Asoo ewule lɛ tumi tɛla Nyamenle? Kyɛkyɛ! Kɛzi ewule—anzɛɛ “kpɔvolɛ” gyɛne bie—kola nyia tumi tɛla “Tumivolɛ [Bedevinli] Nyamenle” ne ɛ? (1 Kɔlentema 15:26; Adendulɛ 6:3) Nyamenle bava ye tumi ne alua ewudwazo ne azo aye ewule avi ɛkɛ, na yebɔ ɛwɔkɛ kɛ ɔbayɛ ye zɔ pɛpɛɛpɛ wɔ ye ewiade fofolɛ ne anu. * Kɛzi zɔhane ɛwɔkɛ ne bayɛ nɔhalɛ ɛ? Nyamenle ara ne, mɔɔ le Gyisɛse la, vale edwɛkɛ mɔɔ maa yɛnyia anyelazo la hanle nwolɛ edwɛkɛ hilele yɛ.—Kenga Mateyu 22:31, 32.

Mekɛ mɔɔ Gyisɛse ɛlɛtendɛ ahile Sadusiima mɔɔ bɛnlie ewudwazo ne bɛnli la, ɔhanle kɛ: “Bɛtɛkengale mɔɔ Nyamenle ɛha, mɔɔ fane mɔwuamra ɛdwazolɛ nwo la ɛlɛ ɔ? Ɔse, ‘Mame a mele Ebileham Nyamenle ne, Ayezeke Nyamenle ne, nee Gyekɔbo Nyamenle ne a.’ Ɛhye kile kɛ ɔle teasema Nyamenle, na ɔnle mɔwuamra Nyamenle.” Wɔ ɛke, Gyisɛse hwenle adwenle hɔle adwelie mɔɔ Nyamenle nee Mosisi lile wɔ kpɔkɛ ne mɔɔ ɛlɛsɔ la azo wɔ ɛvolɛ kɛyɛ 1514 K.Y.M. (Adendulɛ 3:1-6) Kɛmɔ Gyisɛse hilele la, Gyihova edwɛkɛ mɔɔ ɔhanle ɔhilele Mosisi kɛ—“Mame a mele Ebileham Nyamenle ne, Ayezeke Nyamenle ne, nee Gyekɔbo Nyamenle ne” la—kile kɛ ewudwazo ɛwɔkɛ ne bara nuhua bɔkɔɔ. Adenle boni azo?

Mɔɔ lumua la, suzu edwɛkɛ ne anwo. Mekɛ mɔɔ Gyihova nee Mosisi dendɛle la, ɛnee tete selɛma Ebileham, Ayezeke nee Gyekɔbo ɛwu dɛbadɛba—Ebileham ɛwu ɛvolɛ 329, Ayezeke ɛvolɛ 224, yɛɛ Gyekɔbo ɛvolɛ 197. Noko, Gyihova hanle kɛ “mame a mele”—yeanga kɛ ‘mame a ɛnee mele’—bɛ Nyamenle a. Gyihova hanle tete selɛma nsa ne anwo edwɛkɛ kɛ asɛɛ bɛde aze la. Kɛmɔti ɛ?

Gyisɛse hilehilele nu kɛ: ‘Gyihova le teasema Nyamenle, na ɔnle mɔwuamra Nyamenle.’ Gyinla ekyii na suzu mɔɔ zɔhane edwɛkɛ ne kile la anwo. Saa ewudwazo ɛnle ɛkɛ a, anrɛɛ Ebileham, Ayezeke nee Gyekɔbo bala ewule nu dahuu. Saa ye zɔhane a, anrɛɛ Gyihova bayɛ avunli Nyamenle. Na yemɔ bahile kɛ ewule lɛ tumi tɛla Gyihova—kɛ asɛɛ ɔnlɛ tumi mɔɔ ɔkola ɔfa ɔdie ye nɔhalɛ azonvolɛ ɔfi ewule sa nu la.

Ɛnee edwɛkɛ boni a yɛbaha ye wɔ Ebileham, Ayezeke, Gyekɔbo yɛɛ Gyihova nɔhalɛ azonvolɛ kɔsɔɔti mɔɔ bɛwu la anwo a? Gyisɛse hanle edwɛkɛ ɛhye mɔɔ tumi wɔ nu la kɛ: “Ɔ nye zo a bɛ muala bɛde ngoane nu.” (Luku 20:38) Nɔhalɛ nu, bodane mɔɔ Gyihova lɛ kɛ ɔbadwazo ye nɔhalɛ azonvolɛ la bara nu bɔkɔɔ yemɔti ɔbu bɛ kɛ bɛde ngoane nu. (Wulomuma 4:16, 17) Gyihova bahakye menli ɛhye mɔ wɔ ye ngakyelɛ ne mɔɔ di munli la anu kɔkpula kɛ ye mekɛ badwu kɛ ɔbava bɛ yeara ngoane nu la.

Asoo ɛ nye die anyelazo mɔɔ kile kɛ ɛbazia wɔanwu wɔ alɔvolɛ mɔɔ bɛwu la anwo? Saa ɔle zɔ a, ɛnee kakye kɛ, Gyihova lɛ tumi tɛla ewule kolaa. Debie biala ɛnrɛhola ɛnrɛzɛkye ɛwɔkɛ mɔɔ yebɔ kɛ ɔbadwazo mɔwuamra la. Kɛmɔti a ɛnzukoa ewudwazo ɛwɔkɛ ne nee Nyamenle ne mɔɔ bamaa yeayɛ zɔ la anwo ninyɛne dɔɔnwo ɛ? Ɛyɛ zɔ a ɔbamaa wɔabikye Gyihova, “teasema Nyamenle” ne kpalɛ.