1, 2. (a) Duzu a menli dɔɔnwo suzu kɛ saa awie nyia a ɛnee ɔkile kɛ ye ɛbɛla ɛwie ye boɛ a? (b) Kɛ ɔkɛyɛ na wɔanwu debie mɔɔ ɛgyinla zo ɛbu awie kɛ ye ɛbɛla ɛwie ye boɛ la ɛ?

DUZU a kile kɛ awie ɛbɛla ɛwie ye boɛ a? Saa ɛbiza menli kpuyia ɛhye a, ɛbanwu kɛ bɛ mualɛ ne le ngakyile. Kɛ neazo la, menli dɔɔnwo bu menli mɔɔ bɛnyia ezukoa, bɛlɛ gyima, anzɛɛ bɛzukoa nwoma kpole la kɛ bɛ ɛbɛla ɛwie bɛ boɛ. Bie mɔ noko ka kɛ abusuabɔlɛ kpalɛ mɔɔ wɔ bɛ nee bɛ abusua, bɛ gɔnwo mɔ, anzɛɛ bɛ gyima nu amra avinli la a kile kɛ bɛ ɛbɛla ɛwie bɛ boɛ a. Nyamenle azonvolɛ bɔbɔ bahola anyia adwenle kɛ saa awie lɛ nwolɛ adenle dɔɔnwo wɔ asafo ne anu anzɛɛ ɛzonlenlɛ gyima ne anu a, ɛnee yewie ye boɛ.

² Amaa wɔanwu adwenle mɔɔ ɛlɛ ye wɔ awie mɔɔ ye ɛbɛla ɛwie ye boɛ anwo la, ɛbahola wɔahɛlɛ menli ekyi mɔɔ ɛsuzu kɛ bɛ ɛbɛla ɛwie bɛ boɛ—menli mɔɔ ɛ nye die bɛ nwo na ɛbu bɛ la aluma. Subane titile boni a bɛlɛ a? Bɛlɛ ezukoa anzɛɛ bɛlie duma? Bɛle menli titile ɔ? Mualɛ ne mɔ bamaa wɔanwu mɔɔ ɔwɔ wɔ ahonle nu la, na ɔbahola yeanyia kpɔkɛ mɔɔ ɛsi nee wɔ bodane mɔɔ ɔgyi ɛ nye zo la azo tumi kpole.—Luku 6:45.

3. (a) Duzu a ɛnee ɔwɔ kɛ Dwɔhyua yɛ na ye ɛbɛlabɔlɛ awie ye boɛ a? (b) Duzu a yɛbazuzu nwo kɛkala a?

³ Mɔɔ hyia kpalɛ la a le kɛ Gyihova babu yɛ kɛ yɛ ɛbɛla ɛwie yɛ boɛ, ɔluakɛ ngoane mɔɔ yɛbanyia la gyi ɔ nyunlu ɛlolɛ mɔɔ yɛbanyia la azo. Mekɛ mɔɔ Gyihova fa gyima kpole bie awula Dwɔhyua asa kɛ ɔli Yizilayɛma anyunlu ɔhɔ Ɛwɔkɛ Azɛlɛ ne azo la, ɔhanle ɔhilele ye kɛ ɔgenga Mosisi Mɛla ne “nɔɔzo nee ewiazo” na ɔli edwɛkɛ mɔɔ wɔ nu la azo kpalɛ. Nyamenle bɔle ye ɛwɔkɛ kɛ: ‘Ɛhye bamaa wɔ ɛbɛlabɔlɛ adenrɛ anzɛɛ awie wɔ boɛ na wɔayɛ wɔ ninyɛne nrɛlɛbɛ nu.’ (Dwɔ. 1:7, 8) Ɛze ye noko kɛ Dwɔhyua ɛbɛla wiele ye boɛ. Na yɛdayɛ noko ɛ? Kɛ ɔkɛyɛ na yɛanwu ye saa adwenle mɔɔ yɛlɛ kɛ awie ɛbɛla ɛwie ye boɛ la nee Nyamenle ɛdeɛ ne yia ɛ? Ɛhye ati,  bɛmaa yɛzuzu menli nwiɔ mɔɔ Baebolo ne ka bɛ nwo edwɛkɛ la ɛbɛlabɔlɛ nwo.

