Bikye Nzɛlɛlɛ Tievolɛ Ne

MENLI dɔɔnwo mɔɔ bɛka kɛ bɛdie Nyamenle bɛdi la ɛngola ɛngile debie mɔɔ bɛ diedi ne gyi zo la. Yɛɛ bɛngola bɛngilehile deɛmɔti ɛzonlenlɛ fa ɔ nwo wula ninyɛndane nu anzɛɛ deɛmɔti Nyamenle maa amaneɛnwunlɛ nwo adenle la anu. Mɔɔ bɛbahola bɛayɛ la ala a le kɛ bɛbazɛlɛ Nyamenle bie mɔɔ bɛnze kɛzi ɔde la moalɛ.

Noko wɔmɔ, ɛbahola wɔahwe wɔabikye Nyamenle kpalɛ. Ɛbahola wɔanyia diedi mɔɔ gyi Nyamenle anwo ndelebɛbo mɔɔ maa bɛkulo ye azo la. Nɔhalɛ diedi gyi daselɛ zo. (Hibuluma 11:1) Saa ɛsukoa Nyamenle anwo nɔhalɛ ne a, ɛbanwu ye na ɛ nee ye adendɛ kɛ agɔnwolɛ. Maa yɛzuzu menli bie mɔ mɔɔ ɛnee bɛngola bɛnnwu ye saa Nyamenle wɔ ɛkɛ a, noko bɛyɛle nzɛlɛlɛ la anwubielɛ ne mɔ anwo.

▪ Patricia, mɔɔ yɛhanle ɔ nwo edwɛkɛ wɔ mɔlebɛbo ne la. “Kenle ko me nee me gɔnwo mɔ bulu bɔle ɔ bo kɛ yɛka ɛzonlenlɛ nwo edwɛkɛ. Ɛnee meha mehile bɛ kɛ ɔlua me ze mɔɔ ɔnlie Nyamenle ɔnli nee Gyihova Dasevolɛ bie mɔɔ rale yɛ sua nu ɛkɛ la adwelie mɔɔ ɛnee bɛlɛdi la ati a menvile sua nu a. Me gɔnwo mɔ ko hanle kɛ, ‘Bie a mɔɔ Gyihova Alasevolɛ ka la le nɔhalɛ.’

“Ko noko hanle kɛ, ‘Duzu ati a bɛmmaa yɛngɔ bɛ debiezukoalɛ ne ko yɛngɔnea debie ɛ?’ Yemɔti yɛhɔle. Ɛnee yɛnlie mɔɔ bɛka la yɛnli kpalɛ noko yɛ nuhua bie mɔ doale zo hɔle ɔlua agɔnwolɛvalɛ subane mɔɔ Alasevolɛ ne mɔ lale ye ali la ati.

“Noko, Molɛ ko bie mendele edwɛkɛ bie, na ɔmanle mengakyile me subane. Tendɛvolɛ ne hilehilele deɛmɔti menli nwu amaneɛ la anu. Ɛnee metɛtele ye ɛlɛ kɛ mɔlebɛbo ne ɛnee sonla di munli na sonla ko a manle ɛtane nee ewule rale na ɔdɛlɛle ɔhanle alesama kɔsɔɔti a. Tendɛvolɛ ne eza hilehilele deɛmɔti Gyisɛse ewule ne anwo hyia na alesama ahola anyia mɔɔ sonla mɔɔ lumua la minlinle ye la anu. * (Wulomuma 5:12, 18, 19) Arɛlevilɛ nu ala, ɛnee mete edwɛkɛ biala mɔɔ bɛka la abo. Menwunle kɛ, ‘Nyamenle bie wɔ ɛkɛ amgba mɔɔ ɔdwenle yɛ nwo a.’ Mendoale Baebolo ɛzukoalɛ ne azo na yeangyɛ, menyɛle me nzɛlɛlɛ mɔɔ lumua mɔɔ ɛnee melɛ diedi kɛ awie wɔ ɛkɛ mɔɔ ɔlɛtie la.”

▪ Allan, yɛhanle ɔdaye noko ɔ nwo edwɛkɛ wɔ edwɛkɛ mɔɔ lumua la anu. “Kenle ko bie, Gyihova Alasevolɛ rale yɛ ɛkɛ na me ye manle bɛrale yɛ sua ne anu ɔluakɛ ɛnee ɔ nye die aze mɔɔ yɛbadɛnla ye dahuu wɔ azɛlɛ ye azo anwo edwɛkɛ mɔɔ bɛhanle la anwo. Menvale  ɛya. Yemɔti, mengyakyile nyɛvolɛ ne mɔ wɔ asalo ɛkɛ na menvɛlɛle me ye wɔ egyaade ne na menzele ye kɛ, ‘Nea ɛ nwo boɛ. Ɔnle kɛ ɛdie ninyɛne zɛhae mɔ ɛdi!’

