“Me Nee Bɛ Lua”
“Me Nee Bɛ Lua”
“Menli dɔɔnwo bɛavedevede nu, na ndelebɛbo mɔɔ di munli la babu.”—DAN. 12:4, NW.
KƐZI ƐBAYE Ɔ NLOA Ɛ?
Kɛzi bɛbɔ “ndelebɛbo mɔɔ di munli la” nolo wɔ yɛ mekɛ ye anu ɛ?
Duzu a maa “menli dɔɔnwo” die nɔhalɛ ne di a?
Ndenle boni a bɛlua zo bɛmaa ndelebɛbo mɔɔ di munli la “ɛbu” a?
1, 2. (a) Duzu a maa yɛnwu kɛ Gyisɛse nee ye menli lua ɛnɛ na ɔbahɔ zo ɔ nee bɛ alua ɛ? (b) Kɛmɔ Daneɛle 12:4 kile la, duzu a bavi Ngɛlɛlera ne mɔɔ bɛbazukoa ye kpalɛ la anu ara a?
FA YE kɛ ɛwɔ Paladaese. Nwonlomɔ biala mɔɔ ɛbadwazo la, ɛnee ɛlɛ kpɔkɛdelɛ kpalɛ nee anyelielɛ. Ɛnde nyane biala wɔ ɛ nwo nane nu. Anwodolɛ mɔɔ ɛnee wɔ ɛ nwo la kɔsɔɔti ɛhɔ. Wɔ nvɛyeba ne mɔ mɔɔ maa ɛnwu debie, ɛte edwɛkɛ, ɛte evuanlɛ, ɛsɔ debie nu, nee mɔɔ maa ɛte debie fɛlɛko la amuala yɛ gyima kpalɛ. Ɛlɛ anwosesebɛ, gyima mɔɔ yɛ anyelielɛ, agɔnwolɛma dɔɔnwo, yɛɛ wɔ ngyegyelɛ kɔsɔɔti abo ɛpɛ. Nyilalɛ ɛhye mɔ a ɛbanyia ye wɔ Nyamenle Belemgbunlililɛ ne tumililɛ bo a. Kelaese Gyisɛse, Belemgbunli ne mɔɔ bɛkpa ye la, bayila ye menli na yeava Gyihova anwo ndelebɛbo yeahilehile bɛ.
2 Gyihova nee ye nɔhalɛ azonvolɛ balua wɔ mekɛ mɔɔ bɛlɛyɛ ngilehilelɛ gyima ɛhye wɔ ewiade amuala la. Nyamenle nee ɔ Ra ne nee nɔhavoma ɛlua wɔ ɛvoya dɔɔnwo anu. Kolaa na Gyisɛse ahɔ anwuma la, ɔbɔle ye ɛdoavolɛ nɔhavoma ne ɛwɔkɛ kɛ ɔ nee bɛ balua. (Bɛgenga Mateyu 28:19, 20.) Bɛmaa yɛzuzu ngapezo ko mɔɔ bɛhɛlɛle ye wɔ tete Babelɔn wɔ ɛvolɛ kɛyɛ 2,500 mɔɔ ɛze ɛhɔ anu la anwo, na ɔbamaa anwodozo mɔɔ yɛlɛ la anu amia kpalɛ. Ngapezonli Daneɛle hanle ye wɔ “awieleɛ mekɛ” ɛhye mɔɔ yɛwɔ nu la anwo kɛ: “Menli dɔɔnwo bɛavedevede nu, na ndelebɛbo mɔɔ di munli la babu.” (Dan. 12:4, NW) Edwɛkɛ “bɛavedevede nu” mɔɔ wɔ ngyɛnu ɛhye anu la kile debie mɔɔ bɛneɛnlea nu kpalɛ la. Nea kɛzi nvedenvedenu ɛhye bamaa yɛanyia nyilalɛ dɔɔnwo a! Bɛdabɛ mɔɔ bɛsukoa Ngɛlɛlera ne kpalɛ la bɛanyia Nyamenle Edwɛkɛ ne anu nɔhalɛ ndelebɛbo anzɛɛ ndelebɛbo mɔɔ di munli. Eza ngapezo ne hanle kɛ menli dɔɔnwo bɛalie “ndelebɛbo [ɛhye] mɔɔ di munli la” ali. Bieko, ndelebɛbo ɛhye babu. Bɛbabɔ ye nolo wɔ ɛleka biala. Mekɛ mɔɔ yɛlɛsuzu kɛzi ngapezo ɛhye ɛra nu anwo la, yɛbanwu kɛ Gyisɛse nee ye ɛdoavolɛ ne mɔ lua yɛɛ Gyihova kola maa ɛwɔkɛ mɔɔ yebɔ la kɔsɔɔti ba nu.