4. Duzu ati a yɛkola yɛka kɛ Sɔlɔmɔn ɛbɛla wiele ye boɛ ɛ?

⁴ Wɔ ndenle dɔɔnwo azo, Sɔlɔmɔn ɛbɛla wiele ye boɛ kpalɛ. Duzu ati ɔ? Ɔluakɛ ɔzulole Gyihova mɔɔ ɔyilale ye kpole la na ɔdiele ye wɔ ɛvolɛ dɔɔnwo anu. Kakye kɛ mekɛ mɔɔ Gyihova manle Sɔlɔmɔn bizale debie mɔɔ ɔkulo la, belemgbunli ne bizale nrɛlɛbɛ mɔɔ ɔbava yeanlea menli ne la. Nyamenle vale anwonyia bokale nrɛlɛbɛ ne anwo yilale ye. (Bɛgenga 1 Arelemgbunli 3:10-14.) Ɔnwunle “nrɛlɛbɛ ɔdɛlale nrɛlɛbɛvolɛma mɔɔ wɔ sɛnzɛne aduduleɛ nee Yigyibiti la amuala.” Bɛdele Sɔlɔmɔn nganeɛ wɔ “maanle maanle mɔɔ zuozua ye la kɔsɔɔti anu.” (1 Arl. 4:30, 31) Mɔɔ fane ye agyadeɛ nwo la, ɛnee ɛvolɛ biala ɔ sa ka ezukoa nvutuke mɔɔ bo tone nu kilo apenle ngoko 23! (2 Edk. 9:13) Ɛnee ɔze maanlebulɛ, suazilɛ, nee gualilɛ nye zo kpalɛ. Nɔhalɛ nu, mekɛ mɔɔ Sɔlɔmɔn nee Nyamenle zianle la ye ɛbɛla wiele ye boɛ.—2 Edk. 9:22-24.

5. Duzu a Sɔlɔmɔn hanle ye wɔ menli mɔɔ Nyamenle bu bɛ kɛ bɛ ɛbɛla ɛwie bɛ boɛ la anwo a?

⁵ Edwɛkɛ mɔɔ Sɔlɔmɔn hɛlɛle ye wɔ Nolobɔvo buluku ne anu la maa yɛnwu kɛ ɔliele ɔdole nu kɛ tɛ menli mɔɔ ɛnyia bɛ nwo anzɛɛ ɛlie duma la angome a anye die a. Ɔnle zɔ fee. Ɔhɛlɛle kɛ: “Meze kɛ debie kpalɛ biala ɛnle ɛkɛ ɛmmaa bɛ tɛla kɛ bɛkɛli fɛlɛko na bɛkɛlie bɛ nye wɔ mekɛ mɔɔ bɛde ngoane nu la. Eza ɔle Nyamenle ahyɛlɛdeɛ mɔɔ yeva yemaa sonla kɛ awie biala kɛli kɛnlo na ɔkɛlie ɔ nye wɔ ye ɛvɛlɛ nwo.” (Nolo. 3:12, 13) Bieko, ɔnwunle kɛ saa awie fɛlɛkolilɛ bali munli a, kyesɛ Nyamenle die ye to nu na ɔ nee Ye nyia agɔnwolɛvalɛ kpalɛ. Edwɛkɛ ɛhye mɔɔ Sɔlɔmɔn hanle la le nɔhalɛ. Edwɛkɛ ne adwulaleɛ a le kɛ: “Bɛzulo Nyamenle, na bɛli ye mɛla ne mɔ azo, ɔboalekɛ sonla gyima mɔɔ la ɔ nwo zo la ala ɛne.”—Nolo. 12:13.

