gyihova anyunlu na bɛahɔ zo bɛayɛ Belemgbunlililɛ ne maanlema. (2 Kɔl. 2:5-8) Nea enililɛ mɔɔ wɔ nu kɛ yɛbazonle Belemgbunli ɛhye mɔɔ lɛ ɛlɔlɛ la a!
DEBIEZUKOALƐ NWO HYIA BELEMGBUNLILILƐ NE MAANLEMA
13. Kɛzi Belemgbunlililɛ ne maanlema maa ɔda ali kɛ nwomazukoalɛ nwo hyia bɛ ɛ?
13 Alesama arane dɔɔnwo yɛ gyima ɛsesebɛ kilehile bɛ maanlema. Bɛbuke sukulu bɛfa bɛkile bɛ ɛgengalɛ, ɛhɛlɛlɛ, nee gyima ɛyɛlɛ. Belemgbunlililɛ ne maanlema anye die sukulu ɛhye mɔ anwo na bɛ nye bolo bɛsukoa ɛgengalɛ, ɛhɛlɛlɛ nee gyima mɔɔ bɛbava bɛanlea bɛ nwo la. Noko nwomazukoalɛ nwo ngyehyɛleɛ mɔɔ Nyamenle Belemgbunlililɛ ne ɛyɛ ɛmaa ye maanlema la sonle bolɛ maa bɛ kpalɛ. Gyihova dua Keleseɛnema asafo ne azo si nwomazukoalɛ adua. Bɛmaa awovolɛ anwosesebɛ kɛ bɛgenga debie bɛhile bɛ mra. Siane biala, akɛlɛ nɔhavo ne kɛlɛ edwɛkɛ mɔɔ gyi Baebolo ne azo la dɔɔnwo wɔ Ɛzinzalɛ Arane ne nee Awake! ne anu. Saa ɛkenga mukelɛ dodo bie kenle ko biala a, ɛbahola wɔali Belemgbunlililɛ ne nwomazukoalɛ nwo ngyehyɛleɛ ne anzi pɛpɛɛpɛ.
14. (a) Ndetelɛ boni a bɛfa bɛmaa yɛ a? (b) Nzuzulɛ mɔɔ fane nɔsolɛ Abusua Ɛzonlenlɛ nwo la boni a ɛfa ɛdi gyima a?
14 Belemgbunlililɛ ne maanlema nyia ndetelɛ wɔ asafo ayia bo dapɛne biala. Kɛ neazo la, Teokelase Ɛzonlenlɛ Sukulu ne mɔɔ bɛva ɛvolɛ mɔɔ bo abulasia bɛyɛ la boa sukoavoma ɔmaa bɛkilehile Nyamenle Edwɛkɛ ne anu kpalɛ. Asoo wɔhɛlɛ wɔ duma wɔ sukulu ɛhye anu? Kenlensa ye, akɛlɛ nɔhavo ne ɛzi nɔsolɛ Abusua Ɛzonlenlɛ mɔɔ bɛyɛ ye dapɛne biala la azo kpalɛ. Ngyehyɛleɛ ɛhye maa abusua ngyehyɛleɛ ne anu mia. Asoo wɔhola wɔva nzuzulɛ mɔɔ bɛva bɛmaa wɔ yɛ mbuluku ne mɔ anu la wɔli gyima? *
15. Nwolɛ adenle mɔɔ yɛlɛ la anu ko a le boni?
15 Menli mɔɔ gyi alesama arane nzi la kanvo bɛ maanyɛlɛ fane ne wɔ bagua nu, bɔbɔ bɛkɔ azua nu bɛkɔka nwolɛ edwɛkɛ bɛkile. Belemgbunlililɛ ne maanlema kanvo Nyamenle Belemgbunlililɛ ne wɔ gua zo nee azua nu. Nɔhalɛ nu, kɛmɔ yɛhanle ye wɔ edwɛkɛ mɔɔ li ɛhye anyunlu anu la, Ɛzinzalɛ Arane ne, mɔɔ ɔbɔ Gyihova Belemgbunlililɛ ne nolo la a le magazine mɔɔ bɛyɛ ye dɔɔnwo kpalɛ wɔ azɛlɛ ye azo a! Nwolɛ adenle mɔɔ yɛlɛ la anu ko a le kɛ yɛbaha Nyamenle Belemgbunlililɛ ne anwo edwɛkɛ yɛahile. Asoo ɛfa ɛ nwo ɛwula edwɛkɛ ɛhanlɛ gyima ne anu kpalɛ?—Mat. 28:19, 20.
16. Kɛ ɔkɛyɛ na yɛahile kɛ yɛle Nyamenle Belemgbunlililɛ ne maanlema mɔɔ fɛta ɛ?
16 Ɔnrɛhyɛ, Nyamenle Belemgbunlililɛ ne ala a bali tumi wɔ azɛlɛ ye kɔsɔɔti azo a. Ɔbali yɛ sunsum nu nee nwonane nu ngyianlɛ kɔsɔɔti anwo gyima. Ɛbayɛ Nyamenle Belemgbunlililɛ ne maanle sonla kpalɛ wɔ zɔhane mekɛ ne ɔ? Ɛnɛ a le mekɛ mɔɔ ɛbahola wɔhile kɛ ɛbayɛ a. Zɔhane ati, bɛmaa yɛlua kpɔkɛ biala mɔɔ yɛbazi la azo yɛwula Gyihova anyunlunyia yɛva yɛhile kɛ yɛbahɔ zo yɛayɛ Nyamenle Belemgbunlililɛ ne maanlema mɔɔ fɛta.—1 Kɔl. 10:31.
[Ɔ bo ɛkɛ ne edwɛkɛ ne mɔ]
^ ɛden. 4 New World Translation of the Holy Scriptures.
^ ɛden. 11 Kɛ neazo la, nea Awake! July 2011, mukelɛ 24-27; August 2011, mukelɛ 10-13; yɛɛ February 2012, mukelɛ 3-9.
^ ɛden. 14 Nea August 1, 2011 Ɛzinzalɛ Arane, ne mukelɛ 30-31 yɛɛ January 2011, Yɛ Belemgbunlililɛ Gyima ne, mukelɛ 3-6.
[Debiezukoalɛ kpuyia ne mɔ]
[Edwɛkɛ mɔɔ bɛkpa wɔ mukelɛ 21]
Asoo ɛtie Intanɛte nwo kɔkɔbɔlɛ ne mɔɔ gyi Baebolo ne azo la?
[Nvoninli wɔ mukelɛ 19]
Ɛ nye die nɔhalɛ ɛzonlenlɛ nee ye tetedwɛkɛ nwo kɛ Kɔla amra mrenya ne mɔ la ɔ?
[Nvoninli wɔ mukelɛ 22]
Abusua Ɛzonlenlɛ bahola aboa wɔ nee wɔ alɔvolɛ yeamaa bɛayɛ Belemgbunlililɛ ne maanlema
