Nwanwane Ninyɛne Mɔɔ Ɔnrɛhyɛ Ɔbasisi La

SAA dɔketa bie ka kɛ ɔyɛ wɔ apelehyɛne na ɛte kɛ ɔtɛyɛle zɔhane apelehyɛne ne bie ɛlɛ a, duzu nganeɛ a ɛbade a? Kpolerazulɛ biala ɛnle nwolɛ kɛ ɛzulolɛ baha wɔ. Na saa bɛka bɛkile wɔ kɛ dɔketa ɛhye ze gyima kpalɛ na yeyɛ menli dɔɔnwo apelehyɛne zɔhane bie yemaa bɛde kpɔkɛ noko ɛ? Asoo ɛnrɛnyia anwodozo kɛ ɔbahola yeaboa wɔ ɔ?

Ɔwɔ kɛ bɛyɛ ewiade ɛhye mɔɔ ɛnde kpɔkɛ fee la “apelehyɛne” ndɛndɛ. Gyihova Nyamenle ɛlua ye Edwɛkɛ Baebolo ne azo yebɔ ɛwɔkɛ kɛ ɔbamaa azɛlɛ ɛhye azia ayɛ Paladaese. (2 Pita 3:13) Noko saa ɛhye bayɛ boɛ a, kyesɛ bɛdumua bɛye ninyɛndane bɛfi ɛkɛ bɔkɔɔ. (Edwɛndolɛ 37:9-11; Mrɛlɛbulɛ 2:21, 22) Ɔwɔ kɛ bɛye ninyɛne mɔɔ maa menli di nyane mɔɔ ɛbɔ yɛ ɛyia la kɔsɔɔti ɛkɛ kolaa na paladaese ne ahola ara. Ɔbahyia kɛ bɛyɛ nwanwane debie kolaa na ɛhye ara!—Yekile 21:4, 5.

Gyihova Alasevolɛ die di kɛ ɔnrɛhyɛ nzenzaleɛ mgbole ɛhye mɔ bara. Kɛmɔti ɛ? Ɔluakɛ nwanwane ninyɛne mɔɔ Gyihova Nyamenle ɛyɛ ye dɛba la di daselɛ kɛ ɔlɛ tumi ɔkola ɔmaa ye ɛwɔkɛ ne mɔ ba nu. Maa yɛva nwanwane ninyɛne mɔɔ yeyɛ mɔɔ bɛhɛlɛ ye wɔ Baebolo ne anu la anu nsia pɛ yɛdo ninyɛne mɔɔ yeva yebɔ ɛwɔkɛ kɛ ɔbayɛ ye kenlebie la anwo.

 Kɔ zo sukoa ninyɛne mɔɔ Baebolo ne ka kɛ ɔbara kenlebie la anwo debie. Saa wɔ diedi ne yɛ kpole a, wɔ anyelazo mɔɔ ɛlɛ kɛ ɛbadɛnla aze wɔ mekɛ mɔɔ ɛbanyia nvasoɛ wɔavi nwanwane ninyɛne mɔɔ Gyihova yɛ anu la noko bayɛ kpole.

[Ɛlɛka wɔ mukelɛ 7]

NWANWANE DEBIE:

GYISƐSE VALE KPANWO NEE FƐLƐ EKYI MANLE MENLI APENLE DƆƆNWO LILE BƐ KO YILE.​—MATEYU 14:13-21; MAAKE 8:1-9; DWƆN 6:1-14.

ƐWƆKƐ:

“Azɛlɛ ye ɛhye aleɛ dɔɔnwo ɛmaa yɛ, Nyamenle, yɛ Nyamenle ne, ɛyila yɛ.”—EDWƐNDOLƐ 67:6.

MƆƆ YƐSUKOA YƐFI NU:

ƐHƆNE ƐNRƐHU AWIE BIEKO.

NWANWANE DEBIE:

GYISƐSE DUKUELE ANYENZINLIRAVOLƐMA ANYE.​—MATEYU 9:27-31; MAAKE 8:22-26.

ƐWƆKƐ:

“Anyezinlirama anye badukue.”​—AYEZAYA 35:5.

MƆƆ YƐSUKOA YƐFI NU:

ANYENZINLIRAMA KƆSƆƆTI ANYE BADUKUE.

NWANWANE DEBIE:

GYISƐSE YƐLE BƆTƆVOMA KƆSƆƆTI AYILE.​—MATEYU 11:5, 6; DWƆN 5:3-9.

ƐWƆKƐ:

“Abuburama bawuluwulu kɛ ahɛtɛboɛ.”​—AYEZAYA 35:6.

MƆƆ YƐSUKOA YƐFI NU:

BƆTƆVOMA KƆSƆƆTI ANWO BAZA.

NWANWANE DEBIE:

GYISƐSE YƐLE EWULE DƆƆNWO AYILE.​—MAAKE 1:32-34; LUKU 4:40.

ƐWƆKƐ:

“Na awie biala mɔɔ wɔ sua ne azo la ɛnrɛha kɛ, ‘Me nwo ɛdo me.’”​—AYEZAYA 33:24.

MƆƆ YƐSUKOA YƐFI NU:

BƐBAYE ANWONYANE KƆSƆƆTI ƐKƐ. YƐBANYIA KPƆKƐDELƐ KPALƐ.

NWANWANE DEBIE:

ƐNEE GYISƐSE LƐ ABƆDEƐ MUALA AZO TUMI.​—MATEYU 8:23-27; LUKU 8:22-25.

ƐWƆKƐ:

“Bɛbasisi azua bɛadɛnla nu, bɛbayɛ vanye egyinli na bɛali nuhua ma ne bie. Bɛnrɛvɛ ɛvɛlɛ mgbane.”​—AYEZAYA 65:21, 23.

“Awie ɛnrɛsisi wɔ, yɛɛ ɛnrɛzulo; yɛɛ ɛzulolɛ biala ɛnrɛbikye wɔ.”​—AYEZAYA 54:14.

MƆƆ YƐSUKOA YƐFI NU:

ESIANE ƐNRƐSISI BIEKO.

NWANWANE DEBIE:

GYISƐSE DWAZOLE AWIE MƆƆ ƐNEE YEWU LA.​—MATEYU 9:18-26; LUKU 7:11-17.

ƐWƆKƐ:

“Mɔwuamra amuala bade ɔ ne wɔ bɛ nla ne mɔ anu, na bɛvi bɛ nla ne mɔ anu bɛbavinde.”​—DWƆN 5:28, 29.

“Nyevile kpule menli mɔɔ yeva bɛ la. Ewule nee Ɛbolɔ yele bɛ ɛdeɛ mɔɔ bɛvale bɛziele la vindele.”​—YEKILE 20:13.

MƆƆ YƐSUKOA YƐFI NU:

BƐBADWAZO YƐ ALƆVOLƐ MƆƆ BƐWU LA.