6. Duzu a Sɔlɔmɔn neazo ne maa yɛnwu ye wɔ awie mɔɔ ye ɛbɛla ɛwie ye boɛ la anwo a?

⁶ Sɔlɔmɔn zulole Nyamenle na ɔ nee ye luale wɔ ɛvolɛ dɔɔnwo anu. Yɛkenga kɛ ‘ɔlile ɔ ze Devidi mɛla zo, ɔhulole Gyihova.’ (1 Arl. 3:3) Ɛhye kile kɛ ye ɛbɛla wiele ye boɛ, ɔnle zɔ ɔ? Nyamenle manle Sɔlɔmɔn zile ɛzonlenlɛ sua kpole bie mɔɔ bɛbazonle ye wɔ nu la na ɔhɛlɛle Baebolo nu mbuluku ne nsa. Nɔhalɛ nu, yɛnrɛhola yɛnrɛyɛ ninyɛne mɔɔ Sɔlɔmɔn yɛle la. Noko neazo mɔɔ ɔyɛle wɔ mekɛ mɔɔ ɔlile nɔhalɛ ɔmanle Nyamenle la bahola aboa yɛ yeamaa yɛanwu debie mɔɔ awie yɛ a ɛnee ɔkile kɛ ye ɛbɛla ɛwie ye boɛ la na yɛayɛ bie. Yemɔti, kakye kɛ sunsum ne manle Sɔlɔmɔn hɛlɛle mɔɔ menli dɔɔnwo bu ye kɛ ɔmaa awie ɛbɛla wie ye boɛ—anwonyia, nrɛlɛbɛ, duma, nee tumi—la anwo edwɛkɛ kɛ bɛle mgbane. Nɔhalɛ, ninyɛne ɛhye mɔ le mgbane, ɔle kɛ “ɛlɛkye anwoma la.” Ɛtɛyɛle ye nzonlɛ kɛ menli mɔɔ kulo anwonyia la anu dɔɔnwo akunlu ɛndwo bɛ nwo ɔ? Eza bɛta bɛdwenledwenle mɔɔ bɛlɛ ye la anwo. Bieko, kenle ko dedee bɛ anwonyia ne bavi bɛ sa.—Bɛgenga Nolobɔvo ne 2:8-11, 17; 5:10-12.

7, 8.  Adenle boni azo a Sɔlɔmɔn anli nɔhalɛ a, na duzu a vile nu rale a?

⁷ Eza ɛze kɛ awieleɛ bɔkɔɔ ne Sɔlɔmɔn anli nɔhalɛ yɛɛ yeanyɛ tieyɛ. Nyamenle Edwɛkɛ ne ka kɛ: ‘Sɔlɔmɔn yɛle kpanyinli bɔkɔɔ la ye mraalɛ ne mɔ hakyile ye adwenle manle ɔzonlenle maanle zo awozonle. Yeanli nɔhalɛ yeammaa Gyihova ye Nyamenle ne, kɛmɔ ɔ ze Devidi yɛle la. Sɔlɔmɔn yɛle ɛtane tiale Gyihova.’—1 Arl. 11:4-6.

⁸ Gyihova anye anlie mɔɔ Sɔlɔmɔn yɛle la anwo yemɔti ɔhanle kɛ: “Kɛmɔ wɔandie me ne na ɛdawɔ ɛ nye fuu wɔbulu me ngyekyeleɛ nee me mɛla mɔɔ meva memaa wɔ azo la ati, mebalie me maanle ne ɛ sa nu na meava meamaa wɔ sonvolɛma  ne mɔ bie.” (1 Arl. 11:11) Alɔbɔlɛ edwɛkɛ boni ɛne! Ɛnee Sɔlɔmɔn ɛbɛla ɛwie ye boɛ wɔ ndenle dɔɔnwo azo noko nzinlii yeanli nɔhalɛ yeammaa Gyihova. Nɔhalɛ mɔɔ yɛdi yɛamaa Nyamenle la a hyia kpalɛ wɔ ɛbɛlabɔlɛ nu a, noko Sɔlɔmɔn angola ye yɛ. Yɛ nuhua ko biala bahola abiza ɔ nwo kɛ, ‘Asoo mesika me bo kɛ mebava mɔɔ mezukoa ye wɔ Sɔlɔmɔn ɛbɛlabɔlɛ nwo la meali gyima na yeaboa me yeamaa me ɛbɛla awie me boɛ ɔ?’

