1. Kɛzi bie mɔ bu nyɛvolɛ ɛ, na duzu ati a ɛhye ɛnle kpalɛ ɛ?

MENLI bie mɔ fa edwɛkɛkpɔkɛ ‘ɛyɛvolɛ’ di gyima fa kile kɛ bɛ nye ɛnlie menli ekpunli bie anwo anzɛɛ bɛmbu bɛ. Noko nyɛleɛ ɛhye ɛnle kpalɛ. Nɔhalɛ nu, awie biala ɛnle kpalɛ ɛndɛla ɔ gɔnwo. Buluku bie mɔɔ bɛfɛlɛ ye The Races of Mankind la hanle kɛ: “Kɛmɔ Baebolo ne ka la menli kɔsɔɔti le mediema.” Ɔnva nwo kɛ mediema bahola ayɛ ngakyile la, ɛyɛ ye biala a bɛle mediema.

2, 3. Adwenle boni a Gyihova lɛ ye nyɛvolɛ nwo a?

² Nɔhalɛ, ɔnva nwo ɛleka biala mɔɔ yɛde la, nyɛvolɛ wɔ yɛ avinli. Zɔhane a ɛnee ɔde ye wɔ tete Yizilayɛ a, ɔlua Mɛla ngyekyeleɛ ne ati, bɛ nee Gyihova Nyamenle nyianle agɔnwolɛvalɛ titile bie. Bɛzele Yizilayɛma kɛ ɔwɔ kɛ bɛbu nyɛvolɛ, ɔnva nwo kɛ ɛnee bɛnlɛ nwolɛ adenle bie mɔ la. Ɛhye le neazo kɛnlɛma mɔɔ ɔwɔ kɛ yɛdi zo a! Nɔhalɛ Keleseɛnema ɛnyɛ nyeyenu. Kɛmɔti ɛ? Ɛzoanvolɛ Pita hanle kɛ: “Nɔhalɛ, menwu ye wienyi kɛ Nyamenle bu menli kɔsɔɔti kɛ bɛsɛ. Awie biala mɔɔ sulo ye na ɔdi boɛ la ɔdie ye ɔto nu, yɛɛ ɔnnea ɛleka mɔɔ ɔvi nee maanle holɛ ko mɔɔ ɔvi nu la.”—Gyi. 10:34, 35.

³ Nyɛvolɛ mɔɔ ɛnee wɔ Yizilayɛ la nyianle agɔnwolɛ mɔɔ bɛ nee Yizilayɛma vale la azo nvasoɛ. Ɛhye da adwenle mɔɔ ɛnee Gyihova lɛ ye wɔ edwɛkɛ bie mɔɔ Pɔɔlo hanle ye wɔ ɛvolɛ bie anzi anwo la ali. Ɔbizale ye wɔ Gyihova anwo kɛ: “Nyamenle le Dwuuma angome Nyamenle ɔ? Anzɛɛ ɔnle bɛdabɛ noko mɔɔ bɛnle Dwuuma la Nyamenle ɔ? Kɛmɔti ɛ, ɔle bɛdabɛ noko bɛ Nyamenle!”—Wulo. 3:29; Dww. 2:32.

4. Duzu ati a yɛkola yɛka kɛ yɛnlɛ nyɛvolɛ wɔ ‘Nyamenle Yizilayɛma’ ne anu ɛ?

 ⁴ Ɔlua ngyekyeleɛ fofolɛ ne azo, Keleseɛnema mɔɔ bɛkpokpa bɛ la ɛragyinla nwonane nu Yizilayɛma agyakɛ anu kɛ maanle mɔɔ nee Nyamenle lɛ agɔnwolɛvalɛ titile. Ɛhye ati bɛfɛlɛ bɛ ‘Nyamenle Yizilayɛ.’ (Gal. 6:16) Pɔɔlo hanle maanle fofolɛ ɛhye anu amra anwo edwɛkɛ kɛ, “ansolo bɛdabɛ mɔɔ bɛnle Dwuuma la nee Dwuuma, ansolo menli mɔɔ bɛyɛ bɛ mrenyanu nzonlɛ nee bɛdabɛ mɔɔ bɛtɛyɛle bɛ bie la, ansolo nyɛvolɛ, ansolo menli mɔɔ anye ɛtɛtele, ansolo ahanra, yɛɛ ansolo alehelɛ. Kelaese a le ninyɛne kpokpoti a. Kelaese wɔ ye kpokpoti anu.” (Kɔl. 3:11) Wɔ adenle ɛhye azo, awie biala ɛnle ‘ɛyɛvolɛ’ wɔ Keleseɛnema asafo ne anu.

