1, 2. (a) Kɛzi Nyamenle lale ɔ nwo ali hilele Yizilayɛ maanle ne ɛ? (b) Kpuyia boni a edwɛkɛ ɛhye babua a?

WƆ Nihɛmaya mekɛ zo, Livaema ekpunli bie hanle bɛ mgbanyima nwo edwɛkɛ wɔ bagua nu nzɛlɛlɛ nu kɛ, “bɛanyɛ tieyɛ” bɛammaa Gyihova mɛla ne mɔ. Noko Gyihova lale ɔ nwo ali fane dɔɔnwo kɛ, ‘Nyamenle mɔɔ ɔfa ɛtane ɔkyɛ, ɔle ɛlolɛ nee ɛhulolɛ, ɔkyɛ na yeava ɛya yɛɛ ye anwunvɔnezelɛ ne le kpole bo zo.’ Gyihova hɔle zo lale anwunvɔnezelɛ ali hilele Nihɛmaya mekɛ zo amra mɔɔ vile akɛlɛzonlenlɛ nu rale la.—Nih. 9:16, 17.

² Yɛ nuhua ko biala bahola abiza ɔ nwo kɛ, ‘Duzu a Gyihova fakyɛ ne kile maa me a?’ Amaa yɛanyia kpuyia ɛhye anwo mualɛ la, bɛmaa yɛzuzu kɛzi Nyamenle nee arelemgbunli nwiɔ—Devidi nee Manasɛ mɔɔ bɛnyianle Gyihova fakyɛ lile la anwo.

3-5. Kɛ ɔrale ye mɔɔ Devidi yɛle ɛtane kpole ɛ?

³ Ɔwɔ nuhua kɛ ɛnee Devidi le awie mɔɔ sulo Nyamenle a, noko ɔyɛle ɛtane mgbole. Ye ɛtane ne nwiɔ fane Batehyɛba nee Yulaya mɔɔ ɛnee bɛle agyalɛma la anwo. Menli mɔɔ ɛtane ɛhye hanle bɛ la kɔsɔɔti lile nyane. Noko akee, adenle mɔɔ Nyamenle luale zo denrɛle Devidi la maa yɛnwu kɛzi Gyihova fakyɛ ne kpole de la. Maa yɛzuzu mɔɔ zile la anwo.

⁴ Devidi zoanle Yizilayɛ ɛlɔnema kɛ bɛhɔbɔ Amɔnoma suakpole Relaba anwo bɛyia. Ɔwɔ Gyɛlusalɛm aduduleɛ kɛyɛ mayɛle 50 (km 80), wɔ Azule Dwɔdan ne anzi. Zɔhane mekɛ ne ɛnee Devidi wɔ ye suakunlu ɛkɛ ne sua ne ati zo wɔ Gyɛlusalɛm, na ɔnwunle Batehyɛba mɔɔ ɔle awuvolɛ raalɛ la kɛ ɔlɛbia. Ɛnee ɔ hu ɛnle ɛkɛ. Mekɛ mɔɔ Devidi nwunle Batehyɛba la ɔ  nye liele ɔ nwo kpalɛ, yemɔti ɔmanle bɛhɔvale ye bɛrale ye suakunlu ɛkɛ na ɔ nee ye zɛkyele agyalɛ.—2 Sam. 11:1-4.

⁵ Mɔɔ Devidi nwunle kɛ Batehyɛba ɛva ɛkolɛ la, ɔzoanle ɔmanle bɛhɔvale ɔ hu Yulaya bɛrale Gyɛlusalɛm mɔɔ ɛnee ɔ nye la kɛ ɔ nee ɔ ye ne bala a. Noko ɔnva nwo mɔdenle biala mɔɔ Devidi bɔle la, Yulaya angɔ sua nu bɔbɔ. Ɛhye ati, belemgbunli ne hɛlɛle kɛlata manle ye ɛlɔnema kpanyinli ne kɛ ɔmaa “Yulaya ɛli ɛlɔne ne anyunlu kpalɛ kpalɛ, [wɔ] ɛleka mɔɔ konle ne anu yɛ se la” na ɔ gɔnwo mɔ sogyama ne ɛhwe bɛ nwo ɛvi ɔ nwo. Kɛmɔ Devidi hyehyɛle la, yeangyɛ kolaa yɛɛ bɛhunle Yulaya a. (2 Sam. 11:12-17) Belemgbunli ne agyalɛzɛkyelɛ ne eza manle ɔhunle awie mɔɔ ɛnze nwolɛ bie la.