“NDELEBƐBO MƆƆ DI MUNLI” LA LALE ALI
3. Mekɛ mɔɔ ɛzoanvolɛ ne mɔ wule la, duzu a rale “ndelebɛbo mɔɔ di munli la” azo a?
3 Menli mɔɔ ɛkpɔkye la vindele Keleseɛne ɛzonlenlɛ ne anu wɔ ɛzoanvolɛ ne mɔ ewule nzi na bɛdɛlɛle ndɛndɛ kɛ senle. (Gyi. 20:28-30; 2 Tɛs. 2:1-3) Ɛvoya dɔɔnwo pɛle nu la, ɛnee menli mɔɔ ɛnze Baebolo ne anwo ɛhwee nee bɛdabɛ bɔbɔ mɔɔ bɛfɛlɛ bɛ nwo Keleseɛnema la ɛtɛnyianle “ndelebɛbo mɔɔ di munli la.” Ɔnva nwo kɛ Keleseɛnemaanle ne mgbanyima hanle kɛ bɛdie Ngɛlɛlera ne bɛdi la, ɛnee bɛkilehile “mbɔnsam ngilehilelɛ.” Ngilehilelɛ ɛhye mɔ ɛnle nɔhalɛ yɛɛ ɔnli Nyamenle eni. (1 Tem. 4:1) Ɛnee menli dɔɔnwo ɛnze sunsum nu ninyɛne nwo ɛhwee. Menli mɔɔ ɛkpɔkye la adalɛ ngilehilelɛ ne bie a le Nsa-ko Nyamenle, ɛkɛla mɔɔ ɛnwu ɛlɛ, yɛɛ abɔnsam senle.
4. Kɛzi Keleseɛnema ekpunli bie bɔle “ndelebɛbo mɔɔ di munli la” ɛkpondɛlɛ bo wɔ 1870 ne anu ɛ?
4 Noko, wɔ ɛvolɛ 1870 ne anu, mekɛ mɔɔ ɔhale ɛvolɛ kɛyɛ abulanla na “awieleɛ mekɛ ne” abɔ ɔ bo la, nɔhalɛ Keleseɛnema ekpunli ekyi bie mɔɔ ɛnee wɔ Pennsylvania, U.S.A. la, yiale nu zukoale Baebolo ne anyebolo zo kpondɛle “ndelebɛbo mɔɔ di munli la.” (2 Tem. 3:1) Ɛnee bɛfɛlɛ bɛ Baebolo Sukoavoma. Tɛ menli ɛhye mɔ a le “nrɛlɛbɛvolɛma nee nwomama” mɔɔ Gyisɛse hanle kɛ bɛbava zɔhane ndelebɛbo ne bɛavea bɛ la. (Mat. 11:25) Bɛle menli mɔɔ ɛnee bɛlɛ bɛ nwo aze na bɛkpondɛ kɛ bɛyɛ Nyamenle ɛhulolɛdeɛ. Bɛvale asɔneyɛlɛ bɛgengale Ngɛlɛlera ne, bɛzuzule nwo na bɛdwenledwenlenle nwolɛ kpalɛ. Eza bɛvale Baebolo ne anu edwɛkɛ bɛtotole nwo na bɛzuzule awie mɔ edwɛkɛ mɔɔ bɛhɛlɛ ye wɔ nwo la anwo. Ngyikyi ngyikyi, Baebolo Sukoavoma ɛhye mɔ ranwunle nɔhalɛ ne mɔɔ ɛnee yeminli wɔ ɛvolɛ dɔɔnwo anu la.