5, 6. (a) Kpuyia boni a bɛbahola bɛabiza ye wɔ Ayezaya 61:5,6 ne anwo a? (b) Nwane mɔ a le Gyihova ɛsɔfoma nee “nyɛvolɛ” ne mɔ mɔɔ Ayezaya hanle bɛ nwo edwɛkɛ la? (d) Duzu a ekpunli nwiɔ ɛhye mɔ ɛlɛyɛ a?

⁵ Wɔ adenle fofolɛ zo, awie bahola ahwe adwenle ahɔ ngapezo mɔɔ wɔ Ayezaya tile 61 ne mɔɔ ɛra nu wɔ Keleseɛnema asafo ne anwo la azo. Ngyɛnu 6 ne hanle menli mɔɔ bazonle kɛ Gyihova ɛsɔfoma la anwo edwɛkɛ. Ngyɛnu 5 ne noko hanle “nyɛvolɛ” mɔɔ bɛbaboa na bɛ nee “sɛlɛvolɛma” anzɛɛ ɛsɔfoma ne ayɛ gyima la anwo edwɛkɛ. Kɛzi yɛbade ɛhye abo ɛ?

⁶ Yɛte ɔ bo kɛ Gyihova ɛsɔfoma ne a le Keleseɛnema mɔɔ bɛkpokpa bɛ mɔɔ bɛbanyia “alumua ewudwazo ne” mɔɔ bɛbayɛ “Nyamenle nee Kelaese [ɛsɔfoma] na bɛ nee Kelaese ali belemgbunli ɛvolɛ apenle” ne la. (Yek. 20:6) Nɔhalɛ Keleseɛnema dɔɔnwo mɔɔ bɛlɛ anyelazo kɛ bɛbadɛnla azɛlɛ ye azo la noko wɔ ɛkɛ. Menli ɛhye mɔ ɛva bɛ nwo ɛbɔ bɛdabɛ mɔɔ bɛbazonle wɔ anwuma la bɛ nee bɛ ɛlɛyɛ gyima, bɛle nyɛvolɛ wɔ sɛkɛlɛneɛ adenle zo. Bɛfa anyelielɛ bɛboa Gyihova ɛsɔfoma ne bɛso “bɛ ɛya” na bɛte “bɛ vanye egyinli nu ma,” wɔ sɛkɛlɛneɛ adenle zo. Bɛdua edwɛkɛhanlɛ nee nɔhalɛ ne mɔɔ bɛkilehile awie mɔ la azo bɛmaa bɛwula Nyamenle anyunlunyia. Menli mɔɔ bɛkpokpa bɛ la nee “mboane” gyɛne ne kɔkpondɛ menli na bɛfi ɛlɔlɛ nu bɛboa bɛdabɛ mɔɔ bɛkpondɛ kɛ bɛsonle Nyamenle dahuu la.—Dwɔn 10:16.

