Awie ɛyɛ nyeyenu ɛhile wɔ ɛlɛ ɔ? Asoo wɔbiza debie noko ɛ sa anga ye, bɛanyɛ debie bɛammaa wɔ, anzɛɛ bɛanli wɔ eni ɔluakɛ kɛzi ɛ nwo nane de, aneɛ mɔɔ ɛka anzɛɛ gyinlabelɛ mɔɔ ɛlɛ la ati? Saa bie ɛdo wɔ ɛlɛ a ɛnee tɛ ɛ ngomekye ɔ. Noko akee, edwɛkɛ mɔɔ yɛ anyelielɛ la ɛne: Anyiemgba zɛhae mɔ ɛbu wɔ azɛlɛ ye azo ɛdeɛ, noko bie ɛnle anwuma. Keleseɛne ɛzoanvolɛ Pita hanle ye wienyi kɛ, “Nyamenle bu menli kɔsɔɔti kɛ bɛsɛ.”—Kenga Gyima ne 10:34, 35.

Pita hanle edwɛkɛ ɛhye wɔ ɛleka bie mɔɔ ɔnda ɔnyɛ zɔ la—Kɔnileɛse mɔɔ ɔnle Dwuunli la sua nu. Dwuunli Pita dɛnlanle aze wɔ mekɛ mɔɔ ɛnee Dwuuma bu menli mɔɔ bɛnle Dwuuma la kɛ bɛ nwo ɛnde na bɛ nee bɛ ɛndu wɔ adenle biala azo la. Yemɔti, duzu ati a Pita hɔle Kɔnileɛse sua nu a? Yɛka ye sikalɛ a, Gyihova Nyamenle a hyehyɛle kɛ bɛyia ɛkɛ a. Pita nyianle ɛnyelɛzodeɛnwunlɛ na bɛhanle bɛhilele ye wɔ nu kɛ: “Debie mɔɔ Nyamenle ɛde nwolɛ la mmaka kɛ nwolɛ ɛnde.” Ɛnee Pita ɛnze kɛ Kɔnileɛse ɛlumua ɛnwu ɛnyelɛzodeɛnwunlɛ, na anwumabɔvolɛ ɛha ɛhile ye kɛ ɔmaa bɛhɔvɛlɛ Pita. (Gyima ne 10:1-15) Mekɛ mɔɔ Pita nwunle kɛ Gyihova a ɛmaa yera ye zɔ la, yeanyɛ koonwu na ɔdendɛle.

Pita hanle kɛ: “Nɔhalɛ, menwu ye wienyi kɛ Nyamenle bu menli kɔsɔɔti kɛ bɛsɛ.” (Gyima ne 10:34) Giliki edwɛkɛkpɔkɛ mɔɔ bɛhile ɔ bo kɛ “bɛsɛ” la ɛnee kile “sonla nyunlu mɔɔ bɛnea.” (The Kingdom Interlinear Translation of the Greek Scriptures) Nwomanli ko kilehile edwɛkɛkpɔkɛ ɛhye anu kɛ: “Ɔkile ndɛnebuavolɛ mɔɔ nea sonla nyunlu na ɔbua ye ndɛne, tɛ ye edwɛkɛ ne anwo ɔ, na kɛmɔ ɔkulo ahenle anzɛɛ ɔngulo ye edwɛkɛ la ati ɔ.” Nyamenle ɛnnea awie anyunlu na ɔngulo bie ɔndɛla bie ɔluakɛ asolo bɛ nwo nane, maanle mɔɔ bɛvi nu, bɛ gyinlabelɛ anzɛɛ ninyɛne bie mɔ ati.

Emomu, Gyihova nwu mɔɔ wɔ yɛ ahonle nu la. (1 Samoɛle 16:7; Mrɛlɛbulɛ 21:2) Pita doale zo hanle kɛ: “Awie biala mɔɔ sulo ye na ɔdi boɛ la ɔdie ye ɔto nu, yɛɛ ɔnnea ɛleka mɔɔ ɔvi nee maanle holɛ ko mɔɔ ɔvi nu la.” (Gyima ne 10:35) Saa yɛsulo Nyamenle a ɔkile kɛ yɛbu ye, yɛdi ye eni, yɛdie ye yɛdi, na yɛgyakyi debie biala mɔɔ ɛnzɔ ɔ nye la. Yɛdi boɛ, kile kɛ yɛfi yɛ ɛhulolɛ nu yɛyɛ mɔɔ tenrɛ wɔ Nyamenle anye zo la. Gyihova anye die sonla mɔɔ ɛzulolɛ ka ye maa ɔfi ahonle nu ɔyɛ mɔɔ tenrɛ la.—Mɛla ne 10:12, 13.

Saa bɛyɛ nyeyenu bɛhile wɔ anzɛɛ bɛnyia ɛ nwo adwenletane a, ɔwɔ kɛ Pita edwɛkɛ ne mɔɔ ɔhanle ye wɔ Nyamenle anwo la kyekye ɛ rɛle. Gyihova ɛlɛtwe maanle kɔsɔɔti anu menli ahɔ nɔhalɛ ɛzonlenlɛ nu. (Dwɔn 6:44; Gyima ne 17:26, 27) Ɔtie ye azonvolɛ asɔneyɛlɛ na ɔdi nwolɛ gyima ɔnva nwo kɛzi bɛ nwo nane de, maanle mɔɔ bɛvi nu anzɛɛ bɛ gyinlabelɛ. (1 Arelemgbunli 8:41-43) Yɛbahola yɛanyia anwodozo kɛ saa Gyihova vi anwuma nehane nea azɛlɛ ye azo a, ɔnwu menli ko ne ala—alesama abusua ne. Ɛhye ɛha wɔ ɛmaa wɔnyia ɛhulolɛ kɛ ɛbazukoa Nyamenle ɛhye mɔɔ bu menli kɔsɔɔti kɛ bɛsɛ la anwo ninyɛne dɔɔnwo ɔ?