Kpuyia 2: Saa Mewu A Mebahɔ Ni?
ƐNEE Roman le kakula nrenya ekyii bie wɔ mekɛ mɔɔ kale bie bɔle ɔ gɔnwo kpalɛ hunli ye la. Ɔhanle kɛ, “Me gɔnwo ne ewule ne manle menlile nyane kpalɛ. Ɛvolɛ dɔɔnwo mɔɔ esiane ne zile la anzi, membizale kɛ saa yɛwu a yɛkɔ ni.”
Duzu ati a kpuyia ɛhye anwo hyia ɛ?
Alesama ewule yɛ azibɛnwo. Ɔnva nwo ɛvolɛ mɔɔ yɛli la, yɛngulo kɛ yɛbawu. Menli dɔɔnwo sulo mɔɔ ba wɔ ewule nzi la.
Mualɛ boni a bie mɔ fa maa a?
Menli dɔɔnwo die di kɛ saa sonla wu a debie bie wɔ ye nu mɔɔ ɔkɔ zo ɔtɛnla ngoane nu a. Bɛdie bɛdi kɛ sonla kpalɛ kɔ anwuma yɛɛ bɛkile ɛtanevolɛ nyane dahuu wɔ ye ɛtane ti. Bie mɔ noko suzu kɛ sonla ɛndɛnla aze bieko wɔ ye ewule nzi yemɔti awieleɛ kolaa ne bɛ rɛle fi ye bɔkɔɔ.
Duzu a mualɛ ɛhye mɔ maa yɛnwu ye a?
Mualɛ mɔɔ lumua la kola maa yɛnyia adwenle kɛ sonla wu a ɛnee ɔtɛwule. Mɔɔ tɔ zo nwiɔ la kile kɛ bodane biala ɛnle ɛbɛlabɔlɛ nu. Menli mɔɔ die di kɛ bodane biala ɛnle ɛbɛlabɔlɛ nu la die nzuzulɛ ɛhye to nu: “Bɛmaa yɛli na yɛnlo, ɔluakɛ ɛhyema ɛnee yɛwu.”—1 Kɔlentema 15:32.
Duzu a Baebolo ne kilehile a?
Baebolo ne ɛngilehile kɛ sonlabaka ne foa bie kɔ zo tɛnla aze wɔ sonla ewule nzi. Nyamenle manle Belemgbunli Sɔlɔmɔn hɛlɛle kɛ: “Anyewɔzoamra ze kɛ bɛbawu, na mɔwuamra ɛnze ɛhwee.” (Nolobɔvo ne 9:5) Menli mɔɔ “ɛnze ɛhwee” la ɛnze bɛ nzi edwɛkɛ. Bɛnde nganeɛ anzɛɛ bɛngola bɛnyɛ gyima biala. Yemɔti mɔwuamra ɛngola ɛmboa anzɛɛ ɛmboda anyewɔzoamra.
Mɔɔ ɔ nee zɔhane diedi ne ɛnnyia la, Nyamenle ambɔ sonla kɛ ɔwu. Ɔbɔle Adam, sonla mɔɔ ɔlumua la kɛ ɔdɛnla aze dahuu wɔ azɛlɛ ye azo. Mekɛ mɔɔ lumua mɔɔ Nyamenle hanle ewule nwo edwɛkɛ la a le mekɛ mɔɔ ɔhanle anzosesebɛ nwo ndeanlɛ ne ɔhilele Adam la. Ɔduale Adam kɛ ɔmmadi bakama bie na ɔbɔle ye kɔkɔ kɛ saa ɔdi a ‘ɔbawu.’ (Mɔlebɛbo 2:17) Saa Adam nee Yive yɛle tieyɛ a, anrɛɛ bɛ nee bɛ bo zo amra mɔɔ di nɔhalɛ maa Nyamenle la kɔsɔɔti badɛnla aze dahuu.
Adam andie Nyamenle kɔkɔbɔlɛ ne. Ɔyɛle ɛtane wɔ mekɛ mɔɔ ɔyɛle Nyamenle anwo anzosesebɛ la, yemɔti ɔwule. (Wulomuma 6:23) Adam sonlabaka ne foa bie angɔ zo andɛnla aze wɔ ye ewule nzi. Emomu, ɛnee Adam ɛnle ɛkɛ bieko wɔ ye ewule nzi. Nyamenle zele Adam kɛ: “Ɛbahwi ɛ ti anwo na wɔanyia aleɛ wɔali, kɔkpula mekɛ mɔɔ ɛkɛzia ɛkɛhɔ azɛlɛ ye anu bieko la, ɔluakɛ nuhua yɛɛ ɛvi ɛrale a; ɛle ndɛtɛlɛ na ɛbazia wɔahɔ ndɛtɛlɛ nu.” (Mɔlebɛbo 3:19) Ɛtane wɔ alesama amuala anwo na bɛwu ɔluakɛ bɛvi Adam anu.—Wulomuma 5:12.
Ɔnva nwo kpɔkɛ ɛtane mɔɔ Adam bɔle la, Nyamenle bali Ye bodane nwo gyima yeamaa Adam abo zo amra ayi azɛlɛ ye. (Mɔlebɛbo 1:28; Ayezaya 55:11) Ɔnrɛhyɛ, Gyihova badwazo mɔwuamra dɔɔnwo. Ɛzoanvolɛ Pɔɔlo ka zɔhane mekɛ ne anwo edwɛkɛ la, ɔhanle kɛ: “Menli kɔsɔɔti, ɛtanevolɛma nee kpalɛyɛlɛma badwazo ara ngoane nu.”—Gyima ne 24:15.