6. Duzu a Nyamenle yɛle ye wɔ Devidi ɛtane ne mɔ anwo a, na ɔda duzu ali wɔ Gyihova anwo?

⁶ Nɔhalɛ, Gyihova nwunle debie biala mɔɔ hɔle zolɛ la. Ɔnwu debie biala. (Mrɛ. 15:3) Nzinlii Devidi gyale Batehyɛba ɛdeɛ, noko “[Gyihova] akunlu andwo nyɛleɛ ne anwo.” (2 Sam. 11:27) Duzu a Nyamenle yɛle ye wɔ Devidi ɛtane ne mɔ anwo a? Ɔzoanle ye ngapezonli Neetan wɔ Devidi ɛkɛ. Kɛmɔ fakyɛ wɔ Nyamenle afoa la ati, ɔbayɛ kɛ Gyihova anye liele kɛ ɔnwunle debie mɔɔ ɔbagyinla zo yeaze ye anwunvɔne la. Asoo ɛnnwu ye kɛ adenle ɛhye mɔɔ Gyihova luale zo la ka ahonle ɔ? Yeanga kɛ Devidi ɛha ye ɛtane, emomu, ɔmanle Neetan vale ndonwo bie lile gyima hilele belemgbunli ne kɛzi ye ɛtane ne kpole de la. (Bɛgenga 2 Samoɛle 12:1-4.) Nea adenle kɛnlɛma mɔɔ ɔluale zo ɔlile tɛnlabelɛ ɛsesebɛ ɛhye anwo gyima a!

7. Duzu a Devidi yɛle ye wɔ Neetan ndonwo ne anwo a?

⁷ Neetan ndonwo ne manle belemgbunli ne nwunle kɛ ɔwɔ kɛ bɛfa pɛlepɛlelilɛ bɛdi gyima. Devidi vale sukoavolɛ ne anwo ɛya na ɔzele Neetan kɛ: “Meka tease [Gyihova] kɛ, sukoavolɛ ne mɔɔ bɔle ɛbɛla ɛhye la fɛta ewule.” Eza Devidi hanle kɛ ɔwɔ kɛ bɛsie ninyɛne mɔɔ vile nrenya ne asa la abo zo. Neetan zele ye kɛ, “Sonla zɔhane, yemɔ a le ɛdawɔ.” Edwɛkɛ ne zinle Devidi anwo kpalɛ. Akee bɛhanle bɛhilele Devidi kɛ ɔlua mɔɔ yeyɛ la ati, menli bɛawu “dadeɛ” nloa wɔ ye sua nu yɛɛ munzule bado ye abusua ne. Ɔ nyunlu bagua aze wɔ bagua nu ɔlua ye ɛtane ne ati. Devidi nwunle ye ɛtane ne kpole na ɔlile nyane ɔhanle kɛ: “Meyɛ ɛtane metia [Gyihova].”—2 Sam. 12:5-14.

8, 9. Kɛzi edwɛkɛ mɔɔ wɔ Edwɛndolɛ 51 ne la maa yɛnwu Devidi ahonle nu ɛ, na duzu a ɔmaa yɛnwu ye wɔ Gyihova anwo a?