5. Duzu ati a bɛyɛle The Old Theology trate ne ɛ?
5 Ɔnva nwo anyelielɛ mɔɔ Baebolo Sukoavoma ne nyianle wɔ ninyɛne mɔɔ ɛnee bɛlɛsukoa anwo la, bɛamemaa bɛ nwo zo. Bɛnwunle kɛ ninyɛne mɔɔ bɛlɛsukoa la wɔ Baebolo ne anu dɛba yemɔti bɛanga kɛ bɛnyia ngilehilelɛ fofolɛ. (1 Kɔl. 8:1) Emomu, bɛyɛle trate mɔɔ bɛdonle ye duma The Old Theology la bɛdoɔdoale zo. Ɛnee bɛkpondɛ kɛ bɛdua zo bɛmaa kengavoma nwu Ngɛlɛlera ne anu nɔhalɛ ne mɔɔ wɔ Baebolo ne anu la. Trate ne mɔɔ lumua la manle Baebolo sukoavoma “nyianle debie bieko mɔɔ bɛbagenga na yeaboa bɛ yeamaa bɛahoati adalɛ amaamuo mɔɔ vi menli la amaa bɛade yɛ Awulae nee ɛzoanvolɛ ne mɔ ngilehilelɛ ne abo bɔkɔɔ.”—The Old Theology, No. 1, April 1889, m. 32.
6, 7. (a) Ɔvi 1870 ne anu, nɔhalɛ boni mɔ a bɛboa yɛ bɛmaa yɛde ɔ bo a? (b) Nɔhalɛ boni mɔ a wɔzukoa mɔɔ ɛ nye die nwo kpalɛ a?
6 Nea kɛzi nɔhalɛ ngakyile mɔɔ yɛnwu ye wɔ ɛvolɛ mɔɔ bo 100 anu la yɛ azibɛnwo a! * Nɔhalɛ ɛhye mɔ anu la ɛkɛ, na ɔnle debie mɔɔ menli mɔɔ sukoa Nyamenle nee ewiade ne anwo debie la su nwolɛ kpolera a. Bɛmaa yɛ nye die, yɛnyia fanwodi, yɛnwu ɛbɛlabɔlɛ bodane, na yɛnyia anyelazo. Bɛmaa yɛnwu Gyihova subane kɛnlɛma ne nee ye bodane ne mɔ. Eza bɛmaa yɛte gyima mɔɔ Gyisɛse di, deɛmɔti ɔrale azɛlɛ ye azo, ye ewule ne, nee mɔɔ ɔlɛyɛ ye kɛkala la abo kpalɛ. Nɔhalɛ ɛhye mɔ mɔɔ sonle bolɛ la maa yɛnwu deɛmɔti Nyamenle maa ɛtaneyɛlɛ nwo adenle, deɛmɔti yɛwu, kɛzi ɔwɔ kɛ yɛyɛ asɔne, nee mɔɔ saa yɛyɛ a yɛbanyia nɔhalɛ anyelielɛ la.
7 Akee yɛbahola yɛade ngapezo ne mɔ mɔɔ ‘bɛzɔle ɔ nloa’ wɔ ɛvolɛ dɔɔnwo anu na bɛlɛba nu wɔ awieleɛ mekɛ ɛhye anu la abo. (Dan. 12:9) Ɛhye mɔ bie a yɛnwu ye wɔ Ngɛlɛlera ne anu la, titile Edwɛkpa ne mɔ nee Yekile buluku ne. Gyihova ɛboa yɛ yemaa yɛde ninyɛne mɔɔ yɛngola yɛnva yɛ nye yɛnwu bɛ le kɛ Gyisɛse mɔɔ bɛziele ye belemgbunli, konle mɔɔ zile anwuma nee Seetan mɔɔ bɛvuandinle ye bɛdole azɛlɛ ye azo la bɔbɔ abo. (Yek. 12:7-12) Nyamenle eza ɛmaa yɛ nwunu mɔɔ kola maa yɛte deɛmɔti konle, azɛlɛkpusulɛ, ewulenzane, ɛhɔne, nee amumuyɛma ɛbu wɔ “anwongyelelɛ” mekɛ ɛhye anu la abo.—2 Tem. 3:1-5; Luku 21:10, 11.