7. Kɛzi Keleseɛnema mɔɔ bɛwɔ ɛkɛ ɛnɛ la le kɛ Ebileham nee tete nɔhalɛ azonvolɛ ɛ?

⁷ Kɛmɔ yɛnwunle ye wɔ edwɛkɛ mɔɔ li ɛhye anyunlu anu la, nɔhalɛ Keleseɛnema le nyɛvolɛ, anzɛɛ adendulɛma, wɔ Seetan ɛtane ewiade ye anu. Bɛle kɛ nɔhalɛ azonvolɛ mɔɔ dɛnlanle aze wɔ tete ne—mɔɔ Ebileham boka nwo—mɔɔ bɛhanle bɛ nwo edwɛkɛ kɛ “bɛle nyɛvolɛ mɔɔ ɛra nlɔnu wɔ azɛlɛ ɛhye azo” la. (Hib. 11:13) Ɔnva nwo anyelazo mɔɔ yɛlɛ la, yɛ nee Gyihova lɛ agɔnwolɛvalɛ kɛ Ebileham. Gyemise mɔɔ ɛnee boka ɛvoya mɔɔ lumua neazo eku ne anwo la hanle kɛ: “Ebileham liele Nyamenle lile, na ɔlua ye diedi ti Nyamenle liele ye kɛ ɔle sonla tenlene. Na ɔlua zolɛ bɛvɛlɛle Ebileham Nyamenle agɔnwo.”—Gye. 2:23.

8. Ɛwɔkɛ boni a bɛbɔle Ebileham a, na kɛzi ɔdele nganeɛ wɔ nwo ɛ?

⁸ Nyamenle bɔle ɛwɔkɛ kɛ ɔlua Ebileham nee ɔ bo zo amra anwo zo, mbusua kɔsɔɔti mɔɔ wɔ azɛlɛ ye azo la banyia nyilalɛ. (Bɛgenga Mɔlebɛbo 22:15-18.) Ɔnva nwo kɛ ɛnee ɛwɔkɛ ɛhye mɔɔ Nyamenle ɛbɔ la bara nu kenlebie la, Ebileham nyianle anwondozo kɛ ɔbara nu. Asɛɛ ɔvale ye ɛbɛlabɔlɛ ne foa ɔ nee ye abusua ne lile tutɛnla. Ye kɔsɔɔti anzi, Ebileham hɔle zo ɔ nee Gyihova nyianle agɔnwolɛvalɛ.

9, 10. (a) Ndenle boni azo a yɛbahola yɛazukoa Ebileham neazo ne a? (b) Ɛsalɛdolɛ boni a yɛbahola yɛava yɛ nwo yɛawula nu a?

⁹ Ɔnva nwo kɛ ɛnee Ebileham ɛnze mekɛ tendenle mɔɔ ɔwɔ kɛ ɔfa ɔkendɛ ɛwɔkɛ ne la, yeammaa ɛhulolɛ mɔɔ ɔlɛ ɔmaa Gyihova nee ɔ nwo mɔɔ yedu yemaa ye la anu ando. Ɔnleanle ɔ nyunlu fɔɔnwo, yeanyɛ ye adwenle kɛ ɔtɛnla maanle bie anu dahuu. (Hib. 11:14, 15) Nea kɛzi ɔbayɛ kpalɛ kɛ yɛbazukoa Ebileham neazo ne, yɛamaa yɛ ɛbɛlabɔlɛ ayɛ sikalɛ, mɔɔ yɛndwenle nwonane afoa nu ninyɛne, dibilɛ nee gyima mgbole nwo a! Duzu ati a ɔwɔ kɛ yɛsɛkye yɛ mekɛ wɔ ɛbɛlabɔlɛ mɔɔ bɛbu ye kɛ anwondɔlɛ wɔ nu la anwo wɔ ewiade mɔɔ ɔnrɛhyɛ na yeapɛ nu la anu a? Duzu ati a ɔwɔ kɛ yɛkulo ewiade mɔɔ ɔwɔ kɛ mekɛ ekyi bie ala la ɛ? Yɛ nye la debie kpalɛ adenle kɛmɔ ɛnee ɔde ye wɔ Ebileham afoa nu la. Yɛkulo kɛ yɛyɛ kɛ Ebileham la, yɛnyia abotane, yɛkendɛ yɛ anyelazo ne.—Bɛgenga Wulomuma 8:25.

¹⁰ Gyihova ɛlɛto ɛsalɛ avɛlɛ menli mɔɔ vi maanle kɔsɔɔti anu la kɛ bɛlua Ebileham abozonli ne anwo zo bɛralie nyilalɛ. Ɛhye ati, Gyihova ɛsɔfoma ne mɔɔ bɛkpokpa bɛ la nee mboane gyɛne ne mɔɔ bɛle kɛ “nyɛvolɛ” la, ɛlɛto ɛsalɛ avɛlɛ menli mɔɔ ka aneɛ mɔɔ bo 600 la wɔ ewiade amuala.

