Ɛtanevolɛ ne mɔɔ yɛkola yɛsukoa debie yɛfi ye ɛkɛ la a ɛnwu kɛ Gyisɛse nee ye ɛlɛtendɛ wɔ nvoninli ne anu la. Ɛtanevolɛ ne ɛlɛdi nyane wɔ ye ɛtane nwo. Ɔhanle ɔhilele Gyisɛse kɛ: “Saa ɛdi wɔ belemgbunli ne a kakye me.” Kɛmɔ ɛnwu ye wɔ nvoninli ne anu la, Gyisɛse nee ɛtanevolɛ ne ɛlɛtendɛ. Ɛze mɔɔ Gyisɛse ɛlɛka ahile ye la ɔ?— * Gyisɛse ɛlɛbɔ ye ɛwɔkɛ kɛ: ‘Meka meahile wɔ ɛnɛ kɛ, me nee wɔ bahɔ Paladaese.’

Kɛzi ɛsuzu kɛ zɔhane Paladaese ne bayɛ ɛ?— Amaa yɛahola yɛabua ye kpalɛ la, bɛmaa yɛha Paladaese ne mɔɔ Nyamenle yɛle manle nrenya nee raalɛ mɔɔ lumua, Adam nee Yive la anwo edwɛkɛ. Ɛnee zɔhane Paladaese ne wɔ ni? Ɛnee ɔwɔ anwuma anzɛɛ azɛlɛ ye azo?—

Saa ɛka kɛ ɛnee ɔwɔ azɛlɛ ye azo a ɔle zɔ. Yemɔti saa yɛdwenle kɛ ɛtanevolɛ ne bahɔ “Paladaese” a, ɔwɔ kɛ yɛnwu ye kɛ ɔbadɛnla azɛlɛ ye azo wɔ mekɛ mɔɔ ɔbayɛ paladaese la. Kɛzi zɔhane Paladaese ne bayɛ ɛ?— Maa yɛnlea.

Mekɛ mɔɔ Gyihova Nyamenle bɔle menli nwiɔ ne mɔɔ lumua, Adam nee Yive la, Baebolo ne ka kɛ ɔmanle bɛdɛnlanle paladaese nu wɔ azɛlɛ ye azo. Ɛnee bɛfɛlɛ ye “Yidɛn tola ne.” Ɛbahola wɔayɛ kɛzi ɛnee “Yidɛn tola ne” le kɛnlɛma la anwo nvoninli ɔ?— Nɔhalɛ nu, ɛnee ɔle ɛleka kɛnlɛma ɔtɛla ɛleka biala mɔɔ awie banwu ye ɛnɛ la!

Kɛzi ɛdwenle nwo ɛ? Asoo Gyisɛse nee ɛtanevolɛ ne mɔɔ lile nyane wɔ ye ɛtane nwo la badɛnla azɛlɛ ye azo?— Kyɛkyɛ, zɔhane mekɛ ne ɛnee Gyisɛse wɔ anwuma na ɔlɛdi tumi kɛ Belemgbunli wɔ azɛlɛ ye azo Paladaese ne anu. Yemɔti ɛtanevolɛ ne nee Gyisɛse bahɔ Paladaese ɔluakɛ ɔbadwazo ye yeavi ewule nu na yeanlea kɛ ɔ sa baha mɔɔ ɔhyia la wɔ azɛlɛ ye azo Paladaese ne anu. Na duzu  ati a Gyisɛse bamaa awie mɔɔ ɛnee le ɛtanevolɛ la adɛnla Paladaese ɛ?— Maa yɛha ɛhye anwo edwɛkɛ.

Ɔle nɔhalɛ kɛ ɛtanevolɛ ne yɛle ninyɛndane. Na zɔhane ala a menli mgbe mgbe mɔɔ bɛdɛnla azɛlɛ ye azo la ɛyɛ a. Noko akee bɛ nuhua dɔɔnwo yɛle ninyɛndane ɔluakɛ bɛanzukoa Gyihova anwo debie na bɛanwu mɔɔ ɔkulo kɛ bɛyɛ la ati.

Yemɔti bɛbadwazo menli zɛhae mɔ nee ɛtanevolɛ ne mɔɔ Gyisɛse nee ye dendɛle wɔ baka ne azo la bɛara Paladaese ne anu wɔ azɛlɛ ye azo. Bɛbahilehile bɛ bɛamaa bɛanwu Nyamenle ɛhulolɛdeɛ. Akee bɛbanyia adenle bɛahile kɛ bɛkulo Gyihova.

Asoo ɛze mɔɔ bɛbayɛ bɛava bɛahile zɔ la?— Saa bɛyɛ mɔɔ Nyamenle kpondɛ kɛ bɛyɛ la a. Nea kɛzi ɔbayɛ anyelielɛ kɛ yɛbadɛnla Paladaese na dahuu yɛ nee menli mɔɔ kulo Gyihova nee bɛ nwo la adɛnla a!