8. Nwane a ɔwɔ kɛ yɛfa ninyɛne mɔɔ yɛnwu ye nee mɔɔ yɛde la anwo nganvolɛ yɛmaa ye a?
8 Gyisɛse hanle hilele ye ɛdoavolɛ ne mɔ kɛ: “Bɛ nwo ɛyɛ moavolɛ kɛ bɛmɛ bɛnwu ninyɛne mɔɔ bɛnwu bɛ kɛkala la! Meka meahile bɛ kɛ Nyamenle kpɔmanvolɛma nee arelemgbunli dɔɔnwo hulole kɛ anrɛɛ bɛkɛnwu mɔɔ bɛmɛ bɛnwu ye la, noko bɛannwu ye, anzɛɛ bɛkɛde mɔɔ bɛde la, noko bɛande.” (Luku 10:23, 24) Yɛyɛ Gyihova Nyamenle mo kpalɛ kɛ yemaa yɛnwu ninyɛne ɛhye mɔ na yɛde ɔ bo la. Na nea kɛzi yɛ nye die kɛ bɛzoanle “Boavolɛ ne,” Nyamenle sunsum nwuanzanwuanza ne kɛ ɔraye “nɔhalɛ ne amuala” ɔhile Gyisɛse ɛdoavolɛma a! (Bɛgenga Dwɔn 16:7, 13.) Ɔrɛla ye kɛ yɛbahile anyezɔlɛ wɔ ‘ndelebɛbo ɛhye mɔɔ di munli la’ anwo dahuu na yɛaha nwolɛ edwɛkɛ yɛahile!
“MENLI DƆƆNWO” BANYIA “NDELEBƐBO MƆƆ DI MUNLI”
9. Ɛsalɛdolɛ boni a bɛvale bɛmanle wɔ April 1881 magazine ne anu a?
9 Wɔ April 1881 ne anu, ɛnee bɛbɔle Ɛzinzalɛ Arane ne ɛyɛlɛ bo la ɔtɛdwule ɛvolɛ nwiɔ, bɛvale edwɛkɛ bie mɔɔ ɔti se “Yɛkpondɛ Nolobɔlɛma 1,000” la bɛdole gua. Bɛdole ɛsalɛ bɛvɛlɛle menli mɔɔ bɛbahola bɛava bɛ mekɛ ne foa bɛaha edwɛkɛ ne anzɛɛ bɛayɛ adekpakyelɛ la. Bɛmanle bɛ anwosesebɛ kɛ bɛhɔ ɛleka kɔsɔɔti bɛhɔkpondɛ nɔhalɛ Keleseɛnema mɔɔ bɛkulo Nyamenle noko bɛnlɛ ndelebɛbo mɔɔ di munli la na bɛhilehile bɛ Nyamenle nee Baebolo ne anwo nɔhalɛ ne.
10. Duzu a menli yɛle ye wɔ ɛsalɛ mɔɔ bɛdole bɛvɛlɛle bɛ kɛ bɛrayɛ adekpakyelɛma la anwo a?
10 Ɛsalɛdolɛ ne manle ɔlale ali kɛ ɛnee Baebolo Sukoavoma ne ze kɛ nɔhalɛ Keleseɛnema gyima titile a le kɛ bɛbabɔ edwɛkpa ne nolo. Noko adekpakyelɛma 1,000 ne mɔɔ bɛhanle kɛ bɛkpondɛ bɛ la yɛ azibɛnwo ɔluakɛ ɛnee menli ekyi bie ala a ba Baebolo Sukoavoma ayia mɔɔ ɛnee bɛyɛ ye wɔ zɔhane mekɛ ne la abo a. Noko akee, menli dɔɔnwo mɔɔ gengale trate anzɛɛ magazine ne bie la nwunle nɔhalɛ mɔɔ wɔ nu la ndɛndɛ na bɛliele ɛvɛlɛlɛ ne azo. Kɛ neazo la, mekɛ mɔɔ kengavo bie mɔɔ vi London, mɔɔ wɔ England la gengale Ɛzinzalɛ Arane ne nee brohyua bie mɔɔ Baebolo Sukoavoma ne yɛle ye wɔ 1882 ne anu la, ɔhɛlɛle kɛ: “Mesɛlɛ bɛ bɛhile me kɛzi ɔwɔ kɛ meka edwɛkɛ ne nee mɔɔ ɔwɔ kɛ meka la amaa meayɛ gyima ɛhye mɔɔ Nyamenle ɛyila zo na ɔkulo kɛ bɛyɛ la bie.”