9. Asoo ewiade ne babu Pɔɔlo kɛ ye ɛbɛla wiele ye boɛ? Kilehile nu.

⁹ Ɛzoanvolɛ Pɔɔlo ɛbɛlabɔlɛ ne le ngakyile kolaa fi Belemgbunli Sɔlɔmɔn ɛdeɛ ne anwo. Pɔɔlo andɛnla belemgbunli ebia zo anzɛɛ ɔ nee arelemgbunli ando ɛsalɛ. Emomu, ɔdwu mekɛ ne bie bɔbɔ a, ɛhɔne, nzuhɔne nee ɛyɛlɛ ku ye, yɛɛ ɔdɛ ɔ nwo zɔ. (2 Kɔl. 11:24-27) Mekɛ mɔɔ Pɔɔlo liele Gyisɛse dole nu kɛ Mɛzaya la, bɛambu ye bieko wɔ Dwuuma ɛzonlenlɛ ne anu. Emomu, Dwuuma ɛzonlenlɛ ne anu mgbanyima kpɔle ye. Bɛdole ye efiade, bɛbilale ye empele, bɛbole ye, na bɛzile ye awolɛ. Pɔɔlo hanle kɛ bɛbɔle ye nee ɔ gɔnwo mɔ Keleseɛnema aholoba, bɛyɛle bɛ kpɔdekpɔde, na bɛguale bɛ nyunlu aze. “Yɛyɛ ewula wɔ ewiade ye anu; ɛnɛ nee ɛnɛ ala yɛle ewiade amra fovolɛ.”—1 Kɔl. 4:11-13.

10. Duzu ati a ɛnee ɔle kɛ asɛɛ Pɔɔlo ɛkpo adenle mɔɔ ɔdua zo a ye ɛbɛla bawie ye boɛ la ɛ?

¹⁰ Mekɛ mɔɔ ɛnee bɛfɛlɛ ɛzoanvolɛ Pɔɔlo Sɔɔlo la, ɛnee ɔle kɛ ninyɛne bahɔ boɛ amaa ye. Kɛmɔ ɔzɔho kɛ bɛwole ye bɛdole abusua kpalɛ nu la ati, kilehilevolɛ mɔɔ ɛnee bɛbu ye kpalɛ, Gameeleɛle yɛɛ hilele ye debie a. Nzinlii ɔhɛlɛle kɛ: “Wɔ me tipɛne ne mɔ anu, biala ɛnle ɛkɛ mɔɔ nee me sɛ wɔ Dwuuma maamɛla ne azo ɛlilɛ nu a.” (Gal. 1:14) Ɛnee Sɔɔlo ze Hibulu nee Giliki kpalɛ, yemɔti bɛmanle ye adenle ɔyɛle Wulomu maanle ne sonla, na ɛhye manle ɔnyianle nwolɛ adenle dɔɔnwo. Ɛhye ati, saa ɔzile kpɔkɛ kɛ ɔkpondɛ ewiade ninyɛne a, anrɛɛ ɔbanyia ninyɛne nee ezukoa dɔɔnwo. Noko, ɔvale adenle mɔɔ ɔ gɔnwo mɔ—bie a ye abusua ne anu amra bɔbɔ—bɛabu ye kɛ nrɛlɛbɛ ɛnle nu la azo. Duzu ati ɔ?

11. Ninyɛne boni mɔ a ɛnee sonle bolɛ kpalɛ maa Pɔɔlo a, na duzu ati ɔ?

¹¹ Ɛnee Pɔɔlo kulo Gyihova na ɛnee ɔkulo kɛ ɔnyia ɔ nyunlu ɛlolɛ tɛla kɛ ɔbanyia anwonyia anzɛɛ duma. Kɛmɔ Pɔɔlo nyianle nɔhalɛ ne anwo ndelebɛbo mɔɔ di munli la ati, ɔnwunle kɛ ɛkpɔnedeɛ ne, Keleseɛnema ɛzonlenlɛ gyima ne, nee anwuma anyelazo ne sonle bolɛ—ewiadeamra dɔɔnwo bu bɛ nye gua ninyɛne ɛhye mɔ azo. Pɔɔlo nwunle kɛ edwɛkɛ bie wɔ  ɛkɛ mɔɔ ɔwɔ kɛ bɛdi nwolɛ gyima. Ɛnee Seetan ɛha kɛ ɔbahola yeahwe menli yeavi Nyamenle anwo. (Dwo. 1:9-11; 2:3-5) Ɔnva nwo sɔnea biala mɔɔ Pɔɔlo hɔle nu la, ɔsikale ɔ bo kɛ ɔbali nɔhalɛ yeamaa Nyamenle. Ɛhye le debie mɔɔ ewiadeamra ɛmbu ye kɛ ɔmaa awie ɛbɛla wie ye boɛ.