11. Kɛzi Sɔlɔmɔn hilele kɛ ɔdwenle menli mɔɔ ɛnee bɛnle Yizilayɛma la anwo ɛ?

¹¹ Mekɛ mɔɔ ɔyila ɛzonlenlɛ sua ne azo wɔ ɛvolɛ 1026 K.Y.M., yɛɛ kɛmɔ Gyihova ɛwɔkɛ ne mɔɔ ɔbɔle Ebileham kile la, Sɔlɔmɔn dole ɛsalɛ vɛlɛle menli kɔsɔɔti kɛ bɛye Gyihova ayɛlɛ. Ɔvile ahonle nu ɔzɛlɛle kɛ: “Saa ɛyɛvolɛ mɔɔ ɛnle Yizilayɛnli la te wɔ nganeɛ, nee ninyɛne mgbole mɔɔ wɔyɛ wɔmaa wɔ menli ne mɔ la anwo bie, na ɔba kɛ ɔbazonle wɔ na yeazɛlɛ wɔ Ɛzonlenlɛ Sua ye anu a, tie ye nzɛlɛlɛ. Tie ye wɔ anwuma nehane, ɛleka mɔɔ ɛde la, na yɛ debie biala mɔɔ ɔkpondɛ la maa ye. Ɛhye bamaa menli kɔsɔɔti mɔɔ wɔ aleɛabo la anwu wɔ na bɛazulo wɔ, kɛmɔ Yizilayɛma ɛnwu wɔ na bɛsulo wɔ la.”—1 Arl. 8:41-43.

12. Duzu ati a menli bie mɔ ɛnde mɔɔ Gyihova Alasevolɛ yɛ la abo na bɛbu bɛ kɛ bɛle “nyɛvolɛ” ɛ?

 ¹² Ɛyɛvolɛ a le awie mɔɔ yevi ye maanle nu yehɔdɛnla maanle fofolɛ nu anzɛɛ ɔkanleɛnlea ɛkɛ la. Ɛhye fane Gyihova Alasevolɛ mɔɔ bɛwɔ maanle kɔsɔɔti anu ɛnɛ la anwo. Bɛdie anwuma arane, Nyamenle Belemgbunlililɛ ne mɔɔ Kelaese banlea zo la bɛto nu. Yemɔti, bɛnle afoa biala wɔ maanyɛlɛ nu, saa bɔbɔ menli ɛnde mɔɔ bɛyɛ la abo a.

13. (a) Adenle boni azo a awie mɔ nzuzulɛ ala a maa bɛbu awie kɛ ɔle ‘ɛyɛvolɛ’ ɛ? (b) Mɔlebɛbo ne, asoo ɛnee Gyihova kpondɛ kɛ yɛbu awie kɛ ɔle ɛyɛvolɛ ɔ? Kilehile nu.

¹³ Bɛdua ninyɛne mɔɔ nyɛvolɛ yɛ yɛɛ bɛ nwo mɔɔ anzo la azo a bɛnwu bɛ kpalɛ a. Bie a ɔlua bɛ aneɛ, bɛ amaamuo, kɛzi bɛde, yɛɛ bɛ anwoziezielɛ zo. Noko akee, ninyɛne mɔɔ bɛ nee menli kɔsɔɔti mɔɔ wɔ maanle ne anu bɔ nu yɛ la anwo hyia kpalɛ tɛla ninyɛne ɛhye mɔ anu biala. Yemɔti saa yɛbaha a, bɛbu awie kɛ ɔle ɛyɛvolɛ ɔluakɛ ɔnyɛ ye ninyɛne kɛ menli mɔɔ ɛha la. Saa yɛbu yɛ nye yɛgua kɛzi bɛyɛ bɛ ninyɛne ngakyile la azo a, edwɛkɛkpɔkɛ ‘ɛyɛvolɛ’ ɛnrɛhile ɛhwee. Saa yɛ muala mɔɔ yɛwɔ azɛlɛ ye azo la wɔ arane kokye abo anzɛɛ maanle ko ala anu a, anrɛɛ awie biala ɛnle ɛyɛvolɛ. Yɛɛ Gyihova bodane mɔɔ ɔlɛ ɔmaa alesama la a le kɛ bɛ muala bɛbayɛ abusua ko wɔ ye tumililɛ ne abo. Asoo debie wɔ ɛkɛ kɛkala mɔɔ ɔbamaa menli kɔsɔɔti aye ɛyɛvolɛ nwo adwenle ne avi bɛ ti anu ɔ?

