Herman nee Linda anye die kɛ bɛnwunle bɛ nwo la. Linda, mɔɔ nee ɔ hu dɛba ne bɛbɔ ewole la bɔbɔ fɛlɛ Herman kɛ ye “ɛlɔlɛ nzule.” Noko, bɛdie bɛto nu kɛ agyalɛ bieko fa ngyegyelɛ mɔɔ ɛnee ɔnle dɛba ne anu la ba. *

Saa wɔgya bieko a, kɛzi ɛte nganeɛ wɔ agyalɛ bieko mɔɔ wɔhɔ la anwo ɛ? Yelɛ bie mɔɔ bɛfɛlɛ ye Tamara, mɔɔ ɔbɔle ewole na ɔgyale bieko wɔ ɛvolɛ nsa anzi la ka kɛ: “Mekɛ mɔɔ lumua mɔɔ ɛbahɔ agyalɛ la, ɛte nganeɛ titile kɛ wɔ agyalɛ ne badɛnla ɛkɛ dahuu. Noko saa ɛgya bieko a, ɛngola ɛnde nganeɛ zɔhane, ɔluakɛ dahuu ɛze kɛ ɛbɔle ewole wɔ wɔ agyalɛ mɔɔ lumua la anu.”

Noko akee, agyalɛma dɔɔnwo anye ɛlie kpalɛ wɔ mekɛ mɔɔ bɛgyale bieko la. Bɛmanle bɛ agyalɛ ne yɛle anyelielɛ—na ɛdawɔ noko ɛbahola wɔayɛ zɔ! Adenle boni azo? Suzu ngyegyelɛ nsa nee kɛzi Baebolo  ngyinlazo bahola aboa wɔ yeamaa wɔagyinla ɔ nloa la anwo. *

Ellen mɔɔ wɔ South Africa la ka kɛ, “Saa yɛkɔdie yɛ menle wɔ ɛleka mɔɔ me nee me hu dɛba ne hɔle la a, ɔmmaa me rɛle ɛnvi me agyalɛ ne mɔɔ lumua la. Ɔyɛ a, ɔmaa mefa me hu dɛba ne metoto fofolɛ ne anwo.” Noko, saa wɔ bokavolɛ ne ɛgya ɛlɛ, na ɔta ɔka nwolɛ edwɛkɛ a ɔnyɛ ahunlundwolɛ.

NZUZULƐ: Die to nu kɛ ɔnla aze kɛ ɛdawɔ anzɛɛ wɔ bokavolɛ ne arɛle bavi agyalɛ dɛba mɔɔ ɔhɔle la, titile saa ɔhyɛle kpalɛ a. Nɔhalɛ nu, bie mɔ ɛlie ɛdo nu kɛ bɛ rɛle ɛvi, bɛva bɛ bokavolɛ dɛba ne duma bɛvɛlɛ bɛ ye anzɛɛ bɛ hu! Kɛ ɔkɛyɛ na wɔali edwɛkɛ zɛhae anzɛɛ mɔɔ nee ye le ko la anwo gyima ɛ? Baebolo ne tu folɛ kɛ, “Awie biala ɛde ɔ gɔnwo edwɛkɛ bo.”—1 Pita 3:8, New Century Version.

Mmamaa ɔyɛ wɔ nyane kɛ ɛkɛde agyalɛ dɛba ne anwo edwɛkɛ biala. Saa wɔ bokavolɛ ne te nganeɛ kɛ ɔwɔ kɛ ɔka kɛzi ɔ nee ɔ hu anzɛɛ ɔ ye dɛba ne dɛnlanle la anwo edwɛkɛ a, fi atiakunlukɛnlɛma nee anwunvɔnezelɛ nu tie. Eza mmaka kɛ ɔlɛfa wɔ yeatoto ye bokavolɛ dɛba ne anwo. Ian, mɔɔ gyale bieko wɔ ɛvolɛ bulu mɔɔ ɛze ɛhɔ la ka kɛ, “Me ye Kaitlyn ambu me ye mɔɔ ɛwu la anwo edwɛkɛ mɔɔ meka la kɛ ɔle kyibadeɛ. Emomu, ɔbule ye kɛ ɔle adenle mɔɔ bamaa yeanwu mɔɔ ɛmaa ɛnɛ meyɛ zɛhae la.” Ɛbanwu ye bɔbɔ kɛ adwelielilɛ zɛhae baboa yeamaa ɛ nee wɔ bokavolɛ fofolɛ ne anyia agɔnwolɛvalɛ kpalɛ.