⁸ Edwɛkɛ mɔɔ Belemgbunli Devidi hanle ye wɔ edwɛne ne mɔɔ ɔhyehyɛle la anu la maa yenwu nyane mɔɔ ɔlile ye wɔ ye ahonle nu la. Edwɛndolɛ 51 ne ka Devidi nzɛlɛlɛ mɔɔ vi ahonle nu mɔɔ ɔvale ɔdole Gyihova anyunlu la anwo edwɛkɛ, yɛɛ ɔda ye ali wienyi kɛ ɔyɛle debie mɔɔ tɛla ye nvonleɛ ne mɔɔ ɔliele ɔdole nu ala la. Eza ɔnlunle ɔ nwo wɔ ye ɛtane nwo. Ɛnee abusuabɔlɛ mɔɔ Devidi nee Nyamenle lɛ la anwo hyia ye kpalɛ. Ɔhanle kɛ, “Wɔmɔ ala yɛɛ mevo wɔ” a. Ɔzɛlɛle Gyihova kɛ: “O Nyamenle, bɔ ahonle mɔɔ anu te la wula me nu, na maa me sunsum fofolɛ mɔɔ gyi kpundii la. . . . Fa wɔ ngoanelielɛ nwo anyelielɛ ne sia bɛlɛ me, na buke wɔ munli nu sɔ me nu.” (Edw. 51:1-4, 7-12) Asoo ɛbuke wɔ ahonle nu ɛka wɔ nvonleɛ ɛkile Gyihova kɛmɔ Devidi yɛle la?

⁹ Gyihova anye ngyegyelɛ mɔɔ vi Devidi ɛtane ne anu rale la anvi ɛkɛ. Ɛnee ɔwɔ  kɛ ɔnwu nwolɛ amaneɛ wɔ ye ngoane mekɛ kɔsɔɔti anu. Noko akee, Gyihova vale Devidi ɛtane hyɛle ye ɔluakɛ ɔnlunle ɔ nwo na ɔnyianle “ahonle bɛlɛvo.” (Bɛgenga Edwɛndolɛ 32:5; Edw. 51:17) Tumivolɛ Nyamenle ne nwu adwenle mɔɔ wɔ ɛtane bie anzi la. Kɛ anrɛɛ ɔbamaa ndɛnebuavolɛma abua agyalɛzɛkyelɛma ne ewule fɔlɛ kɛmɔ Mosisi Mɛla ne kile la, Gyihova mumua ne vile anwunvɔnezelɛ nu vale ɔ nwo liele Devidi nee Batehyɛba edwɛkɛ ne anu. (Sɛlɛ. 20:10) Nyamenle manle bɛ ra Sɔlɔmɔn rayɛle Yizilayɛ belemgbunli mɔɔ li ɛkɛ.—1 Edk. 22:9, 10.

10. (a) Ɔbayɛ kɛ duzu a manle Gyihova vale Devidi ɛtane hyɛle ye a? (b) Ninyɛne boni a Gyihova gyinla zo fa ɛtane kyɛ a?

¹⁰ Bie a debie bieko mɔɔ Gyihova gyinlanle zo vale Devidi ɛtane hyɛle ye la a le kɛzi ɔdaye mumua ne ɔzele Sɔɔlo anwunvɔne la. (1 Sam. 24:4-7) Gyisɛse hilehilele nu kɛ, Gyihova nee yɛ di ye kɛmɔ yɛ nee awie mɔ di la. Gyisɛse hanle kɛ, “Bɛmmabua awie mɔ ndɛne na Nyamenle ambua bɛ ndɛne, ɔboalekɛ ndɛne mɔɔ bɛkɛva bɛkɛbua awie mɔ la yɛɛ Nyamenle bava abua bɛdabɛ noko a, yɛɛ mɔɔ bɛkɛzuzu bɛkɛmaa awie la yɛɛ bɛbanyia ye a.” (Mat. 7:1, 2) Nea kɛzi yɛ nye die kɛ Gyihova fa ɛtane kyɛ a—bɔbɔ ɛtane kpole le kɛ agyalɛzɛkyelɛ anzɛɛ sonlahunlɛ! Saa yɛfa ɛtane yɛkyɛ, saa yɛka yɛ ɛtane, na yɛkakyi yɛ subane bɔkɔɔ a, ɔbava yeahyɛ yɛ. Saa yɛnu yɛ nwo nɔhalɛ nu a, Gyihova bamaa yɛanyia “sunsum nu anwosesebɛ.”—Bɛgenga Gyima ne 3:19, 20.

