DUZU a Gyihova kpondɛ kɛ bɛdabɛ mɔɔ bɛkulo kɛ bɛsonle ye wɔ adenle kpalɛ zo la yɛ a? Asoo ɔkpondɛ munlililɛ, debie mɔɔ yɛnrɛhola ye yɛ ɔluakɛ yɛnli munli la ati la yeavi yɛ ɛkɛ ɔ? Anzɛɛ yɛbahola yɛayɛ mɔɔ ɔkpondɛ kɛ yɛyɛ la? Saa yɛ nye balie wɔ Nyamenle ɛzonlenlɛ nu a kyesɛ yɛnyia kpuyia ɛhye mɔ anwo mualɛ. Maa yɛzuzu kɛzi ngapezonli Maeka hanle mɔɔ Nyamenle kpondɛ avi yɛ ɛkɛ anwo edwɛkɛ sikalɛ la anwo.—Kenga Maeka 6:8.

‘Yehile wɔ mɔɔ le kpalɛ la.’ Ɔnle kɛ yɛbɔ yɛ ti anu yɛka mɔɔ Nyamenle kpondɛ avi yɛ ɛkɛ la. Yela mɔɔ ɔkpondɛ yeavi yɛ ɛkɛ la ali wienyi wɔ Baebolo ne anu. Mɔɔ Nyamenle kpondɛ avi yɛ ɛkɛ la “le kpalɛ.” Ɔnrɛhola ɔnrɛyɛ debie gyɛne biala. “Nyamenle le ɛhulolɛ,” yemɔti ɔkulo kɛ ɔboa yɛ. (1 Dwɔn 4:8; 5:3) Saa yɛdi ye edwɛkɛ zo a, ɔ nye balie yɛ nwo na yɛanyia nvasoɛ.—Mɛla ne 10:12, 13.

‘Duzu a Gyihova kpondɛ kɛ ɛyɛ a?’ Asoo Nyamenle lɛ adenle kpondɛ debie fi yɛ ɛkɛ? Ɛhɛe! Kɛmɔ Ɔdaye a ɔle yɛ ngoane Nzufeanvea la ati, ɔwɔ kɛ yɛtie ye. (Edwɛndolɛ 36:9) Ɛnee duzu a ɔkpondɛ yeavi yɛ ɛkɛ a? Maeka hanle ninyɛne nsa anwo edwɛkɛ. Nwiɔ ne mɔɔ lumua la fane kɛzi yɛ nee awie mɔ di la anwo titile, yɛɛ mɔɔ tɔ zo nsa la fane agɔnwolɛvalɛ mɔɔ yɛ nee Nyamenle lɛ la anwo.

‘Di pɛlepɛle.’ Buluku bie ka kɛ, Hibulu edwɛkɛkpɔkɛ ne mɔɔ bɛhile ɔ bo “pɛlepɛle” la, eza fane “adenle kpalɛ nee kɛnlɛma mɔɔ yɛbalua zo yɛ nee yɛ kpalɛzoamra ali la anwo.” Nyamenle kpondɛ kɛ yɛdua adenle kpalɛ nee kɛnlɛma zo yɛ nee yɛ gɔnwo mɔ di kɛmɔ ye ngyinlazo ne mɔ kile la. Saa yɛdi pɛlepɛle a, yɛnrɛyɛ nyeyenu, yɛbayɛ mɔɔ tenrɛ, na yɛali nɔhalɛ wɔ debie biala anu. (Sɛlɛvolɛma 19:15; Ayezaya 1:17; Hibuluma 13:18) Yɛ nee awie mɔ di ye adenle kɛnlɛma zo a, bɛdabɛ noko bɛ nee yɛ bɛali ye adenle kɛnlɛma zo.—Mateyu 7:12.

‘Kile ɛhulolɛ kpundii anzɛɛ kulo ahunlunyele.’ Nyamenle anga kɛ yɛyɛ ahunlunyele ala, emomu, eza ɔse yɛhulo. Bɛkola bɛkile Hibulu edwɛkɛkpɔkɛ ne mɔɔ bɛhile ɔ bo “ɛhulolɛ kpundii” la (cheʹsedh) abo kɛ “ahunlunyele” anzɛɛ “nɔhalɛ ɛlɔlɛ.” Baebolo nwo abɔlɔba ko hanle kɛ: “Bɛnrɛhola bɛnrɛhile edwɛkɛkpɔkɛ [cheʹsedh] abo kɛ ɛhulolɛ, anwunvɔnezelɛ anzɛɛ ahunlunyele ala; kyesɛ bɛfa ɔ muala bɛbɔ nu.” Saa yɛkulo ahunlunyele a, yɛfi yɛ ɛhulolɛ nu yɛda ye ali; yɛboa menli mɔɔ hyia moalɛ la. Na ɛhye maa yɛ nye die.—Gyima ne 20:35.

‘Fa mɛlɛbɛnwoaze ɛ nee wɔ Nyamenle ne ɛlua.’ Wɔ Baebolo ne anu, edwɛkɛkpɔkɛ “dua” kile kɛ “ɛfa ɛbɛlabɔlɛ adenle fɔɔnwo bie azo.” Yɛ nee Nyamenle dua ɔlua ɛbɛlabɔlɛ adenle mɔɔ yela ye ali wɔ Baebolo ne anu mɔɔ yɛdi zo la azo. Ɔwɔ kɛ ‘yɛbɛlɛ yɛ nwo aze’ yɛdua adenle ɛhye azo. Kɛzi yɛbayɛ ɛhye ɛ? Saa yɛbɛlɛ yɛ nwo aze yɛmaa Nyamenle a, yɛbalie yɛado nu kɛ yɛtɔ sinli. Yemɔti, ‘ɛbɛlɛ ɛ nwo aze ɛ nee Nyamenle alua’ kile kɛ ɛdie mɔɔ ɔkpondɛ yeavi wɔ ɛkɛ ne la nee mɔɔ ɛbahola ye yɛ la wɔado nu.

Yɛyɛ Gyihova mo kɛ ɔmkpondɛ mɔɔ bo yɛ anwosesebɛ zo la ɔnvi yɛ ɛkɛ a. Ɔ nye sɔ mɔɔ yɛfi ahonle muala nu yɛyɛ ye wɔ ye ɛzonlenlɛ nu la. (Kɔlɔsaema 3:23) Ɔze kɛ yɛsi yɛde la. (Edwɛndolɛ 103:14) Saa yɛfi mɛlɛbɛnwoaze nu yɛdie yɛto nu a, yɛbava anyelielɛ yɛ nee ye alua. Duzu ati a ɛmbɔ mɔdenle ɛnzukoa kɛzi ɛ nee Nyamenle balua la ɛ? Yɛyɛ zɔ a ɔbayila yɛ dɔɔnwo.—Mrɛlɛbulɛ 10:22.