Fa wɔ adwenle sie wɔ bokavolɛ fofolɛ ne subane kpalɛ ne azo. Nɔhalɛ nu, bie a wɔ bokavolɛ ne ɛnlɛ subane anzɛɛ ɛmbɔ mɔdenle kɛ wɔ bokavolɛ dɛba ne la. Noko bie a wɔ bokavolɛ fofolɛ ne yɛ deɛ wɔ ɛleka gyɛne. Ɛhye ati, maa wɔ agyalɛ fofolɛ ne anu ɛzɔ ‘mmafa ɛtoto awie anwo,’ emomu, dwenledwenle mɔɔ bamaa ɛ nye alie wɔ bokavolɛ ne anwo la anwo. (Galeehyeama 6:4) Nrenya bie mɔɔ bɛfɛlɛ ye Edmond, mɔɔ ɛgya fane nwiɔ la hanle ye zɛhae, “Kɛmɔ agɔnwolɛma nwiɔ ɛnle sonla ko ne ala la, zɔhane ala a agyalɛ nwiɔ ne ɛnle agyalɛ ko ne ala a.”

Kɛ ɔkɛyɛ na wɔammaa anyelielɛ mɔɔ ɛnee wɔ wɔ agyalɛ dɛba ne anu la anzɛkye asetɛnla mɔɔ ɛ nee wɔ bokavolɛ fofolɛ ne wɔ nu la ɛ? Jared ka kɛ: “Kenle ko bie menganle mengilele me ye kɛ ɛnee me agyalɛ dɛba ne le kɛ buluku kɛnlɛma bie mɔɔ me nee me ye dɛba ne yɛhɛlɛle a. Ɔvi mekɛ mɔɔ kɔ mekɛ la, mebabuke zɔhane buluku ne anu, meagenga na meadwenledwenle yɛ anwubielɛ kɛnlɛma ne anwo. Noko mende buluku zɔhane anu. Emomu, me nee me ye yɛlɛbɔ nu yɛahɛlɛ yɛ buluku ɛdeɛ na yemɔ anu a mede ye anyelielɛ nu kɛkala a.”

Javier, mɔɔ bɔle ewole na ɔgyale ɛvolɛ nsia anzi la ka kɛ, “Yɛgyale la anzi mekɛ bie, ɛnee me ye te nganeɛ kɛ me gɔnwo mɔ bie ɛlɛgua bɛ nye aze anlea ye.” Mɔɔ dole kunli bie mɔɔ bɛfɛlɛ ye Leo la le ngakyile. Ɔka kɛ, “Menli bie hanle hilele me ye kɛ bɛkulo ɔ hu dɛba ne edwɛkɛ kpole yɛɛ bɛ nwo ɛlɛdɔ ye wɔ me nyunlu ɛkɛ ne!”

NZUZULƐ: Bɔ mɔdenle kɛ ɛbade ɛ gɔnwo ne edwɛkɛ bo. Ian, mɔɔ yɛlumua yɛha ɔ nwo edwɛkɛ la ka kɛ, “Mesuzu kɛ ɔyɛ a agɔnwolɛ bie mɔ di nwolɛ nyane na ɔyɛ se ɔmaa bɛ kɛ bɛ nee awie mɔɔ ɔmboka agyalɛma mɔɔ ɛnee bɛze bɛ la kɛdu.” Yemɔti, nyia ‘ndelebɛbo, na di awie biala eni.’ (Taetɛse 3:2) Maa agɔnwolɛma nee abusua ne mekɛ maa bɛyɛ nzenzaleɛ. Kɛmɔ wɔ agyalɛ ne ɛhakyi la ati, zɔhane ala a wɔ agɔnwolɛ noko bahakyi a. Javier, mɔɔ yɛha ɔ nwo edwɛkɛ la ka kɛ, mekɛ hɔle bie la, ɔ nee ɔ ye nee ɔ gɔnwo mɔ dɛba ziale bɔle nu bieko. Ɔtoa zo kɛ, “Noko kɛ agyalɛma la, yɛbɔ mɔdenle kɛ yɛbanyia agɔnwolɛ fofolɛ na ɛhye noko boa yɛ kpalɛ.”