11. Ndenle boni mɔ azo a Belemgbunli Manasɛ yɛle ɛtane tiale Nyamenle a?

¹¹ Bɛmaa yɛnlea Ngɛlɛlera ne anu edwɛkɛ bieko mɔɔ maa yɛnwu kɛzi Gyihova fi ye ɛhulolɛ nu fa ɛtane kyɛ la. Devidi belemgbunlililɛ ne anzi ɛvolɛ kɛyɛ 360 yɛɛ Manasɛ rayɛle Dwuda belemgbunli a. Ɔyɛle ninyɛndane ngome wɔ ɛvolɛ 55 ne mɔɔ ɔvale ɔlile ebia ne la anu, na ye ninyɛndane ne manle Gyihova vale ɛya. Manasɛ sisile afɔlemokyea manle Beeyale, ɔzonlenle “anwumaneamra ne mɔ amuala,” ɔyelale ɔ mra mrenya ɔbɔle afɔle, yɛɛ ɔyele ngonyia. Ɛhɛe, “ɔyɛle ɛtane kpole ɔtiale [Gyihova].”—2 Edk. 33:1-6.

12. Kɛzi Manasɛ ziale rale Gyihova ɛkɛ ɛ?

¹² Nzinlii, bɛvale Manasɛ bɛdole efiade wɔ Babelɔn. Ɔbayɛ kɛ ɔhakyele edwɛkɛ ɛhye mɔɔ Mosisi hanle hilele Yizilayɛma la wɔ ɛkɛ: “Saa ngyegyelɛ kpole bie ba bɛ nwo zo, na ɛhye mɔ sisi bɛ nwo zo a, bɛzia bɛdoa [Gyihova] bɛ Nyamenle ne, na bɛdie ɔ ne.” (Mɛla 4:30) Manasɛ  amgba ziale hɔle Gyihova ɛkɛ. Adenle boni azo? “Ɔnlunle ɔ nwo” na “ɔzɛlɛle” Nyamenle (kɛmɔ yɛnwu ye wɔ mukelɛ 23 ne la). (2 Edk. 33:12, 13) Yɛnlɛ kɛlɛtokɛ biala mɔɔ maa yɛnwu edwɛkɛ fɔɔnwo ne mɔɔ Manasɛ hanle ye wɔ ye nzɛlɛlɛ ne anu la, noko akee yɛbahola yɛaha kɛ ɔle kɛ Belemgbunli Devidi ɛdeɛ ne mɔɔ ɔwɔ Edwɛndolɛ 51 ne la. Kɛzi ɔde ye biala la, Manasɛ hakyile ye subane bɔkɔɔ.

13. Duzu ati a Gyihova vale Manasɛ ɛtane hyɛle ye a?

¹³ Duzu a Gyihova yɛle ye wɔ Manasɛ nzɛlɛlɛ ne anwo a? “Nyamenle diele [Manasɛ] ɛzunlɛ.” Kɛmɔ Devidi mɔɔ lile ɔ nyunlu yɛle la, Manasɛ nwunle kɛ yeyɛ ɛtane kpole na ɔnlunle ɔ nwo nɔhalɛ nu. Ɛhye ati, Nyamenle vale ye ɛtane hyɛle ye na ɔvale ye ɔziale ɔrale Gyɛlusalɛm ɔmanle ɔralile ye ebia ne. Ɔlua zo, ‘Manasɛ nwunle kɛ Gyihova a le nɔhalɛ Nyamenle ne a.’ (2 Edk. 33:13) Nea kɛzi ɔle arɛlekyekyelɛ kɛ eza yɛnwu ye kɛ yɛ anwunvɔnezelɛ Nyamenle ne fa bɛdabɛ mɔɔ bɛnu bɛ nwo nɔhalɛ nu la ɛtane kyɛ bɛ a!