“Ɔbuale kɛ, ‘Ɛ nee bɛ ɛhɔ bɔ ye zo na maa bɛnwu kɛ bɛle adalɛ.’

“Nɔhalɛ nu, meangola ɛhwee yɛ. Noko bɛ nee me lile ye kɛnlɛma na bɛmanle me buluku bie mɔɔ fane abɔdeɛ nee ngakyihakyililɛ nee ngoane nwo la. Ɛnee edwɛkɛ ne anu la ɛkɛ yemɔti menzile kpɔkɛ kɛ ɔwɔ kɛ mesukoa Nyamenle anwo ninyɛne dɔɔnwo. Me nee Alasevolɛ ne mɔ bɔle ɔ bo zukoale Baebolo ne, na yeangyɛ menwunle kɛ edwɛkɛ biala mɔɔ Baebolo ne ka la le ngakyile fi adwenle biala mɔɔ melɛ ye wɔ ɛzonlenlɛ nwo la anwo. Mɔɔ menwunle Gyihova la, ɛnee ɔ ngome a meyɛ ye nzɛlɛlɛ a. Ɛnee subane bie wɔ me nwo mɔɔ ɛnle kpalɛ yemɔti menzɛlɛle kɛ ɔboa me. Menwu ye bɔkɔɔ kɛ Gyihova diele me nzɛlɛlɛ.”

▪ Andrew, mɔɔ ɔde England la. “Ɔnva nwo kɛ ɛnee medie abɔdeɛ nwo nrɛlɛbɛ medi ɛsesebɛ la, menliele ngakyihakyililɛ menlile ɔluakɛ ɛnee menli ka kɛ ɔle nɔhalɛ. Ɔlua ninyɛndane mɔɔ sisi la ati, meanlie Nyamenle meanli bieko.

 “Noko akee, ɛnee saa ɔdwu mekɛ ne bie a menyia adwenle kɛ: ‘Saa Nyamenle bie wɔ anwuma lɔ a, ɛnee ɔwɔ kɛ mete mɔɔ ɛbɛlabɔlɛ kile la abo. Kɛmɔti a basabasayɛlɛ nee konle ɛbu ɛ?’ Ɛnee saa ɔdwu mekɛ ne bie na me nwo kyele me a, mesɛlɛ noko ɛnee menze ahenle mɔɔ melɛtendɛ meahile ye la.

“Nzinlii, awie vale Will This World Survive? trate ne mɔɔ Gyihova Alasevolɛ a yɛle la ko manle me ye. Ɛnee meta medwenle kpuyia ɛhye anwo kpalɛ. Trate ne manle membizale ye wɔ Baebolo ne anwo kɛ, ‘Asoo ɔfɛta kɛ yɛsuzu mualɛ mɔɔ ɔfa ɔmaa la anwo ɔ?’ Kenle ko bie mɔɔ meangɔ gyima mɔɔ ɛnee melɛdie me menle la, awie vale The Bible—God’s Word or Man’s? * buluku ne ko manle me. Mekɛ mɔɔ menwunle kɛ mɔɔ Baebolo ne ka la nee abɔdeɛ nwo nrɛlɛbɛ yia la, menwunle kɛ ɔwɔ kɛ mesukoa Baebolo ne kpalɛ. Yemɔti, mekɛ mɔɔ Gyihova Alasevolɛ ne mɔ ko hanle kɛ ɔ nee me bazukoa la, menlie mendole nu. Na mɔɔ mendele Gyihova bodane ne mɔ abo la, menwunle kɛ ɔwɔ ɛkɛ amgba, na mebahola meadendɛ meahile ye mekɛ biala wɔ asɔneyɛlɛ nu.”

▪ Jan, bɛtetele ye kɛ Protɛstantnli wɔ London. “Ɛzonlenlɛ nu nabalaba ɛyɛlɛ nee amaneɛnwunlɛ mɔɔ ɛbu zo la manle mengyakyile asɔne ɛhɔlɛ. Mengyakyile kɔlegyi mɔɔ ɛnee mekɔ la na membɔle ɔ bo kɛ meto edwɛne meabɔ getaa meakpondɛ ezukoa. Nuhua yɛ menyiale Pat a. Bɛtetele ye kɛ Katɔleknli noko ɛnee ɔnlɛ diedi kɛ medame la.