12. Duzu ati a wɔva ɛ nye wɔdo Nyamenle anwo zo ɛ?

¹² Wɔsika ɛ bo kɛ Pɔɔlo ɔ? Ɔwɔ nuhua kɛ ɔnla aze kɛ yɛbali nɔhalɛ dahuu ɛdeɛ, noko yɛze kɛ ɔmaa yɛnyia Gyihova nyilalɛ na ɔdie yɛ ɔto nu, na ɛhye a kile kɛ awie ɛbɛla ɛwie ye boɛ amgba a. (Mrɛ. 10:22) Nwolɛ ba yɛ nvasoɛ ɛnɛ, na yɛ nye la kɛ yɛbanyia nyilalɛ kenlebie. (Bɛgenga Maake 10:29, 30.) Ɛhye ati, ɔwɔ kɛ yɛdi edwɛkɛ ɛhye azo: “Bɛmmafa bɛ nye bɛto ninyɛne mɔɔ pɛ nu se kɛ anwonyia la azo, bɛmaa bɛ nye ɛla Nyamenle mɔɔ maa yɛ debie biala molozo mɔɔ yɛfa yɛdie yɛ nye la anwo zo.” Ɔwɔ kɛ ‘yɛkuohua yɛ agyadeɛ mɔɔ bayɛ sua bo ɛdolɛ amaa yɛ wɔ kenle bie, amaa yɛ sa aha ngoane ne mɔɔ le nɔhalɛ ngoane ne la anloa.’ (1 Tem. 6:17-19) Ɛhɛe, yɛbahola yɛanyia anwondozo bɔkɔɔ kɛ wɔ ɛvolɛ ɛya ko anzɛɛ apenle ko anzɛɛ mɔɔ bo zɔ bɔbɔ la anzi, yɛbahakye mɔɔ yɛyɛle la na yɛaha kɛ, “Menvale adenle mɔɔ bamaa me ɛbɛla awie me boɛ la azo amgba!”

13. Anwonyia ɛkpondɛlɛ nwo folɛ boni a Gyisɛse dule a?

¹³ Gyisɛse hanle agyadeɛ nwo edwɛkɛ kɛ: “Bɛmmakpondɛ bɛ anwonyia bɛsie azɛlɛ ye azo, anrɛɛ ɛlɛtɛba nee nrɛnlana kɛzɛkye ye, yɛɛ nwule noko kola wua. Bɛkpondɛ bɛ anwonyia bɛzie anwuma maanle ne anu na ɛlɛtɛba nee nrɛnlana anzɛkye ye, na nwule noko angɔnwua. Bɛnwu ye kɛ ɛleka mɔɔ bɛ anwonyia wɔ la, ɛkɛ ne yɛɛ bɛ ahonle noko wɔ a.”—Mat. 6:19-21.

14. Duzu ati a nrɛlɛbɛ ɛnle nu kɛ yɛbakpondɛ anwonyia wɔ azɛlɛ ye azo ɛ?

¹⁴ Tɛ ezukoa angome a le anwonyia mɔɔ awie bahola anyia ye wɔ azɛlɛ ye azo a. Saa yɛka ye kpalɛ a, bie a le ninyɛne mɔɔ Sɔlɔmɔn hɛlɛle nwolɛ edwɛkɛ kɛ saa awie nyia bie a bɛbu ye kɛ ye ɛbɛla ɛwie ye boɛ wɔ sonla nye zo la—dibelɛ, duma, anzɛɛ tumi. Gyisɛse dole edwɛkɛ ne mɔɔ Sɔlɔmɔn hanle ye wɔ Nolobɔvo buluku ne anu la azo—ewiade anwonyia ɛndɛnla ɛkɛ dahuu. Kɛmɔ bie a wɔyɛ ye nzonlɛ wɔ ewiade ɛhye anu la, anwonyia ɛhye mɔ amuala kola minli. Abɔlɔba F. Dale Bruner hɛlɛle anwonyia ɛhye mɔ anwo edwɛkɛ kɛ duma ɛngyɛ na yeaminli. Awie mɔɔ liele duma anoma la, saa ɛkpondɛ ye ɛhyema a ɛnrɛnwu ye. Ezukoa mɔɔ ɛbanyia ye ɛvolɛ ɛhye anu la, ɛvolɛ bieko ɛnee ɔnza ɛhwee yɛ. Gyisɛse kulo menli. Ɔtu bɛ folɛ kɛ bɛhoati anwobubulɛ mɔɔ anyunlunyia mɔɔ ɛngyɛ na yeapɛ nu fa ba la. Ɔngyɛ. Ɛnee Gyisɛse ɛngulo kɛ ye ɛdoavolɛ ne mɔ asa kɛzi aze. Wɔ mekɛ biala anu, awie mɔɔ kɛra zo fofolɛ la yɛɛ ewiadeamra di ɔ nzi a. Ɔwɔ nuhua kɛ menli dɔɔnwo die edwɛkɛ zɔhane to nu ɛdeɛ, noko bɛ nuhua nyɛ a maa nɔhalɛ mɔɔ ɔwɔ edwɛkɛ ne anu la ka bɛ ɛbɛlabɔlɛ a? Ɛbamaa yeaha wɔ ɛbɛlabɔlɛ ɔ?