14. Duzu a bahile kɛ Gyihova bava awie ɛtane ahyɛ ye a?

¹⁴ Ɛnɛ, Nyamenle azonvolɛ ekyi bie ala a bazɛlɛ ɛtanefakyɛ wɔ ɛtane mgbole mɔɔ le kɛ Devidi nee Manasɛ ɛdeɛ ne la anwo a. Noko akee, ɛhulolɛ mɔɔ Gyihova nyianle kɛ ɔbava arelemgbunli nwiɔ ɛhye mɔ ɛtane yeahyɛ bɛ la maa yɛnwu kɛ saa awie yɛ ɛtane mɔɔ anyebolo wɔ nu bɔbɔ la na ɔnu ɔ nwo nɔhalɛ nu a, ɔfa ɔkyɛ ye.

15. Kɛzi yɛkola yɛnwu kɛ Gyihova ɛnva ɛtane ɛngyɛ ɛkɛ ne ala ɛ?

¹⁵ Nɔhalɛ nu, yɛnrɛhola yɛnrɛha kɛ Gyihova fa alesama kɔsɔɔti ɛtane kyɛ bɛ. Ɛhye ati, bɛmaa yɛva Devidi nee Manasɛ nyɛleɛ ne yɛdo Yizilayɛma nee Dwudama anzosesebɛ ɛdeɛ ne anwo yɛnlea. Nyamenle zoanle Neetan wɔ Devidi ɛkɛ amaa yeanyia adenle yeahakyi ye subane. Devidi hilele nwolɛ anyenzɔlɛ. Mɔɔ  Manasɛ nwu amaneɛ la, ɔnlunle ɔ nwo nɔhalɛ nu. Noko akee, fane dɔɔnwo ne ala, Yizilayɛma nee Dwudama anlu bɛ nwo. Ɔlua ɛhye ati, Gyihova anva bɛ ɛtane angyɛ bɛ. Emomu, ɔmanle ye ngapezoma ne hanle bɛ anzosesebɛ nyɛleɛ ne anwo edwɛkɛ mekɛ tendenle. (Bɛgenga Nihɛmaya 9:30.) Mɔɔ Yizilayɛma vile nlɔnu wɔ Babelɔn rale bɛ maanle nu bɔbɔ la, Gyihova hɔle zo zoanle nɔhalɛ soanvolɛma mɔɔ bie a le ɛsɔfo Ɛzela nee ngapezonli Malakae la wɔ bɛ ɛkɛ. Mekɛ mɔɔ menli ne yɛle Gyihova ɛhulolɛdeɛ la, bɛ nye liele kpalɛ.—Nih. 12:43-47.

16. (a) Duzu a dole Yizilayɛma mɔɔ bɛannu bɛ nwo la ɛ? (b) Nwolɛ adenle boni a awie mɔɔ vi tete Yizilayɛ la bahola anyia a?

¹⁶ Mekɛ mɔɔ bɛzoanle Gyisɛse wɔ azɛlɛ ye azo na ɔbɔle ɛkpɔnenlɛ afɔle ne mɔɔ ɔdi munli la ɔwiele la, Gyihova ammaa Yizilayɛma anva nane ambɔ afɔle bieko. (1 Dwɔn 4:9, 10) Mekɛ mɔɔ ɛnee Gyisɛse wɔ azɛlɛ ye azo la, ɔlale adwenle mɔɔ ɔ Ze lɛ la ali wɔ edwɛkɛ ɛhye mɔɔ ɔhanle la anu: “Gyɛlusalɛm, O Gyɛlusalɛm! Mɔɔ ɛku Nyamenle kpɔmanvolɛma, ɛsi menli mɔɔ Nyamenle ɛzoa bɛ wɔ ɛ nwo la awolɛ a! Fane dɔɔnwo yɛɛ mehulo kɛ anrɛɛ menwɔva me sa menwɔbɛla wɔ menli ne amuala kɛ akɔlɛ ɛdane butu ɔ mra anwo zo la, noko wɔammaa me adenle.” Yemɔti Gyisɛse hanle kɛ: “Bɛbakpo wɔ Ɛzonlenlɛ Sua ne bɛamaa yeadɔ mgbane.” (Mat. 23:37, 38) Zɔhane ati, bɛmanle sunsum nu Yizilayɛ ne ragyinlanle maanle mɔɔ bɛyɛle ɛtane na bɛannu bɛ nwo la agyakɛ anu. (Mat. 21:43; Gal. 6:16) Na Yizilayɛ maanle ne anu amra noko ɛ? Saa bie nyia Nyamenle nee Gyisɛse Kelaese afɔle ne anu diedi a, Gyihova baze ye anwunvɔne na yeava ye ɛtane yeahyɛ ye. Gyihova bava nwolɛ adenle ko ne ala amaa menli mɔɔ bɛannu bɛ nwo mɔɔ bɛwule noko bɛdwazo bɛ wɔ ewiade fofolɛ ne anu la.—Dwɔn 5:28, 29; Gyi. 24:15.

