Asoo Gyihova dwenle yɛ nwo amgba, anzɛɛ ɔndwenle alesama mɔɔ wɔ azɛlɛ ye azo la ngyegyelɛ nwo? Kɛzi Baebolo ne bua zɔhane kpuyia ne la kyekye yɛ rɛle. Nyamenle amgba dwenle alesama abusua ne anwo, na ɔkpondɛ kɛ yɛ nye die wɔ ɛbɛlabɔlɛ nu. Alehyenlɛ biala ɔmaa alesama—bɔbɔ bɛdabɛ mɔɔ bɛnze ayɛlɛ la—nyia ye kpalɛyɛlɛ dɔɔnwo ne azo nvasoɛ. Suzu ɛzoanvolɛ Pɔɔlo edwɛkɛ ne anwo nea.—Kenga Gyima ne 14:16, 17.

Mekɛ mɔɔ Pɔɔlo ɛlɛtendɛ ahile menli mɔɔ bɛnzonle Nyamenle mɔɔ bɛwɔ suakpole Lesetela azo la, ɔhanle kɛ: “Mɔmoane ɔmanle menli muala adenle ɔmanle bɛyɛle mɔɔ bɛdabɛ bɛkulo la. Noko dahuu ɔdua ye ninyɛne kpalɛ mɔɔ ɔyɛ la azo ɔkile ɔ nwo ɔkile bɛ: ɔmaa bɛ ezule, yɛɛ ɛbuhenle ne dwu a ɔmaa bɛ aleɛ na ɔmaa bɛ nye die.” Kɛzi menli mɔɔ diele Pɔɔlo la dele edwɛkɛ ɛhye abo ɛ?

Menli mɔɔ wɔ Lesetela la dele kɛzi Pɔɔlo edwɛkɛ ne le nɔhalɛ la abo ndɛndɛ. Ɛnee bɛyɛ ɛbɔ nu gyima na bɛde azɛlɛ mɔɔ kye aleɛ na nzule wɔ zolɛ la azo. Noko, kɛmɔ Pɔɔlo hakyele bɛ la, Nyamenle a ezule ne nee ɛlobɔ kpalɛ ne Vi ye ɛkɛ a. Yemɔti, mekɛ biala mɔɔ bɛkɛnyia ma dɔɔnwo na bɛkɛli aleɛ fɛlɛko la, ɛnee bɛlɛnyia Nyamenle kpalɛyɛlɛ ne azo nvasoɛ.

Edwɛkɛ mɔɔ Pɔɔlo hanle hilele Lesetelama la maa yɛsukoa Gyihova Nyamenle anwo ninyɛne dɔɔnwo mɔɔ hyia la.

Gyihova maa yɛkpa mɔɔ yɛkulo la. Yɛ ye nzonlɛ kɛ Gyihova manle menli muala adenle manle “bɛyɛle mɔɔ bɛdabɛ bɛkulo la.” Buluku bie mɔɔ menli mɔɔ kile Baebolo ne abo nea nu la ka kɛ edwɛkɛ ɛhye kola kile kɛ “bɛyɛle mɔɔ sɔ bɛ nye la” anzɛɛ “bɛyɛle mɔɔ bɛsuzu kɛ ɔle kpalɛ la.” Gyihova ɛnyɛ ye kyengye kɛ awie biala ɛzonle ye. Ɔmaa yɛ adenle ɔmaa yɛkpa mɔɔ yɛkulo—yɛkola yɛkile mɔɔ yɛbayɛ la.—Mɛla ne 30:19.

Gyihova kpondɛ kɛ yɛnwu ye. Pɔɔlo hanle kɛ, “ɔkile ɔ nwo ɔkile” bɛ. Buluku ne mɔɔ yɛlumua yɛha nwolɛ edwɛkɛ la ka kɛ ɛdendɛfoa ɛhye kola kile kɛ “yemaa menli ɛnwu Nyamenle holɛ ko mɔɔ ɔde la wienyi.” Nyamenle abɔdeɛ maa bɛnwu ye “su kpalɛ ne mɔɔ yɛ nye ɛnnwu ye,” mɔɔ bie a le ye kpalɛyɛlɛ, ye nrɛlɛbɛ, ye tumi nee ye ɛlɔlɛ ne la. (Wulomuma 1:20) Gyihova ɛla ɔ nwo ali fane dɔɔnwo wɔ Baebolo ne anu. (2 Temɔte 3:16, 17) Asoo ɛhye ɛmmaa ɔnla ali wienyi kɛ ɔkpondɛ kɛ yɛnwu ye?

Gyihova kpondɛ kɛ yɛ nye die. Pɔɔlo hanle kɛ, ɔmaa yɛ ‘aleɛ na ɔmaa yɛ nye die.’ Ɛtanevolɛ bɔbɔ mɔɔ ɔnlie ɔnli kɛ Gyihova wɔ ɛkɛ la di aleɛ maa ɔ ko yi na ɔ nye die wɔ ɛbɛlabɔlɛ nu. Noko akee, Nyamenle kpondɛ kɛ dahuu yɛ nye die kpalɛ. Ɛhye bahola ayɛ zɔ a kyesɛ yɛsukoa ɔ nwo nɔhalɛ ne na yɛfa yɛbɔ yɛ ɛbɛla.—Edwɛndolɛ 144:15; Mateyu 5:3.

Yɛ kɔsɔɔti yɛnyia Gyihova kpalɛyɛlɛ ne azo nvasoɛ alehyenlɛ biala. Duzu ati a ɛnzukoa kɛzi ɛbahola wɔanyia anyezɔlɛ wɔamaa Nyamenle ne mɔɔ maa wɔ ‘aleɛ na ɔmaa ɛ nye die’ la anwo debie dɔɔnwo a?