11, 12. (a) Bodane boni a yɛ nee dɛba ne adekpakyelɛma kɔsɔɔti lɛ a? (b) Kɛzi tete adekpakyelɛma ne dele “debiezukoalɛ ekpunli” anzɛɛ asafo ɛ?
11 Ɔkadwu 1885 la, ɛnee Baebolo Sukoavoma kɛyɛ 300 ɛlɛyɛ adekpakyelɛ gyima ne bie. Bodane mɔɔ adekpakyelɛma mɔɔ wɔ ɛkɛ ɛnɛ lɛ kɛ bɛmaa menli arayɛ Gyisɛse Kelaese ɛdoavolɛma la bie yɛɛ ɛnee bɛdabɛ noko bɛlɛ a. Noko asolo ndenle mɔɔ bɛluale zo bɛyɛle bɛ gyima ɛdeɛ ne la. Ɛnɛ, yɛ nee awie ko biala sukoa Baebolo ne, na yɛmaa ye adehilelɛ. Akee yɛmaa Baebolo sukoavo ne fa ɔ nwo bɔ asafo ne. Dɛba ne, ɛnee adekpakyelɛma maa mbuluku na bɛboɔboa anyelielɛma anloa bɛmaa bɛsukoa Ngɛlɛlera ne kɛ ekpunli. Kɛ anrɛɛ bɛ nee awie ko biala bazukoa debie la, bɛka bɛ muala bɛbɔ nu bɛyɛ bɛ “debiezukoalɛ ekpunli” anzɛɛ asafo.
12 Kɛ neazo la, wɔ ɛvolɛ 1907 ne anu, adekpakyelɛma ekpunli bie hɔkpondɛle menli mɔɔ bɛlɛ Millennial Dawn (mɔɔ eza bɛfɛlɛ ye Studies in the Scriptures) ne bie la. Ɛzinzalɛ Arane bie bɔ amaneɛ kɛ: “Bɛboɔboale [anyelielɛma] ɛhye mɔ anloa bɛyɛle ayia ekyi wɔ bɛ azua ne mɔ ko anu. Adekpakyelɛnli ne hanle Divine Plan of the Ages anwo edwɛkɛ hilele bɛ wɔ Molɛ ko anu na Molɛ ne mɔɔ doa ye la ɔmanle bɛ anwosesebɛ kɛ bɛyia nu dahuu.” Wɔ 1911 ne anu, mediema ne mɔ yɛle nzenzaleɛ wɔ ngyehyɛleɛ ɛhye anu. Bɛmanle azonvolɛ adenduvoma abulanlu nee mɔtwɛ mɔɔ bɛkpa bɛ la hɔmanle ɛdendɛlɛ wɔ United States nee Canada amuala. Mediema ɛhye mɔ hɛlɛle anyelielɛma mɔɔ radiele ɛdendɛlɛ ne la aluma nee bɛ address na bɛhyehyɛle bɛ kɛ “debiezukoalɛ ekpunli” wɔ awie mɔ azua nu. Ɔkadwu 1914 la, ɛnee bɛnyia Baebolo Sukoavoma asafo 1,200 wɔ ewiade amuala.