15. Duzu a ɔwɔ kɛ yɛbɔ nwolɛ mɔdenle a?

 ¹⁵ Ɛzonlenlɛ nu mgbanyima bie mɔ ɛhilehile kɛ ɔle ɛtane kɛ awie kɛbɔ mɔdenle kɛ ɔmaa ye ɛbɛla awie ye boɛ. Noko, yɛ ye nzonlɛ kɛ, Gyisɛse anga kɛ mɔdenlebɔlɛ kɔsɔɔti le ɛtane. Emomu, ɛnee ɔlɛtu ye ɛdoavolɛ ne mɔ folɛ kɛ bɛbɔ debie mɔɔ ɛnzɛkye la anwo mɔdenle, “bɛkpondɛ bɛ anwonyia bɛzie anwuma.” Debie mɔɔ ɔwɔ kɛ yɛbɔ mɔdenle yɛyɛ la a le kɛ yɛbamaa yɛ ɛbɛla awie yɛ boɛ wɔ Gyihova anye zo. Nɔhalɛ, Gyisɛse edwɛkɛ ne kakye yɛ kɛ yɛdayɛ mumua ne yɛbahola yɛakpa mɔɔ yɛkulo kɛ yɛyɛ la. Noko akee, mɔɔ wɔ yɛ ahonle nu anzɛɛ mɔɔ ɔsonle bolɛ ɔmaa yɛ la yɛɛ yɛbayɛ a.

16. Anwondozo boni a yɛbahola yɛanyia a?

¹⁶ Saa wɔ yɛ ahonle nu, yɛkpondɛ kɛ yɛyɛ mɔɔ Gyihova kulo la a, yɛbanyia anwondozo kɛ ɔbamaa yɛ sa aha ninyɛne mɔɔ yɛhyia nwo la. Bie a ɔbamaa ɛhɔne anzɛɛ nzuhɔne ahu yɛ wɔ mekɛ ekyi bie anu kɛmɔ bie dole ɛzoanvolɛ Pɔɔlo la. (1 Kɔl. 4:11) Noko akee, yɛbahola yɛanyia diedi wɔ Gyisɛse folɛdulɛ kɛnlɛma ɛhye anu: “Bɛmmadwenle kɛ, ‘Duzu yɛɛ yɛbali a,’ anzɛɛ ‘Duzu a yɛbanlo a,’ anzɛɛ ‘Duzu a yɛbaheda a,’ (Ɛhye mɔ le ninyɛne mɔɔ bɛdabɛ mɔɔ bɛnze Nyamenle la a dwenle nwolɛ a.) Bɛ Ze mɔɔ wɔ anwuma la ze kɛ bɛhyia ninyɛne ɛhye mɔ amuala anwo. Bɛbɔ mɔdenle bɛdwenle Nyamenle Belemgbunlililɛ ne nee mɔɔ Nyamenle kpondɛ kɛ bɛyɛ la anwo kpalɛ, na ɔkɛva mɔɔ bɛhyia nwolɛ la ɔkɛmaa bɛ.”—Mat. 6:31-33.

17, 18. (a) Duzu a kile kɛ awie ɛbɛla ɛwie ye boɛ amgba ɛ? (b) Duzu a ɛngile kɛ awie ɛbɛla ɛwie ye boɛ ɛ?

