FA YE kɛ ɛlɛ ɛ gɔnwo bie mɔɔ ɛ nye die ɔ nwo kpole, na yeyɛ debie mɔɔ ɛnde ɔ bo la. Awie mɔ ɛdendɛ ɛtia ye nyɛleɛ, bɛbu ye kɛ ɔnlɛ adwenle kpalɛ, na bɛka kɛ ɛ gɔnwo ne ati yɛ se. Ɛbalie wɔado nu ɛkɛ ne ala, anzɛɛ ɛbahendɛ wɔadie mɔɔ ɛ gɔnwo ne baha la? Saa ɔnle ɛkɛ na yeahilehile nu a, ɛbazi abotane na wɔanyia ɔ nwo adwenle kpalɛ ɔ?

Kolaa na wɔabua la, bie a ɛbahulo kɛ ɛbanwu edwɛkɛ ne anu kpalɛ. Bie a ɛbabiza kɛ, ‘Kɛzi meze agɔnwolɛ ɛhye kpalɛ ɛ, na duzu a maa me nye die ɔ nwo a?’ Ɔle kpalɛ bɔkɔɔ. Noko suzu nwolɛ nea: Asoo yɛnrɛhola yɛnrɛva ngyinlazo ko ne ala yɛnrɛli gyima wɔ edwɛkɛ ɛhye mɔɔ bɛbiza kɛ Nyamenle ati yɛ se anzɛɛ ɔ ti ɛnyɛ se la anwo?

Bie a ɔbayɛ se kɛ ɛbade ninyɛne bie mɔ mɔɔ Nyamenle ɛyɛ la abo, anzɛɛ ninyɛne mɔɔ yemaa adenle yemaa bɛzi la bahola azi ɛ nwo. Menli dɔɔnwo baha ahile wɔ kɛ Nyamenle ati yɛ se na bɛaha kɛ ɛbua ye ndɛne kɛmɔ bɛyɛ la. Asoo ɛbanyia ɔ nwo adwenle kpalɛ kɔkpula kɛ ɛbade edwɛkɛ ne abo? Mualɛ ne bagyinla kɛzi ɛze Nyamenle kpalɛ la azo. Biza ɛ nwo kɛ, ‘Agɔnwolɛ boni a Nyamenle le maa me a?’

Saa ɛbɛlabɔlɛ ne yɛ se maa wɔ a, bie a ɛbaha kɛ Nyamenle ɛnle agɔnwolɛ kpalɛ fee. Noko dwenle nwolɛ ekyii nea. Nyamenle a ɛmaa ɛbɛlabɔlɛ ɛyɛ se ɛmaa wɔ a anzɛɛ yemaa wɔnyia nyilalɛ ɔ? Kɛmɔ yɛnwu ye la, Seetan a “sie ɛtane ewiade ɛhye” a, tɛ Gyihova ɔ. (Dwɔn 12:31) Yemɔti Seetan a gyi amaneɛnwunlɛ nee nzisi mɔɔ wɔ ewiade ɛhye anu la anzi a. Ɛnlie ɛndo nu kɛ yɛdayɛ mumua ne yɛ sinlidɔlɛ nee esiane mɔɔ yɛ nye ɛnla la a maa yɛyia ngyegyelɛ dɔɔnwo a?

Noko akee, duzu a Nyamenle ɛyɛ a? Tie edwɛkɛ ɛhye mɔɔ Baebolo ne ka la, ɔse Nyamenle a “bɔle anwuma nee aze” a; ɔkile kɛ kɛzi ɔbɔle yɛ ɔmanle ɔyɛle “ɛzulolɛ nee nwanwane” la boka ye gyima ne anwo; na ɔkile kɛ Gyihova a le ‘Nyamenle ne mɔɔ wɔ ngoane wɔ ɔ sa nu la.’ (Edwɛndolɛ 124:8; 139:14; Daneɛle 5:23) Duzu a ɛhye mɔ kɔsɔɔti kile a?

Ɔkile kɛ yɛ Bɔvolɛ ne a ɛmaa yɛ ngoane, na yɛde aze a. (Gyima ne 17:28) Ɔkile kɛ ngoane ahyɛlɛdeɛ ne, ewiade kɛnlɛma ye mɔɔ yɛde nu, ɛlɔlɛ nee agɔnwolɛvalɛ mɔɔ maa yɛ nye die, fɛlɛko mɔɔ yɛte, debie mɔɔ yɛsɔ nu, dede mɔɔ yɛte, nee evuanlɛ mɔɔ yɛte—ɛhye mɔ kɔsɔɔti le ahyɛlɛdeɛ mɔɔ vi Nyamenle ɛkɛ a. (Gyemise 1:17) Ɛnlie ɛndo nu kɛ nyilalɛ ɛhye mɔ maa ɔyɛ Agɔnwolɛ mɔɔ ɔfɛta kɛ yɛbu ye na yɛdie ye yɛdi ɔ?

Nɔhalɛ nu, bie a ɔbayɛ se kɛ ɛbalie Nyamenle wɔali. Bie a ɛte nganeɛ kɛ ɛnze ye kpalɛ yemɔti ɛnrɛhola ɛnrɛlie ye ɛnrɛli. Ndelebɛbo wɔ nu. Wɔ edwɛkɛ nzinrenzinra ɛhye anu, yɛnrɛhola yɛnrɛha deɛmɔti bie mɔ ka kɛ Nyamenle ati yɛ se la amuala anwo edwɛkɛ. Noko asoo nvasoɛ ɛnle zo kɛ ɛbanwu Nyamenle kpalɛ ɔ? * Yɛlɛ anwodozo kɛ saa ɛyɛ zɔ a, ɛbanwu Nyamenle anwo nɔhalɛ ne. Asoo ɔ ti yɛ se? Kyɛkyɛ: “Nyamenle le ɛlɔlɛ.”—1 Dwɔn 4:8.