Saa ɛ nee agɔnwolɛma dɛba yia na bɛlɛdielie bɛ nye a suzu wɔ bokavolɛ ne nganeɛdelɛ nwo.  Kɛ neazo la, saa bɛlɛka wɔ agyalɛ dɛba ne anwo edwɛkɛ a, dua nrɛlɛbɛ adenle zo ka nwolɛ edwɛkɛ amaa wɔ bokavolɛ fofolɛ ne ande nganeɛ kɛ bɛye ye bɛvi nu. Baebolo mrɛlɛbulɛ bie ka kɛ, “Saa awie ka edwɛkɛ na yeandwenle nwolɛ a, ɔwowɔ ɔtɛla dadeɛ, noko nrɛlɛbɛvolɛ nea ye edwɛkɛ boɛ. Ye edwɛkɛ le ayile.”—Mrɛlɛbulɛ 12:18, Holy Bible—Easy-to-Read Version.

Andrew, mɔɔ ɔ ye dɛba ne gyakyile ye la ka kɛ, “Ɔyɛ a mesulo kɛ bɛbagyakyi me bieko.” Amozii, ɔgyale Riley mɔɔ kɛkala ɔ nee ye de la. Ɔse, “Meta medwenle nwo kɛ saa mebahola meayɛ kɛ Riley ahu dɛba ne la a. Ɔyɛ bɔbɔ a medwenle nwolɛ kɛ ɔbaha kɛ menyɛ ɛdeɛ na yeagyakyi me yeahɔva awie fofolɛ.”

NZUZULƐ: Maa wɔ bokavolɛ ne ɛnwu kɛzi ɛte nganeɛ la. Baebolo ne ka kɛ, “Adwenle ngyehyɛlɛ mɔɔ folɛdulɛ ɛnle nwo la kyea.” (Mrɛlɛbulɛ 15:22) Edwɛkɛ mɔɔ bɛ mu nwiɔ bɛzuzule nwolɛ la boale Andrew nee Riley manle bɛliele bɛ nwo bɛlile. Andrew ka kɛ, “Menganle mengilele Riley kɛ ngyegyelɛ bie ba a menrɛha kɛ mebɔ ewole na me nwo adɔ me, na Riley hanle edwɛkɛ ko ne ala bie. Ngyikyingyikyi, akee menliele ye menlile bɔkɔɔ.”

Saa bokavolɛ mɔɔ lumua la anli nɔhalɛ ammaa wɔ bokavolɛ mɔɔ ɛ nee ye de kɛkala wɔ agyalɛ mɔɔ lumua mɔɔ ɔhɔle la anu a, bɔ mɔdenle maa ɔlie wɔ ɔli. Kɛ neazo la, Michel nee Sabine, mɔɔ bɛbɔle ewole wɔ bɛ agyalɛ dɛba ne anu la bɔle kpɔkɛ kɛ saa bɛ nee bɛ bokavolɛ dɛba ne di adwelie a, bɛbaha bɛahile bɛ nwo. Sabine ka kɛ, “Nɔhalɛlilɛ ɛhye maa yɛte nganeɛ kɛ yɛlɛ banebɔlɛ kpalɛ.”—Ɛfɛsɛsema 4:25.

Agyalɛ bieko dɔɔnwo ɛli munli, na wɔ ɛdeɛ ne noko bahola ayɛ zɔ. Ye biala anu, ɛfa ɛtoto mekɛ mɔɔ ɛlumuale ɛgyale la anwo a, ɛze ɛ nwo kpalɛ. Andrew mɔɔ yɛlumua yɛha ɔ nwo edwɛkɛ la ka kɛ, “Riley mɔɔ megya ye la ɛmaa me rɛle ɛkyekye kpalɛ. Ɛvolɛ 13 mɔɔ yɛgya la anu, yɛ agɔnwolɛvalɛ ne anu ɛmia kpalɛ—yɛngulo kɛ ɔbazɛkye fee.”