14, 15. Duzu a Gyihova Alasevolɛ kɛ ekpunli la kile nwolɛ anyezɔlɛ a?

¹⁴ Wɔ ewiade mɔɔ angomedi nee maanle nwo ɛhulolɛ ɛbu nu la anu, ɔyɛ anyelielɛ kɛ menli bie mɔ kulo menli mɔɔ bɛwɔ maanle kɔsɔɔti anu la a. Nɔhalɛ nu, ɔdie mekɛ na yɛahola yɛahakyi adwenle mɔɔ yɛlɛ ye menli nwo la. Ted Turner mɔɔ vale CNN tɛlevihyɛne rale la hanle mɔdenle mɔɔ menli mɔɔ bɛvi maanle ngakyile nu bɔ la anwo edwɛkɛ kɛ: “Memanwule menli ɛhye mɔ mɔɔ bɛvi maanle ngakyile nu la kɛ bɛnle ‘nyɛvolɛ’, na bɛle me gɔnwo mɔ maanlema mɔɔ bɛwɔ azɛlɛ ye azo a. Ɔlile mɛla kɛ ɔnle kɛ gyimayɛvoma ne fa edwɛkɛkpɔkɛ ‘ɛyɛvolɛ’ di gyima. Emomu, ɔwɔ kɛ bɛfa edwɛkɛkpɔkɛ ‘ewiade amuala’ a bɛdi gyima a.”

¹⁵ Wɔ ewiade amuala, Gyihova Alasevolɛ kɛ ekpunli la ala a da Nyamenle adwenle ne bie ali a. Bɛbu menli kɛmɔ Gyihova bu bɛ la, na ɔlua zo bɛhakyi adwenle mɔɔ bɛlɛ ye wɔ awie mɔ anwo nee nganeɛ mɔɔ bɛte bɛmaa bɛ la. Bɛmkpɔ menli mɔɔ vi maanle gyɛne zo la anzɛɛ bɛnlɛ adwenle kɛ bɛnrɛhola bɛnrɛlie  nyɛvolɛ bɛnrɛli. Gyihova Alasevolɛ anye die menli mɔɔ bɛnwu bɛ nee anwosesebɛ ngakyile mɔɔ bɛlɛ la anwo. Asoo wɔzuzu mɔɔ ɛhye ɛhola ɛyɛ la anwo nee kɛzi yeboa ɛdawɔ mumua ne wɔ kɛzi ɛ nee awie mɔ di la anu ɔ?

16, 17. Duzu a Yekile 16:16 yɛɛ Daneɛle 2:44 mɔɔ bara nu la kile maa ɛdawɔ mumua ne a?

¹⁶ Ɔnrɛhyɛ, maanle maanle mɔɔ wɔ ɛkɛ ne kɛkala la nee Gyisɛse Kelaese nee ye anwuma ɛlɔne ne baho wɔ Nyamenle tumililɛ ne anwo wɔ konle ne mɔɔ bɛfɛlɛ ye Hibulu nu “Amagɛdɔn” la anu. (Yek. 16:14, 16; 19:11-16) Wɔ ɛvolɛ 2,500 mɔɔ ɛze ɛhɔ la anu, sunsum nwuanzanwuanza ne manle ngapezonli Daneɛle hanle mɔɔ ɔbado ewiade arane mɔɔ bɛko bɛtia Nyamenle bodane la anwo edwɛkɛ kɛ: “Wɔ arelemgbunli ne mɔ mekɛ ne anu, anwuma Nyamenle ne bava belemgbunlililɛ bie azie ɛkɛ mɔɔ bɛnrɛzɛkye ye ɛlɛ a. Na bɛnrɛva belemgbunlililɛ ne bɛnrɛmaa maanle fofolɛ biala. Ɔbazɛkye arelemgbunlililɛ ɛhye mɔ amuala bɔkɔɔ, na yemɔ ɔbadɛnla ɛkɛ ne dahuu.”—Dan. 2:44, NW.