17, 18. Kɛ ɔkɛyɛ na yɛanyia Gyihova ɛkɛ ɛtanefakyɛ ɛ?

¹⁷ Duzu a ɔwɔ kɛ yɛyɛ ye wɔ ɛhulolɛ mɔɔ Gyihova lɛ fa ɛtane kyɛ la anwo a? Ɔwɔ kɛ yɛyɛ yɛ debie kɛ Devidi nee Manasɛ la. Ɔwɔ kɛ yɛnwu yɛ ɛtane, yɛnu yɛ nwo, yɛfi ahonle nu yɛsɛlɛ Gyihova ɛkɛ ɛtanefakyɛ, na yɛmaa ɔbɔ ahonle mɔɔ anu te la ɔmaa yɛ. (Edw. 51:10) Saa yɛyɛ ɛtane mɔɔ anyebolo wɔ nu la a, ɔwɔ kɛ yɛkpondɛ sunsum nu moalɛ wɔ mgbanyima ne mɔ noko ɛkɛ. (Gye. 5:14, 15) Ɔnva nwo kɛzi yɛ tɛnlabelɛ ne de la, ɔwɔ kɛ yɛmaa edwɛkɛ ɛhye mɔɔ Gyihova hanle hilele Mosisi la tɛnla yɛ adwenle nu—“mele anwunvɔnezelɛ nee atiakunlukɛnlɛma Nyamenle, menva ɛya mgbane mgbane, yɛɛ ɛhulolɛ kpundii nee nɔhalɛlilɛ ɛyi me tɛkɛɛ. Me ɛhulolɛ kpole ne keda apenle apenle nwo zo. Mefa amumuyɛ, mɛladonlɛ yɛɛ ɛtane mekyɛ.” Gyihova ɛtɛkakyile.—Ade. 34:6, 7.

¹⁸ Gyihova vale ndonwo mɔɔ anu la ɛkɛ la bɔle Yizilayɛma mɔɔ ɛnlu bɛ nwo la ɛwɔkɛ kɛ ɔbaye bɛ ɛtane ne yeavi bɛ nwo bɔkɔɔ na yeamaa mɔɔ ye ɛtane ne le kɛ “ɛbenle” la ayɛ fufule kɛ “ezukɔtweaba.” (Bɛgenga Ayezaya 1:18.) Ɛnee duzu a Gyihova fakyɛ ne kile maa yɛ a? Saa bɛbava yɛ nvonleɛ nee yɛ ɛtane bɛahyɛ yɛ a, ɔwɔ kɛ yɛda nɔhalɛ anlubɛnwo ali.

19. Duzu a yɛbazuzu nwo wɔ edwɛkɛ mɔɔ doa zo la anu a?

¹⁹ Kɛ menli mɔɔ nyia Gyihova ɛkɛ ɛtanefakyɛ la, kɛzi yɛbahola yɛazukoa ye wɔ kɛzi yɛ nee yɛ gɔnwo mɔ di la anu ɛ? Kɛ ɔkɛyɛ na yɛava bɛdabɛ mɔɔ bɛyɛ ɛtane kpole na bɛnu bɛ nwo la ɛtane yɛahyɛ bɛ ɛ? Edwɛkɛ mɔɔ doa zo la bamaa yɛanleɛnlea yɛ ahonle nu na yɛahola yɛayɛ kɛ yɛ Ze Gyihova, mɔɔ ɔle ‘kpalɛ na fakyɛ wɔ ye afoa la.’—Edw. 86:5.