13. Duzu ati a “ndelebɛbo mɔɔ di munli” mɔɔ ɛdɛlɛ ɛnɛ la yɛ azibɛnwo ɛ?
13 Ɛnɛ, asafo kɛyɛ 109,400 a wɔ ewiade amuala a, yɛɛ mediema mraalɛ nee mrenya 895,800 sonle kɛ adekpakyelɛma. Kɛkala, menli asɛɛ mgbe mɔtwɛ ɛlie ‘ndelebɛbo ne mɔɔ di munli la’ ɛli, yɛɛ bɛfa bɛbɔ bɛ ɛbɛla. (Bɛgenga Ayezaya 60:22.) * Ɛhye yɛ azibɛnwo ɔluakɛ Gyisɛse hanle kɛ ye duma nu ti “awie biala bakpɔ” ye ɛdoavolɛ ne mɔ. Ɔhanle ɔbokale nwo kɛ bɛbayɛ bɛ kpɔdekpɔde, bɛbava bɛ bɛagua efiade, na bɛahu bɛ bɔbɔ. (Luku 21:12-17) Ɔnva nwo kɛ Seetan, ye sunsum ɛtane ne mɔ, nee alesama kpɔ bɛ la, Gyihova menli ɛli konim dɔɔnwo wɔ bɛ ɛdoavolɛyɛlɛ gyima ne anu. Ɛnɛ, bɛlɛbɔ edwɛkɛ ne nolo wɔ “aleɛabo amuala,” ɔvi ɛhoayelɛ nu ɔkɔdwu ɛleka mɔɔ ɛyɛlɛyɛlɛ kpole wɔ, awoka zo, ɛsɛlɛ zo, azuamgbole nee namunamu zo. (Mat. 24:14) Saa Nyamenle ɛmboka bɛ nwo a, anrɛɛ bɛnrɛhola bɛnrɛyɛ ɛhye.
“NDELEBƐBO MƆƆ DI MUNLI LA BABU”
14. Kɛzi bɛlua mbuluku zo bɛmaa menli dɔɔnwo ɛnyia “ndelebɛbo mɔɔ di munli la” ɛ?
14 Kɛmɔ menli dɔɔnwo ɛlɛbɔ edwɛkpa ne nolo la ati, yemaa “ndelebɛbo mɔɔ di munli la” ɛbu. Eza bɛyɛ nwolɛ mbuluku dɔɔnwo. Baebolo Sukoavoma yele magazine ɛhye mɔɔ lumua la wɔ July 1879 ne anu, na ɛnee duma mɔɔ la zo la a le Zion’s Watch Tower and Herald of Christ’s Presence. Bɛbɔle kɔmpɛlɛ bie ɛkpa bɛmanle ɔyɛle magazine ne 6,000 wɔ Nrelenza aneɛ nu. Charles Taze Russell mɔɔ ɛnee yenyia ɛvolɛ 27 la yɛɛ ɛnee le ye kpanuvolɛ a, na Baebolo Sukoavoma nnu boale ye. Ɛnɛ bɛyɛ Ɛzinzalɛ Arane ne wɔ aneɛ 195 anu. Yemɔ a ɔle magazine mɔɔ bɛyɛ ye dɔɔnwo kpalɛ wɔ azɛlɛ ye azo ɛnɛ a, bɛyɛ ko biala 42,182,000. Mɔɔ doa ye la a le Awake! ne mɔɔ bɛyɛ ko biala 41,042,000 wɔ aneɛ 84 anu la. Bieko, bɛyɛ mbuluku nee Baebolo kɛyɛ mgbe 100 ɛvolɛ biala.
15. Kɛzi bɛtua kakɛ mɔɔ yɛbɔ ye wɔ yɛ mbuluku ne ɛyɛlɛ nwo la ɛ?
15 Bɛfa ndoboa mɔɔ vi ahonle nu la a bɛtua gyima kpole ɛhye anwo kakɛ a. (Bɛgenga Mateyu 10:8.) Ɛhye angome bɔbɔ si menli mɔɔ yɛ mbuluku la anwo, ɔluakɛ ninyɛne mɔɔ bɛfa bɛyɛ mbuluku la awolɛ ɛyɛ se. Adiema nrenya bie mɔɔ ɔtotɔ ninyɛne ɔmaa Bɛtɛlema la hanle kɛ: “Ɔyɛ menli mɔɔ baneɛnlea ɛleka mɔɔ yɛyɛ yɛ mbuluku ne mɔ la azibɛnwo kɛ yɛfa ndoboa mɔɔ yɛnyia ye la ala a yɛyɛ gyima ɛhye la. Eza ɔyɛ bɛ nwanwane kɛ menli mɔɔ yɛ gyima wɔ Bɛtɛle la le mgbavolɛ na bɛ nye die la.”
