Duzu Ati A Ɔmaa Amaneɛnwunlɛ Nwo Adenle A?

MENLI bie mɔ ɛnlie Nyamenle ɛnli ɔnva nwo kɛ ɔdwu mekɛ ne bie a bɛyɛ nzɛlɛlɛ la. Duzu ati ɔ? Amaneɛnwunlɛ mɔɔ ɛbu ewiade la ati ɔ. Asoo wɔzuzu deɛmɔti Nyamenle maa amaneɛnwunlɛ nwo adenle la anwo ɛlɛ?

Asoo Nyamenle vale sinlidɔlɛ bɔle alesama kɛ bɛranwu amaneɛ kɛmɔ ɔde ye ɛnɛ la? Ɔbayɛ se kɛ yɛbabu nyamenle mɔɔ kulo kɛ menli nwu amaneɛ la. Noko suzu ɛhye anwo: Saa ɛlɛneɛnlea kale kɛnlɛma bie anwo na ɛnwu kɛ ɔ nzi ɛleka bie ɛzɛkye a, asoo ɛbaha kɛ ahenle mɔɔ yɛle kale ne la a yɛle ye zɔhane a? Kyɛkyɛ! Ɛbaha kɛ ahenle mɔɔ yɛle la yɛle ye “boɛ” noko awie anzɛɛ debie yɛɛ ɛzɛkye ye a.

Yemɔti, saa yɛnwu kɛzi bɛbɔle ninyɛne ngɛnlɛma wɔ ewiade na akee yɛnwu basabasayɛlɛ mɔɔ ɛlɛkɔ zo la a, adwenle boni a ɔwɔ kɛ yɛnyia a? Baebolo ne ka kɛ mɔɔ Nyamenle bɔle menli nwiɔ ne mɔɔ bɛlumua la ɛnee bɛdi munli, noko nzinlii bɛzɛkyele bɛ nwo. (Mɛla ne 32:4, 5) Edwɛkpa mɔɔ wɔ ɛkɛ la a le kɛ Nyamenle ɛbɔ ɛwɔkɛ kɛ ɔbali ninyɛne nwo gyima na yeamaa alesama azia ali munli. Noko, duzu ati a yemaa yehyɛ zɛhae ɛ?

Kɛmɔti A Yehyɛ Ɛ?

Mɔɔ ɛmaa yehyɛ la a le ahenle mɔɔ ɔwɔ kɛ ɔsie alesama la. Ɛnee ɔnle Gyihova adwenle nu kɛ alesama banlea bɛ nwo zo. Ɔdaye yɛɛ ɔwɔ kɛ ɔyɛ bɛ Belemgbunli a. Baebolo mumua ne ka kɛ: “Sonla ɔdaye ɔnlɛ ɔ nwo; sonla ɔdaye ɔnlɛ ye ngoane zo tumi.” (Gyɛlɛmaya 10:23) Mɔɔ yɛ alɔbɔlɛ la a le kɛ menli mɔɔ bɛlumua la dwazole tiale Nyamenle tumililɛ. Bɛdonle mɛla yemɔti bɛyɛle ɛtanevolɛma. (1 Dwɔn 3:4) Mɔɔ ɛvi  nu ɛra la a le sinlidɔlɛ nee ngyegyelɛ mɔɔ bɛva bɛra bɛ nwo nee bɛ bo zo amra anwo zo la.

Gyihova ɛmaa alesama adenle bɛli tumi wɔ ɛvolɛ dɔɔnwo anu, noko tetedwɛkɛ ɛmaa yela ali kɛ menli ɛnlɛ tumi ɛnnea bɛ nwo zo. Sonla arane kɔsɔɔti maa menli nwu amaneɛ. Ko bɔbɔ ɛtɛkolale ɛtɛyele konle, amumuyɛ, nzisi anzɛɛ anwodolɛ ɛtɛfile ɛkɛ.

Kɛzi Nyamenle Baziezie Ninyɛne Mɔɔ Ɛzɛkye La Ɛ?

Baebolo ne ka kɛ ɔnrɛhyɛ Nyamenle bamaa ewiade fofolɛ mɔɔ pɛlepɛlelilɛ wɔ nu la ara. (2 Pita 3:13) Bɛdabɛ mɔɔ bɛkulo bɛ mediema nee Nyamenle la ala a bahɔ ɛkɛ ne bie a.—Mɛla ne 30:15, 16, 19, 20.

Eza Baebolo ne ka kɛ Nyamenle baye amaneɛnwunlɛ nee menli mɔɔ fa ba la ɛkɛ wɔ “ndɛnebualɛ kenle ne” mɔɔ ɛbikye la anu. (2 Pita 3:7) Yemɔ anzi, Gyisɛse Kelaese mɔɔ Nyamenle ɛyɛ ye Belemgbunli la bazie alesama mɔɔ yɛ tieyɛ la. (Daneɛle 7:13, 14) Duzu a Gyisɛse tumililɛ ne bayɛ a? Baebolo ne ka kɛ: “Bɛlɛvoma bava azɛlɛ ne ayɛ bɛ ɛdeɛ, na bɛ nye alie bɛ ɛkpazilɛ nwo.”—Edwɛndolɛ 37:11.

Gyisɛse mɔɔ ɛlɛdi tumi wɔ anwuma la baye ngyegyelɛ mɔɔ bie a le anwodolɛ, kpanyinliyɛlɛ, nee ewule la avi ɛkɛ. Ɛhye a vi atua mɔɔ alesama dele tiale Gyihova mɔɔ le “ngoane nzufeanvea” la anu rale a. (Edwɛndolɛ 36:9) Gyisɛse bayɛ bɛdabɛ mɔɔ bɛdie ye tumililɛ kpalɛ ne bɛto nu la kɔsɔɔti ayile. Baebolo ngapezo ɛhye mɔ bara nu wɔ ye tumililɛ ne abo:

▪ “Awie biala mɔɔ wɔ sua ne azo la ɛnrɛha kɛ, ‘Me nwo ɛdo me.’ Bɛbava awie biala mɔɔ wɔ sua ne azo la ɛtane bɛahyɛ ye.”—Ayezaya 33:24.

 ▪ “[Nyamenle bakyikyi] bɛ nye anwo monle. Ewule ɛnle ɛkɛ bieko, monle ɛnle ɛkɛ, nyane ɛnle ɛkɛ, ɛzunlɛ ɛnle ɛkɛ ne bieko. Ɔluakɛ alumua ninyɛne ne mɔ ɛze ɛhɔ.”—Yekile 21:4.

Asoo yɛ nye ɛnlie nwo kɛ ɔnrɛhyɛ Nyamenle bali ye ɛwɔkɛ mɔɔ yebɔ kɛ ɔbaye amaneɛnwunlɛ kɔsɔɔti ɛkɛ la azo ɔ? Noko kɛkala, ɔnle kɛ amaneɛnwunlɛ nwo adenle mɔɔ yemaa la ati yɛ sa nu to wɔ asɔneyɛlɛ nwo.

Nyamenle wɔ ɛkɛ. Ɔte edwɛkɛ biala mɔɔ yɛka la, bɔbɔ nyane mɔɔ yɛdi nee yɛ ɛzunlɛ. Ɔ nye la kɛ yɛbadɛnla aze yɛ nye alie na yɛ adwenle nu keseeyɛlɛ nee amaneɛnwunlɛ kɔsɔɔti avi ɛkɛ.