“Ɛnee yɛ nee menli bie mɔɔ bɛdabɛ noko bɛgyakyi sukulu na bɛ nye die ɛzonlenlɛ mɔɔ wɔ Aduduleɛ maanle nu anwo la de sua bie mɔɔ ɛlɛsɛkye la anu. Ɛnee yɛfa dɔnehwele dɔɔnwo yɛsuzu ɛbɛlabɔlɛ nu bodane nwo kpalɛ. Ɛnee me nee Pat yɛnlie Nyamenle yɛnli ɛdeɛ, noko ɛnee yɛze kɛ ‘tumi bie mɔɔ bɔle ninyɛne la’ wɔ ɛkɛ.

“Mekɛ mɔɔ yɛdule yɛhɔle England sɔlɔ kɛ yɛkakpondɛ gyima kɛ edwɛndolɛma la, yɛɛ yɛwole yɛ ra nrenya ne a. Ɔ nwo dole ye kenle ko nɔsolɛ bie na mekakye kɛ menzɛlɛle Nyamenle ne mɔɔ ɛnee menlie ye menli la moalɛ. Yeangyɛ, me nee Pat yɛ avinli yɛle basabasa na menvale yɛ ra ne mengɔle. Menyɛle nzɛlɛlɛ bieko memkpondɛle moalɛ, saa awie wɔ ɛkɛ mɔɔ ɔbadie a. Pat noko yɛle zɔ, mɔɔ ɛnee menze a.

“Kenle ko zɔhane nɔsolɛ nu, Gyihova Alasevolɛ nwiɔ hɔle Pat ɛkɛ na bɛhanle Baebolo nu edwɛkɛ mɔɔ nvasoɛ wɔ zo la bɛhilele ye. Pat vɛlɛle me bizale me saa mebakponle zo me nee ye nee Alasevolɛ ne mɔ azukoa Baebolo ne a. Yeangyɛ yɛranwunle ye kɛ saa Nyamenle anye balie yɛ nwo a, ɔwɔ kɛ yɛgya wɔ mɛla adenle zo. Kɛmɔ ɛnee yɛ abusuabɔlɛ ne ɛnlɛ ngyinlazo kpalɛ la ati, ɛnee ɔyɛ se kpalɛ kɛ yɛbahola yɛayɛ ɛhye.

“Ɛnee yɛkpondɛ kɛ yɛnwu Baebolo ngapezo mɔɔ ɛra nu, deɛmɔti yɛnwu amaneɛ, nee Nyamenle Belemgbunlililɛ ne anwo edwɛkɛ dɔɔnwo. Ngyikyi ngyikyi yeranwunle kɛ Nyamenle dwenle yɛ nwo na ɛnee yɛkpondɛ kɛ yɛyɛ mɔɔ ɔka la. Yɛgyale. Nrɛlɛbɛ mɔɔ yɛnyianle ye wɔ Nyamenle Edwɛkɛ ne anu la ɛboa yɛ ɛmaa yɛtete yɛ mra nsa ne. Yɛnwu ye bɔkɔɔ kɛ Gyihova diele yɛ nzɛlɛlɛ.”

Kpondɛ Daselɛ Ne

Menli dɔɔnwo mɔɔ bie mɔ a yɛha bɛ nwo edwɛkɛ wɔ ɛke la ammaa adalɛ ɛzonlenlɛ ambɛlɛbɛla bɛ na bɛnwu deɛmɔti Nyamenle maa amaneɛnwunlɛ nwo adenle la. Asoo ɛyɛle ye nzonlɛ wɔ edwɛkɛ ne biala anu kɛ Baebolo ne anu ndelebɛbo kpalɛ a manle menli ɛhye mɔ liele lile kɛ Gyihova tie nzɛlɛlɛ ɔ?

Ɛkpondɛ kɛ ɛnwu ye saa Nyamenle wɔ ɛkɛ ɔ? Gyihova Alasevolɛ anye balie nwo kɛ bɛbaboa wɔ bɛamaa wɔanwu nɔhalɛ mɔɔ fane Gyihova “mɔɔ [tie] yɛ nzɛlɛlɛ” anwo nee kɛzi ɛbahwe wɔabikye ye la.—Edwɛndolɛ 65:2.

[Ɔ bo ɛkɛ ne edwɛkɛ ne mɔ]

[Edwɛkɛ mɔɔ bɛkpa wɔ mukelɛ 10]

“Mɔɔ mendele Gyihova bodane ne mɔ abo la, menwunle kɛ ɔwɔ ɛkɛ amgba, na mebahola meadendɛ meahile ye mekɛ biala wɔ asɔneyɛlɛ nu”

[Nvoninli wɔ mukelɛ 9]

Nɔhalɛ diedi gyi daselɛ nee Nyamenle anwo nɔhalɛ ne mɔɔ yɛkpondɛ kɛ yɛnwu ye la azo