NYAMENLE ANWO NDELEBƐBO BAYI AZƐLƐ NE
16. Duzu ati a yɛbɔ ‘ndelebɛbo ne mɔɔ di munli la’ nolo a?
16 Bodane kpalɛ bie ati a “ndelebɛbo mɔɔ di munli la” ɛbu a. Nyamenle kpondɛ kɛ “menli kɔsɔɔti nwu nɔhalɛ ne [anzɛɛ “nyia nɔhalɛ ne anwo ndelebɛbo mɔɔ di munli la,” NW] na bɛnyia ngoane.” (1 Tem. 2:3, 4) Gyihova kpondɛ kɛ menli nwu nɔhalɛ ne amaa bɛazonle ye kpalɛ na yeayila bɛ. Gyihova ɛlua “ndelebɛbo mɔɔ di munli” mɔɔ yeva yemaa la azo yeboɔboa Keleseɛnema mɔɔ bɛkpokpa bɛ la mɔhama mɔɔ di nɔhalɛ la anloa. Eza ɔlɛboɔboa “menli pemgbenleamgbe bie” mɔɔ bɛlɛ anyelazo kɛ bɛbadɛnla azɛlɛ ye azo dahuu la anloa yeavi “mbusua, maanle, aneɛ nee menli ngakyile kɔsɔɔti anu.”—Yek. 7:9.
17. Duzu a nɔhalɛ ɛzonlenlɛ mɔɔ ɛlɛnyia anyuhɔlɛ la kile a?
17 Nɔhalɛ ɛzonlenlɛ mɔɔ ɛnyia anyuhɔlɛ wɔ ɛvolɛ 130 mɔɔ ɛze ɛhɔ anu la, maa yɛnwu ye wienyi kɛ amgba Nyamenle nee ye Belemgbunli ne mɔɔ yekpa ye, Gyisɛse Kelaese, nee Gyihova azonvolɛ mɔɔ bɛwɔ azɛlɛ ye azo la lua ɔlua adehilelɛ, banebɔlɛ, nziezielɛ nee ndetelɛ mɔɔ bɛfa bɛmaa bɛ la ati. Anyuhɔlɛ ɛhye mɔɔ bɛnyia la eza maa yɛnwu kɛ ɛwɔkɛ mɔɔ Gyihova ɛbɔ la kɔsɔɔti bara nu. ‘Gyihova anwo ndelebɛbo bayi azɛlɛ ye tɛkɛɛ kɛ nzule mɔɔ wɔ nyevile nu la.’ (Aye. 11:9) Nea nyilalɛ mɔɔ yɛ nwanwane mɔɔ alesama banyia ye kenlebie a!
[Ɔ bo ɛkɛ ne edwɛkɛ ne mɔ]
^ ɛden. 6 Saa ɛnea Jehovah’s Witnesses—Faith in Action, Part 1: Out of Darkness nee Jehovah’s Witnesses—Faith in Action, Part 2: Let the Light Shine DVD ne mɔ a, ɔbaboa wɔ.
^ ɛden. 13 Nea Isaiah’s Prophecy—Light for All Mankind II, mukelɛ 320.
[Debiezukoalɛ kpuyia ne mɔ]
[Nvoninli wɔ mukelɛ 14]
Ɛnee alumua Baebolo Sukoavoma bɛlɛ bɛ nwo aze na bɛyɛ Nyamenle ɛhulolɛdeɛ
[Nvoninli wɔ mukelɛ 15]
Gyihova anye sɔ mɔdenle mɔɔ ɛbɔ ɛtɛlɛ Nyamenle anwo “ndelebɛbo mɔɔ di munli” ne anu la kpalɛ
