MƆƆ BIE MƆ KA LA: “Nyamenle a nea ewiade ne azo a, yemɔti ɔdaye a ɔmaa si a, ɛhye kile kɛ ɔ ti yɛ se.”

MƆƆ BAEBOLO NE KA LA: “Ewiade ne amuala la ɛtanevolɛ ne tumi nu.” (1 Dwɔn 5:19, NW) Nwane a le “ɛtanevolɛ ne”? Baebolo ne maa yɛnwu kɛ yemɔ a le Seetan. (Mateyu 13:19; Maake 4:15) Ɔnle zɔ ɔ? Suzu ɛhye anwo nea: Saa Seetan lɛ ewiade ye azo tumi a, ɛnee ɔkola ɔmaa menli yɛ angomedi, anyebolo yɛɛ bɛnzuzu ninyɛne nwo bɛngɔ moa kɛmɔ ɔde la. Asoo ɛhye ɛmmaa yɛnnwu deɛmɔti sonla ɛzɛkye ninyɛne mɔɔ wɔ azɛlɛ ye azo la ɔ? Nwomama dɔɔnwo bɔ kɔkɔ kɛ ninyɛne mɔɔ wɔ azɛlɛ ye azo mɔɔ yɛsɛkye bɛ la boka nwolɛ bie a esiane sisi a, bɛkola bɛmaa ɔsi, bɛkola bɛmaa nuhua yɛ se anzɛɛ bɛkola bɛmaa mɔɔ kɛzi la gyegye alesama.

Ɛnee duzu ati a Nyamenle ɛmaa Seetan ɛnyia tumi kpole zɛhae ɛ? Mualɛ ne bɔ ɔ bo wɔ alesama tetedwɛkɛ nu, mekɛ mɔɔ yɛ awovolɛ mɔɔ lumua la dele atua tiale Nyamenle kɛ ɔnle bɛ Neavolɛ la. Ɔvi zɔhane mekɛ ne mɔɔ ɔba la, alesama dɔɔnwo ɛde atua. Kpɔkɛzilɛ ɛhye—Nyamenle tumililɛ mɔɔ bɛkpole la ɛva alesama ewiade ne ɛwula Nyamenle kpɔvolɛ Seetan asa anu. Yemɔti Gyisɛse vɛlɛle Seetan kɛ “mɔɔ sie ɛtane ewiade ɛhye la.” (Dwɔn 14:30) Asoo Seetan bali tumi dahuu? Kyɛkyɛ!

Gyihova * ɛmbu ɔ nye ɛngua amaneɛnwunlɛ mɔɔ Seetan fa ba la azo. Nɔhalɛ nu, Nyamenle di alesama amaneɛnwunlɛ nwo nyane. Kɛ neazo la, mekɛ mɔɔ amaneɛnwunlɛ dole Yizilayɛ maanle ne la, Baebolo ne ka Nyamenle anwo edwɛkɛ kɛ: “Bɛ nyanelilɛ kɔsɔɔti yɛle ye nyanelilɛ.” (Ayezaya 63:9) Nyamenle vi anwunvɔnezelɛ nu ɛyɛ ngyehyɛleɛ kɛ ɔnrɛhyɛ ɔbazɛkye Seetan atisesebɛ tumililɛ ne bɔkɔɔ! Yekpa ɔ Ra, Gyisɛse Kelaese kɛ ɔva pɛlepɛle nee tenleneyɛlɛ ɔli Belemgbunli dahuu.

KƐZI ƆFANE Ɛ NWO LA: Ɔwɔ nuhua kɛ Seetan tumililɛ ne angola ambɔ menli nwo bane anvi esiane nwo ɛdeɛ, noko Gyisɛse tumililɛ ne bayɛ zɔ. Mekɛ bie, Gyisɛse bɔle ye ɛdoavolɛma anwo bane vile ahumu kpole bie mɔɔ dule la anwo. Baebolo ne ka kɛ: “Ɔdeanle ahumu ne nu na ɔzele azɛlɛkye ne mɔ kɛ, ‘Bɛgua diinyi!’ Ɛkɛ ne ala ahumu ne gyakyile ɛdulɛ na maanle nu gyinlanle diinyi.” Ɛdoavolɛma ne hanle kɛ: “Duzu sonla bɔbɔ a le ɛhye, mɔɔ anwoma nee nyevile tie ye a?” (Maake 4:37-41) Edwɛkɛ ɛhye maa yɛnyia anwodozo kɛ Gyisɛse babɔ alesama kɔsɔɔti mɔɔ yɛ tieyɛ la anwo bane wɔ ye tumililɛ ne abo kɛ Belemgbunli la.—Daneɛle 7:13, 14.