GYISƐSE ewudwazo ne ɛnle debie mɔɔ zile tete ne ala mɔɔ ɔngile ɛhwee ɔmmaa yɛ ɛnɛ a. Ɛzoanvolɛ Pɔɔlo hilele nvasoɛ mɔɔ wɔ zo wɔ mekɛ mɔɔ ɔhɛlɛle kɛ: ‘Nɔhalɛ ne a le kɛ Nyamenle ɛdwazo Kelaese ɛvi ewule nu, kɛ bɛdabɛ mɔɔ bɛla wɔ ewule nu la anu ma mɔɔ lumua. Ɔluakɛ kɛmɔ ewule luale sonla ko anwo zo a rale la, zɔhane ala yɛɛ ewudwazo ne balua sonla ko anwo zo ara a. Kɛmɔ menli kɔsɔɔti dua Adam anwo zo wu la, zɔhane ala yɛɛ Nyamenle balua Kelaese anwo zo adwazo bɛ muala ara ngoane nu a.’—1 Kɔlentema 15:20-22.

Bɛdwazole Gyisɛse wɔ Naesan 16, 33 Y.M., wɔ kenle ne mɔɔ nuhua a Dwuuma fa bɛ abɛlɛ ma mɔɔ bɛkɛlumua bɛkɛbu la bɛlɛ Gyihova Nyamenle wɔ ye ɛzonlenlɛ sua ne anu wɔ Gyɛlusalɛm la. Kɛmɔ Pɔɔlo vɛlɛle Gyisɛse ma mɔɔ lumua la ati, ɛnee ɔkile kɛ bɛbadwazo menli gyɛne noko bɛavi ewule nu.

Edwɛkɛ bieko mɔɔ Pɔɔlo hanle la maa yɛnwu mɔɔ bɛbalua Gyisɛse ewudwazo ne azo bɛayɛ la. Pɔɔlo hanle kɛ, ‘kɛmɔ ewule luale sonla ko anwo zo a rale la, zɔhane ala yɛɛ ewudwazo ne balua sonla ko anwo zo ara a.’ Kɛmɔ Adam vale ɛtane nee sinlidɔlɛ wole yɛ la ati, yɛ muala yɛwu. Noko akee, ɔluakɛ Gyisɛse vale ye dasanli ngoane mɔɔ di munli la manle kɛ ɛkpɔnedeɛ la ati, ɔbukele adenle mɔɔ bɛbalua zo bɛalie alesama bɛavi ɛtane nee ewule akɛlɛzonlenlɛ nu ɔlua ewudwazo mɔɔ bɛbanyia la azo. Pɔɔlo hanle edwɛkɛ ne sikalɛ kɛnlɛma wɔ mekɛ mɔɔ ɔhɛlɛle ye wɔ Wulomuma 6:23 la kɛ: “Ɛtane ahatualɛ a le ewule, na Nyamenle ahyɛlɛdeɛ ne mɔɔ ɔfa ɔmaa mgbane la a le ngoane mɔɔ ɛnlɛ awieleɛ wɔ yɛ Awulae Kelaese Gyisɛse ati.”

Gyisɛse mumua ne hilehilele mɔɔ ye ewule nee ye ewudwazo ne kile maa yɛ la anu. Ɔhanle ɔ nwo edwɛkɛ kɛ: ‘Bɛbamaa Sonla Ra ne zo, amaa awie biala mɔɔ kɛlie ye kɛli la anwu na yeanyia ngoane mɔɔ ɛnlɛ awieleɛ. Ɔluakɛ Nyamenle hulole ewiade amra kpole kpalɛ la ati yɛɛ ɔvale Ɔ Ra kokye ne ɔmanle a, amaa awie biala mɔɔ kɛlie ye kɛli la anwu na yeanyia ngoane mɔɔ ɛnlɛ awieleɛ.’—Dwɔn 3:14-16.

Dwenle nwolɛ nea—dahuu ngoane mɔɔ nyane, amaneɛnwunlɛ anzɛɛ alɔbɔlɛlilɛ ɛnle nu la! (Yekile 21:3, 4) Anyelazo kɛnlɛma boni ɛ! Nwomanli bie hanle ye zɛhae: “Kɛmɔ azie zo kakye sonla kɛ ngoane le mekɛ ezinra la, ewudwazo ne maa ɔnwu kɛ ewule le mekɛ ezinra.” Ɛhɛe, Gyisɛse ewudwazo ne kile dahuu ngoane!