¹⁷ Asoo wɔzuzu mɔɔ ɛhye bahile amaa wɔ la anwo? Adwenle mɔɔ menli mɔɔ wɔ ɛkɛ ɛnɛ lɛ ye wɔ nyɛvolɛ nwo la ɛnrɛdɛnla ɛkɛ bieko. Ngakyile biala mɔɔ ɔbara bɛ anwoziezielɛ anzɛɛ bɛ subane nu la bamaa yɛanwu kɛzi nyamenle abɔdeɛ gua ye ngakyile la. Ɔwɔ kɛ anyelazo kɛnlɛma ɛhye ka yɛ maa yɛyɛ mɔɔ yɛbahola ye yɛ la amuala yɛye Gyihova Nyamenle, yɛ Bɔvolɛ ne ayɛlɛ na yɛdi ye eni.

18. Neazo boni mɔ a kile kɛ bɛnrɛbu awie mɔ kɛ bɛle “nyɛvolɛ” bieko ɛ?

¹⁸ Asoo nrɛlɛbɛ ɛnle nu kɛ yɛbalie yɛali kɛ nzenzaleɛ kpole ɛhye bara ɔ? Kyɛkyɛ, ɔnle zɔ fee. Emomu, ndelebɛbo wɔ nu kɛ yɛbalie yɛali kɛ ɔbara. Gyihova Alasevolɛ mɔɔ wɔ ɛkɛ kɛkala la, ɛmbu awie mɔ kɛ bɛle “nyɛvolɛ”. Kɛ neazo la, kenlensa ye ala bɛva ɔfese mɔɔ wɔ maanle bie mɔ anu la bɛbɔ nu amaa bɛade gyima mɔɔ bɛyɛ ye wɔ ɛkɛ la azo na bɛahola bɛayɛ Belemgbunlililɛ edwɛkɛhanlɛ gyima ne dɔɔnwo. (Mat. 24:14) Maanle ne anu amra ɛngola ɛnzi ɛhye adenle, kyesɛ maanle ne anu mɛla ɛmmaa adenle. Ɛhye le daselɛ bieko mɔɔ ɔkile kɛ ɔnrɛhyɛ Gyisɛse Kelaese mɔɔ Gyihova ɛzie ye Belemgbunli la baye mɔɔ ɔfa menli nu mgbakyemgbakyenu ɔba la ɛkɛ na “yeali konim” bɔkɔɔ!—Yek. 6:2.

19. Duzu a nɔhalɛ ne anwo aneɛ tagyee ne ɛmaa yeyɛ boɛ a?

¹⁹ Gyihova Alasevolɛ bɔ mɔdenle ka aneɛ tagyee ne ɔnva nwo kɛ bɛvi maanle ngakyile nu na bɛka aneɛ ngakyile la. Ɛhye fa koyɛlɛ mɔɔ bɛngola ye sɛkye la ba. (Bɛgenga Zɛfanaya 3:9.) Bɛle ewiade kɔsɔɔti abusua ko mɔɔ bɛde bɛ nwo bɛvi ngyehyɛleɛ ɛtane ɛhye anwo a. Koyɛlɛ mɔɔ wɔ abusua ɛhye avinli la le ewiade fofolɛ ne mɔɔ nyɛvolɛ ɛnle nu la anwo nvoninli. Akee awie biala mɔɔ de aze zɔhane mekɛ ne la banwu kɛ edwɛkɛ mɔɔ The Races of Mankind buluku ne hanle la le nɔhalɛ: “Kɛmɔ Baebolo ne ka la menli kɔsɔɔti le mediema.”