¹⁷ Edwɛkɛ mɔɔ nwolɛ hyia kpalɛ la a le ɛhye: Tɛ ewiade ye yɛɛ ɔwɔ kɛ bu yɛ kɛ yɛ ɛbɛla ɛwie yɛ boɛ a. Bieko, tɛ nwolɛ adenle mɔɔ yɛlɛ ye wɔ Keleseɛnema asafo ne anu la yɛɛ ɔbahile kɛ yɛ ɛbɛla ɛwie yɛ boɛ a. Noko tieyɛ nee nɔhalɛlilɛ a maa yɛnyia nwolɛ adenle ɛhye a. Nyamenle edwɛkɛ ne se: “Debie ko mɔɔ ɔwɔ kɛ sonvolɛ zɛhae yɛ la a le kɛ ɔkɛli nɔhalɛ ɔkɛmaa ɔ menle ne.” (1 Kɔl. 4:2) Ɔwɔ kɛ yɛkɔ zo yɛdi nɔhalɛ. Gyisɛse hanle kɛ: “Mɔɔ kɛgyinla kpundii kɛhɔ awieleɛ la, Nyamenle kɛlie ye ngoane.” (Mat. 10:22) Asoo ɛnlie ɛndo nu kɛ saa awie banyia ngoane a ɛnee ɔkile kɛ ye ɛbɛlabɔlɛ ɛwie ye boɛ ɔ?

¹⁸ Saa ɛdwenledwenle mɔɔ yɛha nwolɛ edwɛkɛ wɔ anwuma ɛke la anwo a, ɛkola ɛnwu kɛ nɔhalɛ mɔɔ yɛdi yɛamaa Nyamenle la ɛngyi duma, nwomazukoalɛ, ezukoa gyinlabelɛ, dibelɛ; anzɛɛ nrɛlɛbɛ, mɔdenlebɔlɛ, anzɛɛ anwosesebɛ zo. Wɔ tɛnlabelɛ biala anu, yɛbahola yɛali nɔhalɛ yɛamaa Nyamenle. Nyamenle menli mɔɔ dɛnlanle aze wɔ ɛvoya ne mɔɔ lumua anu la bie mɔ ɛnee le sukoavolɛ nee ehyiavolɛ. Pɔɔlo dule sukoavolɛma ne folɛ kɛ “ɔwɔ kɛ bɛyɛ nyele, bɛkɔ zolɛ bɛyɛ nyɛleɛ kpalɛ, bɛfa atiakunlukɛnlɛma nee ɛhulolɛ bɛkyɛ debie.” Ɛnee sukoavolɛma ne nee ehyiavolɛma ne kɔsɔɔti bahola anyia “ngoane ne mɔɔ le nɔhalɛ ngoane ne la.” (1 Tem. 6:17-19) Zɔhane ala a ɔde ye ɛnɛ noko a. Yɛ kɔsɔɔti yɛlɛ nwolɛ adenle ko ne ala yɛɛ yɛdi ɛzonle ko ne ala: Ɔwɔ kɛ yɛdi nɔhalɛ na yɛkɔ zolɛ yɛyɛ “nyɛleɛ kpalɛ.” Saa yɛyɛ zɔ a, yɛ Bɔvolɛ ne babu yɛ kɛ yɛ ɛbɛla ɛwie yɛ boɛ na yɛ nye balie kɛ yɛlɛyɛ mɔɔ ɔkulo la.—Mrɛ. 27:11.

19. Duzu a wɔsika ɛ bo kɛ ɛyɛ ye wɔ ɛbɛlabɔlɛ nu amaa yeawie wɔ boɛ a?

¹⁹ Bie a ɛnrɛhola ɛnrɛli wɔ ngyegyelɛ nwo gyima bɔkɔɔ, noko ɛbahola wɔahomo ɛ nwo zo. Ɔnva nwo tɛnlabelɛ biala mɔɔ ɛwɔ nu la, bɔ mɔdenle di nɔhalɛ. Ɛhɛe, ɔwɔ kɛ ɛbɔ mɔdenle. Nyia anwondozo kɛ Gyihova bayila wɔ ɛnɛ nee mekɛ mɔɔ ɛnlɛ awieleɛ. Mmamaa ɛ rɛle fi edwɛkɛ ɛhye mɔɔ Gyisɛse hanle hilele Keleseɛnema mɔɔ bɛkpokpa bɛ la ɛlɛ: “Di nɔhalɛ maa me, bɔbɔ kɔdwu ewule nu, na mebabɔ wɔ ngoane abɔtile.” (Yek. 2:10) Ɛhye a bahile kɛ awie ɛbɛla ɛwie ye boɛ amgba a!